Yeremiya
41 Kosãi yepanduvali Isameli+ omõla a Netaniya omõla a Elisiama una wa kala ukuacikoti colosoma,* haeye umue pokati kalume va velapo va soma, weya lalume ekũi vakuavo ku Gedaliya omõla a Ahikama ko Misipa.+ Osimbu va kala oku lia kumosi ko Misipa, 2 Isameli omõla a Netaniya kuenda alume ekũi vana va kala laye va votoka kuenje va ponda losipata Gedaliya omõla a Ahikama omõla a Siafane. Omo liaco, eye wa ponda una soma yo Bavulono a nõlele oco a songuile ofeka. 3 Isameli wa pondavo va Yudea vosi vana va kala la Gedaliya ko Misipa, oku kongelamo asualali va va Kaldea vana va kalako.
4 Keteke liavali noke lioku pondiwa kua Gedaliya, osimbu okuti lomue wa ci kũlĩha, 5 kueya 80 kalume va tunda ko Sekeme,+ ko Silo+ kuenda ko Samaria.+ Olonjele viavo via tetiwile, ovowalo avo a toka toka, va liteta ovo muẽle+ kuenda vambatele ovilumba violomema longuendu+ peka liavo oco va vi nene konjo ya Yehova. 6 Noke Isameli omõla a Netaniya wa tunda ko Misipa oku ka lisanga lavo loku lila osimbu a kala oku enda. Eci eye a lisanga lavo wa va sapuila hati: “Enjui ku Gedaliya omõla a Ahikama.” 7 Pole, eci va iñila volupale, Isameli omõla a Netaniya kumue lalume vaye, va va ponda kuenda va va imba vocisimo.
8 Pole, pokati kavo pa kala alume ekũi vana va sapuila Isameli vati: “Ku ka tu ponde, momo tu kuete otiliku, osevata, ulela kuenda owiki via solekiwa vepia.” Omo liaco, eye ka va pondele ndeci a linga la vamanjaye. 9 Isameli wa imba vocisimo cimue cinene ovivimbi viosi vialume eye a ponda, cina Soma Asa a fẽlele omo lia Soma Baasia wo ko Isareli.+ Ocisimo caco, oco Isameli omõla a Netaniya a yukisa lalume va pondiwa.
10 Isameli wambata kumandekua ovisupe viosi viomanu va kala ko Misipa,+ oku kongelamo omãla vakãi va soma kuenda omanu vosi va sialele ko Misipa, vana Nevusaradana usongui wolondavululi a ecele ku Gedaliya+ omõla a Ahikama oco a va lave. Isameli omõla a Netaniya wa vambata kumandekua kuenje wa enda loku loña ku va Amoni.+
11 Eci Yohanana+ omõla a Karea kuenda asongui vosi volohoka vana va kala laye, va yeva ovina viosi vĩvi Isameli omõla a Netaniya a linga, 12 vongolola alume vosi kuenda va tunda oco va liyake la Isameli omõla a Netaniya kuenje vo sanga ocipepi lovava anene* o ko Giveone.
13 Omanu vosi vana va kala la Isameli va sanjuka eci va mola Yohanana omõla a Karea kumue lasongui vosi volohoka va kala laye. 14 Noke omanu vosi vana Isameli ambatele kumandekua oku tunda ko Misipa,+ va ñualapo kuenje va tiukila la Yohanana omõla a Karea. 15 Pole, Isameli omõla a Netaniya kuenda eci ci soka ecelãla kalume vaye, va puluka ku Yohanana kuenje va tilila ku va Amoni.
16 Yohanana omõla a Karea lasongui vosi volohoka va kala laye, vambata omanu va supile ko Misipa, vana eye a yovuile ku Isameli omõla a Netaniya noke yoku ponda Gedaliya+ omõla a Ahikama. Ovo vopa alume, asualali, akãi, omãla kuenda vakesongo kelombe ko Giveone. 17 Omo liaco, ovo va enda kuenda va kala kocitumãlo coku yekisa akombe co ko Kimihama, ocipepi lo Beteleme+ locimãho coku enda Kegito+ 18 omo lia va Kaldea. Momo va va kuatela usumba omo okuti, Isameli omõla a Netaniya wa pondele Gedaliya omõla a Ahikama, una soma yo Bavulono a nõlele oco a songuile ofeka.+