15-تەتقىق ماقالىسى
51-ناخشا يېپىش چىڭ يەھۋاغا!
بىز ئۈچۈن «يەھۋاغا يېقىنلىشىش ياخشىدۇر»
«مەن ئۈچۈن خۇداغا يېقىنلىشىش ياخشىدۇر».—زەبۇر 73:28.
مەركىزى ئىدىيە
يەھۋاغا قانداق يېقىنلىشالايمىز ۋە شۇنداق قىلىشنىڭ بىز ئۈچۈن قانداق پايدىسى بارلىقىنى ئۆگىنىمىز.
1، 2. (1) بىرى بىلەن يېقىن دوست بولۇش ئۈچۈن نېمە قىلالايمىز؟ (2) بۇ ماقالىدە نېمىنى مۇھاكىمە قىلىمىز؟
سىزنىڭ يېقىن دوستىڭىز بارمۇ؟ سىلەر قانداق دوست بولۇپ قالغان؟ بەلكىم، سىلەر كۆپ ۋاقتىنى بىرگە ئۆتكۈزدۈڭلار. ئۇنىڭ ھاياتىدا قانداق قىيىنچىلىقلارنى باشتىن كەچۈرگەنلىكىنى بىلدىڭىز، يېقىنراق تونۇشقانسېرى ئۇنىڭ نېمىنى ياقتۇرۇپ، نېمىنى ياقتۇرمايدىغانلىقىنى بىلدىڭىز. يەنە دوستىڭىزنىڭ ئۈلگە قىلىپ ئۆگىنىشكە ئەرزىيدىغان گۈزەل پەزىلەتلىرىنى كۆردىڭىز. شۇنداق قىلىپ، ئۇ دوستىڭىزنى ياخشى كۆرۈپ قالدىڭىز.
2 بىرى بىلەن دوست بولۇش ئۈچۈن ۋاقىت ۋە كۈچ چىقىرىش كېرەك. شۇنىڭغا ئوخشاش، يەھۋا بىلەن يېقىن دوست بولۇش ئۈچۈنمۇ كۈچ چىقىرىشىمىز لازىم. بۇ ماقالىدە، يەھۋا خۇداغا قانداق يېقىنلىشىشقا بولىدىغانلىقى ۋە شۇنداق قىلىشنىڭ بىز ئۈچۈن قانداق پايدىسى بارلىقىنى كۆرۈپ چىقىمىز. ئاۋۋال، ئەڭ يېقىن دوستىمىز يەھۋاغا يېقىنلىشىشنىڭ نېمە ئۈچۈن ياخشى ئىكەنلىكىنى مۇھاكىمە قىلىپ چىقايلى.
3. نېمە ئۈچۈن يەھۋا بىلەن دوست بولۇشنىڭ پايدىسى توغرۇلۇق چوڭقۇر ئويلىنىشىمىز كېرەك؟ مىسال كەلتۈرۈڭ.
3 يەھۋاغا يېقىنلىشىش ياخشى، بۇنىڭدىن ھېچقايسىمىز گۇمانلانمايمىز. لېكىن، زادى قانچىلىك ياخشىلىقى ھەققىدە چوڭقۇر ئويلىنىش بىزنى داۋاملىق يەھۋاغا يېقىنلىشىشقا دەۋەت قىلىدۇ (زەبۇر 63:6–8). مەسىلەن، بىز سالامەتلىكىمىزنىڭ ياخشى بولۇشنى خالىساق، توغرا ئوزۇقلىنىش، دائىم بەدەن چېنىقتۇرۇش، قېنىپ ئۇخلاش ۋە ھەر كۈنى يېتەرلىك سۇ ئىچىش قاتارلىق ئىشلارنىڭ بىز ئۈچۈن پايدىلىق ئىكەنلىكىنى بىلىمىز. لېكىن، نۇرغۇن ئادەملەر بۇ ئىشلارغا سەل قارايدۇ، نەتىجىدە تەن-سالامەتلىكى ناچارلىشىدۇ. لېكىن، بۇ ئىشلار توغرۇلۇق پات-پات ئويلىنىدىغان ئادەم سالامەتلىكى ئۈچۈن پايدىلىق ئادەتلەرنى داۋاملاشتۇرىدۇ. شۇنىڭغا ئوخشاش، خۇداغا يېقىنلىشىشنىڭ ياخشىلىقىنى بىلىمىز، ئەمما بۇ يېتەرلىك ئەمەس. يەھۋا بىلەن بولغان دوستلۇقىمىزنىڭ بىز ئۈچۈن قانداق پايدىسى بارلىقى توغرۇلۇق چوڭقۇر ئويلىنىش بىزنى داۋاملىق ياراتقۇچىمىزغا يېقىنلىشىشقا دەۋەت قىلىدۇ.—زەبۇر 119:27–30.
4. زەبۇر 73:28-ئايەتتە نېمە يېزىلغان؟
4 زەبۇر 73:28-نى ئوقۇڭ. ئىبادەتخانىدا ناخشىچى بولۇپ خىزمەت قىلىدىغان لاۋىي قەبىلىسىدىن بولغان بىر كىشى زەبۇر 73-بابنى يازغان. بەلكىم، ئۇ يەھۋاغا نۇرغۇن يىل سادىق خىزمەت قىلغان. شۇنداق بولسىمۇ، ئۇ يەھۋا بىلەن يېقىن دوست بولۇشنىڭ پايدىسىنى تونۇپ يېتىپ، «يەھۋاغا يېقىنلىشىش ياخشىدۇر» دەپ ئۆزى ۋە باشقىلارغا ئەسكەرتىش بەرگەن. ئۇنداقتا، خۇداغا يېقىنلىشىشنىڭ قانداق پايدىسى بار؟
خۇداغا يېقىنلىشىش بىزنى خۇشاللىققا ئېرىشتۈرىدۇ
5. (1) نېمە ئۈچۈن يەھۋاغا يېقىنلاشقانسېرى تېخىمۇ خۇشال-خۇرام بولىمىز؟ (2) پەندى-نەسىھەت 2:6–16-ئايەتلەرگە ئاساسلانغاندا، خۇدا بەرگەن دانالىقنىڭ قانداق پايدىسىنى كۆرۈۋاتىسىز؟
5 بىز يەھۋاغا يېقىنلاشقانسېرى تېخىمۇ خۇشال-خۇرام بولىمىز (زەبۇر 65:4). خۇشال-خۇرام بولۇشىمىز ئۈچۈن نۇرغۇن سەۋەبلەر بار. مەسىلەن، خۇدا سۆزىدىكى نەسىھەتلەرگە ئەمەل قىلساق، بىز دانالىققا ئېرىشىپ، خەۋپ-خەتەرلەردىن ساقلىنالايمىز ۋە چوڭ خاتالىقلارنى ئۆتكۈزمەيمىز (پەندى-نەسىھەت 2:6–16-نى ئوقۇڭ). شۇڭا، مۇقەددەس كىتابتا: «بەختلىكتۇر دانالىقنى تاپقان ھەم ئەقىل-ئىدراكقا ئېرىشكەن ئىنسان»،— دەپ يېزىلغان.—پەند ن. 3:13.
6. نېمە ئۈچۈن زەبۇر يازغۇچىسىنىڭ كۆڭلى يېرىم بولغان؟
6 ئەلۋەتتە، يەھۋانىڭ خىزمەتچىلىرىمۇ بەزىدە قايغۇرىدۇ. زەبۇر 73-بابنىڭ يازغۇچىسى ئادالەتسىزلىكنى كۆرگەندە، ئۇنىڭ كۆڭلى يېرىم بولۇپ، خۇشاللىقىنى يوقاتقان. خۇداغا بويسۇنمايدىغان رەزىل ئادەملەرنىڭ باياشات تۇرمۇش كەچۈرۈۋاتقانلىقىنى كۆرگەندە، ئۇ بەك ئاچچىقلانغان ۋە ئۇلارغا ھەسەت قىلغان. ئۇ ھەتتا زوراۋان، تەكەببۇر ئادەملەر باياشات ياشايدۇ، تەن-سالامەتلىكى ياخشى، ئازاب-ئوقۇبەتلەرنى كۆرمەيدۇ دەپ خاتا ئويلاشقا باشلىغان (زەبۇر 73:3–7، 12). بۇ زەبۇر يازغۇچىسى ئادالەتسىزلىكلەرنى كۆرۈپ، يەھۋاغا خىزمەت قىلىشنىڭ ھېچقانداق پايدىسى يوق دەپ ئويلىغان. ئۇ ئاھ ئۇرۇپ مۇنداق دېگەن: «دېمەك، مەن قەلبىمنى بىكاردىن-بىكار پاك تۇتۇپتىمەن، بىگۇناھ تۇرۇپ، بىھۇدە قوللۇرۇمنى يۇيۇپ يۈرۈپتىمەن».—زەبۇر 73:13.
7. بىزنىڭ كۆڭلىمىز يېرىم بولۇپ ئازابلانغاندا نېمە قىلالايمىز؟ (رەسىمگە ھەم قاراڭ).
7 ئۇنىڭ كۆڭلى يېرىم بولسىمۇ، زەبۇر يازغۇچىسى يامان ھېس-تۇيغۇلارنىڭ ئۆزىنى چىرمىۋېلىشىغا يول قويمىغان. ئۇ «خۇدانىڭ مۇقەددەس ئىبادەتخانىسىغا» كىرگەن. شۇ يەردە يەھۋا ئۇنىڭ كۆز قارىشىنى ئۆزگەرتىشىگە ياردەم بەرگەن (زەبۇر 73:17–19). بىزنىڭ كۆڭلىمىز يېرىم بولغاندا، ئەڭ يېقىن دوستىمىز يەھۋا بىزنى چۈشىنىدۇ. ئەگەر بىز ئۇنىڭغا دۇئا قىلىپ، ئۇنىڭدىن مەسلىھەت سورىساق ۋە مۇقەددەس كىتابتىكى مەسلىھەتلەرگە قۇلاق سالساق ھەمدە ئېتىقادچى قېرىنداشلىرىمىزنىڭ ياردىمىنى قوبۇل قىلساق، كۈچ-مەدەتكە ئېرىشىپ، غەم-قايغۇلارغا قارىماي داۋاملىق يەھۋاغا خىزمەت قىلالايمىز. ھەتتا، غەم-ئەندىشە قىلىپ، ئۈستىمىزگە ئېغىر يۈكنى ئارتىپ قويغاندەك ھېس قىلغاندا، يەھۋا بىزگە تەسەللى بېرىپ، كۆڭلىمىزنى تىنچ-خاتىرجەم قىلىدۇ.—زەبۇر 94:19a.
زەبۇر 73-بابنى يازغان لاۋىي «خۇدانىڭ مۇقەددەس ئىبادەتخانىسىغا» كىرگەن (7-ئابزاسقا قاراڭ)
خۇداغا يېقىنلاشساق، مەنىلىك ھايات كەچۈرىمىز ۋە ئۈمىدۋار بولىمىز
8. يەھۋاغا يېقىنلىشىشنىڭ بىز ئۈچۈن يەنە قانداق پايدىسى بار؟
8 يەھۋاغا يېقىنلاشساق، بىز مەنىلىك ھايات كەچۈرىمىز. كېلەچەككە ئۈمىد بىلەن قارايمىز (يەرەم. 29:11). يەھۋا بىلەن دوست بولۇش بىزنى قايسى ئىككى بەرىكەتكە ئېرىشتۈرىدىغانلىقىنى كۆرۈپ چىقايلى.
9. يەھۋاغا يېقىنلاشساق، نېمە ئۈچۈن مەنىلىك ھايات كەچۈرىمىز؟
9 خۇداغا يېقىنلاشساق، مەنىلىك ھايات كەچۈرىمىز. نۇرغۇنلىغان ئادەملەر خۇداغا ئىشەنمەيدۇ. شۇڭا، ئۇلار ئىنسانلار نېمە ئۈچۈن ياشاۋاتقانلىقىنى بىلمەيدۇ ۋە كېلەچەكتە ئادەمزات يوقۇلۇپ كېتىدىغانلىقىغا ئىشىنىدۇ. لېكىن، بىز مۇقەددەس كىتابتىن خۇدانىڭ «بار ئىكەنلىكىگە ۋە ئۇنى ئەستايىدىل ئىزدىگەنلەرنى» مۇكاپاتلايدىغانلىقىنى بىلىۋالدۇق (ئىبرانىي. 11:6). ھەتتا ھازىرنىڭ ئۆزىدە خۇشال-خۇرام تۇرمۇش كەچۈرەلەيمىز، چۈنكى قايسى مەقسەتتە يارىتىلغان بولساق، شۇ ئىش بىلەن، يەنى ئاسماندىكى ئاتىمىز يەھۋاغا ئىبادەت قىلىش ئارقىلىق كۆڭلىمىزگە خۇشاللىق ۋە قانائەت تاپىمىز.—ق. شەر. 10:12، 13.
10. زەبۇر 37:29-ئايەتكە ئاساسلانغاندا، يەھۋاغا ئۈمىد باغلىغانلارنىڭ كېلەچىكى قانداق بولىدۇ؟
10 نۇرغۇن ئادەملەر ئىشلەپ پۇل تېپىش، توي قىلىپ پەرزەنتلىك بولۇش ۋە قېرىغاندا قىينىلىپ قالماي ياشاش ئارزۇ-ئۈمىدى بىلەن ياشايدۇ. ئۇلار يەھۋا خۇدانىڭ ئىنسانىيەتكە قانداق گۈزەل كېلەچەكنى ۋەدە قىلغانلىقىدىن خەۋەرسىز. ئەمما، بىز يەھۋاغا ئىبادەت قىلىدىغانلار، تىرىشىپ ياراتقۇچى يەھۋاغا يېقىنلىشىمىز ۋە ئۇنىڭ ۋەدىلىرىگە ئۈمىد باغلاپ ياشايمىز (زەبۇر 25:3–5؛ 1-تىموت. 6:17). بىز ئۆزىمىز يېقىنلىشىپ دوستلۇق ئورناتقان خۇدايىمىزغا ئىشىنىپلا قالماي، ئۇنىڭ ھەممە ۋەدىلىرىنى ئەمەلگە ئاشۇرىدىغانلىقىغا ئىشىنىمىز. بىز كەلگۈسىدە مول بەرىكەتلەرگە ئېرىشىمىز. ئەڭ مۇھىمى، بىز يەر يۈزىدىكى جەننەتتە يەھۋاغا مەڭگۈ ئىبادەت قىلىمىز.—زەبۇر 37:29-نى ئوقۇڭ.
11. خۇداغا يېقىنلىشىش بىزگە ۋە ئۇنىڭغا قانداق تەسىر قىلىدۇ؟
11 خۇداغا يېقىنلىشىشنىڭ يەنە نۇرغۇن سەۋەبلىرى بار. مەسىلەن، بىز توۋا قىلساق، يەھۋا بىزنى كەچۈرىدىغانلىقىنى ۋەدە قىلىدۇ (يەشايا 1:18). شۇڭلاشقا، بۇرۇن قىلغان گۇناھلىرىمىز ئۈچۈن ۋىجدان ئازابى تارتىپ يۈرمەيمىز (زەبۇر 32:1–5). يەھۋاغا يېقىنلاشقانسېرى، بىز ئۇنىڭ كۆڭلىنى خۇرسەن قىلالايمىز ۋە ئۆزىمىز ھەم خۇشال بولىمىز (پەند ن. 23:15). ئەلۋەتتە، خۇدا بىلەن دوست بولۇپ، ئېرىشىدىغان بەرىكەتلەر بەك نۇرغۇن! ئۇنداقتا، ھازىر قانداق قىلىپ يەھۋاغا تېخىمۇ يېقىنلىشالايدىغانلىقىمىزنى كۆرۈپ باقايلى.
داۋاملىق «خۇداغا يېقىنلىشىش» ئۈچۈن نېمە قىلالايمىز؟
12. خۇداغا يېقىنلىشىش ئۈچۈن سىز ئاللىقاچان نېمىلەرنى قىلدىڭىز؟
12 چۆمۈلدۈرۈلۈشتىن ئاۋۋال، سىز يەھۋانىڭ دوستى بولۇش ئۈچۈن نۇرغۇن تىرىشچانلىقلارنى كۆرسەتتىڭىز. مەسىلەن، يەھۋا خۇدا ۋە مەسىھ ئەيسا توغرۇلۇق نۇرغۇن ھەقىقەتلەرنى ئۆگەندىڭىز، چىن قەلبىڭىزدىن گۇناھلىرىڭىزغا توۋا قىلدىڭىز ۋە خۇداغا قەتئىي ئىشەنگەنلىكىڭىزنى ۋە پۈتۈن كۈچىڭىز بىلەن ئۇنىڭ ئىرادىسىنى ئورۇندايدىغانلىقىڭىزنى كۆرسەتتىڭىز. لېكىن، خۇداغا تېخىمۇ يېقىنلىشىش ئۈچۈن، بىز چوقۇم داۋاملىق مۇشۇ ئىشلارنى قىلىشىمىز كېرەك.—كولوسى. 2:6.
13. داۋاملىق يەھۋاغا يېقىنلىشىش ئۈچۈن نېمە قىلىشىمىز كېرەك؟
13 داۋاملىق يەھۋاغا يېقىنلىشىش ئۈچۈن نېمە قىلالايمىز؟ (1) مۇقەددەس كىتابنى دائىم ئوقۇپ، تەتقىق قىلىپ ئۆگىنىشىمىز كېرەك. مۇقەددەس كىتابنى ئوقۇغاندا، خۇدا توغرۇلۇق پەقەت بىلىم ئېلىپ قويماي، بەلكى خۇدانىڭ بىز ئۈچۈن نېمىنى ئىرادە قىلغانلىقىنى چۈشىنىپ، ئۇ خالىغاندەك ياشاشقا تىرىشىشىمىز لازىم (ئەفەس. 5:15–17). (2) خۇدانىڭ شەخسەن بىزگە كۆرسەتكەن سۆيگۈ-مۇھەببىتى توغرۇلۇق چوڭقۇر ئويلىنىپ، ئىشەنچىمىزنى كۈچەيتىشىمىز لازىم. (3) بىز يەھۋانىڭ كۆڭلىنى رەنجىتىدىغان ئىشلارنى ئۆچ كۆرۈپ، يامانلىق قىلغۇچىلار بىلەن دوست بولماسلىقىمىز لازىم.—زەبۇر 1:1؛ 101:3.
14. كۈندىلىك تۇرمۇشىمىزدا يەھۋانى مەمنۇن قىلىش ئۈچۈن نېمە ئىشلارنى قىلساق بولىدۇ؟ (1-كورىنتلىقلار 10:31) (رەسىملەرگە ھەم قاراڭ).
14 1-كورىنتلىقلار 10:31-نى ئوقۇڭ. يەھۋانىڭ كۆڭلىنى خۇرسەن قىلىدىغان ئىشلارنى قىلىش بىز ئۈچۈن مۇھىم. بۇنىڭ ئۈچۈن ۋەز قىلىش ۋە جامائەت ئىبادەت يىغىلىشلىرىغا بېرىش يېتەرلىك ئەمەس. بىز يەنە كۈندىلىك تۇرمۇشىمىزدا بارچە ئىشلاردا خۇدانى مەمنۇن قىلىشىمىز لازىم. مەسىلەن، ھەر ئىشتا سەمىمىي، راستچىل بولۇپ، سېخىيلىق بىلەن ئۆزىمىزدە بارىنى باشقىلار بىلەن ئورتاقلاشساق، خۇدانى خۇشال قىلىمىز (2-كورىنت. 8:21؛ 9:7). يەھۋا بىزگە سوۋغات سۈپتىدە بەرگەن ھاياتلىقنى قەدىرلىشىمىزنى خالايدۇ. شۇڭا، ياخشى يەپ-ئىچىپ، ساغلام ئوزۇقلىنىش ئادىتىنى ساقلاش ۋە باشقا سالامەتلىكىمىزگە پايدىلىق ئىشلارنى قىلىش ئارقىلىق، ياراتقۇچىمىز يەھۋاغا تېخىمۇ يېقىنلىشالايمىز. قارىماققا، ئاددىي كۆرۈنگەن ئىشلاردىمۇ يەھۋانى خۇشال قىلىشقا تىرىشساق، ئۇ بىزنى تېخىمۇ ياخشى كۆرىدۇ.—لۇقا 16:10.
ماشىنىنى ئاۋايلاپ ھەيدەش، بەدەن چېنىقتۇرۇش، ساغلام ئوزۇقلىنىش ئارقىلىق ئۆزىمىزگە كۆڭۈل بۆلسەك ۋە باشقىلارغا مېھماندوستلۇق كۆرسەتسەك، يەھۋانى خۇشال قىلالايمىز (14-ئابزاسقا قاراڭ)
15. يەھۋا بىزنىڭ باشقىلارغا قانداق مۇئامىلە قىلىشىمىزنى خالايدۇ؟
15 يەھۋا مەيلى ئۇنىڭغا ئىبادەت قىلىدىغانلار ياكى قىلمايدىغانلار بولسۇن، ھەممىسىگە مېھرىبانلىق بىلەن ياخشى مۇئامىلە قىلىدۇ (مەتتا 5:45). ئۇ بىزنىڭمۇ شۇنداق قىلىشىمىزنى خالايدۇ. مەسىلەن، ئۇ بىزگە بۇيرۇق قىلىپ: «ھېچكىمنى ھاقارەت قىلمىسۇن، جېدەلخور بولمىسۇن. ئەكسىچە، غەرەز ئۇقىدىغان، ھەممە كىشىگە مۇلايىم مۇئامىلە قىلىدىغان بولسۇن» دېگەن (تىتۇس 3:2). شۇڭا، بىز يەھۋاغا ئىشەنمەيدىغان ئادەملەرنى تۆۋەن كۆرۈپ، ئۆزىمىزنى ئۇلاردىن ياخشىراق دەپ ئويلىمايمىز (2-تىموت. 2:23–25). باشقىلارغا مېھرىبانلىق بىلەن ياخشى مۇئامىلە قىلساق، يەھۋاغا يېقىنلىشالايمىز.
خاتالىقلارنى ئۆتكۈزگەندىمۇ خۇداغا يېقىنلىشالايمىز
16. زەبۇر 73-بابنىڭ يازغۇچىسى قانداق ھېس-تۇيغۇدا بولغان؟
16 بەزىدە ئۆتكۈزگەن خاتالىقلىرىڭىز سەۋەبلىك، ئۆزىڭىزنى يەھۋانىڭ دوستى بولۇشقا لايىق ئەمەستەك ھېس قىلىشىڭىز مۇمكىن. زەبۇر 73-بابنىڭ يازغۇچىسى ھەم شۇنىڭغا ئوخشاش ھېس-تۇيغۇدا بولغان. ئۇ مۇنداق دېگەن: «يولدىن چەتنەپ كەتكىلى تاس قالغانىدى پۇتلىرىم، تېيىلىپ كېتىشكە ئازلا قالغانىدى قەدەملىرىم» (زەبۇر 73:2). زەبۇر يازغۇچىسى ئۆزى ئېتىراپ قىلغاندەك، ئۇنىڭ كۆڭلى ئاچچىق ئازاب-ئوقۇبەتكە تولغان ۋە ئۆزىنى يەھۋانىڭ ئالدىدا نادان ۋە ئاڭسىز ھايۋاندەك ھېس قىلغان (زەبۇر 73:21، 22). ئۇ خاتالىق ئۆتكۈزگەچكە، «مەن ئەمدى يەھۋانىڭ سۆيگۈ-مۇھەببىتىگە لايىق ئەمەسمەن، ئۇ مېنى كەچۈرمەيدۇ» دەپ ئويلىغانمۇ؟
17. (1) زەبۇر يازغۇچىسى ھەتتا روھى چۈشكۈن پەيتتە، نېمە ئىش قىلغان؟ (2) ئۇنىڭ مىسالىدىن نېمىنى ئۆگىنىمىز؟ (رەسىملەرگە ھەم قاراڭ).
17 زەبۇر يازغۇچىسى يەھۋانى ئۇنىڭدىن ۋاز كەچتى دەپ ھېس-قىلغان بولسىمۇ، شۇ ھېس-تۇيغۇلار ۋاقتىنچە بولغان. قارىماققا، ئۇ ھاياتىدا روھى ئەڭ چۈشكۈن پەيتتە، يەھۋاغا يېقىنلىشىش كېرەكلىكىنى چۈشەنگەن. بۇنى ئۇنىڭ مۇنۇ سۆزلىرى كۆرسىتىپ بېرىدۇ: «بىراق، ھازىر مەن ھەمىشە سەن [يەھۋا] بىلەن؛ سەن مېنى تۇتتۇڭ ئوڭ قولۇڭ بىلەن. سەن يېتەكلەيسەن مېنى نەسىھىتىڭ بىلەن، ئاخىرى ھەتتا مېنى شان-شەرەپكە مۇيەسسەر قىلىسەن» (زەبۇر 73:23، 24). بىزمۇ ئىشەنچىمىزنىڭ ئاجىزلىشىپ كەتكەنلىكىنى ھېس قىلغاندا ياكى ئۆتكۈزگەن خاتالىقلىرىمىز سەۋەبلىك روھى چۈشكۈنلۈككە چۈشكەندە، قورام تېشىمىز يەھۋادىن كۈچ-مەدەت سورىشىمىز كېرەك (زەبۇر 73:26؛ 94:18). ھەتتا ۋاقتىنچە پۇتلىرىمىز ھەق يولدىن تېيىپ كەتكەن ھالەتتىمۇ، يەھۋانىڭ يېنىغا قايتىپ كېلەلەيمىز ۋە ئۇنىڭ بىزنى كەچۈرۈشكە تەييار تۇرغانلىقىغا ئىشىنەلەيمىز (زەبۇر 86:5). بولۇپمۇ، روھىمىز چۈشكۈن ۋاقىتلاردا، يەھۋاغا تېخىمۇ يېقىنلىشىشىمىز كېرەك.—زەبۇر 103:13، 14.
ئىشەنچىمىز ئاجىزلىشىپ كەتكەنلىكىنى ھېس قىلغاندا، بىز كۆپرەك دۇئا قىلىش ۋە جامائەت يىغىلىشلىرىغا قاتنىشىش ئارقىلىق يەھۋاغا تېخىمۇ يېقىنلىشىشىمىز كېرەك (17-ئابزاسقا قاراڭ)
خۇداغا مەڭگۈ يېقىنلىشالايمىز
18. نېمە ئۈچۈن داۋاملىق خۇداغا يېقىنلىشالايمىز؟
18 بىز يەھۋا توغرۇلۇق بىلىم ئالغانسېرى، ئۇنىڭغا داۋاملىق يېقىنلىشالايمىز، ھەتتا مەڭگۈ يېقىنلىشالايمىز. مۇقەددەس كىتابتا ئېيتىلغاندەك، يەھۋانىڭ يوللىرى، ئۇنىڭ دانالىقى ۋە بىلىمىنىڭ تېگىگە يەتكىلى بولماس.—رىملىقلار 11:33.
19. زەبۇر كىتابى بىزنى نېمىگە ئىشەندۈرىدۇ؟
19 زەبۇر 79:13-ئايەتتە مۇنداق يېزىلغان: «بىز سېنىڭ خەلقىڭ، سېنىڭ يايلىقىڭدىكى قوي پاداڭ، ساڭا تەشەككۈر ئېيتىمىز ئەبەدىل-ئەبەدكىچە؛ ساڭا مەدھىيە ئوقۇيمىز ئەۋلادتىن-ئەۋلادقىچە». سىزمۇ داۋاملىق يەھۋاغا يېقىنلاشسىڭىز ۋە ئۇنىڭ سىزنىمۇ مەڭگۈ بەرىكەتلەيدىغانلىقىغا ئىشەنچ قىلالايسىز. خۇددى زەبۇر يازغۇچىسىدەك سىزمۇ تولۇپ تاشقان ئىشەنچ بىلەن مۇنداق دېيەلەيسىز: «خۇدا قەلبىمدىكى قورام تېشىم ۋە مەڭگۈلۈك نېسىۋەم».—زەبۇر 73:26.
27-ناخشا يەھۋا تەرەپتە تۇرۇڭلار!
a ئەگەر بىر كىشى ئۇزۇن ۋاقىت بېسىم ئاستىدا، غەم-تەشۋىش ئىچىدە ياكى روھى چۈشكۈن ھالەتتە يۈرسە، دوختۇرنىڭ ياردىمىگە موھتاج بولۇشى مۇمكىن. بۇ توغرۇلۇق كۆپرەك مەلۇماتلارغا ئېرىشىش ئۈچۈن «كۈزىتىش مۇنارى» (باشقا تىلدا) 2023-يىل، 1-سانىغا قاراڭ.