38-دەرس
خۇدا سوۋغا قىلغان ھاياتنى قەدىرلەڭ
ھاياتتا بىز قىلالايدىغان ۋە ھۇزۇر ئالالايدىغان ئاجايىپ ئىشلار بار. ھەتتا تۇرمۇشىمىزدا تۈرلۈك قىيىنچىلىقلارنى باشتىن ئۆتكۈزسەكمۇ، ئادەتتە كۆڭلىمىزنى سۆيۈندۈرۈپ، بىزنى خۇشال قىلىدىغان باشقا بەزى ئىشلارمۇ بار. ھايات سوۋغىسىغا مىننەتدارلىقىمىزنى قانداق كۆرسىتەلەيمىز ۋە بۇنداق قىلىشنىڭ ئەڭ مۇھىم سەۋەبى نېمە؟
1. نېمە ئۈچۈن ھاياتنى قەدىرلىشىمىز كېرەك؟
بىز ھاياتنى قەدىرلىشىمىز كېرەك، چۈنكى بۇ كۆيۈمچان ئاتىمىز يەھۋانىڭ بىزگە بەرگەن سوۋغىسى. ئۇ پۈتكۈل ھاياتلىقنى ياراتقاچ، ھاياتنىڭ مەنبەسىدۇر (زەبۇر 36:9). «ھەممىسىگە ھايات، نەپەس ۋە بارچە نەرسىنى بەرگۈچى ئۇ ئۆزىدۇر» (ئەلچىلەر 17:25، 28). ياراتقۇچى يەھۋا ھايات كەچۈرۈشىمىز ئۈچۈن كېرەكلىك ھەممە نەرسىلەرنى بېرىۋاتىدۇ. ئۇنىڭدىن باشقا، ئۇ بىزنىڭ ھاياتتىن زوقلىنىپ، شاد-خۇرام ياشىشىمىز ئۈچۈن بارچە شارائىتلارنى ھازىرلاپ بېرىۋاتىدۇ.—ئەلچىلەر 14:17-نى ئوقۇڭ.
2. ھاياتلىق سوۋغىسىنى قەدىرلەيدىغانلىقىمىزنى يەھۋاغا قانداق كۆرسىتەلەيمىز؟
ئانىڭىزنىڭ قوسىقىدا پەيدا بولغان ۋاقتىڭىزدىن باشلاپ، يەھۋا سىزگە كۆڭۈل بۆلۈپ كەلدى. داۋۇت پەيغەمبەر خۇدانىڭ ئىلھاملاندۇرۇشى بىلەن مۇنداق سۆزلەرنى يازغان ئىدى: «مەن تېخى تۆرەلمە ھالەتتە، سېنىڭ كۆزلىرىڭ مېنى كۆردى» (زەبۇر 139:16). يەھۋا ھاياتىڭىزنى ئىنتايىن قەدىرلەيدۇ (مەتتا 10:29–31-نى ئوقۇڭ). كىمكى قەستەن بىرىنى ئۆلتۈرسە، ھەتتا ئۆزىنى ئۆلتۈرۈۋالسا، يەھۋانىڭ كۆڭلىنى قاتتىق ئاغرىتىدۇa (چىقىش 20:13). ئەگەر نادانلىق قىلىپ، ئۆز ھاياتىمىزنى خەتەرگە تەۋەككۈل قىلساق ياكى بېخەتەرلىك چارە-تەدبىرلىرىنى قوللانماي، باشقىلارنىڭ ھاياتىغا خەۋپ يەتكۈزسەكمۇ، يەھۋانىڭ كۆڭلى ئاغرىيدۇ. ئۆز تېنىمىزنى ئاسراپ، باشقىلارنىڭ ھاياتىنى قەدىرلىسەك، ياراتقۇچىمىز بەرگەن ھاياتلىق سوۋغىسىنى قەدىرلەيدىغانلىقىمىزنى كۆرسىتىمىز.
چوڭقۇرراق قېزىڭ
ھاياتلىق سوۋغىسى ئۈچۈن مىننەتدارلىقىڭىزنى كۆرسىتىشنىڭ بەزى يوللىرىنى بىلىۋېلىڭ.
3. تەن ساغلاملىقىڭىزغا كۆڭۈل بۆلۈڭ
ئۆزىنى ياراتقۇچى يەھۋاغا بېغىشلىغان بارلىق مەسىھ ئەگەشكۈچىلىرى پۈتۈن ھاياتىنى ئۇنىڭغا خىزمەت قىلىشقا ئاتىغان. ئۇلار تەنلىرىنى خۇددى قۇربانلىق كەبى خۇداغا تەغدىم قىلىدۇ. رىملىقلار 12:1، 2-نى ئوقۇڭ، كېيىن تۆۋەندىكى سوئاللارغا جاۋاب بېرىڭ:
سىزنى تەن ساغلاملىقىڭىزغا كۆڭۈل بۆلۈشكە نېمە دەۋەت قىلىدۇ؟
تەن ساغلاملىقىڭىزغا كۆڭۈل بۆلۈش ئۈچۈن نېمىلەرنى قىلالايسىز؟
4. بىخەتەرلىككە دىققەت قىلىپ، زىيان-زەخمەت ياكى بالا-قازادىن ساقلىنىڭ
مۇقەددەس كىتاب بىزنى خەتەرلىك ئىش-ھەرىكەتلەردىن ساقلىنىشقا دەۋەت قىلىدۇ. فىلىمنى كۆرۈڭ ۋە بىخەتەر بولۇش ئۈچۈن قانداق مەسلىھەتلەر بېرىلگەنلىكىنى بىلىۋېلىڭ.
پەندى-نەسىھەت 22:3-نى ئوقۇڭ، كېيىن ئۆزىڭىز ۋە باشقىلارنىڭ بىخەتەرلىكى ھەققىدە چوڭقۇر ئويلىنىپ كۆرۈڭ:
ئۆيىڭىزدە
ئىش ئورنىدا
تەنتەربىيە ئويۇنلىرىنى ئوينىغاندا
قاتناش قوراللىرىنى ھەيدىگەندە ياكى ئولتۇرغاندا
5. ئانىنىڭ قورسىقىدىكى بالىنىڭ ھاياتىنى قەدىرلەڭ
داۋۇت پەيغەمبەر يەھۋانىڭ ئانىنىڭ قورسىقىدىكى بالىنىڭ ھاياتىغا، يەنى تۆرەلمىنىڭ يېتىلىشىگە كۆڭۈل بۆلىدىغانلىقىنى شېئىرىي تىل بىلەن ئىپادىلىگەن ئىدى. زەبۇر 139:13–17-نى ئوقۇڭ، كېيىن تۆۋەندىكى سوئالغا جاۋاب بېرىڭ:
يەھۋانىڭ نەزەرىدە، ئادەمنىڭ ھاياتى ئانىنىڭ قوسىقىدا باشلىنامدۇ ياكى تۇغۇلغان ۋاقىتتىمۇ؟
يەھۋانىڭ ئىسرائىللارغا قەدىمدە چۈشەرگەن قانۇنلىرى ھامىلدار ئانىلارنى ۋە ئۇلارنىڭ تۇغۇلمىغان بالىلىرىنى قوغدىغان ئىدى. چىقىش 21:22، 23-نى ئوقۇڭ، كېيىن تۆۋەندىكى سوئاللارغا جاۋاب بېرىڭ:
بىر كىشى ئېھتىياتسىزلىقتىن تۇغۇلمىغان بالىنىڭ ئۆلۈشىگە سەۋەبچى بولسا، يەھۋا بۇنىڭغا قانداق كۆزقاراشتا بولغان؟
بىر كىشى قەستەن شۇنداق قىلسا، يەھۋا قانداق ھېس-تۇيغۇدا بولىدۇ؟b
سىز يەھۋانىڭ كۆزقارىشىغا قانداق قارايسىز؟
ھەتتا ھاياتنىڭ قەدىر-قىممەتلىك ئىكەنلىكىنى چۈشىنىدىغان ئايالمۇ بالا چۈشۈرۈشنى بىردىن-بىر تاللاش يولى دەپ قارىشى مۇمكىن. يەشايا 41:10-نى ئوقۇڭ، كېيىن تۆۋەندىكى سوئاللارغا جاۋاب بېرىڭ:
بالا چۈشۈرۈش مەسىلىسىدە، ئايال ئېغىر بېسىمغا دۇچ كەلسە، ئۇ كىمدىن ياردەم سورىيالايدۇ؟ نېمە ئۈچۈن؟
بەزىلەر مۇنداق دەيدۇ: «ھەرقانداق بىر ئايالنىڭ بالا چۈشۈرۈشنى تاللاش-تاللىماسلىق ھوقۇقى بار. چۈنكى، بۇ ئۇنىڭ تېنى».
نېمە ئانا ۋە توغۇلمىغان بالىنىڭ ھاياتىنى يەھۋانىڭ قەدىرلەيدىغانلىقىغا سىزنى ئىشەندۈرىدۇ؟
خۇلاسە
مۇقەددەس كىتاب بىزگە، ياراتقۇچى يەھۋا سوۋغا قىلغان ھاياتنى سۆيۈش، ھۆرمەتلەش ۋە ئاسراپ قوغداشنى ئۆگىتىدۇ. بۇ ئۆزىمىزنىڭمۇ ۋە باشقىلارنىڭمۇ ھاياتىنى ئۆز ئىچىگە ئالىدۇ.
تەكرارلاش
نېمە ئۈچۈن يەھۋا ئىنساننىڭ ھاياتىنى قەدىرلەيدۇ؟
كىشى قەستەن ئادەم ئۆلتۈرسە ياكى ئۆلۈۋالسا، يەھۋا قانداق ھېس-تۇيغۇدا بولىدۇ؟
نېمە ئۈچۈن ھاياتلىق سوۋغىسىنى قەدىرلەيسىز؟
ئىزدىنىپ كۆرۈڭ
ياراتقۇچى يەھۋاغا ھايات سوۋغىسى ئۈچۈن مىننەتدارلىقىمىزنى قانداق بىلدۈرەلەيمىز؟
خۇدا بالا چۈشۈرگەن ئايالنى كەچۈرەمدۇ؟
«مۇقەددەس كىتابتا بالا چۈشۈرۈش توغرۇلۇق نېمە يېزىلغان؟» (تور بېكەتتىكى ماقالە)
كۆڭۈل ئېچىش تۈرلىرىنى تاللاش قارارىغا خۇدانىڭ كۆزقارىشى قانداق تەسىر قىلىشى كېرەكلىكىنى بىلىۋېلىڭ.
كىشى ئۆزىنى ئۆلتۈرۈۋېلىش توغرۇلۇق ئويلاپ يۈرگەن بولسا، مۇقەددەس كىتاب ئۇنىڭغا ياردەم بېرەلەمدۇ؟
a يەھۋا يۈرىكى ئېزىلگەنلەرگە ئىنتايىن كۆڭۈل بۆلىدۇ (زەبۇر 34:18). ئۇ ئازابلىق ھېس-تۇيغۇلار سەۋەبلىك كىشىلەرنىڭ ئۆلۈۋېلىشنى ئويلايدىغانلىقىنى چۈشىنىدۇ. شۇڭا، ياراتقۇچىمىز بۇنداق ئوي-خىيالدا بولغان كىشىگە ياردەم بېرىشنى خالايدۇ. خۇدانىڭ ياردىمىدە، شۇنداق ئوي-خىيالدىن قۇتۇلالىغان كىشىنىڭ نېمە دېگەنلىكىنى بىلىش ئۈچۈن، بۇ دەرسنىڭ «ئىزدىنىپ كۆرۈڭ» دېگەن بۆلىكىدە كۆرسىتىلگەن «مەن ئۆلۈۋېلىشنى ئويلايمەن. شۇنداق ئوي-پىكىردە بولغاندا، مۇقەددەس كىتاب ماڭا ياردەم بېرەلەمدۇ؟» ناملىق ماقالىنى ئوقۇڭ.
b ئىلگىرى بالا چۈشۈرگەن ئايال، بەلكىم ئۆزىنى ئەيىبلەپ، ۋىجدان ئازابى تارتىشى مۇمكىن. ياراتقۇچى يەھۋا ئۇلارنى كەچۈرۈۋېتەلەيدۇ. كۆپرەك مەلۇماتلارنى ئېلىش ئۈچۈن، بۇ دەرسنىڭ «ئىزدىنىپ كۆرۈڭ» دېگەن بۆلىكىدە كۆرسىتىلگەن «مۇقەددەس كىتابتا بالا چۈشۈرۈش توغرۇلۇق نېمە يېزىلغان؟» ناملىق ماقالىنى ئوقۇڭ.