12-تەتقىق ماقالىسى
54-ناخشا ئىماندا چىڭ تۇرايلى!
ئىمان-ئېتىقادقا تايىنىپ ياشاڭ
«بىز كۆز بىلەن كۆرگىنىمىزگە ئەمەس، بەلكى ئىمان-ئېتىقادىمىزغا تايىنىپ بىلەن ياشايمىز».—2-كورىنت. 5:7.
مەركىزى ئىدىيە
مۇھىم قارارلارنى چىقارغاندا ئۆزىمىزگە ئەمەس، يەھۋا خۇداغا تايىنىدىغانلىقىمىزنى قانداق كۆرسىتەلەيمىز؟
1. نېمە ئۈچۈن ئەلچى پاۋلۇس ئارقىسىغا قارىغاندا، ھاياتىدىن قانائەت ھېس قىلغان؟
ئەلچى پاۋلۇس پات-ئارىدا ئۆزىنىڭ ئۆلۈمگە ھۆكۈم قىلىنىدىغانلىقىنى بىلگەن. لېكىن، ئۇ ئارقىسىغا قاراپ باققىنىدا، ھاياتىدىن قانائەت ھېس قىلغان. شۇڭا، ئۇ: «مۇسابىقىنى يۈگۈرۈپ تاماملىدىم، ئېتىقادىمنى ساقلاپ قالدىم»،— دېگەن ئىدى (2-تىموت. 4:6–8). پاۋلۇس ھاياتىنى يەھۋاغا خىزمەت قىلىشقا بېغىشلاپ دانا قارار چىقارغان. شۇڭا، ئۇ خۇدانىڭ ئۇنىڭدىن رازى ئىكەنلىكىنى بىلگەن. بىزمۇ توغرا قارارلارنى چىقىرىپ، يەھۋانىڭ يۈرىكىنى خۇشال قىلىشنى خالايمىز. ئۇنداقتا، بىز بۇنى قانداق قىلالايمىز؟
2. ئىمان-ئېتىقادقا تايىنىپ ياشاش نېمىنى بىلدۈرىدۇ؟
2 پاۋلۇس ئۆز خېتىدە مۇنداق يازغان: «بىز كۆز بىلەن كۆرگىنىمىزگە ئەمەس، بەلكى ئىمان-ئېتىقادىمىزغا تايىنىپ ياشايمىز» (2-كورىنت. 5:7). ئۇ نېمە دېمەكچى بولغان؟ كۆرگەنلىرى بويىچە ياشاۋاتقان ئىنسان پەقەت كۆزى كۆرگەن، قۇلىقى ئاڭلىغان ياكى ئۆزى ھېس قىلغانغا ئاساسەن قارار چىقىرىدۇ. ئەكسىچە، ئېتىقادقا تايىنىپ ياشاۋاتقان ئىنسان يەھۋاغا بولغان ئىمان-ئېتىقادىغا ئاساسەن قارار چىقىرىدۇ. ئۇ پەقەت يەھۋانىڭ يوليورۇقى بويىچە مېڭىپ، ھازىر ياخشىراق ھايات كەچۈرۈپ قالماي، كېلەچەكتە يەھۋانىڭ تېخىمۇ كۆپ بەرىكەتلەرگە ئېرىشتۈرىدىغانلىقىغا ئىشىنىدىغانلىقىنى ئۆز ئىش-ھەرىكەتلىرىدە ئىپادىلەيدۇ.—زەبۇر 119:66؛ ئىبرانىي. 11:6.
3. ئىمان-ئېتىقاد بىلەن ياشىساق، قانداق بەرىكەتلەرگە ئېرىشىمىز؟ (2-كورىنتلىقلار 4:18)
3 ئەلۋەتتە، بەزىدە كۆرگەن، ئاڭلىغان ۋە ھېس قىلغانلىرىمىزغا ئاساسەن قارار چىقىرىمىز. لېكىن، مۇھىم قارارنى چىقارغاندا، پەقەت كۆرگەن ياكى ئاڭلىغانغا ئاساسەن قارار چىقارساق، خاتالىقلارنى سادىر قىلىپ قويۇشىمىز مۇمكىن. چۈنكى، كۆزگە كۆرۈنىدىغان نەرسىلەر بەزىدە بىزنى ئازدۇرۇپ قويىدۇ. تېخىمۇ خەتەرلىك يېرى، ئەگەر كۆرگىنىمىزگە ئاساسەن قارار چىقارساق، ئاخىرىغا بارغاندا، يەھۋانىڭ كۆڭلىنى رەنجىتىپ قويىشىمىز مۇمكىن (ۋەز 11:9؛ مەتتا 24:37–39). ئەمما، ئىمان-ئېتىقادىمىز بىلەن ياشىساق، «رەببىمىز نېمىنى قوبۇل قىلىدىغانلىقىغا» كۆز يەتكۈزگەن ئاساستا، ئۇنى خۇرسەن قىلىدىغان قارارلارنى چىقىرىمىز (ئەفەس. 5:10). خۇدانىڭ يوليورۇقىغا بويسۇنساق، كۆڭلىمىز تىنچ-خاتىرجەملىك تېپىپ، ھەقىقىي خۇشال-خۇراملىققا ئېرىشىمىز (زەبۇر 16:8، 9؛ يەشايا 48:17، 18). ئەگەر داۋاملىق ئېتىقاد بىلەن ياشىساق، كېلەچەكتە مەڭگۈ ياشايمىز.—2-كورىنتلىقلار 4:18-نى ئوقۇڭ.
4. بىر كىشىنىڭ ئىمان-ئېتىقادقا تايىنىپ ياشىغان-ياشىغانلىقىنى قەيەردىن بىلەلەيمىز؟
4 كۆزىمىز كۆرگەنگە ئەمەس، ئىمان-ئېتىقادقا تايىنىپ ياشاۋاتقانلىقىمىزنى قەيەردىن بىلىمىز؟ بۇنىڭ ئۈچۈن، ئۆز-ئۆزىمىزدىن مۇنداق سورىشىمىز كېرەك: «مەن نېمىگە ئاساسەن قارارلارنى چىقىرىمەن؟ كۆزۈم كۆرگەنگە ئاساسەنمۇ ياكى يەھۋاغا ئىشىنىپ، ئۇنىڭ نەسىھەتلىرىگە ئاساسەنمۇ؟» ئىش ئورنى تاللىغاندا؛ ئۆمۈرلۈك جۈپتىمىزنى تاللىغاندا؛ خۇدانىڭ تەشكىلاتى كۆرسەتمىلەرنى بەرگەندە، كۆزىمىز بىلەن كۆرگىنىمىزگە ئەمەس، بەلكى ئىمان-ئېتىقادىمىزغا تايىنىپ ياخشى قارار چىقىرىش ئۈچۈن نېمىلەرنى نەزەرگە ئېلىشىمىز كېرەكلىكىنى كۆرۈپ چىقايلى.
ئىش ئورنى تاللىغاندا
5. ئىش ئورنى تاللىغاندا، نېمىنى نەزەردە تۇتۇشىمىز كېرەك؟
5 ھەممىمىز ئۆزىمىز ۋە ئائىلىمىزدىكىلەرنىڭ قىينىلىپ قالماي، ياخشى ھايات كەچۈرۈشىنى خالايمىز (ۋەز 7:12؛ 1-تىموت. 5:8). بەزى ئىشلاردا يۇقىرى مائاش ئالىسىز. يۇقىرى مائاش كۈندىلىك خىراجەتلەرگە يىتىپ قالماي، ھەتتا ئازراق پۇل يىغىشقا ياردەم بېرىدۇ. يەنە بەزى ئىشلارنى قىلىپ، تاپقان پۇل زۆرۈر تۇرمۇش لازىمەتلىرىكلىرىگە ئاران-ئاران يەتكۈزىدۇ. شۇڭا، بىر ئىشقا كىرىشتىن ئاۋۋال، قانچىلىك مۇئاش بېرىدىغانلىقىنى سورايمىز. لېكىن، بىز پەقەت بۇ توغرۇلۇق ئويلانساق، بۇ ئىمان-ئېتىقادقا تايىنىپ ئەمەس، كۆز بىلەن كۆرگىنىمىزگە ئاساسەن ياشايدىغانلىقىمىزنى كۆرسىتىدۇ.
6. ئىش ئورنى تاللىغاندا، ئىمان-ئېتىقاد بىلەن ياشايدىغانلىقىمىزنى قانداق كۆرسىتەلەيمىز؟ (ئىبرانىيلار 13:5)
6 ئىمان-ئېتىقادىمىز بىلەن ياشىساق، تاللىغان ئىشىمىز يەھۋا بىلەن بولغان دوستلۇقىمىزغا قانداق تەسىر قىلىدىغانلىقىنى نەزەرگە ئالىمىز. ئۆزىمىزدىن مۇنداق سورىساق بولىدۇ: «بۇ ئىشقا كىرسەم، مەندىن يەھۋا ئۆچ كۆرىدىغان ئىشلارنى قىلىشنى تەلەپ قىلامدۇ؟ (پەند ن. 6:16–19) جامائەت يىغىلىشلىرى، ۋەز قىلىش ۋە شەخسىي تەتقىق ئۆگىنىشىم بىر چەتتە قالامدۇ؟ ئائىلەمدىكىلەردىن ئۇزاق ۋاقىت ئايرىلىشقا توغرا كېلەمدۇ؟» (فىلىپى. 1:10) بۇ سوئاللارغا «ھەئە» دەپ جاۋاب بەرسەك، ئىش تاپالماي قىينىلىپ كەتسەكمۇ، بۇنداق ئىشقا كىرمىسەك، دانا قارار چىقارغان بولىمىز. ئىمان-ئېتىقادقا تايىنىپ ياشىساق، يەھۋانىڭ ئېھتىياجلىرىمىزنى تەمىنلەپ بېرىدىغانلىقىغا ئىشىنىمىز ۋە ئىمانىمىزنى كۆرسىتىدىغان قارارلارنى چىقىرىمىز.—مەتتا 6:33؛ ئىبرانىيلار 13:5-نى ئوقۇڭ.
7، 8. خاۋېر كۆرگىنى بىلەن ئەمەس، ئىمان-ئېتىقاد بىلەن ياشىغانلىقىنى قانداق كۆرسەتتى؟ (رەسىمگە ھەم قاراڭ).
7 جەنۇبىي ئامېرىكىدا ياشايدىغان خاۋېرa ئىسىملىك بۇرادەر ئېتىقاد بىلەن ياشاشنىڭ قانچىلىك مۇھىم ئىكەنلىكىنى چۈشەنگەن. ئۇ: «مەن شىركەتنىڭ باشقۇرغۇچىلار قاتلىمىدا ئىشلەش ئىلتىماسىنى تولدۇردۇم. بۇ ئىشتا ئىلگىرىكى ئىشىمغا قارىغاندا ئىككى ھەسسە يۇقىرى مۇئاش بېرەتتى ۋە مەن بۇ ئىشتىن رازى ئىدىم»،— دەيدۇ. لېكىن، خاۋېر پىدائىي ۋەز ئېيتقۇچى بولۇشنى باشلىماقچى بولغان. ئۇ يەنە مۇنداق دەيدۇ: «مېنى يۇقىرى مەنسەپ قاتلىمىدىكى بۆلۈم باشلىقى بىلەن يۈزمۇ-يۈز سۆھبەتكە چاقىردى. مەن يەھۋاغا دۇئا قىلىپ، ياردەم سورىدىم. ئۇ مەن ئۈچۈن نېمە ئەڭ ياخشى ئىكەنلىكىنى بىلىدىغانلىقىغا ئىشىنەتتىم. مەن ئۆز كەسپىمدە يۇقىرىراق مەنسەپكە ئېرىشىپ، كۆپرەك پۇل تېپىشنى ئويلىساممۇ، ئىشىمنىڭ يەھۋاغا كۆپرەك خىزمەت قىلىشىمغا توسالغۇ بولۇشىنى خالىمايتتىم».
8 خاۋېر سۆزىنى داۋاملاشتۇرۇپ: «يۈز-تۇرانە سۆھبەتتە، بۆلۈم باشلىقى ماڭا نورمال ئىش ۋاقتىدىن سىرت، دائىم يەنە ۋاقىت قوشۇپ ئىشلىشىم كېرەكلىكىنى ئېيتتى. بىراق، مەن ھۆرمەت بىلەن، دائىم ۋاقىت قوشۇپ ئىشلەشكە ۋاقىت چىقمايدىغانلىقىنى، سەۋەبى خۇداغا خىزمەت قىلىش ئۈچۈن ۋاقىت چىقىرىشىم كېرەكلىكىنى چۈشەندۈردۈم»،— دەيدۇ. خاۋېر بۇ ئىش تەكلىپىنى رەت قىلىپ، ئىككى ھەپتىدىن كېيىن ئۇ پىدائىي ۋەز ئېيتقۇچى بولۇپ خىزمەت قىلىشنى باشلىغان. بىرقانچە ئايلاردىن كېيىن، ئۇ كۆپ ۋاقتىنى ئالمايدىغان يېڭى ئىش تاپقان. ئۇ مۇنداق دەيدۇ: «يەھۋا دۇئايىمغا جاۋاب بېرىپ، پىدائىي ۋەز ئېيتقۇچى بولۇشۇمغا ياردەم بېرىدىغان ئىشنى تاپتىم. شۇڭا، ھازىر يەھۋاغا خىزمەت قىلالايمەن ۋە قېرىنداشلىرىمغا ھەم ياردەم بېرىشكە ۋاقتىم يېتىدۇ. شۇنداق قولايلىق ئىشنى تاپقىنىمغا ئىنتايىن خۇشالمەن».
سىزنى ئىش ئورنىدا ئۆستۈرمەكچى بولسا، قارارىڭىز يەھۋانىڭ سىز ئۈچۈن نېمە ئەڭ ياخشى ئىكەنلىكىگە بىلىدىغانلىقىغا ئىشىنىدىغانلىقىڭىزنى نامايان قىلسۇن (7، 8-ئابزاسقا قاراڭ)
9. تېئونىڭ مىسالىدىن قانداق ساۋاق ئالدىڭىز؟
9 ھازىرقى ئىش ئورنىڭىز يەھۋا بىلەن بولغان مۇناسىۋىتىمىزگە يامان تەسىر قىلسا، نېمە قىلالايمىز؟ كونگودا ياشايدىغان تېئو مۇنداق دەيدۇ: «مەن ئارزۇ قىلغان ئىشنى تاپتىم. بۇ ئىشتا ئۈچ ھەسسە كۆپ مائاش ئالاتتىم ۋە ھەممىسى مېنى ھۆرمەتلەيتتى». بىراق، تېئو نورمال ئىش ۋاقتىدىن كېيىنمۇ قوشۇمچە ئىشلەپ، دائىم يىغىلىشلاردىن قالاتتى. شىركەتنىڭ سەمىمىيەتسىز ئىش-ھەرىكىتىنى يوشۇرۇش ئۈچۈن خىزمەتداشلىرى تېئونى يالغان سۆزلەشكە قىستايتتى. تېئو بۇ ئىشتىن چىقىپ كېتەي دېسە، ئىشسىز قېلىشتىن قورقاتتى. ئۇنداقتا، ئۇنىڭغا نېمە ياردەم بەرگەن؟ تېئو مۇنداق دەيدۇ: «ماڭا ھاباققۇق 3:17–19-ئايەتلەر كۈچ-مەدەت بەردى. مەن ئىشسىز قالساممۇ، يەھۋانىڭ ماڭا غەمخورلۇق قىلىدىغانلىقىنى چۈشەندىم. شۇڭا، شۇ ئىشتىن چىقىپ كەتتىم … . نۇرغۇن خوجايىنلار ئادەم يوقىرى مائاش ئېلىش ئۈچۈن ھەرقانداق قۇربانلىقلارنى بېرىشكە تەييار تۇرىدۇ دەپ ئويلايدۇ. كۆپرەك پۇل تۆلىسەك، ھەتتا ئائىلىسىگە ھەمراھ بولىدىغان ۋە خۇداسىغا ئىبادەت قىلىدىغان ۋاقىتلىرىنى ھەم قۇربان قىلىدۇ دەيدۇ. مەن دانا قارار چىقىرىپ، يەھۋا خۇدا ۋە ئائىلەم بىلەن بولغان ياخشى مۇناسىۋەتنى قوغداپ قالغانلىقىمدىن ئىنتايىن خۇشالمەن. بىر يىلدىن كېيىن، خۇدانىڭ ياردىمى بىلەن مۇنتىزىم بىر ئىشنى تاپتىم. مۇئاشىم كۆپ بولمىسىمۇ، ئاددىي-ساددا تۇرمۇش كەچۈرۈشكە يېتىدۇ. ئەڭ مۇھىمى، روھىي ئىشلارغا ۋاقىت چىقىرالايمەن. يەھۋاغا خىزمەت قىلىشنى ھاياتىمىزدا بىرىنچى ئورۇنغا قويسىڭىز، بەزىدە ئىقتىساد جەھەتتىن قىينىلىپ قېلىشىڭىز مۇمكىن، لېكىن يەھۋا ھەرگىز بىزنى تاشلىمايدۇ». ئەگەر يەھۋانىڭ نەسىھەتلىرى ۋە ۋەدىلىرىگە ئىشەنسەك، ئىمان-ئېتىقادىمىزغا تايىنىپ ياشايمىز ۋە ياراتقۇچىمىز بىزنى چوقۇم بىزنى بەرىكەتلەيدۇ.
لايىق تاللىغاندا
10. لايىق ئىزدىگەن قېرىنداشنىڭ كۆزى كۆرگەن نەرسىگە ئاساسەن قارار چىقارغانلىقىنى نېمىدىن كۆرۈنىدۇ؟
10 نىكاھ — يەھۋا ھەدىيە قىلغان سوۋغاتتۇر. شۇڭا، توي قىلىش ئۈچۈن ئۆزىمىزگە ئىزدەش تەبىئىي ئىش. مەسىلەن، تۇرمۇش قۇرماقچى بولغان قىز ئۆزى ياقتۇرغان يىگىتنىڭ مىجەز-خۇلقى، بوي-بەستى، نام-ئابرويى، ئىقتىسادى ئەھۋالى ۋە ئائىلىدىكى مەسئۇلىيەتلىرىگە كۆڭۈل بۆلۈشى مۇمكىنb. بۇ ئامىللار ئىنتايىن مۇھىم، لېكىن ئۇ پەقەت مۇشۇ ئىشلارغا كۆڭۈل بۆلسە، بۇ ئۇنىڭ كۆزى كۆرگەن نەرسىلەر تايىنىپ ياشايدىغانلىقىنى كۆرسىتىدۇ.
11. ئۆزىگە لايىق ئىزدەۋاتقان قېرىنداشلار ئىمان-ئېتىقاد بىلەن ياشاۋاتقانلىقىنى قانداق كۆرسىتەلەيدۇ؟ (1-كورىنتلىقلار 7:39)
11 توي قىلىش ئۈچۈن ئۆزىگە لايىق ئىزدىگەندە، يەھۋانىڭ نەسىھەتلىرىگە قۇلاق سالساق، ئۇ بىزدىن چوقۇم پەخىرلىنىدۇ. يەھۋانىڭ نەسىھەتلىرىگە قۇلاق سالىدىغان قېرىنداشلار ئۇچرىشىشقا چىقىپ مۇھەببەتلىشىشنى باشلاشتىن بۇرۇن، «ياشلىق باھارى» ئۆتۈپ كېتىشنى كۈتىدۇ (1-كورىنت. 7:36). ئۇلار ئۆزىگە لايىق ئىزدىگەندە، يەھۋانىڭ نەزىرىدىكى ياخشى ئەر ياكى ياخشى ئايالدا بولۇشقا تېگىشلىك پەزىلەتلەرنى يېتىلدۈرگەن كىشىنى ئىزدەيدۇ (پەند ن. 31:10–13، 26–28؛ ئەفەس. 5:33؛ 1-تىموت. 5:8). يەھۋا گۇۋاھچىسى بولمىغانلار كۆڭۈل ئىزھارى قىلماقچى بولسا، ئۇلار بىلەن ئارىلىشىپ مۇھەببەتلەشمەيدۇ. چۈنكى، ئۇ 1-كورىنتلىقلار 7:39-ئايەتلەردىكى (ئوقۇڭ) نەسىھەتكە قۇلاق سالىدۇ. ئۇلار يەھۋانىڭ چوقۇم ئۇلارنىڭ ھېس-تۇيغۇلىرىغا ھەرقانداق كىشىدىن ياخشىراق كۆڭۈل بۆلىدىغانلىقىغا ئىشىنىپ، ئىمان-ئېتىقاد بىلەن ياشاشنى داۋاملاشتۇرىدۇ.—زەبۇر 55:22.
12. روزا ئىسىملىك قېرىنداشنىڭ مىسالىدىن نېمىنى ئۆگەندىڭىز؟
12 كولۇمبىيىدە پىدائىي ۋەز ئېيتقۇچى بولۇپ خىزمەت قىلىدىغان روزا ئىسىملىك قېرىنداشنىڭ مىسالىنى كۆرۈپ چىقايلى. ئىش ئورنىدا بىر يىگىتنىڭ روزىغا كۆڭلى چۈشۈپ قالغان. روزا ھەم ئۇنى ياقتۇرۇپ قالغان. ئۇ مۇنداق دەيدۇ: «ئۇ مەھەللىدە پىداكارلىق بىلەن باشقىلارغا ياردەم بېرەتتى، ھېچقانداق بىر يامان ئادەتلىرى يوقتى. قارىماققا، ئۇ بەك ياخشى يىگىت بولۇپ، ئۇنىڭدا ئۆمۈرلۈك جۈپتۈمگە قويىدىغان تەلىپىمگە لايىق بارچە پەزىلەتلەر بار ئىدى. ئەمما، ئۇ يەھۋا گۇۋاھچىسى ئەمەستى. شۇ چاغلاردا، مەن ئۆزۈمنى يالغۇز ھېس قىلىپ، توي قىلىشنى ئارزۇ قىلىپ يۈرەتتىم. لېكىن، جامائەتتە ئۆزۈمگە لايىق كىشىنى تاپالمىدىم. شۇڭا، شۇ يىگىتنىڭ كۆڭۈل ئىزھارىنى رەت قىلىش ناھايىتى قىيىن بولدى». لېكىن، روزا دىققىتىنى پەقەتلا كۆزى بىلەن كۆرگەن نەرسىلەرگە قاراتماي، بەلكى ئۆزىنىڭ قارارى يەھۋا بىلەن بولغان مۇناسىۋىتىگە قانداق تەسىر قىلىدىغانلىقى توغرۇلۇق چوڭقۇر ئويلانغان. شۇڭا، ئۇ ھېلىقى يىگىت بىلەن ئالاقە قىلىشنى توختىتىپ، كۆپرەك خۇداغا خىزمەت قىلىشقا باشلىغان. كۆپ ئۆتمەي. ئۇ پادىشاھلىق ۋەز ئېيتقۇچىلىرىنى تەربىيىلەش مەكتىپىگە تەكلىپ قىلىنىپ، ھازىر مەخسۇس پىدائىي ۋەز ئېيتقۇچى بولۇپ خىزمەت قىلىۋاتىدۇ. روزا مۇنداق دەيدۇ: «يەھۋا خۇدا مېنى مول بەرىكەتلەپ، ھازىر مەن ئىنتايىن خۇشال ياشاۋاتىمەن». مەلۇم نەرسىگە كۆڭلىمىز باغلىنىپ قالغاندا، ئېتىقاد بىلەن ياشاش ھەمىشە ئاسان ئەمەس. بىراق، ئېتىقاد بىلەن ياشىغان ئادەم ھېچقاچان پۇشايمان قىلمايدۇ.
خۇدانىڭ تەشكىلاتى كۆرسەتمىلەرنى بەرگەندە
13. خۇدانىڭ تەشكىلاتى كۆرسەتمىلەرنى بەرگەندە، قانداق ئىنكاس قايتۇرۇشىمىز مۇمكىن؟
13 يەرلىك ئاقساقاللار، رايونغا مەسئۇل ئاقساقال، يەرلىك بەيتەل ۋە يېتەكچى كېڭەش دائىم بىرگە ئىبادەت پائالىيەتلىرىمىز بىلەن مۇناسىۋەتلىك كۆرسەتمىلەرنى بېرىدۇ. لېكىن، بەزىدە نېمە ئۈچۈن شۇنداق كۆرسەتمە بېرىلگەنلىكىنى چۈشەنمەسلىكىمىز مۇمكىن. شۇ چاغدا، بۇ كۆرسەتمە ئىشلىرىمىزنى تېخىمۇ قىيىنلاشتۇرىدىغاندەك كۆرۈنۈپ، ھەتتا كۆرسەتمە بەرگەن بۇرادەرلەرنىڭ كەمچىلىك تەرەپلىرىگە كۆپرەك دىققەت ئاغدۇرۇشىمىز مۇمكىن. ئەگەر شۇنداق قىلىساق، كۆزىمىز كۆرگەنگە ئاساسەن ئىش قىلغان بولىمىز.
14. خۇدانىڭ تەشكىلاتى كۆرسەتمىلەرنى بەرگەندە، ئىمان-ئېتىقاد بىلەن ياشايدىغانلىقىمىزنى قانداق كۆرسىتەلەيمىز؟ (ئىبرانىيلار 13:17)
14 ئىمان-ئېتىقاد بىلەن ياشىساق، بىز يەھۋانىڭ ئۆز تەشكىلاتىنى يېتەكلەۋاتقانلىقىغا ۋە ئۇ ۋەزىيىتىمىزنى ياخشى بىلىدىغانلىقىغا ئىشىنىمىز. شۇڭا، بىز كۆرسەتمىلەرگە دەرھال بويسۇنۇپ، جان دىلىمىز بىلەن يوليورۇق بويىچە ئىش قىلىمىز (ئىبرانىيلار 13:17-نى ئوقۇڭ). كۆرسەتمىلەرگە بويسۇنغاندا، بىز جامائىتىمىزنىڭ ئىناق-ئىتتىپاق بولۇشىغا ھەسسە قوشىمىز (ئەفەس. 4:2، 3). يېتەكچىلىكنى ئۆز زىممىسىگە ئالغان بۇرادەرلەرنىڭ نامۇكەممەل بولۇشىغا قارىماي، ئۇلارغا بويسۇنساق، يەھۋا چوقۇم بىزنى مول بەرىكەتلەيدۇ (سام. 1-ياز. 15:22). بۇ شۇنىڭغا ئىشىنىمىزكى، ئەگەر مەلۇم كۆرسەتمىلەرگە تۈزىتىش كىرگۈزۈشكە توغرا كەلسە، مۇۋاپىق ۋاقىت-سائىتى كەلگەندە، يەھۋا چوقۇم تۈزىتىدۇ.—مىكاھ 7:7.
15، 16. دەسلەپتە تەشكىلاتنىڭ يېڭى كۆرسەتمىسىگە گۇمان بىلەن قارىغان بىر بۇرادەر ئىمان-ئېتىقاد بىلەن ياشايدىغانلىقىنى قانداق كۆرسەتكەن؟ (رەسىمگە ھەم قاراڭ).
15 ئىمان-ئېتىقاد بىلەن ياشاپ، تەشكىلات بەرگەن كۆرسەتمىلەرگە بويسۇنۇشنىڭ پايدىسىنى تەكىتلەيدىغان بىر مىسالنى كۆرۈپ چىقايلى. پېرۇدا كۆپ ساندىكى ئىنسانلار ئىسپان تىلىنى سۆزلىيەلىسىمۇ، نۇرغۇن كىشىلەر ئۆزىنىڭ ئانا تىلىدا سۆزلەشكە ئادەتلەنگەن. شۇ تىللارنىڭ بىرى — كېچۇئا. ئۇزۇن يىللار كېچۇئا تىلىدا سۆزلەيدىغان قېرىنداشلار ۋەز قىلىدىغان رايونلاردا ئالايتەن شۇ تىلدا سۆزلەيدىغان ئادەملەرنى ئىزدىگەن. بىراق، دۆلەتنىڭ قانۇنى ئۆزگەرگەچ، ئەمدى قېرىنداشلارغا كېچۇئا تىلدا سۆزلەيدىغان ئادەملەرنى ئىزدەپ تېپىشقا قارىتا يېڭى كۆرسەتمىلەر بېرىلگەن (رىملىقلار 13:1). شۇ چاغدا، بەزىلەر يېڭى ئۇسۇلدا ئۇلارنى تېپىش قىيىن بولۇپ قېلىشىدىن ئەنسىرىگەن. ئەمما، قېرىنداشلار يەنىلا يېڭى كۆرسەتمىگە بويسۇنغان، نەتىجىدە يەھۋا ئۇلارنىڭ خىزمىتىنى بەرىكەتلەپ، ئۇلار كېچۇئا تىلىدا سۆزلەيدىغان نۇرغۇن ئادەملەرنى تاپالىغان.
16 كېۋىن ئىسىملىك ئاقساقالمۇ يېڭى كۆرسەتمىدىن گۇمان قىلغانىدى. ئۇ مۇنداق دەيدۇ: «دەسلەپتە يوليورۇق كەلگەندە، مەن ھازىر كېچۇئا تىلىدا سۆزلەيدىغان ئادەملەرنى قانداق تاپىمىز دەپ ئەنسىرىدىم. لېكىن، پەندى-نەسىھەت 3:5-ئايەتتىكى سۆزلەرنى ئېسىمگە ئېلىپ، مۇسانىڭ مىسالى توغرۇلۇق ئويلاندىم. ئۇ ئىسرائىل خەلقىنى مىسىردىن ئېلىپ چىققاندا، يەھۋا ئۇنىڭغا ئىسرائىللارنى قىزىل دېڭىزنىڭ بويىغا باشلاپ كېلىشنى بۇيرىغان. قارىماققا، ئۇلار تۇزاققا چۈشۈپ، مىسىرلىقلاردىن قېچىپ قۇتۇلالمايدىغاندەك كۆرۈنگەن. ئەمما، مۇسا پەيغەمبەر يەھۋاغا بويسۇنغان. نەتىجىدە، خۇدا ئۇنى بەرىكەتلەپ، خەلقىنى ئاجايىپ مۆجىزە بىلەن قۇتقۇزغان» (چىق. 14:1، 2، 9–11، 21، 22). كېۋىن يېڭى ئۇسۇلدا ۋەز قىلىپ كۆرۈشكە تەييار بولغان. بۇنىڭ نەتىجىسى قانداق بولغان؟ ئۇ مۇنداق دەيدۇ: «يەھۋا بىزنى شۇنچىلىك كۆپ بەرىكەتلەرگە ئېرىشتۈرىدىغانلىقىنى ئويلاپمۇ باقمىغان ئىدىم. بۇرۇن كۆپ يول يۈرۈپ بىر-ئىككى ئادەمنىلا تاپاتتۇق. ھازىر بولسا، كېچۇئا تىلىدا سۆزلەيدىغان ئادەملەر توپلاشقان يەرلەردە ۋەز قىلىمىز. نەتىجىدە، بىز كۆپرەك ئادەملەر بىلەن سۆھبەت باشلاپ، قايتا يولۇقۇشلارغا بارىمىز ۋە بىز بىلەن مۇقەددەس كىتابنى تەتقىق قىلىپ ئۆگىنىدىغانلارنىڭ سانىمۇ كۆپەيدى. ئىبادەت يىغىلىشلىرىمىزغا ھەم كۆپرەك ئادەملەر كېلىدىغان بولدى». كۆرگىنىمىزدەك، ئىمان-ئېتىقاد بىلەن ياشايدىغانلار چوقۇم يەھۋانىڭ مول بەرىكەتلىرىگە ئېرىشىدۇ.
نۇرغۇن ئادەملەر قېرىنداشلىرىمىزغا كېچۇئا تىلىدا سۆزلەيدىغان ئادەملەرنىڭ قەيەردە ياشايدىغانلىقىنى كۆرسىتىپ بەردى (15، 16-ئابزاسقا قاراڭ)
17. بۇ ماقالىدىن نېمىلەرنى ئۆگەندىڭىز؟
17 بىز ئىش ئورنى تاللىغاندا، توي قىلىدىغان لايىقنى تاللىغاندا ۋە خۇدانىڭ تەشكىلاتى كۆرسەتمىلەرنى بەرگەندە، ئىمان بىلەن قانداق ياشىيالايدىغانلىقىمىزنى كۆرۈپ چىقتۇق. بىراق، كىنو ياكى ئويۇن-تاماشىلارنى تاللىغاندا ۋە بىلىم ئېلىش ئۈچۈن قانچە يىل مەكتەپتە ئوقۇش ياكى پەرزەنت تەربىيىسى ھەققىدە قارارلارنى چىقارغاندا ھەم ئىمان-ئېتىقادقا تايىنىپ ياشىشىمىز لازىم. مەيلى قانداق قارارلارنى چىقارمايلى، پەقەت كۆز بىلەن كۆرگىنىمىزگە ئەمەس، ئەكسىنچە يەھۋا بىلەن بولغان مۇناسىۋىتىمىز توغرۇلۇق چوڭقۇر ئويلىنىشىمىز، ئۇنىڭ نەسىھەتلىرىگە بويسۇنۇشىمىز ۋە بىزگە غەمخورلۇق قىلىدىغانلىقى توغرۇلۇق بەرگەن ۋەدىسىگە ئىشىنىشىمىز كېرەك. شۇ چاغدىلا، بىز «ئەبەدىل-ئەبەد خۇدايىمىز يەھۋانىڭ ئىسىمى بىلەن ماڭىمىز».—مىكاھ 4:5.
156-ناخشا ئىشىنىمەن
a بەزى ئىسىملار ئۆزگەرتىلگەن.
b بۇ ئابزاستا لايىق ئىزدىگەن ئايال قېرىنداشلارغا مەسلىھەتلەر بېرىلگەن بولسىمۇ، بۇ مەسىھەتلەر لايىق ئىزدەۋاتقان بۇرادەرلەرگە ھەم ماس كېلىدۇ.