يەرنى مىراس ئېلىشقا تەييارمۇسىز؟
ھەممىمىز ئەيسانىڭ «مۇلايىم كىشىلەر بەختلىك، چۈنكى ئۇلار يەر يۈزىنى مىراس ئالىدۇ» دېگەن ۋەدىسىنىڭ ئەمەلگە ئېشىشىنى تەقەززالىق بىلەن كۈتىۋاتىمىز (مەتتا 5:5). مەسىھ قىلىنغان ئېتىقادچىلار ئاسماندا پادىشاھلار بولۇپ، ئەيسا مەسىھ بىلەن بىرلىكتە ھۆكۈمرانلىق قىلغاندا يەرنى مىراس ئالىدۇ (ۋەھىي. 5:10؛ 20:6). خۇدانىڭ ھەقىقىي خىزمەتچىلىرىنىڭ كۆپىنچىسى يەر يۈزىنى مىراس ئېلىپ، مۇكەممەل ھالەتتە، تىنچ-ئامانلىق، شاد-خۇراملىق ئىچىدە مەڭگۈ ياشاشنى تۆت كۆزى بىلەن كۈتىۋاتىدۇ. شۇنداق ياشاش ئىمكانىيىتىگە ئېرىشىش ئۈچۈن، ئۇلار مۇھىم خىزمەتنى قىلىشى كېرەك. مەسىلەن، ئۇلار يەرنى جەننەتكە ئايلاندۇرۇشى، تىرىلگەنلەرنىڭ ئېھتىياجلىرىنى تەمىنلەپ بېرىشى ۋە ئۇلارغا تەلىم بېرىشى لازىم. بىز بۇ ئىشلارغا قاتنىشىشنى خالايدىغانلىقىمىزنى ھازىرنىڭ ئۆزىدە قانداق كۆرسىتەلەيدىغانلىقىمىزنى كۆرۈپ باقايلى.
يەرنى جەننەتكە ئايلاندۇرۇشقا تەييارمۇسىز؟
پەرۋەردىگار يەھۋا ئادەملەرگە: «يەر يۈزىنى تولدۇرۇپ، ئۇنى بويسۇندۇرۇڭلار»،— دېگەندە، پۈتۈن يەر يۈزىنى ئاستا-ئاستا جەننەتكە ئايلاندۇرۇشنى بۇيرۇغان (يارىت. 1:28). خۇدانىڭ ئەسلى نىيەت-مەقسىتىنى ئەمدى يەرنى مىراس ئالىدىغانلار ئەمەلگە ئاشۇرالايدۇ. ئۇلار ھەممىنى بېشىدىن باشلايدۇ، چۈنكى ھازىر ئېرەم بېغى يوق. ئارماگېدوندىن كېيىن، ئۇلارغا يەر يۈزىنىڭ ۋەيران قىلىنغان جايلىرىنى تازىلاشقا توغرا كېلىدۇ. بۇنىڭ ئۈچۈن كۆپ كۈچ چىقىرىپ ئىشلەش كېرەك!
بابىلوندىن يۇرتىغا قايتقان ئىسرائىللارغىمۇ بۇنىڭغا ئوخشاش بىر ئىش تاپشۇرۇلغان. ئۇلارنىڭ يۇرتىدا 70 يىل ئادەم ياشىمىغان ئىدى. لېكىن، يەشايا پەيغەمبەر ئۇلار يەھۋانىڭ ياردىمىدە يۇرت ماكانىنى ئەسلىگە كەلتۈرەلەيدىغانلىقىنى ئالدىن-ئالا ئېيتقان ئىدى. بېشارەتتە شۇنداق دېيىلگەن: «ئۇ ئۇنىڭ قاقاس چۆلىنى ئېرەم بېغىدەك قىلىدۇ ۋە باياۋانلىرىنى يەھۋانىڭ بېغىدەك قىلىدۇ» (يەشايا 51:3). ئىسرائىللار يەھۋانىڭ ياردىمىدە گۈزەل يۇرت ماكانىنى قۇرۇپ چىقالىغان ئىدى. كەلگۈسىدە يەرنى مىراسقا ئالىدىغانلارمۇ ئوخشاشلا يەھۋانىڭ ياردىمى بىلەن يەر يۈزىنى گۈزەل جەننەتكە ئايلاندۇرالايدۇ. سىز بۇ ئىشقا قاتناشماقچى بولغانلىقىڭىزنى ھازىر كۆرسىتەلەيسىز.
مەسىلەن، ئۆيىڭىزنى ۋە ئۆيىڭىزنىڭ ئۆپ-چۆرىسىنى پاكىز-رەتلىك ۋە سەرەمجان تۇتالايسىز. قوشنىلىرىڭىز پاكىزلىقنى ئانچە ياخشى كۆرمىسىمۇ، ئۆز ئادىتىڭىزنى تاشلىماڭ. شۇنداقلا يىغىلىش زالى ۋە چوڭ يىغىلىش سارىيىنى ئاسراش ۋە پاكىزە تۇتۇش ئىشلىرىغا قاتنىشىڭ. ئەگەر مۇمكىنچىلىكىڭىز بولسا، سىزنىڭ رايونىڭىزدىكى تەبىئىي ئاپەتكە ئۇچرىغانلارغا ياردەم بېرىش ئۈچۈن پىدائىي خىزمەتچى بولۇش ئىلتىماسىنى تولدۇرۇڭ. شۇ چاغدىلا، قېرىنداشلار كېرەك بولغاندا، سىزنىڭ ياردەم قولىڭىزنى سۇنۇشقا تەييار ئىكەنلىكىڭىزنى بىلىدۇ. ئويلىنىپ كۆرۈڭ: «ئەگەر يەرنى مىراس ئالسام، قانداق ياردەم بېرىشىم مۇمكىن؟ بەزى ھۈنەر ياكى ماھارەتلەرنى ھازىر ئۆگىنەلەيمەنمۇ؟»
تىرىلگەنلەرگە ياردەم بېرىشكە تەييارمۇسىز؟
ئەيسا يائېرنىڭ قىزىنى تىرىلدۇرگەندىن كېيىن دەرھال ئۇنىڭغا تاماق بېرىشنى ئېيتقان (ماركۇس 5:42، 43). ئەلۋەتتە، 12 ياشلىق قىزنى قورسىقىنى تويغۇزۇش قىيىن ئەمەس. ئەمما، ئويلاپ كۆرۈڭ: «قەبىرلەردە بولغانلارنىڭ ھەممىسى» ئەيسانىڭ ئاۋازىنى ئاڭلاپ، قەبىردىن چىققاندا، ئىش قانچىلىك كۆپ بولىدۇ! (يۇھاننا 5:28، 29). مۇقەددەس كىتابتا بۇ ۋاقىت توغرۇلۇق نۇرغۇن تەپسىلاتلار بولمىسىمۇ، تىرىلدۈرۈلگەنلەرنىڭ يەيدىغان تاماق، تۇرىدىغان جاي، كىيىدىغان كىيىم-كېچەككە ئېھتىياجى بولىدىغانلىقى شەك-شۈبھىسىزدۇر. ئۇلارغا ياردەم بېرىشكە تەييار ئىكەنلىكىڭىزنى ھازىرنىڭ ئۆزىدە كۆرسىتەلەمسىز؟ مۇشۇ نەرسىلەر ھەققىدە ئويلىنىپ كۆرۈڭ.
يەرنى مىراس ئېلىشقا تەييار ئىكەنلىكىڭىزنى بۈگۈن قانداق كۆرسىتەلەيسىز؟
رايونغا مەسئۇل ئاقساقال جامائىتىڭىزگە كېلىدىغانلىقىنى ئېلان قىلغاندا، ئۇنى چۈشلۈك تاماققا چاقىرالامسىز؟ بەيتەلدىن مەخسۇس تولۇق ۋاقىتلىق خىزمەتچىسىنىڭ جامائىتىڭىزگە تەيىنلەپ ئەۋەتسە ياكى رايونغا مەسئۇل ئاقساقال خىزمىتىنى ئاخىرلاشتۇرسا، ئۇلارنىڭ تۇرىدىغانغا جاي تېپىشىغا ياردەم بېرەلەمسىز؟ سىز تۇرىدىغان جايدا رايونلۇق بىر كۈنلۈك ياكى ئۈچ كۈنلۈك مەخسۇس چوڭ يىغىلىش ئۆتكۈزۈلمەكچى بولسا، چوڭ يىغىلىشتىن بۇرۇن ياكى ئۇنىڭدىن كېيىن پىدائىي بولۇپ خىزمەت قىلالامسىز؟ ياكى بولمىسا، كەلگەن قېرىنداشلارنى قارشى ئېلىشقا ياردەم بېرەلەمسىز؟
تىرىلگەنلەرگە تەلىم بېرىشكە تەييارمۇسىز؟
ئەلچىلەر 24:15-ئايەتكە ئاساسلانغاندا، بىز مىلياردلىغان ئادەملەر تىرىلىدۇ دەپ ئۈمىد قىلىمىز. ئۇلارنىڭ ئارىسىدا ھەق خۇدا يەھۋا توغرۇلۇق بىلمەيدىغانلار كۆپ بولىدۇ. شۇ چاغدا، ئۇلار ھەقىقەت توغرىسىدا بىلىم ئېلىش پۇرسىتىگە ئېرىشىدۇa. يەھۋانىڭ سادىق، تەجرىبىلىك خىزمەتچىلىرى ئۇلارغا تەلىم بېرىدۇ (يەشايا 11:9). ياۋرۇپا، جەنۇبىي ئامېرىكا ۋە ئافرىقىدا خىزمەت قىلغان شارلوت ئىسىملىك قېرىنداش بۇ ۋاقىتنى تۆت كۆزى بىلەن كۈتىۋاتىدۇ. ئۇ مۇنداق دەيدۇ: «تىرىلدۈرۈلگەلەرگە تەلىم بېرىدىغان ۋاقىتنى تەقەززالىق بىلەن كۈتىۋاتىمەن. قەدىمدە ياشىغان بىرى توغرۇلۇق ئوقۇغاندا، بۇ كىشى يەھۋانى بىلگەن بولسا، ھاياتى تامامەن باشقىچە بولغان بولاتتى دەپ ئويلايمەن. مەن تىرىلگەنلەرگە ياراتقۇچى يەھۋانى تونۇپ، ئۇنىڭغا خىزمەت قىلسا، ھاياتىنىڭ قانچىلىك ئەھمىيەتلىك ئۆتىدىغانلىقىنى ئېيتىپ بېرىشكە تەشنا!»
ھەتتا ئەيسانىڭ زامانىدىن بۇرۇن ياشىغان خۇدانىڭ سادىق خىزمەتچىلىرى كۆپ نەرسىلەرنى ئۆگىنىشكە توغرا كېلىدۇ. مەسىلەن، دانىيال پەيغەمبەرگە ئۆزى يازغان، لېكىن ئاخىرىغىچە چۈشەنمىگەن بېشارەتلەرنىڭ قانداق ئەمەلگە ئاشقانلىقىنى ئېيتىپ بېرىش، نېمە دېگەن چوڭ شان-شەرەپ! (دانىيال 12:8). ياكى رۇت بىلەن نائومىغا ئۇلارنىڭ ئەۋلادىدىن ۋەدە قىلىنغان مەسىھ چىققانلىقىنى ئېيتىپ بېرىش كىشىنى بەكمۇ ھاياجانلاندۇرىدۇ! شۇ چاغدا، بىز بۇ رەزىل دۇنيانىڭ بېسىمىغا ئۇچرىماي، شاد-خۇراملىق ئىچىدە پۈتۈن يەر يۈزىدە ئەركىن-ئازادە تىرىلدۈرۈلگەنلەرگە تەلىم-تەربىيە بېرىمىز. بۇندىنمۇ ئارتۇق خۇشاللىق بولماس كىشىگە!
بۇ تەلىم-تەربىيە ئىشلىرىغا قاتنىشىش ئۈچۈن ھازىردىن باشلاپ قانداق تەييارلىق قىلالايسىز؟ بىر يولى — تەلىم بېرىش ماھارىتىڭىزنى ئاشۇرۇش ۋە دۇنيانىڭ جاي-جايلىرىدا ئېلىپ بېرىلىۋاتقان ۋەز ئېيتىش خىزمىتىگە دائىم قاتنىشىش (مەتتا 24:14). ھازىرقى ۋەزىيىتىڭىز ياكى يېشىڭىز سەۋەبلىك، بۇ ئىشقا تولۇق قاتنىشىشقا ئىمكانىيىتىڭىز يار بەرمىسە، قولۇڭىزدىن كەلگىنىچە خىزمەت قىلىشقا تىرىشىڭ، بۇ سىزنىڭ تىرىلگەنلەرگە تەلىم بېرىشكە تەييار ئىكەنلىكىڭىزنى كۆرسىتىدۇ.
ئۇنداقتا، سىز ھەقىقەتەن يەرنى مىراس ئالىدىغان ۋاقىتنى تەشنالىق بىلەن كۈتۈۋاتامسىز؟ يەرنى جەننەتكە ئايلاندۇرۇپ، تىرىلگەنلەرنىڭ ئېھتىياجلىرىنى تەمىنلەپ، ئۇلارغا تەلىم بېرىشكە تەقەززامۇسىز؟ يەرنى مىراسقا ئالغاندا قىلماقچى بولغان ئىشلارنى، ھازىردىن باشلاپ قىلىشنى ئۆگەنسەك، شۇ ۋاقىتقا ئۆزىمىزنىڭ تەييار ئىكەنلىكىنى كۆرسىتىمىز.
a «كۈزىتىش مۇنارى»، 2022-يىل، سېنتەبىر سانى، «نۇرغۇن كىشىلەرنى ھەققانىيلىق يولىغا يېتەكلەڭلار» ناملىق ماقالىگە قاراڭ.