37-دەرس
مۇقەددەس كىتاب ئىش-ئەمگەك ۋە پۇل ھەققىدە نېمە دەيدۇ؟
ئىش ياكى پۇل توغرۇلۇق غەم-ئەندىشە قىلىپ، كۆڭلىمىز خاتىرجەم بولمىغان چاغلار بولغانمۇ؟ بىر تەرەپتىن زۆرۈر ئېھتىياجلىرىمىزنى قامداش، يەنە بىر تەرەپتىن يەھۋا قوبۇل قىلىدىغان ئۇسۇلدا ئۇنىڭغا ئىبادەت قىلىش ئاسانغا توختىمايدۇ. مۇقەددەس كىتاب بىزگە ياردەم بېرەلەيدىغان ئەمەلىي مەسلىھەتلەرنى بېرىدۇ.
1. مۇقەددەس كىتاب ئىش-ئەمگەك ھەققىدە نېمە دەيدۇ؟
خۇدا بىزنىڭ ئىش-ئەمگەك ياكى ئەجىر-مېھنىتىمىزنىڭ ھالاۋىتىنى كۆرۈشىمىزنى خالايدۇ. مۇقەددەس كىتابتا مۇنداق دېيىلگەن: «ئىنسان ئۈچۈن يەپ-ئىچىپ، قىلغان ئەجىر-مېھنىتىدىن ھۇزۇرلىنىشتىن ئارتۇق ياخشى ئىش يوق ئىكەن» (ۋەز 2:24). يەھۋا ئىشچان خۇدادۇر. بىزمۇ ئۇنى ئۈلگە قىلىپ، ئىشچان بولساق، ئۇنىڭ كۆڭلىنى خۇرسەن قىلىمىز ۋە ئۆز كۆڭلىمىزمۇ قانائەت تاپىدۇ.
ئىش-ئەمگەك بەك مۇھىم! بىراق، ئۇنىڭ يەھۋاغا ئىبادەت قىلىشتىنمۇ مۇھىمراق ئورۇننى ئىگەللىشىگە يول بەرمەسلىكىمىز لازىم (يۇھاننا 6:27). يەھۋا شۇنداق ۋەدە بېرىدۇكى، ئەگەر ھاياتىمىزدا ئۇنى بىرىنچى ئورۇنغا قويساق، ئۇ تۇرمۇشىمىزدىكى زۆرۈر ئېھتىياجلىرىمىزنى تەمىنلەپ بېرىدۇ.
2. پۇلغا تەڭپۇڭ كۆزقاراشتا بولۇش دېگەن نېمە؟
مۇقەددەس كىتاب پۇلنىڭ كىشىنى قوغدايدىغانلىقىنى ئېيتىدۇ. ئۇ يەنە پەقەت پۇل بولسىلا، خۇشاللىق تاپالايمەن دەپ ئويلىماسلىق ھەققىدە ئاگاھلاندۇرىدۇ (ۋەز 7:12). شۇڭا، ئۇ بىزنى پۇلپەرەس بولماي، بەلكى «بارىغا قانائەت قىلىڭلار» دەپ ئۈندەيدۇ (ئىبرانىيلار 13:5-نى ئوقۇڭ). بىز ئۆزىمىزدە بارىغا قانائەت قىلساق، دائىم تېخىمۇ كۆپرەك نەرسىلەرگە ئېرىشىشنى ئارزۇ قىلمايمىز. قەرزگە بوغۇلۇشتىن ساقلىنىمىز (پەندى-نەسىھەت 22:7). قىمار ئويناش ۋە تېزراق باي بولۇش ئۈچۈن ئالدامچىلىق قىلىشتىن يىراق تۇرىمىز.
3. قانداق سېخىي بولالايمىز؟
يەھۋا سېخىي خۇدادۇر. بىز مەرت ياكى قولى ئوچۇق بولساق، ئۇنى ئۈلگە قىلىمىز (1-تىموتىي 6:18). جامائەتنى قوللاپ-قۇۋۋەتلەش ۋە مۇھتاجلىقتا قالغانلارغا، بولۇپمۇ ئېتىقادداشلىرىمىزغا ياردەم قولىمىزنى سۇنۇش ئارقىلىق پۇلىمىزنى سېخىيلىق بىلەن ئىشلىتەلەيمىز. يەھۋا بىزنىڭ قانچىلىك بەرگەنلىكىمىزگە ئەمەس، بەلكى نىيىتىمىزگە قارايدۇ. ئەگەر چىن قەلبىمىزدىن سېخىيلىق بىلەن بەرسەك، ئۆزىمىز خۇشال بولىمىز ۋە يەھۋانىڭ كۆڭلىنى خۇرسەن قىلىمىز.—ئەلچىلەر 20:35-نى ئوقۇڭ.
چوڭقۇرراق قېزىڭ
ئىش-ئەمگەككە توغرا كۆزقاراشتا بولۇش ۋە بارىغا قانائەت قىلىشنىڭ قانداق پايدىسى بارلىقىنى بىلىۋېلىڭ.
4. ئىشچان بولۇپ، يەھۋاغا شان-شەرەپ كەلتۈرۈڭ
يەھۋا بىلەن بولغان دوستلىقىمىز ئىش-ئەمگەككە بولغان كۆزقارىشىمىزغا تەسىر كۆرسىتىشى كېرەك. فىلىمنى كۆرۈڭ، كېيىن تۆۋەندىكى سوئاللار ئۈستىدە ئويلىنىپ كۆرۈڭ.
بۇ فىلىمدا، جېيسوننىڭ ئۆز ئىشىغا بولغان كۆزقارىشى ۋە ئىش ئورنىدىكى ھەرىكىتى سىزگە قانداق تەسىر قىلدى؟
ئۇ ئۆز ئىشىغا تەڭپۇڭ كۆزقاراشنى ساقلاش ئۈچۈن نېمە قىلدى؟
كولوسىلىقلار 3:23، 24-نى ئوقۇڭ، كېيىن تۆۋەندىكى سوئالغا جاۋاب بېرىڭ:
نېمە ئۈچۈن ئىش-ئەمگەككە بولغان كۆزقارىشىمىز مۇھىم؟
ئىش-ئەمگەك بەك مۇھىم. بىراق، ئۇنىڭ ياراتقۇچى يەھۋاغا ئىبادەت قىلىشتىنمۇ مۇھىمراق ئورۇننى ئىگەللىشىگە يول بەرمەسلىكىمىز لازىم
5. قانائەتچان بولۇشنىڭ پايدىسى
نۇرغۇن كىشىلەر پۈتۈن كۈچى بىلەن كۆپرەك پۇل تېپىشقا تىرىشىدۇ. ئەمما، مۇقەددەس كىتاب بۇ توغرىسىدا بىزگە باشقىچە نەسىھەت بېرىدۇ. 1-تىموتىي 6:6–8-نى ئوقۇڭ، كېيىن تۆۋەندىكى سوئالغا جاۋاب بېرىڭ:
مۇقەددەس كىتاب بىزنى نېمە قىلىشقا ئۈندەيدۇ؟
گەرچە پۇلىمىز بەك ئاز بولسىمۇ، بىز خۇشال بولالايمىز. فىلىمنى كۆرۈڭ، كېيىن تۆۋەندىكى سوئال ئۈستىدە ئويلىنىپ كۆرۈڭ.
پۇلى ئاز بولۇشىغا قارىماي، بۇ ئائىلىنى نېمە خۇشال قىلىدۇ؟
ئەمما، كۆپ پۇلىمىز بولسا، يەنە تېخىمۇ كۆپرەك بولۇشىنى خالىساقچۇ؟ ئەيسا بۇنىڭ خەۋپ-خەتىرىنى تەمسىل ئارقىلىق چۈشەندۈرگەن. ئۇنىڭ تەمسىلىدىن نېمىنى ئۆگەندىڭىز؟ لۇقا 12:15–21-نى ئوقۇڭ، كېيىن تۆۋەندىكى سوئالغا جاۋاب بېرىڭ:
ئەيسا مەسىھنىڭ تەمسىلىدىن نېمىنى ئۆگەندىڭىز؟ —15-ئايەتنى كۆرۈڭ.
پەندى-نەسىھەت 10:22 ۋە 1-تىموتىي 6:10-نى ئوقۇڭ ۋە سېلىشتۇرۇڭ. كېيىن تۆۋەندىكى سوئاللارغا جاۋاب بېرىڭ:
سىزنىڭچە، قايسىسى مۇھىمراق: يەھۋا بىلەن بولغان دوستلۇقمۇ ياكى كۆپرەك پۇل تېپىشمۇ؟ نېمە ئۈچۈن؟
پۇل تېپىشقا بېشى بىلەن كىرىپ كېتىش قانداق ئاقىۋەتكە دۇچار قىلىدۇ؟
6. يەھۋا زۆرۈر ئېھتىياجلىرىمىزنى تەمىنلەپ بېرىدۇ
ئىش-ئەمگەك ۋە پۇل بىلەن مۇناسىۋەتلىك قىيىنچىلىقلار يەھۋاغا بولغان ئىمان-ئېتىقادىمىزنى سىنىشى مۇمكىن. فىلىمنى كۆرۈڭ ۋە ئىمان-ئېتىقادىمىز شۇنداق سىناقلارغا دۇچ كەلگەندە، نېمە قىلالايدىغانلىقىمىزنى بىلىۋېلىڭ. كېيىن تۆۋەندىكى سوئاللار ئۈستىدە ئويلىنىپ كۆرۈڭ.
بۇ فىلىمدا، بۇرادەر قانداق قىيىنچىلىقلارغا دۇچ كەلدى؟
ئۇ قىيىنچىلىقلارنى يېڭىش ئۈچۈن نېمە قىلدى؟
مەتتا 6:25–34-نى ئوقۇڭ، كېيىن تۆۋەندىكى سوئالغا جاۋاب بېرىڭ:
خۇدا پادىشاھلىقىنى بىرىنچى ئورۇنغا قويغانلارغا، ئۇ نېمە قىلىشنى ۋەدە قىلىدۇ؟
بەزىلەر مۇنداق دەيدۇ: «ئائىلەمنى بېقىش ئۈچۈن جاپالىق ئىشلىشىم كېرەك. ھەر ھەپتە جامائەت يىغىلىشلىرىغا بارالمايمەن».
قايسى ئايەت سىزنى، يەھۋاغا ئىبادەت قىلىشنى بىرىنچى ئورۇنغا قويۇشنىڭ ھەردائىم ئەڭ ياخشى قارار ئىكەنلىكىگە ئىشەندۈرىدۇ؟
خۇلاسە
ئەلۋەتتە، ئىش-ئەمگەك قىلىش ۋە پۇل تېپىش زۆرۈر، بىراق ئۇلار ھەرگىزمۇ يەھۋاغا ئىبادەت قىلىشىمىزغا توسقۇنلۇق قىلماسلىقى كېرەك.
تەكرارلاش
ئىش-ئەمگەككە تەڭپۇڭ كۆزقاراشنى ساقلىشىڭىزغا نېمە ياردەم بېرەلەيدۇ؟
سىز ئۈچۈن قانائەتچان بولۇشنىڭ قانداق پايدىسى بار؟
يەھۋانىڭ ئۆز خەلقىنى تەمىنلەپ بېرىدىغانلىقىغا بولغان ئىشەنچىڭىزنى قانداق كۆرسىتەلەيسىز؟
ئىزدىنىپ كۆرۈڭ
مۇقەددەس كىتاب پۇل توغرۇلۇق نېمە دېگەنلىكىنى بىلىۋېلىڭ.
«پۇل ھەقىقەتەن بارچە يامانلىقنىڭ يىلتىزىمۇ؟» (تور بېكەتتىكى ماقالە)
پۇلنى خۇدانى خۇرسەن قىلىدىغان ئۇسۇلدا ئىشلىتىشنى بىلىۋېلىڭ.
«مۇقەددەس كىتاب باشقىلارغا بېرىش توغرۇلۇق نېمە دەيدۇ؟» (تور بېكەتتىكى ماقالە)
قىمار زىيانسىز ئويۇنلارمۇ؟
«قىمار توغرۇلۇق مۇقەددەس كىتاب نېمە دەيدۇ؟» («ئويغىنىش!»، 2015-يىل، مارت)
بىر كىشىنىڭ قىمار ئويناش ۋە ئوغرىلىق قىلىشنى توختىتىشىغا نېمە ياردەم بەرگەنلىكىنى بىلىۋېلىڭ.
«ئات بەيگە قىمار ئويۇنىغا خۇمار ئىدىم» («كۈزىتىش مۇنارى»، 2011-يىل، 1-نويابىر)