Yeremiya
37 Soma Sedekiya+ omõla a Yosiya wa fetika oku viala pocitumãlo ca Koniya*+ omõla a Yehoyakimi, momo Soma Nevukandesa wo ko Bavulono wo lingisa osoma vofeka yo Yuda.+ 2 Pole, eye kuenda akuenje vaye kumue lomanu vo vofeka, ka va yevele olondaka Yehova a popia pocakati cuprofeto Yeremiya.
3 Kuenje Soma Sedekiya wa tuma Yehukale+ omõla a Selemiya kuenda Sofoniya+ omõla a Maaseya ocitunda, kuprofeto Yeremiya hati: “Linga ohenda, tu likutilileko ku Yehova Suku yetu.” 4 Yeremiya wa endaenda lelianjo pokati komanu, momo handi ka vo kapele vokayike.+ 5 Kuenje olohoka via Fareo via tunda Kegito+ kuenda va Kaldea vana va ñualele ocingonja o Yerusalãi va yeva esapulo liaco liatiamẽla kokuavo. Omo liaco, ovo va tunda vo Yerusalãi.+ 6 Noke ondaka ya Yehova yeya kuprofeto Yeremiya yiti: 7 “Ca popia Yehova Suku ya Isareli ceci hati: ‘Eci vu sukila oku sapuila soma yo Yuda, una wo tumi kokuange oku ndi kũlĩhĩsa ceci hati: “Tali! Olohoka via Fareo vi kasi oku iya oku vu kuatisi, vi ka tiukila kofeka yavio Kegito.+ 8 Kuenje va Kaldea va ka tiuka kulo kuenda va ka liyaka lolupale olu, loku lu tambula kuenda oku lu timĩha londalu.”+ 9 Ca popia Yehova ceci hati: ‘Ko ka likembi ene muẽle poku popia okuti: ‘Va Kaldea va ka tu sia muẽle lika wetu,’ momo ovo ka va ka vu si. 10 Ndaño wa kunduili olohoka viosi via va Kaldea vi kasi oku liyaka lene kuenda pa supile lika alume vavo va lemẽhiwa, ovo nda va tẽla oku votoka volombalaka viavo kuenda oku timĩha olupale olu londalu.”’”+
11 Eci olohoka via va Kaldea via tunda vo Yerusalãi omo liolohoka via Fareo,+ 12 Yeremiya wa tunda ko Yerusalãi oku enda kofeka ya Benjamini+ oco a tambuleko onepa yaye pokati komanu vaye. 13 Pole, eci eye a pitĩla Kombundi ya Benjamini, kesongo kondavululi okuti, onduko yaye Iriya omõla a Selemiya, omõla a Hananiya, wa kuata uprofeto Yeremiya kuenda wo sapuila hati: “Ove o kasi oku tiamẽla konele ya va Kaldea!” 14 Pole, Yeremiya wa popia hati: “Eci uhembi! Ame si kasi oku tiamẽla konele ya va Kaldea.” Pole, eye ko yevelile. Omo liaco, Iriya wa kuata Yeremiya kuenda wo wambata kolombuale. 15 Olombuale via temẽla Yeremiya+ kuenje vio veta loku u* yikila vokayike+ vonjo ya Yehonatana usonehi, yina ya pongoluiwa okayike. 16 Yeremiya wa kapiwa vokayike,* volohondo vio posi kuenda wa kalamo oloneke vialua.
17 Noke Soma Sedekiya wa tuma oku u kovonga kuenda soma wo pula vuyombeki vonjo* yaye.+ Eye wo pula hati: “Kuli hẽ ondaka yimue ya tunda ku Yehova?” Yeremiya wa tambulula hati: “Kuli!” Kuenda wamisako hati: “Ove o ka eciwa peka lia soma yo Bavulono!”+
18 Yeremiya wa pulavo Soma Sedekiya hati: “Ekandu lipi nda ku lingila ove kumue lakuenje vove kuenda omanu ava, oco vu ndi kapi vokayike? 19 Pi ku kasi ovaprofeto vene vana va ku imbili owanji poku popia vati: ‘Soma yo Bavulono ka keya oku vu katukili kuenda oku katukila ofeka eyi’?+ 20 Linga ohenda, kaliye yevelela, A ñala yange a soma. Linga ohenda, tava kepingilo liange liohenda. Ku ka ndi tume vali konjo ya soma Yehonatana+ usonehi, sanga oko ndi ka fila.”+ 21 Omo liaco, Soma Sedekiya wa handeleka okuti, Yeremiya o yikiwa Vocitali Colondavululi+ kuenda eteke leteke kua eciwa kokuaye ombolo yi kasi ndombunje+ ya tunda vokololo ya vakuakuyoka ombolo, toke eci olombolo viosi via pua volupale.+ Kuenje Yeremiya wamamako oku kala Vocitali Colondavululi.