47-دەرس
سۇغا چۆمۈلدۈرۈلۈشكە تەييارمۇسىز؟
سىز مۇقەددەس يازمىلارنى تەتقىق قىلىپ ئۆگىنىش ئارقىلىق يەھۋا توغرۇلۇق نۇرغۇن بىلىمگە ئىگە بولدىڭىز. ئاشۇ ئۆگەنگەنلىرىڭىزنى ئەمەلىي قوللىنىش ئۈچۈن بەزى ئۆزگەرتىشلەرنى قىلدىڭىز. لېكىن، ئۆز ھاياتىڭىزنى يەھۋاغا بېغىشلاش ۋە چۆمۈلدۈرۈلۈشكە توسالغۇ بولۇۋاتقان بەزى نەرسىلەر بار بولۇشى مۇمكىن. بۇ دەرستە چۆمۈلدۈرۈلۈش قەدىمىنى بېسىشقا توسالغۇ بولىدىغان بەزى قىيىنچىلىقلارنى ۋە ئۇلارنى قانداق يېڭىش ھەققىدە مۇھاكىمە قىلىمىز.
1. چۆمۈلدۈرۈلۈشتىن بۇرۇن قانچىلىك بىلىم ئېلىشىڭىز كېرەك؟
سىز سۇغا چۆمۈلدۈرۈلۈش ئۈچۈن، ھەقىقەت توغرۇلۇق ئېنىق بىلىمگە ئىگە بولۇشىڭىز كېرەك (1-تىموتىي 2:4). بۇ ھەرگىزمۇ، چۆمۈلدۈرۈلۈشتىن ئاۋۋال مۇقەددەس يازمىلار ھەققىدىكى بارلىق سوئاللارنىڭ جاۋابلىرىنى بىلىشىڭىز كېرەك دېگەننى بىلدۈرمەيدۇ. ھەتتا ئۇزۇن يىللار بۇرۇن چۆمۈلدۈرۈلگەن ئېتىقادچىلارمۇ بىلىم ئېلىشنى داۋاملاشتۇرىدۇ (كولوسىلىقلار 1:9، 10). ئەمما، سىز چوقۇم مۇقەددەس كىتابنىڭ ئاساسىي تەلىملىرىنى چۈشىنىشىڭىز لازىم. جامائەت ئاقساقاللىرى يېتەرلىك بىلىمگە ئىگە بولغان-بولمىغانلىقىڭىزنى ئېنىقلىشىڭىزغا ياردەم بېرىدۇ.
2. چۆمۈلدۈرۈلۈشتىن بۇرۇن قايسى قەدەملەرنى بېسىشىڭىز كېرەك؟
چۆمۈلدۈرۈلۈشتىن ئاۋۋال، چوقۇم توۋا قىلىپ، توغرا يولغا مېڭىشىڭىز كېرەك (ئەلچىلەر 3:19-نى ئوقۇڭ). بۇ دېگەنلىك، سىز ئۆتمۈشتە قىلغان بارلىق گۇناھلىرىڭىزغا چىن قەلبىڭىزدىن پۇشايمان قىلىپ، يەھۋادىن كەچۈرۈم تىلەشنى بىلدۈرىدۇ. سىز يەنە يامان ئادەتلەرنى پۈتۈنلەي تاشلاپ، خۇدانى خۇرسەن قىلىپ ياشاشنى قەتئىي قارار قىلىشىڭىز لازىم. بۇنىڭدىن باشقا، جامائەت بىلەن بىرگە ئىبادەت يىغىلىشلىرىغا ۋە سۇغا چۆمۈلدۈرۈلمىگەن ۋەز ئېيتقۇچى سۈپىتىدە ۋەز ئېيتىش خىزمىتىگە قاتنىشىشىڭىز كېرەك.
3. نېمە ئۈچۈن ئالدىڭىزغا قەدەم تاشلاشتىن قورقماسلىقىڭىز كېرەك؟
بەزىلەر ئۆزلىرىنىڭ يەھۋاغا بەرگەن ۋەدىسىنى ئورۇندىيالماي قېلىشىدىن قورقىدۇ. ئەلۋەتتە، سىز بەزى چاغلاردا خاتالىقلار ئۆتكۈزۈپ قالىسىز. ھەتتا مۇقەددەس كىتابتا تىلغا ئېلىنغان سادىق ئەر ۋە ئايال خىزمەتچىلەرمۇ خاتالىق ئۆتكۈزگەن. بىراق، يەھۋا ئۆزىگە ئىبادەت قىلغۇچىلارنىڭ مۇكەممەل بولۇشىنى تەلەپ قىلمايدۇ (زەبۇر 103:13، 14-نى ئوقۇڭ). كۈچىڭىز يېتىشىچە تىرىشسىڭىز، يەھۋا خۇرسەن بولىدۇ ۋە سىزگە ياردەم بېرىدۇ! ئەمەلىيەتتە، يەھۋا بىزگە ۋەدە بەرگەنكى، ھېچنەرسە بىزنى ئۇنىڭ «مۇھەببىتىدىن ئايرىيالمايدۇ».—رىملىقلار 8:38، 39-نى ئوقۇڭ.
چوڭقۇرراق قېزىڭ
يەھۋا بىلەن تېخىمۇ ياخشىراق تونۇشۇش ۋە ئۇنىڭ ياردىمىنى قوبۇل قىلىش ئارقىلىق، سۇغا چۆمۈلدۈرۈلۈشكە توسالغۇ بولىدىغان قىيىنچىلىقلارنى قانداق يېڭەلەيدىغانلىقىڭىزنى بىلىۋېلىڭ.
4. يەھۋانى تېخىمۇ ياخشىراق تونۇڭ
سۇغا چۆمۈلدۈرۈلۈشتىن ئاۋۋال، يەھۋانى قانچىلىك ياخشى تونۇشىڭىز كېرەك؟ ئۇ ھەققىدە بىلگەنلىرىڭىز، سىزنى ئۇنى سۆيۈشكە ھەمدە خۇرسەن قىلىشقا ئۈندىشى لازىم. فىلىمنى كۆرۈپ، دۇنيانىڭ ھەرقايسى جاي-جايلىرىدىكى مۇقەددەس كىتابنى تەتقىق قىلىپ ئۆگەنگەنلەرنىڭ بۇ مۇھىم قەدەمنى قانداق باسقانلىقىنى بىلىۋېلىڭ.
بۇ فىلىمدا، بەزى كىشىلەرنىڭ چۆمۈلدۈرۈلۈشكە ئۆزىنى تەييارلىشىغا نېمە ياردەم بەرگەن؟
رىملىقلار 12:2-نى ئوقۇڭ، كېيىن تۆۋەندىكى سوئاللارغا جاۋاب بېرىڭ:
سىز مۇقەددەس كىتابتا ھەقىقەت يېزىلغانلىقىغا ياكى يەھۋا گۇۋاھچىلىرىنىڭ ھەقىقەتنى ئۆگىتىدىغانلىقىغا گۇمانلىنامسىز؟
ئەگەر گۇمانلىرىڭىز بار بولسا، نېمە قىلالايسىز؟
5. توسالغۇ بولىدىغان قىيىنچىلىقلارنى يېڭىڭ
بىز ھاياتىمىزنى يەھۋاغا بېغىشلاشنى ۋە سۇغا چۆمۈلدۈرۈلۈشنى قارار قىلغىنىمىزدا، ھەربىرىمىز قىيىنچىلىقلارغا دۇچ كېلىمىز. فىلىمنى كۆرۈڭ، كېيىن تۆۋەندىكى سوئاللار ئۈستىدە ئويلىنىپ كۆرۈڭ.
بۇ فىلىمدا، نارانگېرېل يەھۋاغا خىزمەت قىلىش ئۈچۈن قانداق توسالغۇلارنى يېڭىشى كېرەك ئىدى؟
ئۇنىڭ بۇ توسالغۇلارنى يېڭىشىگە يەھۋاغا بولغان سۆيگۈ-مۇھەببىتى قانداق ياردەم بەرگەن؟
پەندى-نەسىھەت 29:25 ۋە 2-تىموتىي 1:7-نى ئوقۇڭ، كېيىن تۆۋەندىكى سوئالغا جاۋاب بېرىڭ:
توسالغۇلارنى يېڭىش ئۈچۈن قانداق قىلىپ جاسارەتلىك بولالايمىز؟
6. يەھۋانىڭ ياردىمىگە ئىشىنىڭ
يەھۋا ئۆزى سىزنىڭ ئۇنى خۇرسەن قىلىشىڭىزغا ياردەم بېرىدۇ. فىلىمنى كۆرۈڭ، كېيىن تۆۋەندىكى سوئاللار ئۈستىدە ئويلىنىپ كۆرۈڭ.
بۇ فىلىمدا، مۇقەددەس كىتابنى ئۆگەنگەن كىشىنىڭ سۇغا چۆمۈلدۈرۈلۈشىگە نېمە توسالغۇ بولغان؟
نېمىنىڭ ياردىمىدە، ئۇ يەھۋاغا بولغان ئىشەنچىسىنى كۈچەيتكەن؟
يەشايا 41:10، 13-نى ئوقۇڭ، كېيىن تۆۋەندىكى سوئالغا جاۋاب بېرىڭ:
ھاياتىڭىزنى يەھۋاغا بېغىشلىغاندا بەرگەن ۋەدىڭىزنى ئورۇندىيالايدىغانلىقىڭىزغا، نېمە ئۈچۈن ئىشەنچ قىلالايسىز؟
7. يەھۋانىڭ سۆيگۈ-مۇھەببىتىگە بولغان مىننەتدارلىقىڭىزنى چوڭقۇرلاشتۇرۇڭ
يەھۋانىڭ سىزگە بولغان سۆيگۈ-مۇھەببىتى توغرىسىدا قانچە كۆپ ئويلانسىڭىز، مىننەتدارلىقىڭىز شۇنچە چوڭقۇرلىشىدۇ ۋە ئۇنىڭغا مەڭگۈ خىزمەت قىلىش ئىستىكىڭىز كۈچىيىدۇ. زەبۇر 40:5-نى ئوقۇڭ، كېيىن تۆۋەندىكى سوئالغا جاۋاب بېرىڭ:
يەھۋانىڭ قايسى بەرىكىتى ئۈچۈن سىز ئالاھىدە مىننەتدار؟
يەرەمىيا پەيغەمبەر يەھۋانى ۋە ئۇنىڭ سۆزىنى ياخشى كۆرگەن. ئۇ يەھۋانىڭ ئىسمى بىلەن ئاتىلىش شان-شەرىپى ئۈچۈن مىننەتدار بولغان. ئۇ: «سۆزلىرىڭ مېنى ئىپتىخارلاندۇرۇپ، قەلبىمنى شاد-خۇراملىققا چۆمدۈردى. چۈنكى، مەن سېنىڭ ئىسىمىڭ بىلەن ئاتالغانمەن، ئەي، تەڭرى يەھۋا!» (يەرەمىيا 15:16). تۆۋەندىكى سوئاللارغا جاۋاب بېرىڭ:
نېمە ئۈچۈن يەھۋا گۇۋاھچىسى بولۇش ئالاھىدە ئىمتىياز؟
چۆمۈلدۈرۈلۈشتىن ئۆتۈپ، يەھۋا گۇۋاھچىسى بولۇشنى خالامسىز؟
بۇنداق قىلىشىڭىزغا توسالغۇ بولىدىغان بىرەر نەرسە بارمۇ؟
سىزنىڭچە، چۆمۈلدۈرۈلۈش مەقسىتىگە يېتىش ئۈچۈن نېمىلەرنى قىلىشىڭىز كېرەك؟
بەزىلەر مۇنداق دەيدۇ: «چۆمۈلدۈرۈلگەندە بەرگەن ۋەدەمنى ئورۇنلىيالمايمەن دەپ قورقىمەن».
سىزمۇ شۇنداق ھېس قىلامسىز؟
خۇلاسە
يەھۋانىڭ ياردىمى بىلەن چۆمۈلدۈرۈلىشىڭىزگە توسالغۇ بولىدىغان ھەرقانداق قىيىنچىلىقلارنى يېڭىپ كېتەلەيسىز.
تەكرارلاش
سۇغا چۆمۈلدۈرۈلۈش ئۈچۈن مۇقەددەس كىتاب ھەققىدە قانچىلىك بىلىمىڭىز بولۇشى لازىم؟
چۆمۈلدۈرۈلۈشتىن ئاۋۋال قانداق ئۆزگەرتىشلەرنى قىلىشىڭىز كېرەك؟
نېمە ئۈچۈن قورقۇنچنىڭ چۆمۈلدۈرۈلىشىڭىزگە سىزگە توسالغۇ بولۇشىغا يول قويماسلىقىڭىز كېرەك؟
ئىزدىنىپ كۆرۈڭ
نېمە سەۋەبتىن سۇغا چۆمۈلدۈرۈلۈشنى قارار قىلىشىڭىز كېرەك؟
«سىز چۆمۈلدۈرۈلۈشكە تەييارمۇ؟» («كۈزىتىش مۇنارى»، 2020-يىل، 1-مارت)
سۇغا چۆمۈلدۈرۈلىشىڭىزگە قانداق ئىشلار توسالغۇ بولۇشى مۇمكىن؟ ئۇلارنى قانداق يېڭەلەيدىغانلىقىڭىزنى كۆرۈپ بېقىڭ.
«چۆمۈلدۈرۈلۈشىمگە نېمە توسقۇنلۇق قىلىدۇ؟» («كۈزىتىش مۇنارى»، 2019-يىل، 1-مارت)
بىر كىشىنىڭ چۆمۈلدۈرۈلۈشكە توسالغۇ بولىدىغان بەزى چوڭ قىيىنچىلىقلارنى قانداق يەڭگەنلىكىنى بىلىۋېلىڭ.
«نېمە ئۈچۈن تېخىغىچە چۆمۈلدۈرۈلۈشتىن ئۆتمىدىڭىز؟» (10:1)
دەسلەپتە، ئاتائا ئىسىملىك كىشى چۆمۈلدۈرۈلۈشتىن ئىككىلەنگەن. ئۇنىڭ بۇ مۇھىم قەدەمنى بېسىشىغا نېمە ياردەم بەرگەنلىكىنى كۆرۈپ بېقىڭ.