Yeremiya

34 Ondaka ya Yehova yina yeya ku Yeremiya, eci Soma Nevukandesa wo ko Bavulono lolohoka viaye viosi kuenda ovosoma osi o killu lieve, ana a kala vemẽhi liuviali waye lomanu vosi va kala oku linga uyaki lo Yerusalãi kuenda alupale aluo osi, yeyi yokuti:+

2 “Ca popia Yehova Suku ya Isareli ceci hati: ‘Kuende, vangula la Soma Sedekiya+ wo ko Yuda kuenje u sapuila okuti: “Ca popia Yehova ceci hati: ‘Ñasi oku eca olupale olu peka lia soma yo Bavulono kuenje eye o ka lu timĩha londalu.+ 3 Ove ku ka puluka peka liaye, momo ove o ka kuatiwa muẽle loku eciwa kokuaye.+ Kuenje o ka mola soma yo Bavulono iso liso kuenda eye o ka sapela love polo la polo noke ove o ka enda ko Bavulono.’+ 4 Pole, A Soma Sedekiya wo ko Yuda, yevelela ondaka ya Yehova yokuti: ‘Ca popia Yehova catiamẽla kokuove ceci hati: “Ove ku ka fa losipata. 5 Ove o ka fa lombembua+ kuenje ovo va ka timĩha olonguendu eci o kendiwa, ndeci va linga la va isiove, olosoma viosimbu vina via ku livangela kuenda va ka ku lila vati: ‘Avoyo we, A cime!’ momo ‘nda popia ondaka,’ oco Yehova a popia.”’”’”

6 Noke uprofeto Yeremiya wa sapuila olondaka evi viosi ku Soma Sedekiya wo ko Yuda ko Yerusalãi, 7 eci olohoka via soma yo Bavulono via kala oku linga uyaki lo Yerusalãi kuenda lalupale osi o Yuda ana a supilepo okuti,+ o Lakisi+ kuenda o Aseka;+ momo pokati kalupale o Yuda, a-a, o-o lika alupale ka a yuliwile handi okuti, a kuatele oviteyuilo.

8 Ondaka ya Yehova yeya ku Yeremiya noke lia Soma Sedekiya oku linga ocisila cimue lomanu vosi vo Yerusalãi oco va yovole apika.+ 9 Omunu wosi o sukila oku yovola upika waye u Heveru, ci kaile ulume ale ukãi, oco okuti lomue amamako oku lingisa manjaye u Yudea ndupika waye. 10 Omo liaco, olombuale viosi kuenda omanu vosi va pokola. Ovo va iñila vocisila cokuti omunu wosi o sukila oku yovola upika waye wulume ale wukãi kuenda ka vamamako vali oku va lingisa ndapika. Ovo va pokola kuenje va va ecelela oku enda. 11 Pole, noke ovo va nena vali apika vavo alume lakãi vana ovo va yovuile kuenje ovo va va kisika vali oku iñila kupika. 12 Omo liaco, Yeremiya wa tambula ondaka ya Yehova ya tunda ku Yehova yiti:

13 “Ca popia Yehova Suku ya Isareli ceci hati: ‘Nda linga ocisila cimue la vakukululu yene+ keteke nda vopa vofeka Yegito vonjo yupika,+ cokuti: 14 “Kesulilo lianyamo epanduvali, omunu lomunu pokati kene o sukila oku yovuisa manjaye u Heveru una wa landisiwile kokuove haeye wa ku vumba vokuenda kuanyamo epandu; ove o sukila oku u yovuisa.”+ Pole, vakukululu yene ka va yevelele, ale oku vonguila ovatũi avo kokuange. 15 Kuenje votembo yimue yitito,* ene wa pongololi olonjila viene kuenda wa lingi eci ca sunguluka kovaso ange poku sandeka eyovo liomunu o lisungue lene kuenje wa lingi ocisila cimue kovaso ange vonjo yambata onduko yange. 16 Pole, noke ene wa pongololi olonjila viene kuenda wa sepuli onduko yange+ poku nena vali apika vene valume kuenda vakãi vana ene wa yovuisi ndomo ci likuata lonjongole yavo kuenje wa va kisiki oku tiukila kupika.’

17 “Omo liaco, ca popia Yehova ceci hati: ‘Ene ka wa pokuili kokuange poku sandeka eyovo liomunu lomunu ku manjaye kuenda komunu a lisungue laye.+ Omo liaco, eyovo ndi kasi oku sapula kokuene lieli,’ oco Yehova a popia, ‘ene vu ka fa losipata, lefengi*+ kuenda lonjala kuenje ndi ka ecelela okuti, ene vu kala ocikuata cimue cocinjoko kovosoma osi o kilu lieve.+ 18 Kuenje eci oco ci ka pita lomanu vana va sinĩla ocisila cange poku yuvula oku kapako olondaka viocisila cina ovo va linga kovaso yange eci ovo va teta onãle volonepa vivali kuenje va pita pokati kolonepa viaco vivali,+ 19 okuti, olombuale vio Yuda, olombuale vio Yerusalãi, vakesongo kelombe, ovitunda kuenda omanu vosi vo vofeka, vana va pita pokati kolonepa vionãle: 20 Ndi ka va eca peka liovanyãli vavo kuenda peka lia vana va sandiliya oku va ponda kuenje atimba avo a ka kala okulia kuolonjila viovailu kuenda kuovinyama vio kilu lieve.+ 21 Ndi ka eca Soma Sedekiya wo ko Yuda lolombuale viaye peka liovanyãli vavo, peka lia vana va sandiliya oku va ponda kuenda peka liolohoka via soma yo Bavulono+ vina vi kasi oku tunda pokati kene.’+

22 “‘Ndi ka eca ocihandeleko,’ oco Yehova a popia ‘kuenje ndi ka vi nena vali volupale olu kuenda ovio vi ka liyaka laluo loku lu tambula, loku lu timĩha londalu;+ kuenje alupale o Yuda ndi ka a lingisa ekalasoko okuti, ka mu kala onungi.’”+