ئوقۇرمەنلەرنىڭ سوئاللىرى
خۇدانىڭ خىزمەتچىسى ئۆزىنى باشقا ئادەملەردىن قوغداش ئۈچۈن ئوق ئاتىدىغان قۇرالىنى، مەسىلەن، تاپانچىنى ياكى مىلتىقنى ئىشلەتسە بولامدۇ؟
بۇ پرىنسىپلار ئۆزىنى قوغداش ئۈچۈن تاپانچا، مىلتىق ياكى باشقا ئوق ئاتىدىغان قۇراللاردىن پايدىلىنىش ناتوغرا ئىكەنلىكىنى كۆرسىتىدۇ. تۆۋەندىكى پرىنسىپلارنى قاراپ چىقايلى:
يەھۋا خۇدانىڭ ئالدىدا ئادەملەرنىڭ ھاياتى مۇقەددەس. زەبۇر يازغۇچىسى داۋۇت يەھۋا ھەققىدە: «سەندىلا باردۇر ھاياتلىق بۇلىغى»،— دەپ يازغان (زەبۇر 36:9). شۇڭا خۇدا خىزمەتچىسى ئۆزىنى ياكى مال-مۈلكىنى قوغداشنى قارار قىلسا، قان تۆكۈشتىن، يەنى ئادەم ئۆلتۈرۈشكە جاۋابكار بولۇشتىن نېرى بولۇش ئۈچۈن قولىدىن كېلىدىغان ھەممىنى قىلىدۇ (تەكرار قانۇن 22:8؛ زەبۇر 51:14).
ئەلۋەتتە، ئادەم ئۆزىنى ھىمايە قىلىش ئۈچۈن ئىشلىتىدىغان ھەرقانداق نەرسە بىلەن بىرسىنى ئۆلتۈرۈپ قويۇشى مۇمكىن. ئەمما ئوق ئاتىدىغا قۇرال بىلەن، ئاۋايلىماي ياكى ئەتەي، ئادەمنى ئۆلتۈرۈش تېخىمۇ ئاسان بولىدۇa (ئىزاھاتقا قاراڭ). بۇنىڭدىن تاشقىرى، ھۇجۇم قىلغۇچى قېنى قىزىپ جىددىيلىشىپ تۇرغانلىقتىن، قۇرالنى كۆرسە، خەتەرلىك ۋەزىيەت ئۇنىڭدىنمۇ كەسكىنلىشىپ، قان تۆكۈلۈشى مۇمكىن.
ئەيسا ئۆلۈمىدىن ئاۋالقى كەچتە شاگىرتلىرىغا قىلىچ ئېلىشنى ئېيتقاندا، ئۇلارنىڭ ئۆزلىرىنى ھىمايە قىلىشىنى نەزەردە تۇتمىغان ئىدى (لۇقا 22:36، 38). شۇنداق قىلغانلىقىنىڭ سەۋەبى، ئەيسا ئۇلارغا تەلىم بېرىشنى مەقسەت قىلغانىدى: ئۇنىڭ ئەگەشكۈچىلىرى، ھەتتا قۇراللىق بىر توپ كىشى بىلەن يۈزمۇ-يۈز ئۇچراشسىمۇ، زوراۋانلىق قىلماسلىقى كېرەك (لۇقا 22:52). پېترۇس قىلىچىنى ئىشلىتىپ باش روھانىينىڭ چاكىرىنىڭ قۇلىقىنى چېپىۋەتكەندە، ئەيسا پېترۇسقا: «قىلىچىڭنى ئورنىغا قايتۇرغىن»،— دەپ بۇيرىدى. ئاندىن كېيىن، ئۇ ئاساسىي ھەقىقەت، يەنى بۈگۈنكى كۈنگىچە يېتەكچى بولىدىغان پرىنسىپنى ئېيتتى: «قىلىچ كۆتەرگەنلەرنىڭ ھەممىسى قىلىچتىن ئۆلىدۇ» (مەتتا 26:51، 52).
مىكا 4:3تە بېشارەت قىلىنغاندەك، خۇدا خەلقى «قىلىچلىرىنى ساپان چىشلىرى، نەيزىلىرىنى ئورغاق قىلىدۇ». ھەقىقىي مەسىھىيلەر تىنچلىقپەرۋەرلىكى بىلەن تونۇلىدۇ. ئۇلار خۇدانىڭ ئەلچى پاۋلۇس ئارقىلىق بەرگەن «يامانلىقىغا يامانلىق قايتۇرماڭلار» ۋە «ھەممىسى بىلەن تىنچلىق مۇناسىۋەتتە بولۇڭلار»، دېگەن بۇيرۇقلىرىغا قۇلاق سالىدۇ (رىملىقلارغا 12:17، 18). پاۋلۇس ھەر تۈرلۈك قىيىنچىلىقلارغا دۇچ كەلسىمۇ، ھەتتا «قاراقچىلاردىن خەتەرلەردە» قالسىمۇ، ئۆزىنى ھىمايە قىلىش ئۈچۈن ھېچقاچان مۇقەددەس كىتاب پرىنسىپلىرىغا قارشى چىقمىغان (كورىنتلىقلارغا 2-خەت 11:26). ئەكسىچە، ئۇ خۇداغا ئىشەنچ باغلاپ، مۇقەددەس كىتابتىكى دانا مەسلىھەتنىڭ «ئۇرۇش قۇراللىرىدىن ئەۋزەل» ئىكەنلىكىنى بىلگەن (ۋەز 9:18).
خۇدانىڭ خىزمەتچىلىرى ئۈچۈن ھايات مال-مۈلۈكتىن كۆپ قىممەت-باھالىق. بىز بىلگىنىمىزدەك، «ئادەمنىڭ ھاياتى ئۇنىڭ مال-مۈلكىگە باغلىق ئەمەس» (لۇقا 12:15). شۇڭا قۇراللىق بۇلاڭچىغا يۇمشاق سۆزلىگىنىمىز تەسىر قىلمىسا، بىز ئەيسانىڭ «زۇلۇم كىشىگە ئۇنىڭ قىلغىنىدەك قايتۇرما» دېگەن مەسلىھىتىگە ماس ھەرىكەت قىلىمىز. باشقىچە ئېيتقاندا، بۇلاڭچىغا ئۇ خالىغان ھەممە نەرسىنى بېرىشكە توغرا كېلىشى مۇمكىن (مەتتا 5:39، 40؛ لۇقا 6:29).b (ئىزاھاتقا قاراڭ.) ئەلۋەتتە، ئەڭ ياخشىسى، خەتەرلىك ۋەزىيەتنىڭ ئالدىنى ئېلىش. مۇقەددەس كىتابنىڭ مەسلىھىتىگە قۇلاق سېلىپ، «مال-مۈلكى بىلەن ماختىنىشتىن» نېرى بولۇش، بىزنى جىنايەتچىلەرنىڭ نىشانى بولۇشىدىن قوغدايدۇ (يوھاننىڭ 1-خېتى 2:16). شۇنداقلا، قوشنىلىرىمىزنىڭ بىزنى تىنچلىقپەرۋەر يەھۋا گۇۋاھچىلىرى سۈپىتىدە تونۇغانلىقىمۇ ھىمايە بولىدۇ (پەندى-نەسىھەت 18:10).
خۇدانىڭ خىزمەتچىلىرى باشقىلارنىڭ ۋىجدانىنى ھۆرمەتلەيدۇ (رىملىقلارغا 14:21). ئەگەر بىرەر قېرىنداشنىڭ ئۆزىنى ھىمايە قىلىش ئۈچۈن قۇرال ساقلايدىغانلىقى مەلۇم بولسا، بەزى قېرىنداشلار بۇنىڭدىن ھاڭ-تاڭ قېلىشى، ھەتتا ئېتىقاد يولىدا پۇتلاپ يېقىتىدىغان پۇتلىكاشاڭ بولۇشى مۈمكىن. قۇرال ساقلاشقا قانۇنىي ھوقۇقىمىز بولغىنى بىلەن، قېرىنداشلارنى ياخشى كۆرگەنلىكتىن، بىز ھېچقاچان ئۇلار ئۈچۈن پۇتلىكاشاڭ بولىدىغان ئىشلارنى قىلمايمىز (كورىنتلىقلارغا 1-خەت 10:32، 33؛ 13:4، 5).
خۇدانىڭ خىزمەتچىلىرى ئۈلگىلىك بولۇشقا تىرىشىدۇ (كورىنتلىقلارغا 2-خەت 4:2؛ پېترۇسنىڭ 1-خېتى 5:2، 3). ئەگەر قېرىنداش باشقىلاردىن ھىمايە قىلىنىش ئۈچۈن قۇرال ساقلىسا، ئاقساقاللار ئۇنىڭغا مۇقەددەس كىتابقا ئاساسلانغان مەسلىھەت بېرىدۇ. ئەگەر ئۇ قۇرالنى ئۆزىگە قالدۇرۇشنى قارار قىلسا، ئۇ ياخشى ئۈلگە كۆرسەتمەيدۇ. شۇڭا، ئۇنىڭغا جامائەتتە ھېچقانداق مەسئۇلىيەت ۋە ئىمتىيازلىق ۋەزىپىلەر تاپشۇرۇلمايدۇ. ئەگەر قېرىنداشتىن جان بېقىش ئۈچۈن قىلىۋاتقان ئىشىدا قۇرالنى تۇتۇش تەلەپ قىلىنسا ۋە ئۇ بۇنداق قىلىشنى داۋاملاشتۇرسا، يۇقىرىدا ئېيتىلغانلارغا ئوخشاش ۋەزىيەتتە بولىدۇ. ئۇ باشقا ئىشنى ئىزدىسە، ياخشىراق بولىدۇ c(ئىزاھاتقا قاراڭ).
خۇدا خىزمەتچىسى ئۆزىنى، ئائىلىسىنى ۋە مال-مۈلكىنى قانداق ھىمايە قىلىشنى ھەم قەيەرگە ئىشقا كىرىشنى ئۆزى قارار قىلىشى كېرەك. لېكىن شۇ قارارنى مۇقەددەس كىتاب پرىنسىپلىرىغا تايىنىپ چىقىرىشى لازىم. دانالىقى زور خۇدايىمىز بۇ پرىنسىپلارنى بىزنى ياخشى كۆرگەنلىكتىن بەرگەن. شۇ سەۋەبتىن يەھۋا بىلەن زىچ مۇناسىۋەتتە بولغان مەسىھىيلەر ئۆزلىرىنى باشقىلاردىن ھىمايە قىلىش ئۈچۈن قۇرال ساقلىماسلىققا قارار قىلغان. ئەگەر خۇداغا تايىنىدىغان ۋە ھاياتىدا مۇقەددەس كىتاب پرىنسىپلىرىنى قوللىنىدىغان بولسا، ئۇلار مەڭگۈ ھەقىقىي خاتىرجەملىكتە ھايات كەچۈرۈدىغانلىقىنى بىلىدۇ (زەبۇر 97:10؛ پەندى-نەسىھەت 1:33؛ 2:6، 7).
بۈيۈك ئاپەت ۋاقتىدا مەسىھىيلەر ئۆزلىرىنى ھىمايە قىلىشقا ئۇرۇنماي يەھۋاغا تايىنىدۇ
a خۇدانىڭ خىزمەتچىسى ئوزۇقلىنىش مەقسىتى بىلەن ئوۋ ئوۋلاش ياكى ئۆزىنى يىرتقۇچ ھايۋانلاردىن ھىمايە قىلىش ئۈچۈن قۇرال (مەسىلەن، مىلتىق ياكى ئوۋ مىلتىق) ساقلاشنى قارار قىلىشى مۈمكىن. لېكىن قۇرالنى قوللانمىغان چاغدا، ئۇنىڭ ئوقلىرىنى چىقىرىۋېتىشى، بەلكىم ھەتتا قۇرالنىڭ ئۆزىنى پارچىلىشى ياكى قۇلۇپ سېلىنىدىغان بېخەتەر يەردە تۇتۇشى كېرەك. خۇدانىڭ خىزمەتچىسىنىڭ قۇرال تۇتۇشى مەنئىي قىلىنغان، ياكى بولمىسا ھۆكۈمەت قۇرالغا ئىگە بولۇشنى چەكلىگەن ياكى نازارەت قىلىدىغان يەرلەردە ياشىسا، يەرلىك قانۇنغا بويسۇنۇشى لازىم (رىملىقلارغا 13:1).
b بىرسى ئۆزىنى قانداقلارچە جىنسىي خورلۇقتىن ھىمايە قىلالايدىغانلىقىنى بىلىش ئۈچۈن «ئويغىنىڭلار!» (رۇس) ژۇرنالىنىڭ 1993-يىل، 8-مارت سانىدىكى «جىنسىي خورلۇققا ئۇچراشنىڭ ئالدىنى قانداق ئېلىشقا بولىدۇ؟» ناملىق ماقالىگە قاراڭ.
c قۇرال تۇتۇشنى تەلەپ قىلىدىغان ئىش ھەققىدە «كۆزىتىش مۇنارىنىڭ» (رۇس) 2005-يىل، 1-نويابىر سانىنىڭ 31-بېتىدىن ۋە 1984-يىل، 1-فېۋرال سانىنىڭ 18، 19-بەتلىرىدىن كۆپرەك ئوقالايسىز.