ETUNDILO

1 Omãla va Isareli vana va enda Kegito kumue la Yakoba okuti, omunu lomunu la vakuanjo yaye, olonduko viavo vievi:+ 2 Ruvene, Simeone, Lewi kuenda Yuda;+ 3 Isakare, Sevulono kuenda Benjamini; 4 Dani, Nafitali, Gadi kuenda Asiyere.+ 5 Ovitumbulukila viosi via Yakoba* via tẽla 70 komanu, pole, Yosefe wa kala ale Kegito.+ 6 Noke Yosefe la vamanjaye vosi va fa+ kuenda ocitumbulukila caco cosi. 7 Va Isareli* va kuata omãla valua loku livokiya calua kuenda vamamako oku pama calua lonjila yimue yi komõhisa loku yukisa ofeka.+

8 Vokuenda kuotembo, Kegito kua viala osoma yimue yokaliye okuti ka ya kũlĩhĩle Yosefe. 9 Omo liaco, osoma yaco ya sapuila omanu vaye hati: “Tali! Omanu va Isareli va livokiya calua kuenda va pama okuti, etu tu sule.+ 10 Tu lunguki lavo. Sanga ovo va kamamako oku livokiya kuenda nda kuiya uyaki va ka likongela kovanyãli vetu loku liyaka letu kuenje va ka tunda vofeka.”

11 Ovo va va kapela asongui vovopange a tĩla,* oco va va talise ohali lovopange a lema+ kuenje va va kisika oku tungila Fareo olupale luo Pitome kuenda luo Ramesese+ ana a kala alupale oku seleka okulia. 12 Pole, osimbu va Isareli va enda oku talisiwa ohali, va kala oku livokiya vali calua kuenda vamamako oku lisanduila vofeka kuenje va Egito va kuatela usumba va Isareli.+ 13 Noke va Egito va lingisa va Isareli apika loku va kisika oku linga upange wa tĩla.+ 14 Va va talisa ohali yalua poku va kisika oku linga upange wa tĩla woku kosa onata kuenda oku tunga atisolu, loku linga ovopange osi o kovapia. Ovo va va talisa ohali loku va kangisa calua ndapika.+

15 Noke soma Yegito wa sapela lakãi va Heveru vakuakucitisa okuti, olonduko viavo Sifira kuenda Puwa, 16 poku va handeleka hati: “Eci wendi oku kuatisa akãi va Heveru oku cita+ kuenje vu va mola komangu yoku cita, nda vu limbuka okuti oñaña yaco yulume, pondi oñaña yaco; pole, nda oñaña yaco yukãi yi kale lomuenyo.” 17 Pole, akãi vakuakucitisa va sumbilile Suku yocili kuenje ka va lingile eci soma Yegito a va handelekele. Ovo ka va pondele oloñaña vialume.+ 18 Noke yotembo yimue, soma Yegito wa vilikiya akãi vakuakucitisa loku va pula hati: “Momo lie ka wa pondeleli oloñaña vialume?” 19 Akãi vakuakucitisa va tambulula Fareo vati: “Akãi va Heveru ka va kasi ndakãi va Egito. Ovo va kuete ongusu yalua kuenda va cita lika liavo osimbu handi vakuakucitisa ka va pitĩlile kokuavo.”

20 Omo liaco, Suku wa sumũlũisa akãi vaco vakuakucitisa kuenje omanu vamamako oku licita kuenda oku pama calua. 21 Omo okuti, akãi vakuakucitisa va sumbilile Suku yocili, eye wa va sumũlũisa poku eca kokuavo omãla. 22 Noke Fareo wa handeleka omanu vaye vosi hati: “Oñaña yosi yulume ya va Heveru okuti ya citiwa ndopo, yimbi Volui Nilu, pole, oñaña yosi yukãi yi kale lomuenyo.”+

2 Kotembo yaco, ulume umue ukuepata lia Lewi wa kuela omõla a Lewi.+ 2 Ukãi waco noke wemina kuenje wa cita omõla ulume. Eci a mola okuti omõlaco wa posoka, wo salamisa vokuenda kuolosãi vitatu.+ 3 Eci a limbuka okuti ka tẽlele vali oku u salamisa,+ wa tikula ekualu* lia pangiwa loloneva, wa li laña lekokoto kuenda wa kapamo omõla kuenje wa li kapa pokati kolondeya via kala kowulo Yolui Nilu. 4 Pole, mukãi waye+ wa talama ocipãla oco a limbuke eci ca laikele oku pita laye.

5 Eci omõla ufeko a Fareo a lokila kolui Nilu oco a yue, apika vaye vakãi va kala oku endela kowulo yolui Nilu. Noke eye wa mola ekualu lia kala vokati kolondeya. Kuenje vepuluvi liaco, wa tuma upika waye oku kopa ekualu liaco.+ 6 Eci a tuvula ekualu wa mola okuti, mua kala omõla ulume wa kala oku lila. Kuenje wo kuatela ohenda yu wa popia hati: “Omõla u, omõla umue wa va Heveru.” 7 Noke mukãi woñaña wa pula komõla ufeko wa Fareo hati: “Citava hẽ okuti ndi ka kovonga ukãi umue u Heveru o nyamisa oco a ku nyamisileko omõla?” 8 Omõla ufeko a Fareo wo tambulula hati: “Kuende!” Vepuluvi liaco, ufeko wa enda kuenje wa kovonga ina yomõla.+ 9 Omõla a Fareo wa sapuila ukãi waco hati: “Ambata omõla u, ka ndi nyamisileko noke ndu ku feta.” Kuenje ukãi wambata omõla kuenda wo nyamisa. 10 Eci omõla a kula, ukãi waco wo weca komõla ufeko a Fareo kuenje wa linga omõlaye.+ Yu wo luka okuti Mose* loku popia hati: “Momo ndo upa vovava.”+

11 Koloneke viaco, eci Mose a linga ukulu,* wa enda toke ku vamanjaye kuenje wa mola ndomo vamanjaye va kala oku kangisiwa lupange walua.+ Eye wa molavo u Egito umue wa kala oku tipula u Heveru umue okuti, umue pokati ka vamanjaye. 12 Noke wa vanja konele yimue, lo konele yikuavo kuenje eci a limbuka okuti ka kua kaile omunu, wa ponda u Egito loku u lembika veseke.+

13 Pole, keteke lia kuamamo, eye wa enda, yu wa sanga alume vavali va Heveru va kala oku liyaka. Kuenje wa pula omunu wa lueya hati: “Momo lie o vetela ukuene?”+ 14 Kuenje ulume waco wo tambulula hati: “Helie wa ku nõla oco o linge ombuale kuenda onganji yetu? Anga hẽ o yongola oku ndi ponda ndeci wa ponda u Egito?”+ Mose wa kuata usumba kuenda wa popia hati: “Eci nda linga ca kũlĩhĩwa!”

15 Eci Fareo a ci yeva, wa yonguile oku ponda Mose; pole, Mose wa tila Fareo kuenda wa enda oco a ka kale kofeka yo Midiane+ kuenje wa tumãla ocipepi locisimo cimue. 16 Ocitunda co ko Midiane+ ca kuata omãla epanduvali vakãi kuenda omãla vaco veya oku tapa ovava loku yukisa ovinyuĩlo oco va nyuise oviunda via isiavo. 17 Pole, angombo vamue veya kuenje ndeci va siata ale oku linga, va lupuisa akãi vaco. Noke Mose wa votoka kuenje wa kuatisa* akãi vaco poku nyuisa ovava ocunda cavo. 18 Eci va tiukila konjo ya Isiavo Ruele,*+ eye wa va pula hati: “Momo lie etaili wa tiukili selo konjo?” 19 Ovo va tambulula vati: “Ulume umue u Egito+ wa tu popela kangombo kuenda wa tu tapelako ovava loku nyuisa ocunda.” 20 Eye wa pula omãla vaye hati: “Eye o kasi pi? Momo lie ka weyilili lulume waco? U kovongi oco a lie letu.” 21 Noke Mose wa tava oku kala lulume waco kuenda ulume waco wa eca Sipora+ omõlaye ukãi oco a likuele la Mose. 22 Kuenje Sipora wa cita omõla ulume kuenda Mose wo luka okuti Gerisiomo,*+ momo wa popia hati: “Nda linga ocingendeleyi vofeka yamãle.”+

23 Noke yotembo yalua,* soma yo Kegito wa fa+ kuenje va Isareli vamamako oku lisiõsiõla omo lioku kala apika kuenje va lila calua loku liyula kuenda oku lila kuavo kuoku pinga ekuatiso omo lioku kala apika, kuamamako oku yevala ku Suku yocili.+ 24 Noke Suku wa yeva oku lisiõsiõla kuavo+ kuenje wa ivaluka ocisila a lingile la Avirahama, la Isake kuenda la Yakoba.+ 25 Suku wa ivaluka va Isareli; kuenje Suku wa mola ohali yavo.

3 Mose wa linga ungombo wolomeme via ndatembo yaye Yetiro,+ ocitunda co ko Midiane. Osimbu a kala oku songuila ocunda konele yutakelo wo vekalasoko, wa pitĩla ko Horeve, omunda ya Suku yocili.+ 2 Noke ungelo wa Yehova wa molẽha kokuaye vulienge wondalu vokati kocisapa.+ Osimbu eye a kala oku vanja kocisapa, wa limbuka okuti oco ca taima, pole, ka ca kaile oku pia. 3 Kuenje Mose wa popia hati: “Eci ci komõhisa! Momo lie ocisapa ka ci pila? Ndi amela ocipepi oco ndi ci mole.” 4 Eci Yehova a mola okuti Mose wa endako oku ci tala, wo vilikiya oku upisa vocisapa loku popia hati: “A Mose! A Mose!” eye wa tambulula hati: “Ame ulo.” 5 Noke Suku hati: “Ku ka amele ocipepi. Lula olohaku viove kolomãhi viove, momo pocitumãlo o tãi ndeti osi yaco yi kola.”

6 Suku wamisako oku popia hati: “Ame ndi Suku ya isiove, Suku ya Avirahama,+ Suku ya Isake+ kuenda Suku ya Yakoba.”+ Kuenje Mose wa sitika ocipala caye, momo oku mola Suku yocili, co lingisa usumba. 7 Yehova wamisako hati: “Nda mola muẽle ohali yomanu vange vana va kasi Kegito kuenda nda yeva oku liyula kuavo omo lia vana va va kisika oku linga upange walua; nda kũlĩha ciwa ohali va kasi oku liyaka layo.+ 8 Ndi lokilako oco ndi va yovole peka lia va Egito,+ loku vopa vofeka yaco kuenje ndi va tuala kofeka yimue yiwa haiyo yinene, ofeka yimue okuti yi tumõha asenjele lowiki+ okuti, ocikanjo ca va Kanana, ca va Hiti, ca va Amori, ca va Perisi, ca va Hivi kuenda ca va Yevusi.+ 9 Cilo nda yeva oku liyula kuomanu va Isareli kuenda nda molavo ndomo va Egito va kasi oku va kangisa calua.+ 10 Kaliye enju, ndu ku tuma ku Fareo oco o kope omanu vange va Isareli Kegito.”+

11 Pole, Mose wa pula Suku yocili hati: “Ame elie okuti ngenda ku Fareo oku kopa va Isareli Kegito?” 12 Suku wo tambulula hati: “Ndi kala kumue love+ kuenda eyi ondimbukiso yokuti ame nda ku tuma: Noke yoku upa omanu Kegito, vu ka fendela Suku yocili vomunda yilo.”+

13 Pole, Mose wa pula Suku yocili hati: “Nda ame nda enda ku va Isareli loku va sapuila okuti, ‘Suku ya vakukululu yene wa numa kokuene’ kuenje ovo va mula vati: ‘Helie onduko yaye?’+ Ndi va sapuila nye?” 14 Suku wa tambulula Mose hati: “Ame Ndi ka Kala Eci Nda Panga* Oku Kala.”*+ Eye wamisako hati: “Eci oco o ka sapuila va Isareli okuti, ‘Ame Ndi ka Kala, eye wa numa kokuene.’”+ 15 Noke Suku wa sapuila vali Mose hati:

“Eci oco o ka sapuila va Isareli okuti, ‘Yehova, Suku ya vakukululu yene, Suku ya Avirahama,+ Suku ya Isake+ kuenda Suku ya Yakoba+ eye wa numa kokuene.’ Eyi oyo onduko yange otembo ka yi pui+ kuenda ndi kũlĩhĩwa londuko yaco kocitumbulukila locitumbulukila.* 16 Kaliye kuende, ongolola akulu vo Isareli loku va sapuila hati: ‘Yehova Suku ya vakukululu yene, Suku ya Avirahama, Suku ya Isake kuenda Suku ya Yakoba, wa molẽha kokuange kuenda wa popia hati: “Ame nda vu kapiko kuenda nda siata oku mola eci va siata oku vu+ lingi Kegito. 17 Kuenje ndi likuminya kokuene siti, ndu ku popeli kohali vu kasi oku talisiwa+ peka lia va Egito loku vu tuali vofeka ya va Kanana, ya va Hiti, ya va Amori,+ ya va Perisi, ya va Hivi kuenda ya va Yevusi,+ ofeka yimue okuti yi tumõha asenjele lowiki.’”+

18 “Ovo va ka yeva kondaka yove+ kuenje ove kumue lakulu vo Isareli, wendi ku soma Yegito loku u sapuila hati: ‘Yehova Suku ya va Heveru+ wa vangula letu. Linga ohenda, ecelela okuti tu linga ungende woloneke vitatu woku enda vekalasoko, oco tu ka lumbile Yehova Suku yetu ocilumba.’+ 19 Ame muẽle nda kũlĩha okuti, soma Yegito ka ka ecelela okuti wendi, te lika nda eka limue lia pama lio kisika oku ci linga.+ 20 Ndi kolõla eka liange kuenda ndi ka yambula o Egito lovilinga viange viosi vi komõhisa, noke eye o ka ecelela okuti wendi.+ 21 Ndi lingisa okuti va Egito va lekisa ohenda komanu vange kuenje eci vu tundi, ka vu tundi ño ovoko.+ 22 Ukãi lukãi, a pinge komunu a lisungue laye kuenda kukãi wa sikĩla konjo yaye ovikuata viopalata, levi viulu kuenda uwalo, oco vu vi walisi komãla vene valume lo komãla vene vakãi; kuenje vu punda va Egito.”+

4 Mose wa tambulula hati: “Nye ndi linga nda ovo ka va tavele kokuange kuenda ka va yevi kondaka yange?+ Momo va ka popia vati, ‘Yehova ka molẽhele kokuove.’” 2 Yehova wo pula hati: “Eci nye o kuete peka liove?” Eye wa tambulula hati: “Ombueti.” 3 Suku hati: “Yimba posi.” Eye wa yimba posi kuenje ya pongoloka onyõha;+ kuenda Mose wa yi tila. 4 Yehova wa sapuila Mose hati: “Olõla okuokuo kuove loku yi kuata kucĩla wayo.” Eye wolõla okuokuo kuenda wa yi kuata, noke ya linga ombueti peka liaye. 5 Noke Suku wa popia hati: “O sukila oku ci linga oco va tave okuti, Yehova Suku ya vakukululu yavo, Suku ya Avirahama, Suku ya Isake kuenda Suku ya Yakoba,+ wa molẽha kokuove.”+

6 Yehova wa popia vali laye hati: “Mange ohenda iñisa eka liove vokati kuwalo wove.” Eye wa iñisa eka liaye vokati kuwalo waye. Eci opa eka liaye, olio lia kuatiwa lovilundu, lia yela ndocikokoto!+ 7 Noke Suku wa popia hati: “Iñisa vali eka liove vokati kuwalo wove.” Eye wa iñisa vali eka liaye vokati kuwalo waye. Eci opa eka vuwalo waye, olio lia kala ciwa ndetimba liaye liosi! 8 Suku wa popia vali hati: “Nda ka va tavele kokuove, ale oku tava kocikomo catete, va ka tava kocikomo ci kuamamo.+ 9 Nda lopo ka va tavele kovikomo viaco vivali kuenda va likala oku yevelela kondaka yove, o sua ovava Volui Nilu, o a pesila posi ya kukuta kuenda ovava o sua vo Nilu a ka pongoloka osonde posi ya kukuta.”+

10 Noke Mose wa sapuila Yehova hati: “A Yehova ngecele, pole, ame si tẽla oku vangula ciwa, ndaño kosimbu, ale ceci wa fetika oku sapela lukuenje wove, momo si tẽla oku vangula lonjanga kuenda elimi liange li lema.”+ 11 Yehova wo pula hati: “Helie wa panga omẽla womunu, ale helie o kuete unene woku lingisa omunu ocitende, pamue ocisitatũi, ale oku vanja ciwa pamue omeke? Siti ame ndi Yehova? 12 Kaliye kuende, ame ndi ka kala love osimbu o vangula* kuenda hu longisa eci o sukila oku popia.”+ 13 Pole, eye hati: “Ngecele a Yehova, mange ohenda tuma ño omunu ukuavo o yongola oku tuma.” 14 Kuenje onyeño ya Yehova ya wengukila Mose, yu wa popia hati: “Nye ci popiwa catiamẽla ku huvove Arone+ u Lewi? Nda kũlĩha okuti eye o vangula ciwa. Cilo eye o kasi oku iya oku ka li sanga love. Eci eye a ka ku mola, o ka sanjuka calua.+ 15 Omo liaco, vangula laye kuenda kapa olondaka viaco vomẽla waye+ kuenje ame ndi kala lene eci vu vangula+ kuenje ndu longisi eci vu linga. 16 Eye o ka ku vanguilako kovaso yomanu kuenda o ka linga kapitiya kove kuenje ove o ka kala nda Suku kokuaye.*+ 17 Ove ambata peka liove ombueti eyi kuenje o ka linga layo ovilimbu.”+

18 Omo liaco, Mose wa tiukila ku ndatembo yaye Yetiro+ kuenje wo sapuila hati: “Mange ohenda, ndi yongola oku tiukila ku vamanjange va kasi Kegito oco ndi kũlĩhĩse nda handi va kasi lomuenyo.” Yetiro wa sapuila Mose hati: “Kuende lombembua.” 19 Noke Yehova wa sapuila Mose ko Midiane hati: “Kuende, tiukila Kegito, momo alume vosi vana va kala oku ku sanda oco va ku ponde,* va fa.”+

20 Kuenje Mose wa tikula ukãi waye kuenda omãla vaye, wa va kapa kocimbulu yu wa linga ungende woku tiukila kofeka Yegito. Handi vali, Mose wambata ombueti ya Suku yocili peka liaye. 21 Noke Yehova wa sapuila Mose hati: “Eci o tiukila Kegito, likapelako oku linga ovikomo viosi kovaso a Fareo vina nda ku ĩha unene woku vi linga.+ Pole, ame ndi ecelela okuti, eye o tĩlisa utima waye+ kuenje ka ka tava okuti omanu va enda.+ 22 Sapuila Fareo hati: ‘Ca popia Yehova ceci hati: “Isareli omõlange, omõlange uveli.+ 23 Ndu ku handeleka siti, Tuma omõlange oco a ende oku ka ndi fendela.* Pole, nda wa likala oku u tuma, ndi ponda omõlove, omõlove uveli.”’”+

24 Osimbu a kala oku linga ungende vonjila yoku enda kocitumãlo coku lala, Yehova+ wo sanga kuenda wa yonguile oku u ponda.*+ 25 Kuenje Sipora+ wa tikula ewe limue lia tua,* wa sevisa evamba omõlaye kuenje wa lingisa okuti ociyuvuluila caco ci lamba vovolu aye,* yu wa popia hati: “Momo ove wusandombua yosonde kokuange.” 26 Suku wo wecelela oku enda. Noke ukãi wa popia hati, “sandombua yosonde,” omo lioku seviwa evamba.

27 Yehova wa sapuila Arone hati: “Kuende vekalasoko oco o ka li sange la Mose.”+ Eye wa enda kuenje wa li sanga laye komunda ya Suku yocili+ kuenda wo lama lesipulo. 28 Mose wa sapuila Arone olondaka viosi via Yehova una wo tuma+ kuenda ovilimbu viosi Eye o handeleka oku linga.+ 29 Noke Mose la Arone va enda kuenda vongolola akulu vosi va va Isareli.+ 30 Arone wa va sapuila olondaka viosi Yehova a sapuilile Mose kuenda wa lingila ovilimbu+ kovaso omanu. 31 Kuenje omanu va tava.+ Eci va yeva okuti Yehova wa ivaluka va Isareli+ kuenda wa mola ohali yavo,+ ovo va petamẽla posi kuenda va kekama.

5 Noke Mose la Arone va enda ku Fareo loku u sapuila hati: “Ca popia Yehova Suku ya Isareli ceci hati, ‘Tuma omanu vange oco va ende vekalasoko oku ndingila ocipito cimue.’” 2 Pole, Fareo wa pula hati: “Yehova+ hẽ helie okuti ndi pokola kondaka yaye yoku tuma va Isareli oco va ende?+ Sia kũlĩhĩle Yehova, handi vali, si tumi va Isareli oku enda.”+ 3 Noke ovo va popia vati: “Suku ya va Heveru wa sapela letu. Tu linge ohenda, tu yongola oku linga ungende woloneke vitatu woku enda vekalasoko, oco tu ka lumbile Yehova Suku yetu+ ocilumba; nda ka tua ci lingile, eye o ka tu yambula luvei ale losipata.” 4 Soma Yegito wa va tambulula hati: “A Mose la Arone, momo lie vu yonguila oku upa omanu kupange wavo? Tiukili kovopange ene!”*+ 5 Fareo wamisako hati: “Tali okuti vofeka muli omanu valua kuenje vu yongola okuti ovo va liwekapo kovopange avo.”

6 Keteke liaco, Fareo wa handeleka asongui vupange* kumue loloñuatisi viavo via nõliwa pokati ka va Isareli hati: 7 “Ko ka eci vali owangu wa kukuta komanu oco va tunge atisolu.+ Ovo muẽle va ende, va ka kelule* owangu wa kukuta va sukila. 8 Pole, va kisiki oku tunga etendelo limuamue liatisolu ndomo va enda oku linga kosimbu. Ko ka tepululiko, momo ovo va kasi lowesi.* Eli olio esunga lieci va kalukila vati, ‘Tu yongola oku enda, tu ka lumbila Suku yetu ocilumba!’ 9 Va kisiki oku talavaya calua kuenda va ĩhi upange walua oco ka va ka yevelele ovohembi.”

10 Asongui vupange+ kumue loloñuatisi viavo va enda kuenje va sapuila omanu vati: “Ca popia Fareo ceci hati: ‘Siu wĩhi vali owangu wa kukuta. 11 Kuendi ene muẽle, ka likeluili* owangu wa kukuta kuosi vu u sanga, pole, upange wene ka u tepuluiwa.’” 12 Kuenje omanu va lisanduila vofeka yosi Yegito oco vongolole owangu wa kukuta wa supa koku ungula. 13 Asongui vupange vamamako oku va kisika vati: “Omunu lomunu a malusule upange waye weteke leteke, ndeci wa endi oku linga eci kua kala esokiyo lioku wĩhi owangu wa kukuta.” 14 Handi vali, oloñuatisi via va Isareli vina via nõliwa lasongui vupange va Fareo, via tipuiwa.+ Kuenje via pulisiwa hati: “Momo lie ka wa tẽlisilili etendelo liatisolu ndomo wa endi oku linga ale? Wa ci lingili ale hẽla kuenda etaili.”

15 Oloñuatisi via va Isareli via enda ku Fareo via livondela* kokuaye viti: “Momo lie o tatela ndomo akuenje vove? 16 Akuenje vove ka va tambuile owangu laumue wa kukuta, lopo va tu sapuila vati: ‘Tungi atisolu!’ Akuenje vove va tipuiwa, pole, omanu vove ovo va kuete eko.” 17 Pole, Fareo hati: “Wakuawesi,* wakuawesi* muẽle!+ Eli olio esunga lieci vu popeli hati: ‘Tu yongola oku enda, tu ka lumbila Yehova ocilumba.’+ 18 Kaliye kuendi, tiukili kovopange ene! Ka vu tambuli owangu wa kukuta, pole, te wa tẽlisi etendelo liatisolu lia kisikiwa.”

19 Oloñuatisi via va Isareli via limbuka okuti, ohali ya va sanga omo liocihandeleko cokuti: “Ka citava oku tepulula etendelo liatisolu lia kisikiwa keteke leteke.” 20 Kuenje eci va tunda ku Fareo va lisanga la Mose kuenda Arone vana va kala oku va kevelela. 21 Vepuluvi liaco, va va sapuila vati: “Yehova a vanje kokuene kuenda a ku sombisi, momo wa kokeli okuti Fareo lakuenje vaye va tu sepula* kuenda wa kapi osipata povaka avo oco va tu ponde.”+ 22 Noke Mose wa likutilila ku Yehova hati: “A Yehova, momo lie wa kokela ohali komanu ava? Momo lie wa numĩla? 23 Tunde eci nda molẽhela kovaso a Fareo oku vanguila vonduko yove,+ eye o kasi oku linga ũvi walua komanu ava+ kuenda ove kua yovuile omanu vove.”+

6 Kuenje Yehova wa sapuila Mose hati: “Cilo o mola eci ndi linga ku Fareo.+ Eka liange lia pama li ko kisika oku va eca kuenje eka liange lia pama li ko kisika oku va tundisa vofeka yaye.”+

2 Noke Suku wa sapuila Mose hati: “Ame ndi Yehova. 3 Ame nda enda oku molẽha ku Avirahama, ku Isake kuenda ku Yakoba nda Suku Ukuonene Wosi,+ pole, sia situluile kokuavo+ eci catiamẽla konduko yange Yehova.+ 4 Nda lisilavo ocisila cimue lavo coku va ĩha ofeka yo Kanana, haiyo ofeka va kala ndovingendeleyi.+ 5 Cilo nda yeva oku lisiõsiõla kuomanu va Isareli vana va Egito va va lingisa apika kuenje nda ivaluka ocisila cange.+

6 “Omo liaco, sapuila va Isareli hati: ‘Ame ndi Yehova kuenda ndu ku yovoli kupange wa tĩla wa va Egito kuenda kupika wavo+ kuenje ndu ku popeli lokuokuo kuolõha* layambulo a piãla.+ 7 Ene vu linga omanu vange kuenje ame ndi linga Suku yene,+ vu kũlĩha okuti ame muẽle ndi Yehova Suku yene, una o ka ku yovoli kupange wa tĩla wa va Egito. 8 Ndu tuali vofeka nda lisila* oku eca ku Avirahama, ku Isake kuenda ku Yakoba; ndu wĩhi ofeka yaco ndocipiñalo cene.+ Ame ndi Yehova.’”+

9 Noke Mose wa eca esapulo liaco ku va Isareli, pole, ovo omo liesumuo liavo kuenda upika walua,+ ka vo yevelele.

10 Kuenje Yehova wa sapuila Mose hati: 11 “Kuende, ka sapuile Fareo soma Yegito oco a ecelele va Isareli oku tunda vofeka yaye.” 12 Mose wa tambulula Yehova hati: “Tala! Va Isareli ka va njevelele;+ Fareo o njeva ndati nda ame si tẽla oku vangula ciwa?”*+ 13 Pole, Yehova wa sapuila vali Mose la Arone olonumbi va sukilile oku eca ku va Isareli kuenda ku Fareo soma Yegito oco vope va Isareli vofeka Yegito.

14 Ava ovo asongui volonjo via va isiavo. Omãla va Ruvene, uveli wa Isareli+ vava: Hanoke, Falu, Hecirone kuenda Karimi.+ Ava ovo apata a Ruvene.

15 Omãla va Simeone vava: Yemuele, Yamini, Ohada, Yakini, Soyara kuenda Saulu omõla ulume wukãi umue u Kanana.+ Ava ovo apata a Simeone.

16 Olonduko viomãla va Lewi+ ndomo ci likuata lapata avo vievi: Gerisiono, Kohata kuenda Merari.+ Lewi wa kala komuenyo ci soka 137 kanyamo.

17 Omãla va Gerisiono vava: Livini kuenda Simei ndomo ci likuata lapata avo.+

18 Omãla va Kohata vava: Amirama, Yicihare, Hevirone kuenda Usiyele.+ Kohata wa kala komuenyo ci soka 133 kanyamo.

19 Omãla va Merari vava: Mahili kuenda Musi.

Ava ovo apata a va Lewi ndomo ci likuata lapata avo.+

20 Amirama wa kuela Yokevede mukãi wa isiaye.+ Eye wo citila Arone kuenda Mose.+ Amirama wa kala komuenyo ci soka 137 kanyamo.

21 Omãla va Yicihare vava: Kora,+ Nefege kuenda Sikiri.

22 Omãla va Usiyele vava: Misaeli, Elicafana+ kuenda Sitiri.

23 Arone wa kuela Elisieva, omõla wa Aminadava mukãi wa Nahisione.+ Eye wa cita laye Nadava, Avihu kuenda Eleasa la Itamare.+

24 Omãla va Kora vava: Asire, Elikana kuenda Aviasafa.+ Ava ovo apata a va Kora.+

25 Eleasa,+ omõla a Arone wa kuela umue pokati komãla va Putiyele. Kuenje ukãi waco wo citila Finehase.+

Ava ovo va kala asongui volonjo via va isia via va Lewi, ndomo ci likuata lapata avo.+

26 Kepata eli, oko kua tiamẽlele Arone la Mose vana Yehova a sapuila hati: “Upi omanu va Isareli vofeka Yegito, ndolohoka via sokiyiwa vovimunga.”*+ 27 Mose la Arone+ ovo va vangula la Fareo soma Yegito oco vope omanu va Isareli Kegito.

28 Keteke liaco, eci Yehova a vangula la Mose kofeka Yegito, 29 Yehova wa sapuila Mose hati: “Ame ndi Yehova. Sapuila Fareo soma Yegito ovina viosi mopia love.” 30 Kuenje Mose wa tambulula Yehova hati: “Tala! Ame si tẽla oku vangula ciwa,* Fareo o ka njeva ndati?”+

7 Noke Yehova wa sapuila Mose hati: “Tala, nda ku lingisa nda Suku* ku Fareo kuenda Arone huvove o linga uprofeto wove.+ 2 Ove o ka pituluila olondaka viosi nda ku handeleka ku huvove Arone kuenda eye o ka vi sapuila Fareo kuenje eye o ka ecelela va Isareli oku tunda vofeka yaye. 3 Catiamẽla kokuange, ndi ecelela okuti, Fareo o tĩlisa utima waye+ kuenda ndi ka vokiya ovilimbu lovikomo viange vofeka Yegito.+ 4 Pole, Fareo ka ka tava kokuene kuenje ame ndi koluĩla eka liange Kegito kuenda njupa omanu vange* valua okuti, va Isareli vofeka Yegito layambulo a piãla.+ 5 Eteke ndi olũila eka liange Kegito loku upa va Isareli pokati kavo, va Egito va ka limbuka okuti, ame muẽle Yehova.”+ 6 Mose la Arone va linga ovina Yehova a va handeleka; ovo va linga muẽle cosi. 7 Mose wa kuata eci ci soka 80 kanyamo kuenda Arone wa kuata eci ci soka 83 kanyamo eci va vangula la Fareo.+

8 Yehova wa sapuila Mose la Arone hati: 9 “Nda Fareo wa ku sapuili okuti, ‘Lingi ocikomo cimue,’ sapuila Arone okuti, ‘Tikula ombueti yove, yimba posi kovaso a Fareo.’ Kuenje oyo yi linga onyõha yinene.”+ 10 Mose la Arone va enda ku Fareo kuenda va linga ndeci Yehova a va sapuila. Arone wa imba ombueti yaye posi kovaso a Fareo kuenda kovaso yakuenje vaye kuenje ya linga onyõha yinene. 11 Pole, Fareo wa tuma oku kovonga olonoño la vakualumbu vo ko Egito+ kuenje va lingavo ovina viaco lovombanda avo.*+ 12 Omunu lomunu wa imba ombueti yaye posi kuenje via linga olonyõha vinene; pole, ombueti ya Arone ya ina olombueti viavo. 13 Pole, lopo Fareo wa tĩlisa utima waye+ kuenda ka yevelele kokuavo, ndeci Yehova a ci popele.

14 Yehova wa sapuila Mose hati: “Utima wa Fareo wa tĩla.+ Eye wa likala oku eca omanu oco va ende. 15 Kuende ku Fareo komẽle. Eci a tunda oku enda Kolui Nilu, talama kohulo Yolui oco o lisange laye; kuenje ambata ombueti yina ya pongolokele onyõha.+ 16 Kuenje u sapuila okuti, ‘Yehova Suku ya va Heveru wa numa kokuove+ kuenda wa popia hati: “Tuma omanu vange oco va ende oku ka ndi fendela* vekalasoko,” pole, toke cilo kua tavele. 17 Ca popia Yehova ceci hati: “Omo lieci ndi linga, o ka limbuka okuti, ame ndi Yehova.+ Ndi veta vovava Olui Nilu lombueti yi kasi peka liange kuenje a pongoloka osonde. 18 Olõsi vi kasi vo Nilu vi fa kuenda o Nilu yi ka lẽha lãvi kuenje va Egito ka va ka tẽla oku nyua ovava o Nilu.”’”

19 Noke Yehova wa popia la Mose hati: “Sapuila Arone hati, ‘Tikula ombueti yove kuenda olũila eka liove kovava o Egito,+ kolondui vialio, lo kolono vialio,* lo koviva vialio+ kuenda kovikuata viosi vioku seleka ovava oco a pongoloke osonde.’ Vofeka yosi Yegito mu kala osonde, ci kale vovikuata viavaya ale viovawe.” 20 Vonjanja yaco, Mose la Arone va linga ndomo Yehova a va handeleka. Eye wa tikula ombueti, wa veta vovava Olui Nilu kovaso a Fareo lakuenje vaye kuenje ovava osi olui a pongoloka osonde.+ 21 Kuenje olõsi via kala volui via fa,+ olui lua fetika oku lẽha lãvi kuenda va Egito ka va tẽlele oku nyua ovava o vo Nilu+ kuenje vofeka yosi Yegito mua kala osonde.

22 Pole, vakualumbu vo ko Egito, va lingavo ocikomo cimuamue lovombanda avo+ kuenje Fareo wamamako oku tĩlisa utima waye kuenda ka tavele oku va yevelela ndeci Yehova a ci popele.+ 23 Fareo wa tiukila konjo yaye kuenda ka kapeleko ovina viaco. 24 Va Egito vosi va enda oku ka fẽla kolonele vio Nilu oco va sange ovava oku nyua, momo ka ca tavele oku nyua ovava o Nilu. 25 Tunde eci Yehova a veta o Nilu, pa pita oloneke epanduvali.

8 Yehova wa sapuila Mose hati: “Kuende ku Fareo u sapuila okuti, ‘Ca popia Yehova ceci hati: “Tuma omanu vange oco va ende va ka ndi fendele.*+ 2 Nda ove amamako oku likala oku va tuma, ame ndi yambula lovinonga+ ocikanjo cove cosi. 3 Kuenje Olui Nilu lu yuka lovinonga kuenda ovio vi lamana loku iñila vonjo yove, vohondo yove, pula wove, lo volonjo viakuenje vove kuenda viomanu vove, volofolono viove kuenda volombia vioku lingila olombolo.*+ 4 Ovinonga viya kokuove kumue lo komanu vove kuenda kakuenje vove vosi.”’”

5 Noke Yehova wa sapuila Mose hati: “Sapuila Arone, okuti, ‘Tikula ombueti yove kuenda olũila eka liove kolondui, kolono vio Nilu kuenda koviva vialio kuenje vofeka Yegito mu kala ovinonga.’” 6 Noke Arone wolũila eka liaye kovava o Egito kuenje ovinonga via fetika oku iya loku yuka vofeka Yegito. 7 Vakualumbu va lingavo ocikomo cimuamue lovombanda avo kuenje va lingisa okuti vofeka Yegito mu iyavo ovinonga.+ 8 Fareo wa kovonga Mose la Arone kuenda wa popia hati: “Livondeli ku Yehova oco ope ovinonga kokuange lo komanu vange,+ momo ndi yongola oku tuma omanu oku enda oco va ka lumbile Yehova ocilumba.” 9 Noke Mose wa sapuila Fareo hati: “Cosi ci kasi ño peka liove okuti, o ndi sapuila eteke ndi pinga oco ovinonga vi tunde kokuove, kakuenje vove, komanu vove kuenda kolonjo viove. Ovinonga viaco vi siala lika Volui Nilu.” 10 Eye wa popia hati: “Hẽla liya.” Noke Mose wa sapuila Fareo hati: “Ci lingiwe ndeci wa popia oco o limbuke okuti, ka kuli u wa lisoka la Yehova Suku yetu.+ 11 Ovinonga vi tunda kovaso yove, volonjo viove, kakuenje vove kuenda komanu vove. Ovio vi siala lika volui Nilu.”+

12 Mose la Arone va tunda kovaso a Fareo kuenje Mose wa pinga ku Yehova catiamẽla kovinonga vina Eye a tumĩle ku Fareo.+ 13 Yehova wa tambulula epingilo lia Mose kuenje ovinonga via fetika oku fila volonjo, lo kovitali kuenda vovapia. 14 Noke va Egito vongolola ovinonga viaco loku vi kapa olondunda kuenje ofeka ya fetika oku lẽha lãvi. 15 Eci Fareo a mola okuti ovinonga via fa, wa tĩlisa utima waye+ kuenda wa likala oku va yevelela ndeci Yehova a ci popele.

16 Yehova wa vangula la Mose hati: “Sapuila Arone hati: ‘Olõla ombueti yove, veta voneketela yo posi kuenje oneketela yaco, yi pongoloka olohamue vofeka yosi Yegito.’” 17 Ovo va ci linga. Arone wa tikula ombueti yaye kuenda wolõla eka liaye loku veta voneketela yo posi kuenje olohamue vieya komanu lo kovinyama. Oneketela yosi yo posi ya pongoloka olohamue vofeka yosi Yegito.+ 18 Vakualumbu va seteka oku lingavo ovina viaco loku nena olohamue lovombanda avo,+ pole, ka va ci tẽlele. Kuenje olohamue vieya komanu kuenda kovinyama. 19 Vakualumbu va sapuila Fareo vati: “Eci omuine wa Suku!”+ Pole, Fareo wamamako oku tĩlisa utima waye kuenda ka va yevelele, ndeci Yehova a ci popele.

20 Noke Yehova wa sapuila Mose hati: “Pasuka selo komẽle, talama kovaso a Fareo. Tala! Eye o kasi oku tunda oku enda kolui! Kuenje u sapuila okuti, ‘Ca popia Yehova ceci hati: “Tuma omanu vange oco va ende va ka ndi fendele.* 21 Nda kua tumile omanu vange oco va ende, ndi tuma olonyi* kokuove, kakuenje vove, lo komanu vove kuenda volonjo viove; kuenje volonjo via va Egito mu yuka olonyi kuenda haico ci kala vofeka ovo* va kasi. 22 Keteke liaco, ndingisa muẽle okuti, ofeka yo Gosene kuna kua tungila omanu vange yi li kalela. Vofeka yaco ka mu ka kala olonyi+ kuenje o ka limbuka okuti, ame ndi Yehova, ndi kasi vofeka yilo.+ 23 Ndi tepisa pokati komanu vange lomanu vove. Hẽla liya, oco ku kala ondimbukiso yaco.”’”

24 Kuenje Yehova wa ci linga kuenda endo liolonyi lia fetika oku iñila vonjo ya Fareo, lo volonjo viakuenje vaye kuenda vofeka yosi Yegito.+ Ofeka ya nyõliwa lolonyi.+ 25 Noke Fareo wa kovonga Mose la Arone kuenje wa va sapuila hati: “Kuendi, ka eci ocilumba ku Suku yene vofeka yilo.” 26 Pole, Mose wa popia hati: “Ka ca sungulukile oku linga ndoco, momo ovina tu lumbila Yehova Suku yetu, va Egito va vi suvuka.+ Nda tua lumba kovaso ya va Egito cimue okuti va ci suvuka, ovo hẽ ka va tu sõsõla lovawe? 27 Tu linga ungende woloneke vitatu vekalasoko kuenje omo tu ka lumbila Yehova Suku yetu ocilumba, ndomo eye a tu ci sapuila.”+

28 Noke Fareo wa popia hati: “Ndu weceleli okuti wendi oco vu lumbili Yehova Suku yene ocilumba vekalasoko. Pole, ku ka endi kupãla. Ndi likutililiko.”+ 29 Omo liaco, Mose wa popia hati: “Kaliye ndi tunda kovaso ove, ha likutilila ku Yehova kuenje hẽla liya, olonyi vi ka tunda ku Fareo, lo kakuenje vaye kuenda komanu vaye. Pole, Fareo ka ka tu kembe* vali poku likala oku ecelela omanu oku ka lumbila Yehova+ ocilumba.” 30 Mose wa tunda kovaso a Fareo kuenda wa likutilila ku Yehova.+ 31 Kuenje Yehova wa linga ndeci Mose o pinga, noke olonyi via tunda ku Fareo, lo kakuenje vaye kuenda komanu vaye. Lalumue lua siala vofeka. 32 Pole, Fareo wa tĩlisa vali utima waye kuenda ka ecelele omanu oku enda.

9 Yehova wa sapuila Mose hati: “Kuende ku Fareo, u sapuila okuti, ‘Ca popia Yehova Suku ya va Heveru ceci hati: “Tuma omanu vange oco va ende oku ka ndi fendela.*+ 2 Pole, nda ove wa likala oku va tuma loku amamako oku va tateka, 3 tala! eka lia Yehova+ li veta oviunda viove. Ku kala efengi linene+ li veta olokavalu, lovimbulu, lolongamelo, lolongombe kuenda olomeme. 4 Yehova o ka tepisa muẽle pokati koviunda via va Isareli loviunda via va Egito kuenda lacimue ca va Isareli ci ka fa.”’”+ 5 Handi vali, Yehova wa sokiya otembo yoku ci linga, poku popia hati: “Hẽla liya, Yehova o ka linga ovina viaco vofeka.”

6 Yehova wa linga ovina viaco keteke lia kuamamo kuenje oviunda viosi vio Kegito via fetika oku fa,+ pole, povinyama via va Isareli, lacimue ca fapo. 7 Eci Fareo a tuma oku ci kũlĩhĩsa, wa limbuka okuti, lacimue ocinyama ca va Isareli ca fa. Pole, Fareo wamamako oku tĩlisa utima waye kuenda ka ecelele omanu oco va ende.+

8 Yehova wa sapuila Mose la Arone hati: “Yukisi ovaka ene letiko lio vofolono kuenje Mose a imbe etiko liaco vilu kovaso a Fareo. 9 Noke li linga oneketela vofeka yosi Yegito kuenje yi pongoloka olombumbu vialua komanu lo kovinyama viosi viofeka Yegito.”

10 Ovo va tikula etiko vofolono yimue kuenda va talama kovaso a Fareo kuenje Mose wa imba etiko liaco vilu, noke lia pongoloka olombumbu vialua komanu lo kovinyama. 11 Vakualumbu ka va tẽlele oku talama kovaso a Mose omo liolombumbu, momo olombumbu via lisanduila ku vakualumbu kuenda ku va Egito vosi.+ 12 Pole, Yehova wa ecelela okuti, Fareo o tĩlisa utima waye kuenje ka yevelele kokuavo ndeci Yehova a sapuilile Mose.+

13 Noke Yehova wa sapuila Mose hati: “Pasuka selo komẽle, talama kovaso a Fareo kuenda u sapuila hati: ‘Ca popia Yehova Suku ya va Heveru ceci hati: “Tuma omanu vange oco va ende va ka ndi fendele.* 14 Ame ndu veti lafengi ange osi, ove kumue lakuenje vove, lomanu vove oco vu limbuki okuti, kilu lieve liosi ka kuli u wa lisoka lame.+ 15 Momo ame nda ndoluĩla ale eka liange oku ku veta lefengi linene, ove kumue lomanu vove kuenje nda wa nyõliwa ale kilu lieve. 16 Pole, esunga lieci nda ecelela okuti ove amamako oku kala lomuenyo lieli: oco hu lekise unene wange kuenda oco onduko yange yi sapuiwe kilu lieve liosi.+ 17 Handi haimo o tatela lãvi omanu vange okuti, ku va ecelela oku enda? 18 Hẽla kelivala ndeli, ndi lokisa ociwe ca kãla okuti, lalimue eteke ca pitile Kegito tunde eci ya sevetiwa toke cilo. 19 Tuma oku nena vocitumãlo ca koka ovinyama viove viosi kuenda cosi cove ci kasi vepia. Omanu vosi lovinyama vi kasi vepia okuti, ka via neniwile vocitumãlo ca koka, eci ku iya ociwe vi fa.”’”

20 Pokati kakuenje va Fareo, wosi wa sumbilile ondaka ya Yehova, wa iñisa lonjanga akuenje vaye lovinyama viaye vocitumãlo ca koka, 21 pole, vana ka va pokuile kondaka ya Yehova, va sia akuenje vavo lovinyama viavo vepia.

22 Yehova wa sapuila Mose hati: “Olũila eka liove kovailu oco ociwe ci lokile vofeka yosi Yegito+ okuti, komanu, lo kovinyama kuenda kovikũla viosi vio vofeka Yegito.”+ 23 Mose wolũila ombueti yaye kovailu kuenje Yehova wa tuma ovilemĩlo lociwe kuenda ondalu* ya lokila kilu lieve kuenje Yehova wamamako oku lokisa ociwe vofeka Yegito. 24 Kua kala ociwe kuenda ondalu ya kala oku liakoka vokati kociwe. Ociwe caco ca kãla enene; vofeka Yegito lalimue eteke mua pitile ociwe ca soka ndeci, tunde eci ya linga ofeka.+ 25 Ociwe caco ca nyõla ovina viosi via kala vofeka yosi Yegito, oku upisa komanu toke kovinyama kuenda ca nyõlavo ovikũla viosi loviti viosi.+ 26 Vofeka yo Gosene muna va Isareli va kala, omo lika ka mua lokele ociwe.+

27 Noke Fareo wa tuma oku vilikiya Mose la Arone kuenje wa va sapuila hati: “Onjanja eyi nda lueya. Yehova ukuesunga, pole, ame lomanu vange tua lueya. 28 Likutilili ku Yehova oco ovilemĩlo lociwe vi imũhe. Noke ngecelela okuti wendi kuenje ka vu kala vali kulo.” 29 Omo liaco, Mose wo sapuila hati: “Osimbu ndi tunda volupale, ndolũila ovaka ange kovaso a Yehova. Kuenje ovilemĩlo lociwe vi liwekapo, oco o limbuke okuti, ilu lieve lia Yehova.+ 30 Pole, ove kumue lakuenje vove, nda kũlĩha ale okuti, ndaño ndoco ka vu ka sumbila Yehova Suku.”

31 Olinyu losevata via nyõleha, momo osevata ya kuatele ale apunga kuenda olinyu ya kala oku telẽha. 32 Pole, otiliku* ka ya nyõlehele, momo ya cilua oku ima. 33 Mose wa tunda volupale kovaso a Fareo, yu wolũila ovaka aye kovaso a Yehova kuenje ovilemĩlo lociwe via liwekapo kuenda ombela ka ya lokele vali.+ 34 Eci Fareo a limbuka okuti ombela lociwe kuenda ovilemĩlo via liwekapo, wa lueya vali kuenda wa tĩlisa utima waye,+ eye kumue lakuenje vaye. 35 Fareo wamamako oku tĩlisa utima waye kuenda ka tumile va Isareli oku enda, ndomo Yehova a ci popele pocakati ca Mose.+

10 Yehova wa sapuila Mose hati: “Kuende ku Fareo, momo nda ecelela okuti, eye kumue lakuenje vaye va tĩlisa ovitima viavo+ oco ndi lekise ovikomo viange evi kokuaye,+ 2 kuenje o sapuila komãla vove lo kolonekulu viove eci nda linga lo Egito kuenda olondimbukiso nda linga pokati kavo;+ kuenje ene vu ka limbuka muẽle okuti, ame ndi Yehova.”

3 Mose la Arone va enda ku Fareo kuenda vo sapuila vati: “Ca popia Yehova Suku ya va Heveru ceci hati, ‘Toke pi o likala oku pokola kokuange?+ Ecelela omanu vange oco va ende oku ka ndi fendela.* 4 Momo nda wamamako oku likala oku tuma omanu vange oco va ende, hẽla liya, ndi tuma olohuma vofeka yove. 5 Ovio vi ka lisanduila kilu lieve liosi okuti, ongongo ka yi ka molẽha. Kuenje ovio vi ka lia eci ca supa kociwe leci ca supa kokuene kuenda vi ka lia oviti viove viosi.+ 6 Ovio vi ka yuka volonjo viove, lolonjo viakuenje vove vosi kuenda kolonjo viosi via va Egito okuti, olonjali viove la vakukululu yove ka va la mola ocina cimue ndeci vofeka yilo toke etaili.’”+ Noke wa ñualapo kuenje wa tunda kovaso a Fareo.

7 Akuenje va Fareo vo sapuila vati: “Ulume u toke otembo yipi a kamamako oku tu saluisa?* Tuma omanu oco va ende oku ka fendela* Yehova Suku yavo. Handi kua limbukile okuti o Egito ya nyõleha?” 8 Kuenje Mose la Arone vambatiwa vali ku Fareo kuenda eye wa va sapuila hati: “Kuendi, ka fendeli* Yehova Suku yene. Pole, velie va ka enda?” 9 Mose wa popia hati: “Tu enda lamalẽhe vetu, lakulu, lomãla vetu valume, lomãla vetu vakãi, lolomeme vietu kuenda olongombe vietu,+ momo tu ka lingila Yehova ocipito.”+ 10 Eye wa va sapuila hati: “Nda eteke limue nda ecelela okuti ene wendi lomãla vene, ci lekisa okuti, Yehova o kasi muẽle lene!+ Ene vu yongola oku linga cimue ka ca sungulukile. 11 Si tava! Ambati ño alume oco va ka fendele* Yehova, momo eci oco wa pingi.” Kuenje va tundisiwa kovaso a Fareo.

12 Yehova wa sapuila Mose hati: “Olũila eka liove kofeka Yegito okuti olohuma viya, oco vi lisanduile vofeka Yegito loku lia ovikũla viosi vio vofeka, viosi vina via supa kociwe.” 13 Vepuluvi liaco, Mose wolũila ombueti yaye vofeka Yegito kuenje Yehova wa sikisa ofela yo kutundilo vofeka vokuenda kueteke liaco liosi kuenda uteke wosi. Eci kua ca omẽle, ofela yo kutundilo ya nena olohuma. 14 Kuenje olohuma vieya vofeka yosi Yegito kuenda via lisanduila vocikanjo cosi Cegito.+ Kua kala olohuma vialua;+ ka kua la kala olohuma vialua ndevi kuenda ka vi ka kalako vali. 15 Ovio via kala kilu lieve liosi kuenda osi ya tekãvele lolohuma; ovio via lia ovikũla viosi vio vofeka kuenda apako osi oviti ana a supile kociwe; koviti ka kua sialele emẽla lalimue ndaño kovikũla vovapia vofeka yosi Yegito.

16 Noke Fareo wa tuma oku vilikiya lonjanga Mose la Arone kuenda wa popia hati: “Nda lingila ekandu Yehova Suku yene kuenda kokuene. 17 Kaliye mangi ohenda, eceli vali ekandu liange onjanja eyi kuenda likutilili ku Yehova Suku yene okuti, o njupa efengi eli li ponda.” 18 Eye* wa tunda kovaso a Fareo kuenda wa likutilila ku Yehova.+ 19 Kuenje Yehova wa sikisa ofela yalua okuti, ofela yo kutakelo konele yikuavo yina yambata olohuma loku vimba Vokalunga Kakusuka. Laumue oluhuma lua supa vocikanjo cosi co Egito. 20 Kuenje Yehova wa ecelela okuti Fareo o tĩlisa utima waye+ kuenda eye ka ecelele okuti va Isareli va enda.

21 Kuenje Yehova wa sapuila Mose hati: “Olũila eka liove kovailu oco ku kale owelema vofeka Yegito okuti, owelema walua.” 22 Vonjanja yaco, Mose wolũila eka liaye kovailu kuenje kua kala owelema walua vofeka yosi Yegito vokuenda kuoloneke vitatu.+ 23 Ovo ka va tẽlele oku mola omunu lukuavo kuenda lomue wa tẽla oku votoka apa a kala vokuenda kuoloneke vitatu; pole, kua kala ocinyi kovitumãlo va Isareli vosi va kala.+ 24 Fareo wa kovonga Mose kuenje wo sapuila hati: “Kuendi, ka fendeli* Yehova.+ Pole, olomeme viene, lolongombe viene ovio lika vi siala. Omãla vene va endevo lene.” 25 Pole, Mose wa popia hati: “Ove o tu ĩha* ovinyama vioku lumba oco tu lumbile Yehova Suku yetu+ ocilumba coku pia elisi. 26 Tu ambatavo oviunda vietu. Ka kuli ocinyama ci siala, momo vimue pokati kavio tu ka vi eca koku fendela Yehova Suku yetu kuenda ka tua kũlĩhĩle handi eci tu ka eca kefendelo lia Yehova toke eci tu pitĩla.” 27 Yehova wa ecelela okuti, Fareo o tĩlisa utima waye kuenje eye ka tavele oku va tuma oku enda.+ 28 Fareo wo sapuila hati: “Tunda kovaso yange! Ku ka seteke oku mola vali ocipala cange, momo eteke o mola ocipala cange, haico o fa.” 29 Kuenje Mose wa popia hati: “Ndomo wa ci popia, si seteka vali oku mola ocipala cove.”

11 Kuenje Yehova wa sapuila Mose hati: “Ndi nena vali efengi limue ku Fareo kuenda Kegito. Noke eye o ko tundisi kulo.+ Eci a ko tundisi, o ko tundisi muẽle lovina viosi vu kuete.+ 2 Cilo, Sapuila omanu okuti, alume vosi lakãi va pinge komunu a lisungue laye ovikuata viopalata kuenda viulu.”+ 3 Yehova wa lekisa ohenda komanu kovaso a va Egito. Handi vali, Mose weya oku sumbiwa calua kofeka Yegito pokati kakuenje va Fareo kuenda pokati komanu.

4 Mose wa popia hati: “Ca popia Yehova ceci hati: ‘Vokati kuteke ndi pita Vegito,+ 5 kuenje olonuñulu viosi viofeka Yegito vi fa,+ oku upisa konuñulu ya Fareo una wa tumãla kocalo caye, toke konuñulu yupika wukãi una o talavaya kombambo kuenda olonuñulu viosi vioviunda.+ 6 Vofeka yosi Yegito mu kala oku lila kualua okuti, ka kua la kalako kuenda lalimue eteke ku ka kalako vali.+ 7 Pole, ku va Isareli ka ku ka kala ombua layimue yi kua, pamue omanu ale oviunda viavo, oco vu limbuki okuti Yehova o pondola oku tepisa pokati ka va Egito la va Isareli.’+ 8 Akuenje vove vosi va keya muẽle kokuange kuenje va ka ñekamẽla loku popia vati, ‘Kuende, ove kumue lomanu vosi va ku kuãi.’+ Noke yovina evi, ngenda.” Kuenje wa tunda kovaso a Fareo lonyeño yalua.

9 Yehova wa sapuila Mose hati: “Fareo ka ka tava kondaka yove,+ oco ovikomo viange vi livokiye vofeka Yegito.”+ 10 Mose la Arone va linga ovikomo viosi evi kovaso a Fareo,+ pole, Yehova wa ecelela okuti Fareo o tĩlisa vali utima waye kuenje ka ecelele okuti va Isareli va tunda vofeka yaye.+

12 Yehova wa sapuila Mose la Arone vofeka Yegito hati: 2 “Osãi yilo, yi linga efetikilo liolosãi kokuene. Oyo yi linga osãi yatete kolosãi viunyamo kokuene.+ 3 Sapuila ohongele yosi ya va Isareli okuti, ‘Keteke liekũi yosãi yilo, omunu lomunu a nõle omeme+ oco yi linge yepata* liaye okuti, onjo omeme onjo omeme. 4 Pole, nda epata liaye litito calua okuti ka li tẽla oku lia omeme yosi, eye o lia omeme yaco vonjo yaye lomunu o lisungue laye ndomo ci likuata letendelo liomanu. Poku tenda omanu vaco, sokiyi onepa yomeme omunu lomunu a ka lia. 5 Ocinyama caco te cina ka ci kuete etondelo+ okuti, ocitupi ci kuete unyamo umosi. Vu sukila oku ci nõla pokati kovitupi viotulomeme ale kolohombo. 6 Vu yi soleka toke keteke 14 yosãi yilo+ kuenda epata lepata vekongelo lia va Isareli li sukila oku yi ponda kelivala lio pokati koku iñila kuekumbi loñolosi.*+ 7 Va tikule onepa yimue yosonde loku yi nyĩla kovikuli vivali viepito kuenda kocikuli conepa yo kilu yuvelo wolonjo vina ovo va ka lila omeme.+

8 “‘Ovo va sukila oku lia ositu vuteke waco.+ Va yoke ositu yaco vondalu loku yi lia lombolo ka yi kuete etumbisa+ kuenda ovikũla vi lula.+ 9 Ka citava oku lia ositu yaco owisu, ndaño oku yi teleka lovava, pole, yi yokiwe vondalu kumue lutue waco lakoto aco kuenda ovina vio vokati. 10 Ka citava okuti pa supa cimue toke komẽle, pole, nda pa supa toke komẽle, ci timĩhiwe vondalu.+ 11 Osimbu vu lia ositu yaco, iñi pimo luvia, wali olohaku kuenda kuati ombueti peka liene; kuenje vu yi lia lonjanga. Momo eyi o Paskoa ya Yehova. 12 Momo vuteke waco, ndi pita vofeka Yegito, ndi ponda olonuñulu viosi viofeka Yegito, ci kale omanu ale ovinyama;+ ndi yambula olosuku viosi vio Kegito.+ Ame ndi Yehova. 13 Osonde yi linga ondimbukiso kokuene volonjo vu kasi; kuenje eci ndi mola osonde, ndi pitahãla kuenda efengi ka liya kokuene eci ndi nyõla ofeka Yegito.+

14 “‘Eteke liaco, li ka linga onjivaluko kokuene kuenda vu sukila oku li sambiliya ndocipito ca Yehova toke kovitumbulukila viene viosi. Eci ociholo cimue vu sukila oku sambiliya otembo ka yi pui. 15 Vu lia ombolo ka yi kuete etumbisa vokuenda kuoloneke epanduvali.+ Keteke liatete, vu sukila oku upa etumbisa volonjo viene, momo wosi wa lia ovina vi kuete etumbisa tunde keteke liatete toke keteke liepanduvali, omunu waco a tepiwe* pokati ka va Isareli. 16 Keteke liatete, vu liongolola oco vu fendeli Suku kuenda keteke liepanduvali, vu liongolola vali. Ka citava oku linga upange vokuenda kuoloneke viaco.+ Vu pongiya lika eci omunu lomunu a sukila oku lia.

17 “‘Lingi Ocipito Colombolo ka vi Kuete Etumbisa,+ momo keteke liaco, njupa omanu* vene vofeka Yegito. Amamiko oku lava eteke liaco kovitumbulukila viene viosi, ndociholo otembo ka yi pui. 18 Kosãi yatete keteke 14 yosãi yaco koñolosi, vu lia olombolo ka vi kuete etumbisa toke keteke 21 yosãi yaco koñolosi.+ 19 Volonjo viene ka mu ka sangiwe etumbisa vokuenda kuoloneke epanduvali, momo nda umue o lia cimue ci kuete etumbisa, ci kaile ocingendeleyi ale onyitiwe yofeka,+ omunu waco a tepiwe* pokati kohongele ya va Isareli.+ 20 Ka citava oku lia cimue ci kuete etumbisa. Volonjo viene viosi vu sukila oku lia olombolo ka vi kuete etumbisa.’”

21 Mose wa vilikiya lonjanga akulu vosi vo Isareli+ kuenje wa va sapuila hati: “Nõleli epata lepata ocinyama* cimue kuenda pondi ocinyama caco cocilumba co Paskoa. 22 Noke vu sukila oku yava ocitungu covisapa viohisopu vosonde yi kasi pombasiya kuenje osonde yaco vu yi nyĩla kocikuli conepa yo kilu yuvelo kuenda kovikuli vivali viepito; kuenje lomue ka ka tunde vonjo* yaye toke komẽle. 23 Eci Yehova a ka pita oco a nene efengi ku va Egito kuenje o mola osonde kocikuli conepa yo kilu yuvelo kuenda kovikuli vivali viepito, Yehova o ka pitãhala uvelo wolonjo viaco kuenda ka ka ecelela okuti, efengi lioku fa* li iñila volonjo viene.+

24 “Vu sukila oku pokola kociholo eci ene kumue lomãla vene otembo ka yi pui.+ 25 Eci vu iñili vofeka Yehova a likuminya oku eca kokuene, amamiko oku linga ocipito caco.+ 26 Nda omãla vene vo puli vati, ‘Ocipito eci ci lomboloka nye kokuene?’+ 27 ene vu tambulula hati: ‘Ocilumba co Paskoa ya Yehova, una wa pitahãla olonjo via va Isareli Kegito eci a nenela efengi va Egito, pole, wa teyuila olonjo vietu.’”

Kuenje omanu* va petamẽla posi loku kekama. 28 Va Isareli va enda, yu va linga ndeci Yehova a handelekele Mose la Arone.+ Ovo va linga muẽle cosi.

29 Vokati kuteke, Yehova wa ponda olonuñulu viosi viofeka Yegito+ oku upisa konuñulu ya Fareo una wa tumãla kocalo caye, toke konuñulu yomandekua una o kasi vokayike* kuenda olonuñulu viosi viovinyama.+ 30 Vuteke waco, Fareo wa pasuka kumue lakuenje vaye vosi lomanu vakuavo va Egito kuenda kua kala oku lila kualua pokati ka va Egito, momo ka kua kaile onjo yimue okuti, ka mua file omunu.+ 31 Vepuluvi liaco, wa vilikiya Mose la Arone+ luteke kuenje wa popia hati: “Votoki, tundi pokati komanu vange ene kumue la va Isareli vakuavo. Kuendi, ka fendeli* Yehova, ndomo wa ci popi.+ 32 Ambativo oviunda viene violomeme levi violohombo kuenda violongombe, kuendi ndomo wa ci popi.+ Pole, pingivo ku Suku oco a ndi sumũlũise.”

33 Kuenje va Egito va kisika omanu oco va tunde lonjanga+ vofeka loku va sapuila vati: “Nda ka wa tundili, omanu vosi va ka fa!”+ 34 Omanu va longeka osema ya tamiwa okuti, ka ya kapiwile etumbisa kuenda va muñila puwalo wavo atiyela oku pangela olombolo kuenje va ambatela kapepe. 35 Va Isareli va linga ndomo Mose a va sapuila kuenje va pinga ku va Egito ovikuata viopalata, levi viulu kuenda uwalo.+ 36 Yehova wa lingisa okuti va Egito va lekisa ohenda komanu vaye kuenje va eca ku va Isareli ovina ovo va pinga kuenda va Isareli va punda va Egito.+

37 Kuenje va Isareli va tunda ko Ramesese+ oku enda ko Sukote+ va soka 600.000 kalume va endela posi okuti, omãla* ka va tendiwile.+ 38 Omanu vamue ovingendeleyi*+ va endavo kumue lavo oku kongelamo olomeme kuenda olongombe okuti, etendelo limue linene lioviunda. 39 Ovo va fetika oku yoka olombolo ka vi kuete etumbisa losema ya tamiwa yina va tunda layo Kegito. Oyo ka ya kapiwile etumbisa, momo ovo va tundisiwa lonjanga Kegito okuti, ka va kuatele otembo yoku pongiya okulia kuavo.+

40 Otembo yoku kala kua va Isareli vana va kala Kegito+ ya tẽla 430 kanyamo.+ 41 Eci anyamo 430 a sulila, keteke liaco muẽle, omanu* vosi va Yehova va tunda vofeka Yegito. 42 Vuteke owu, ovo va ka linga ocipito omo Yehova a vopa vofeka Yegito. Vuteke waco, omanu vosi va Isareli va sukila oku lingila ocipito Yehova toke kovitumbulukila viavo viosi.+

43 Noke Yehova wa sapuila Mose la Arone hati: “Ociholo co Paskoa ceci: Ka citava okuti ocingendeleyi cimue ci liako.+ 44 Nda omunu umue o kuete upika umue wulume wa landiwa lolombongo, vu sukila oku u seva evamba.+ Noke oco lika a liako. 45 Ocingendeleyi kuenda onalavayi yi fetiwa, ka citava okuti va liako. 46 Vosi va kasi vonjo yimuamue, va sukila oku lila pamosi okameme. Ko ka ambati ositu yaco posamua yonjo kuenda ko ka teyi ekepa lalimue.+ 47 Ohongele yosi ya Isareli yi linge ocipito caco. 48 Nda pokati kene pali ocingendeleyi cimue kuenje ci yongola oku lingila Yehova ocipito co Paskoa, alume vosi vo vonjo yomunu waco te va seviwa evamba. Noke citava oku linga ocipito kuenje eye o kala ndonyitiwe yofeka. Pole, ulume wosi ka seviwile evamba ka ka lieko.+ 49 Ocihandeleko cimuamue ci tiamisiwile konyitiwe kuenda kocingendeleyi ci kasi pokati kene.”+

50 Va Isareli vosi va linga ndomo Yehova a handelekele Mose la Arone. Ovo va linga muẽle cosi. 51 Keteke liaco, oco Yehova opa va Isareli kumue lomanu* vavo vofeka Yegito.

13 Yehova wa sapuila vali Mose hati: 2 “Olonuñulu viosi vialume* via va Isareli vi kolisa* kokuange. Onuñulu yulume yi citiwa, ci kale yomanu ale yovinyama yi tiamẽla kokuange.”+

3 Kuenje Mose wa sapuila omanu hati: “Ivaluki eteke lietaili wa tundi Kegito,+ konjo yupika, momo Yehova wo wupi kocitumãlo cilo leka lia pama.+ Omo liaco, ko ka li lacimue ci kuete etumbisa. 4 Keteke lietaili vu kasi oku tunda Kegito kosãi ya Aviva.*+ 5 Eci Yehova a wiñisi vofeka ya va Kanana, ya va Hiti, ya va Amori, ya va Hivi kuenda ya va Yevusi+ okuti, ofeka yina eye a lisila ku vakukululu yene oku u wĩhi,+ ofeka yimue okuti yi tumõha asenjele lowiki,+ lingaingi ocipito caco vosãi yilo. 6 Oloneke epanduvali, vu lialia ombolo ka yi kuete etumbisa+ kuenje keteke liepanduvali vu lingila Yehova ocipito. 7 Ombolo ka yi kuete etumbisa yi liwe oloneke epanduvali;+ pokati kene ka pa ka sangiwe lacimue ci kuete etumbisa+ ndaño etumbisa ka li ka sangiwe vocikanjo cene cosi.* 8 Keteke liaco, sapuila omãla vove hati: ‘Ñasi oku ci linga omo lieci Yehova a ndingila eci nda tunda Kegito.’+ 9 Eci ci kala ndondimbukiso peka liene kuenda ndonjivaluko kovipolo* viene+ oco ocihandeleko ca Yehova ci kale vomẽla wene, momo Yehova wo wupi Kegito leka lia pama. 10 Unyamo lunyamo vu sukila oku kapako ociholo eci loku linga ocipito caco votembo ya sokiyiwa.+

11 Eci Yehova o wiñisi vofeka ya va Kanana yina eye a lisila kokuene kuenda ku vakukululu yene oku u wĩhi,+ 12 tumbiki ku Yehova olonuñulu viosi vialume* kuenda onuñulu yosi yulume yovinyama vu kuete. Olonuñulu viosi vialume vi tiamẽla ku Yehova.+ 13 Nda o kuete onuñulu yimue yocimbulu o sukila oku yi yovola. O ci linga poku lumba omeme yimue pomangu yocimbulu. Nda kua lumbile omeme yimue, o sukila oku teya osingo yocimbulu. Kuenje onuñulu yosi yomãla valume vepata liove, yi sukilavo oku yovuiwa.+

14 “Nda omõlove noke o ku pula hati, ‘Eci ci lomboloka nye?’ U tambulula hati: ‘Yehova wa tu upa Kegito vonjo yupika leka lia pama.+ 15 Eci Fareo a likala oku tu tuma oku enda,+ Yehova wa ponda olonuñulu viosi vio kofeka Yegito, oku upisa kolonuñulu viomanu toke kolonuñulu viovinyama.+ Eli olio esunga lieci ñasilili oku lumbila Yehova olonuñulu viosi vialume* loku yovola olonuñulu viosi viomãla vange.’ 16 Kuenje eci ci linga ndondimbukiso peka liove kuenda pupolo* wove,+ momo Yehova wa tu upa Kegito leka lia pama.”

17 Noke eci Fareo a tuma omanu oku enda, Suku ka va songuilile vonjila yofeka ya va Filisiti, ndaño okuti yi teta onimbu. Momo Suku wa popia hati: “Sanga omanu va ka pongolola ovisimĩlo viavo eci va ka mola okuti va sukila oku yaka kuenje va tiukila Kegito.” 18 Suku wa lingisa omanu oku likonda vonjila yo vekalasoko Liokalunga Kakusuka.+ Pole, va Isareli poku tunda vofeka Yegito va lipongiya ciwa ndovimunga viasualali. 19 Mose wambatavo akepa a Yosefe, momo Yosefe wa lingisa omãla va Isareli oku lisila laye hati: “Suku ka ko yanduluki kuenda ambati akepa ange eci vu tunda kulo.”+ 20 Ovo va tunda ko Sukote kuenje va tungila ocilombo ko Etami, konele yekalasoko.

21 Yehova wa va pitila kovaso oco a va songuile. Kutanya wa va songuila longunji yelende+ kuenda kuteke wa va songuila longunji yondalu oco yi va ĩhe ocinyi okuti, va tẽla oku linga ungende kutanya kuenda kuteke.+ 22 Ongunji yelende ka ya tundile kovaso yomanu vokuenda kutanya ndaño ongunji yondalu ka ya tundile kovaso yavo vokuenda kuteke.+

14 Yehova wa sapuila Mose hati: 2 “Sapuila va Isareli oco va tiukile loku tunga ocilombo kovaso yo Pihahirote, pokati ko Migidolo lokalunga ka imba ovaso ko Baale-Cifone.+ Kuenje vu tunga ocilombo kovaso yo Baale-Cifone ocipepi lokalunga. 3 Noke Fareo o ka popia eci catiamẽla ku va Isareli hati: ‘Ovo va kasi oku tungayala vofeka. Ka kuli onjila yoku tunda vekalasoko.’ 4 Ame ndi ka ecelela okuti, Fareo o tĩlisa utima waye+ kuenda o ka va landula kuenje ndi limuisa ulamba poku kundula Fareo kumue lolohoka viaye viosi;+ kuenje va Egito va ka limbuka muẽle okuti, ame ndi Yehova.”+ Eci oco va Isareli va linga.

5 Noke va sapuila soma Yegito okuti, omanu va tila. Vepuluvi liaco, Fareo kumue lakuenje vaye, va pongolola ovisimĩlo viavo viatiamẽla komanu,+ yu va popia vati: “Momo lie tua ecelela va Isareli oku enda okuti, ka va tu vumbi vali ndapika?” 6 Eye wa pongiya akãlu aye wuyaki kuenje wa enda kumue lasualali vaye.+ 7 Wa nõla 600 kakãlu a velapo kuenda akãlu osi akuavo vo Kegito okuti, vekãlu lekãlu mua kala asualali. 8 Yehova wa ecelela okuti Fareo soma Yegito o tĩlisa utima waye kuenje wa landula va Isareli osimbu va Isareli va kala oku enda loku sima okuti, va kolapo.*+ 9 Va Egito va va landula+ kuenda olokavalu viosi via Fareo lakãlu osi lalume vakuakuendela kolokavalu, kumue lolohoka viaye va kala oku amela ocipepi la va Isareli osimbu va kala vocilombo cavo konele yokalunga ocipepi lo Pihahirote kovaso yo Baale-Cifone.

10 Eci Fareo a kala ocipepi, va Isareli va petula ovaso avo kuenje va mola okuti va Egito va kala oku va landula. Va Isareli va kuata usumba walua kuenje va fetika oku kalukila Yehova.+ 11 Ovo va pula Mose vati: “Wa tu nena kulo oco tu file vekalasoko+ omo okuti Kegito ka kuli ovitumãlo vioku kenda? Momo lie wa tu lingila ovina evi? Momo lie wa tu upila Kegito? 12 Eci tua kala Kegito siti tua ku sapuila okuti, ‘Tu ecelele ño oku vumba va Egito’? Momo kokuetu hĩse oku vumba va Egito okuti oku fila vekalasoko hacoko.”+ 13 Noke Mose wa sapuila omanu hati: “Ko ka kuati usumba.+ Ko ka sakalali kuenda limbuki epopelo Yehova a ko muisi etaili.+ Momo va Egito vu lete etaili, lalimue eteke vu ka va mola vali.+ 14 Yehova eye o ka vu yakeliko,+ cene oku ũha lika.”

15 Yehova wa popia la Mose hati: “Momo lie o kasilili oku amamako oku kalukila kokuange? Sapuila va Isareli oco va tungulule ocilombo. 16 Catiamẽla kokuove, tikula ombueti yove kuenda oluĩla eka liove kilu liokalunga, loku ka tepa pokati oco va Isareli va pite vokati kokalunga posi ya kukuta. 17 Catiamẽla kokuange, ndi ecelela okuti va Egito va tĩlisa ovitima viavo oco va landule va Isareli; kuenje ndi limuisa ulamba poku kundula Fareo kumue lolohoka viaye viosi lakãlu aye wuyaki kuenda alume vaye vakuakuendela kolokavalu.+ 18 Kuenje va Egito va ka limbuka muẽle okuti, ame ndi Yehova eci ndi limuisa ulamba poku kundula Fareo kumue lakãlu aye wuyaki kuenda alume vaye vakuakuendela kolokavalu.”+

19 Noke ungelo wa Suku yocili,+ una wa pitile kovaso yomanu va va Isareli wa sondoloka, wa enda konyima yavo kuenje ongunji yelende ya kala kovaso yavo ya sondolokavo kuenda ya talama konyima yavo.+ 20 Elende liaco lieya pokati kolohoka via va Egito lomanu va Isareli.+ Konele yimue, elende lia kala oku koka owelema. Konele yikuavo olio liamamako oku eca ocinyi kuteke.+ Vokuenda kuteke wosi, va Egito ka va tẽlele oku amela ocipepi la va Isareli.

21 Mose woluĩla eka liaye kilu liokalunga;+ kuenje Yehova wa tiuwiya konyima ovava okalunga poku sikisa ofela yalua yo kutundilo vokuenda kuteke wosi kuenje okalunga ka linga osi ya kukuta+ kuenda ovava aco a tepiwa.+ 22 Kuenje va Isareli va pita pokati kokalunga posi ya kukuta+ osimbu ovava a linga ndocimbaka konele yavo yondio kuenda yo kepĩli.+ 23 Va Egito va va landula kuenje olokavalu viosi via Fareo, lakãlu aye wuyaki kuenda alume vaye vakuakuendela kolokavalu, va fetika oku va landula vokati kokalunga.+ 24 Komẽle ociteketeke,* Yehova wa vanja kolohoka via va Egito oku u pisa vokati kongunji yondalu kuenda yelende+ kuenje wa kokela ombuanja olohoka via va Egito. 25 Eye wopako alola akãlu avo okuti a enda lovitangi kuenje va Egito va popia vati: “Tu tili va Isareli, momo Yehova o kasi oku va yakelako poku yaka letu va Egito.”+

26 Noke Yehova wa sapuila Mose hati: “Oluĩla eka liove kilu liokalunga oco ovava a tiukile ku va Egito, kakãlu avo wuyaki kuenda kalume vakuakuendela kolokavalu.” 27 Vepuluvi liaco, Mose woluĩla eka liaye kilu liokalunga kuenje eci kua ca, okalunga ka likongela ndeci ka kala ale. Osimbu va Egito va kala oku tila, Yehova wa pungikila va Egito vokati kokalunga.+ 28 Ovava a tiuka kuenda a tuvika akãlu wuyaki la vakuakuendela kolokavalu lolohoka viosi via Fareo vina via landuile va Isareli vokati kokalunga.+ Lomue pokati kavo wa supapo.+

29 Pole, va Isareli va endela posi ya kukuta vokati kokalunga+ kuenje ovava a linga ndocimbaka konele yavo yondio lo kepĩli.+ 30 Keteke liaco, Yehova wa popela va Isareli povaka a va Egito+ kuenje va Isareli va mola ovivimbi via va Egito kohulo yokalunga. 31 Va Isareli va limbukavo ndomo Yehova a lekisa unene* waye walua ku va Egito kuenje omanu va fetika oku kuatela esumbilo lialua Yehova, loku kolela Yehova kuenda kukuenje waye Mose.+

15 Vepuluvi liaco, Mose la va Isareli va imbila Yehova ocisungo eci+ vati:

“Njimbila Yehova ocisungo, momo eye wa kemãlisiwa calua.+

Okavalu lu wa endelako wa va imba vokalunga.+

 2 Yehova eye ongusu yange lunene wange, momo wa linga epopelo liange.+

Eye Suku yange, ndu ko sivaya;+ eye Suku ya isiange,+ ndu ko kemainya.+

 3 Yehova esualali limue lia pama.+ Yehova oyo onduko yaye.+

 5 Akimba o vokalunga a va sitika; va lokila valondo ndewe.+

 9 Unyãli wa popia hati: ‘Ndi va landula! Ndi va sanga!

Ndi tepa ovina via pundiwa toke eci ndi sanjuka!

Ndi pola osipata yange! Okuokuo kuange ku va yula!’+

11 A Yehova, pokati kolosuku helie wa lisoka love?+

Helie wa lisoka love okuti, wa velapo koku kola?+

Te Una o sesamẽla oku sumbiwa lovisungo viesivayo, Una o linga ovikomo.+

12 Ove wolõla eka liove liondio kuenje ongongo ya va ina.+

Olonungi viosi vio ko Kanana vi ka sumua.+

16 Va ka kuatiwa lusumba kuenda ocinjoko.+

18 Yehova o viala ndosoma otembo ka yi pui.+

20 Kuenje Miriama uprofeto ukãi okuti mukãi wa Arone, wa kuata opandelu kuenda akãi vosi vo kuama konyima oku sika olopandelu loku piluka. 21 Miriama poku imba wa tambulula alume hati:

“Imbili Yehova ocisungo, momo wa kemãlisiwa calua.+

Okavalu lu wa endelako wa va imba vokalunga.”+

22 Noke Mose wa tunda la va Isareli Vokalunga Kakusuka kuenje va enda vekalasoko lio Siuri kuenda va linga ungende woloneke vitatu vekalasoko, pole, ka va sangele ovava. 23 Eci va pitĩla ko Mara,*+ ka va tẽlele oku nyua ovava o ko Mara omo a lula. Eli olio esunga lieci ocitumãlo caco ca lukiwila okuti, Mara. 24 Kuenje omanu va fetika oku lisiõsũila Mose+ vati: “Tu nyua nye?” 25 Eye wa kalukila ku Yehova+ kuenje Yehova wo lekisa uti umue. Eci eye a wimba vovava, ovava aco a sõsa.

Kocitumãlo caco, oko Eye a va tumbikila ociholo kuenda ocihandeleko kuenje wa va kapa voseteko.+ 26 Eye wa popia hati: “Nda wa yevelela kondaka ya Yehova Suku yove loku linga eci ca sunguluka kovaso aye loku pokola kovihandeleko viaye kuenda koviholo viaye viosi,+ si ka nena kokuove ovovei ana nda nenela va Egito,+ momo ame ndi Yehova ndu ku sakula.”+

27 Noke va pitĩla ko Elimi kuna kua kala 12 kolono viovava kuenda 70 koviti vieva. Kuenje oko va tungila ocilombo cavo ocipepi lovava aco.

16 Eci ohongele yosi ya va Isareli ya tunda ko Elimi, ya pitĩla vekalasoko lio Sine,+ lina lia kala pokati ko Elimi lo Sinai, keteke 15 kosãi yavali, noke yoku tunda kofeka Yegito.

2 Kuenje ohongele yosi ya va Isareli ya fetika oku lisiõsuĩla Mose la Arone vekalasoko.+ 3 Va Isareli vamamako oku va sapuila vati: “Hĩse nda eka lia Yehova lia tu pondele kofeka Yegito, kuna tua enda oku lia ositu,+ tua lia lia ovikulia vikuavo toke eci tu kuta. Cilo wa tu neni mulo vekalasoko oco vu pondi ekongelo liosi lonjala.”+

4 Noke Yehova wa sapuila Mose hati: “Ndokisa ombolo yi tunda kovailu+ kuenje omunu lomunu o tunda oco ongolole eci a soka laco keteke liaco+ okuti, ndi va seteka loku limbuka nda va ka pokola kocihandeleko cange ale sio.+ 5 Pole, keteke liepandu+ poku pongiya eci vongolola, va sukila oku ongolola eci ci lisoka loloneke vivali okuti, eci va enda oku upa koloneke via pita ci sule.”+

6 Omo liaco, Mose la Arone va sapuila va Isareli vosi vati: “Koñolosi vu ka limbuka muẽle okuti Yehova eye wo vupi vofeka Yegito.+ 7 Kuenje komẽle vu ka mola ulamba wa Yehova, momo oku lisiõsiõla kuene kua yevala ku Yehova. Etu velie okuti vu lisiõsuĩla kokuetu?” 8 Mose wamisako hati: “Eci Yehova o ko wĩhi ositu yoku lia koñolosi kuenda ombolo yoku lia komẽle toke eci vu kuta, vu ka limbuka okuti, Yehova wa yeva oku lisiõsiõla kuene, kuna vu kasi oku lisiõsuĩla kokuaye. Oco hẽ etu velie? Ene ka vu kasi oku lisiõsũila kokuetu puãi, wa lisiõsuĩli Yehova.”+

9 Noke Mose wa popia la Arone hati: “Sapuila ohongele yosi ya va Isareli hati: ‘Enjui kovaso a Yehova, momo eye wa yeva oku lisiõsiõla kuene.’”+ 10 Osimbu Arone a kala oku vangula lohongele yosi ya va Isareli, ovo va ñualapo loku vandekela ovaso vekalasoko kuenje tala! Ulamba wa Yehova wa molẽhela velende.+

11 Yehova wa sapuila vali Mose hati: 12 “Nda yeva oku lisiõsiõla kua va Isareli.+ Va sapuila hati: ‘Oku upisa kelivala lio pokati koku iñila kuekumbi loñolosi* vu lia ositu kuenda komẽle vu lia ombolo toke eci vu kuta+ kuenje vu limbuka muẽle okuti, ame ndi Yehova Suku yene.’”+

13 Koñolosi kua molẽha akalanga kuenje a kala kocilombo cosi+ kuenda komẽle kua molẽha owume kuenje wa ñuala ocilombo cosi. 14 Eci owume wa takata, posi yekalasoko pa molẽha ovina vimue vitito+ vi kasi ndocikokoto. 15 Va Isareli eci va ci mola, va fetika oku lipula pokati vati: “Eci nye?” momo ka va ci kũlĩhĩle. Mose wa va sapuila hati: “Eyi oyo ombolo Yehova a eca kokuene oco vu lie.+ 16 Eci oco Yehova a handeleka hati: ‘Omunu lomunu ongolole eci a tẽla oku lia. Omunu lomunu ope omeri* yimosi+ ndomo ci likuata letendelo liomanu va kasi vombalaka yaye.’” 17 Va Isareli va fetika oku linga ovina viaco; kuenje vamue vongolola calua kuenda vakuavo vongolola citito. 18 Eci va ci yonga lomeri, una wongolola calua ka kuatele eci ca supa kuenda una wongolola citito ka kuatele eci ca kamba.+ Omunu lomunu wongolola eci a tẽla oku lia.

19 Noke Mose wa va sapuila hati: “Lomue ka ka ci soleke toke komẽle.”+ 20 Pole, ovo ka va yevele kondaka ya Mose. Vamue eci va supisapo kamue toke komẽle, ca fetika oku tunda ovanyo kuenda oku lẽha lãvi kuenje Mose wa va temẽla. 21 Eteke leteke komẽle, va sukilile oku ci ongolola okuti, omunu lomunu ongolola eci a tẽla oku lia. Kuenje eci ku kala utanya walua oco ca enda oku yenguluka.

22 Keteke liepandu, va nõla okulia kuoloneke vivali+ okuti, omunu lomunu olomeri vivali. Kuenje asongui vosi vohongele veya, yu va ci lomboluila Mose. 23 Noke eye wa va sapuila hati: “Ca popia Yehova ceci hati: Hẽla ku kala eteke liepuyuko* okuti, esambata li kola ku Yehova.+ Yoki eci vu sukila oku yoka kuenda teleki eci vu sukila oku teleka;+ kuenje eci ci supapo ci soleki toke komẽle.” 24 Ovo va ci soleka toke komẽle ndomo Mose a va handelekele kuenda eci va soleka ka ca lehẽle ndaño oku kuata ovanyo. 25 Kuenje Mose wa popia hati: “Ci li etaili, momo etaili esambata ku Yehova. Etaili ka vu ci sangi posamua yocilombo. 26 Vu ci ongolola voloneke epandu, pole, keteke liepanduvali okuti Esambata,+ ka ku kala cimue.” 27 Keteke liepanduvali omanu vamue va tunda oco va kongolole, pole, ka va sangele cimue.

28 Kuenje Yehova wa pula Mose hati: “Toke pi vu likala oku pokola kolonumbi viange kuenda kovihandeleko viange?+ 29 Limbuki okuti Yehova wa ku ĩhi Esambata.+ Eli olio esunga lieci a kasilili oku wĩhi ombolo yoloneke vivali keteke liepandu. Omunu lomunu a kale pocitumãlo caye; lomue ka ka tunde pocitumãlo caye keteke liepanduvali.” 30 Omo liaco, omanu va lava Esambata* keteke liepanduvali.+

31 Onjo ya Isareli ya luka ombolo yaco okuti, “o mana.”* Oyo ya yelele ndombuto yocelo kuenda oku pepa kuaco kua kala ndakende a pangiwa lowiki.+ 32 Noke Mose wa popia hati: “Ca handeleka Yehova ceci hati: ‘Yukisi onjongo yomeri lo mana okuti, yi selekiwa lovitumbulukila viene viosi+ oco vi mole ombolo nda eca kokuene vekalasoko eci ndo vupi vofeka Yegito.’” 33 Kuenje Mose wa sapuila Arone hati: “Tikula esanga, kapamo onjongo yomeri yo mana kuenda yi kapa kovaso a Yehova oco yi selekiwe lovitumbulukila viene viosi.”+ 34 Arone wa yi kapa kovaso yocikasia Cuvangi,+ oco yi selekiwe ndeci Yehova a handelekele Mose. 35 Va Isareli va lia o mana ci soka 40 kanyamo,+ toke eci va pitĩla vofeka yimue mua kala ale omanu.+ Ovo va lia o mana toke eci va pitĩla kongave yofeka yo Kanana.+ 36 Omeri yimosi, onepa yekũi yonjongo yo efa.*

17 Ohongele yosi ya va Isareli ya tunda vekalasoko lio Sine+ poku enda kocitumãlo locitumãlo ndomo ci likuata locihandeleko ca Yehova+ kuenje ya tungila ocilombo ko Refidimi.+ Pole, kocitumãlo caco ka kua kaile ovava oco omanu va nyue.

2 Omanu va fetika oku lihoyisa la Mose+ loku popia vati: “Tu ĩhe ovava oku nyua.” Pole, Mose wa va pula hati: “Momo lie vu hoyela lame? Momo lie vu kasilili oku amamako oku kapa Yehova voseteko?”+ 3 Pole, omanu va kala lenyona lialua lioku nyua ovava kuenje vamamako oku lisiõsuĩla Mose+ vati: “Momo lie wa tu upila Kegito kumue lomãla vetu, loviunda vietu oco tu file kulo lenyona?” 4 Oku sulako Mose wa kalukila Yehova hati: “Nye ndi linga lomanu ava? Ndopo va ndi sõsõla lovawe!”

5 Noke Yehova wa sapuila Mose hati: “Livanga kovaso yomanu, kuende lakulu vamue va Isareli kuenda ambata ombueti yina wa veta layo Volui Nilu.+ Yi kuata peka, kuende. 6 Tala! Ame ndi ka talama kovaso yove kewe, ko Horeve. Veta vewe kuenda ovava a ka tunda vewe liaco kuenje omanu va ka nyua.”+ Mose wa lingila ovina viaco kovaso yakulu va va Isareli. 7 Omo liaco, eye wa luka ocitumãlo caco okuti, Masa*+ kuenda Meriva*+ momo va Isareli oko va hoyela loku seteka Yehova+ poku popia vati: “Anga hẽ Yehova o kasi muẽle pokati ketu, ale sio?”

8 Noke va Amaleke+ veya kuenje va liyaka la va Isareli ko Refidimi.+ 9 Omo liovina viaco, Mose wa sapuila Yehosua+ hati: “Pokati kalume vetu nõlapo vamue kuenje kuende ka liyake la va Amaleke. Hẽla liya ndi talama kilu liomunda lombueti ya Suku yocili peka liange.” 10 Yehosua wa linga ndomo Mose o sapuila,+ yu wa liyaka la va Amaleke. Kuenje Mose la Arone kuenda Huru+ va londa kilu liomunda.

11 Osimbu Mose amamako oku tulika ovaka aye, va Isareli va yula, pole, eci a petamisa ovaka aye, va Amaleke va yula. 12 Eci ovaka a Mose a kava, ovo va nena ewe limue kuenje eye wa tumãlako. Noke Arone la Huru, va kuata kovoko aye umue konele yimue, ukuavo konele yikuavo kuenje ovaka aye amamako oku tulikiwa toke eci ekumbi lia iñila. 13 Kuenje Yehosua wa kundula Amaleke kumue lomanu vaye losipata.+

14 Yehova wa sapuila Mose hati: “Soneha ovina viaco velivulu oco vi linge ndonjivaluko kuenda vi pituluila Yehosua hati: ‘Ndi imũla onjivaluko yosi ya va Amaleke vemẽhi liovailu.’”+ 15 Kuenje Mose wa tunga utala yu wa u luka okuti, Yehova-nisi,* 16 loku popia hati: “Omo okuti eka lia va Amaleke lia katukila ocalo ca Yehova,+ Yehova o ka liyaka lavo kocitumbulukila locitumbulukila.”+

18 Yetiro ocitunda co ko Midiane haeye ndatembo ya Mose,+ wa yeva ovina viosi Suku a lingila Mose kumue lomanu vaye va Isareli kuenda ndomo Yehova opa va Isareli Kegito.+ 2 Yetiro ndatembo ya Mose wa yekisile Sipora ukãi wa Mose eci Mose o tuma oku tiukila konjo, 3 lomãla vaye vavali valume.+ Omõla umue wa tukuiwile okuti, Gerisiomo*+ momo Mose wa popele hati: “Nda linga ocingendeleyi vofeka yamãle,” 4 kuenda omõla ukuavo wa tukuiwile okuti, Eliyesere,* momo Mose wa popele hati: “Suku ya isiange eye oñuatisi yange, una wa mopela kosipata ya Fareo.”+

5 Yetiro ndatembo ya Mose kumue lomãla va Mose kuenda ukãi waye, veya ku Mose vekalasoko muna eye a tungilile ocilombo komunda ya Suku yocili.+ 6 Eye wa tuma esapulo ku Mose liokuti: “Ame ndi ndatembo yove Yetiro,+ ñasi oku iya kokuove kumue lukãi wove kuenda omãla vove vavali valume.” 7 Vepuluvi liaco, Mose wa tunda oco a ka lisange la ndatembo yaye kuenje eye wa petamẽla posi yu wo sipula. Omunu lomunu, wa pulisa ekalo liukuavo kuenje va iñila vombalaka.

8 Mose wa lomboluila ndatembo yaye ovina viosi Yehova a linga ku Fareo kuenda Kegito oco a kuatise va Isareli,+ lovitangi viosi va liyaka lavio vonjila+ kuenda ndomo Yehova a va yovola. 9 Yetiro wa sanjukila ovina viosi viwa Yehova a lingila va Isareli poku va yovola Kegito.* 10 Noke Yetiro wa popia hati: “Yehova a sivayiwe, una wo yovoli Kegito kuenda ku Fareo haeye wa yovola omanu peka lia va Egito. 11 Cilo nda kũlĩha okuti, Yehova wa velapo olosuku viosi vikuavo,+ momo eye wa teyuila omanu vaye kovanyãli vavo vakuepela.” 12 Noke Yetiro ndatembo ya Mose wa nena ocilumba coku pia elisi, lovilumba vikuavo oco vi eciwe ku Suku kuenje Arone kumue lakulu vosi va va Isareli, veya oco va lie kumosi la ndatembo ya Mose kovaso a Suku yocili.

13 Keteke lia kuamamo, Mose wa tumãla ndeci a siata oku ci linga oco a tetuluile omanu kuenje omanu vamamako oku kala kovaso a Mose, oku upisa komẽle toke koñolosi. 14 Eci ndatembo ya Mose a mola ovina viosi eye a kala oku lingila omanu, wa pula hati: “Eci nye o kasi oku lingila omanu? Momo lie o lingila ovina evi lika liove okuti, omanu vosi va talama kovaso yove oku upisa komẽle toke koñolosi?” 15 Mose wa sapuila ndatembo yaye hati: “Momo omanu va kasi oku amamako oku iya kokuange oco va kũlĩhĩse eci catiamẽla kolonumbi via Suku. 16 Eci ku iya ocitangi pokati komanu vavali, ovo veya kokuange loku ci ndi lomboluila. Kuenje ndi tetulula ocitangi caco, loku va lomboluila ovisimĩlo via Suku yocili kuenda ovihandeleko viaye.”+

17 Ndatembo ya Mose wo sapuila hati: “Onjila o kasi oku kuama poku tetulula ovitangi, ka ya sungulukile. 18 Ocili okuti, ove o ka kava, ci kaile ove kuenda omanu va kasi love, momo upange owu u lema calua kokuove kuenda ku tẽla oku u linga lika liove. 19 Cilo njevelele. Ndu ku ĩha elungulo limue kuenje Suku o ka kala love.+ Ove o kala onumiwa yomanu kovaso a Suku yocili+ kuenda o sapuila ovitangi viaco ku Suku yocili.+ 20 O sukila oku va longisa oviholo kuenda ovihandeleko,+ loku va lekisa onjila va sukila oku endela kuenda upange va sukila oku linga. 21 Omo liaco, ove o sukila oku nõla pokati komanu alume va loñoloha+ haivo va sumbila Suku, alume va koleliwa haivo va suvuka ovitukiko+ kuenda eca kokuavo ocikele coku kala asongui vohulukãi yomanu, asongui vocita, asongui vakũi atãlo kuenda asongui vekũi.+ 22 Ovo va sukila oku tetuluila omanu eci kuiya ocitangi* cimue kuenda ocitangi cosi okuti ka ca lelukile va ci nene kokuove,+ pole, ocitangi cosi citito ovo muẽle va ci tetulule. Leluisa upange wove poku ecelela okuti, ovo va ku kuatisa.+ 23 Nda wa ci linga kuenda nda okuti Suku layevo haico a ku handeleka, ove o ka tẽla oku linga upange waco kuenje omanu vosi va ka tiukila kolonjo viavo lesanju.”

24 Vepuluvi liaco, Mose wa yevelela ndatembo yaye kuenje wa linga ovina viosi eye o sapuila. 25 Mose wa nõla alume va loñoloha pokati ka va Isareli vosi kuenje wa va ĩha ocikele coku kala asongui vomanu okuti, asongui vohulukãi, asongui vocita, asongui vakũi atãlo kuenda asongui vekũi. 26 Kuenje ovo va enda oku tetuluila omanu eci kuiya ocitangi cimue. Ocitangi cosi okuti ka ca lelukile, va enda oku ci nena ku Mose,+ pole, ocitangi cosi citito ovo muẽle va enda oku ci tetulula. 27 Noke Mose wa liusika la ndatembo yaye+ kuenje ndatembo yaco, wa tiukila kofeka yaye.

19 Kosãi yatatu noke lia va Isareli oku tunda kofeka Yegito, veteke liaco, va pitĩla vekalasoko lio Sinai. 2 Ovo va tunda ko Refidimi+ kuenda va pitĩla vekalasoko lio Sinai kuenje va tungila ocilombo vekalasoko. Va Isareli omo va tungila ocilombo kovaso yomunda.+

3 Noke Mose wa londa komunda oco a molẽhele kovaso a Suku yocili kuenje Yehova wo vilikiya oku upisa komunda+ hati: “Eci oco o sapuila onjo ya Yakoba kuenda va Isareli hati: 4 ‘Ene muẽle wa moli eci nda linga la va Egito+ kuenda ndomo ndo wambati vavava ongonga kuenje nda ku neni kokuange.+ 5 Kaliye nda vu pokoli lutate kondaka yange loku kapako ocisila cange, ene vu linga muẽle ocipiñalo cange ci likasi, pokati komanu vosi,+ momo ilu lieve liosi liange.+ 6 Ene kokuange vu linga usoma umue wovitunda kuenda ofeka yimue yi kola.’+ Evi ovio olondaka o sukila oku sapuila va Isareli.”

7 Mose wa enda, yu wa vilikiya akulu vomanu kuenda wa va lomboluila olondaka viosi Yehova o handelekele.+ 8 Noke omanu vosi va tambuluila kumuamue vati: “Ovina viosi Yehova a popia tu vi linga.”+ Vonjanja yaco, haico Mose a enda oku ka sapuila Yehova etambululo liomanu. 9 Kuenje Yehova wa sapuila Mose hati: “Tala! Njiya kokuove velende litekãva, oco omanu va yeve osimbu ndi vangula love kuenda oco olonjanja viosi va kolelevo kokuove.” Noke Mose wa sapuila Yehova olondaka omanu va popia.

10 Yehova wa sapuila Mose hati: “Kuende komanu, va kolisa etaili la hẽla kuenda va sukila oku sukula uwalo wavo. 11 Va sukila oku lipongiyila eteke liatatu, momo keteke liatatu, Yehova o lokila komunda Sinai kovaso yomanu vosi. 12 O sukila oku kapela omanu vosi olongave okuti, vi ñuala omunda kuenda va sapuila hati: ‘Kuati utate, ko ka lamaneli komunda ale oku lamba kolongave viaco. Wosi wa lamba komunda yaco, o ka pondiwa muẽle. 13 Lalimue eka li lamba komunu o kuete eko, pole, eye o sõsuĩwa lovawe ale o asiwa.* Ci kaile ocinyama ale omunu, ka kala lomuenyo.’+ Pole, eci ku yevala ocileñi combinga yomeme,+ ovo va sukila oku iya ocipepi lomunda.”

14 Noke Mose wa loka komunda, yu wa enda toke apa pa kala omanu kuenje wa fetika oku kolisa omanu kuenda ovo va sukula uwalo wavo.+ 15 Eye wa sapuila omanu hati: “Lipongiyili eteke liatatu. Ko ka litokeki lakãi vene.”*

16 Komẽle yeteke liatatu, kua kala ovilemĩlo loviliakulo kuenda elende limue linene lia molẽhela komunda,+ noke kua yevala ocileñi cimue cinene combinga kuenje omanu vosi vocilombo va fetika oku luluma.+ 17 Mose wopa omanu vocilombo wa vambata posamua oco va ka lisange la Suku yocili kuenje ovo va talama kepato liomunda. 18 Omunda yosi yo Sinai ya kala oku tunda owisi, momo Yehova wa lokila komunda yaco vondalu;+ kuenda owisi waco wa kala oku londa ndowisi wofolono kuenje omunda yosi ya kala oku luluma calua.+ 19 Osimbu ocileñi combinga ca kala oku livokiya calua, Mose wa vangula kuenje Suku yocili wo tambulula.*

20 Yehova wa lokila Komunda Sinai kilu liomunda. Noke Yehova wa vilikiya Mose oco a londe kilu liomunda kuenje Mose wa lamana.+ 21 Yehova wa sapuila Mose hati: “Loka kuenda lungula omanu oco ka va ka seteke oku iya ocipepi la Yehova oku u mola sanga valua pokati kavo va ka fa. 22 Kuenje ovitunda vina via siata oku amela ocipepi la Yehova olonjanja viosi, vi li kolise ovio muẽle oco Yehova ka ka vi kundule.”*+ 23 Mose wa sapuila Yehova hati: “Omanu ka va tẽla oku lamanela Komunda Sinai omo ove wa tu lungula ale poku tu sapuila okuti, ‘Kapa ongave kolonele viomunda kuenda yi kolisa.’”+ 24 Noke Yehova wa sapuila Mose hati: “Kuende, loka noke enju vali kumue la Arone, pole, ku ka ecelele okuti, ovitunda kuenda omanu va seteka oku iya ocipepi oco va lamanele ku Yehova, oco eye ka ka va kundule.”+ 25 Omo liaco, Mose wa lokila toke apa pa kala omanu kuenje wa ci va sapuila.

20 Noke Suku wa popia olondaka evi viosi+ hati:

2 “Ame ndi Yehova Suku yove, una wa ku upa kofeka Yegito, konjo yupika.+ 3 Ku ka fendele olosuku vikuavo, te lika ame.+

4 “Ku ka lisongele ociñumañuma ale esetahãlo liocina cimue ci kasi kovailu, pamue posi, ale vovava vemẽhi liongongo.+ 5 Ku ka vi kekamẽle ndaño muẽle oku vetiyiwa oku vi fendela,+ momo ame ndi Yehova Suku yove, ndi Suku una o yongola okuti omanu vo fendela lika eye,+ haeye o nena eyambulo komãla omo liakulueya olonjali, kocitumbulukila catatu kuenda kocitumbulukila cakuãla okuti, ca vana va ndi suvuka, 6 pole, o lekisa ocisola ka ci pongoloka kolohulukãi viovitumbulukila via vana va ndi sole haivo va kapako ovihandeleko viange.+

7 “Ku ka tukule onduko ya Yehova Suku yove olivova,+ momo Yehova o yambula una o tukula onduko Yaye olivova.+

8 “Ivaluka eteke Liesambata loku likolisa.+ 9 O sukila oku linga upange wove wosi voloneke epandu,+ 10 pole, eteke liepanduvali, esambata limue lia tumbikiwila Yehova Suku yove. Ka citava oku linga upange laumue, ci kale ove ale omõlove ulume, pamue omõlove ukãi, upika wove wulume, lupika wove wukãi, ndaño ocinyama cove covimbo ale ocingendeleyi ca tunga valupale ove.*+ 11 Momo vokuenda kuoloneke epandu Yehova wa lulika ovailu, longongo, lokalunga kuenda ovina viosi vi kasimo kuenje eye wa fetika oku puyuka keteke liepanduvali.+ Eli olio esunga lieci Yehova a sumũlũisila eteke Liesambata kuenda wa li kolisa.

12 “Sumbila isiove la ina yove,+ oco o kale lomuenyo otembo yalua vofeka Yehova Suku yove a kasi oku eca kokuove.+

13 “Ku ka ponde.+

14 “Ku ka linge ukahokolo.+

15 “Ku ka nyane.+

16 “Ku ka imbile ukuene uvangi wesanda.+

17 “Ku ka livele onjo yukuene. Ku ka livele ukãi wukuene,+ pamue upika waye wulume, ale upika waye wukãi, pamue ongombe yaye, ale ocimbulu caye, ndaño ocina cimue catiamẽla kokuaye.”+

18 Eci omanu vosi va yeva ovilemĩlo locileñi combinga, leci va mola oviliakulo kuenda omunda ya kala oku tunda owisi; kuenje omanu va luluma kuenda va talama ocipãla.+ 19 Omo liaco, ovo va sapuila Mose vati: “Vangula letu ove muẽle kuenje tu ku yevelela, pole, Suku ka ka vangule letu, omo liusumba wokuti tu fa.”+ 20 Kuenje Mose wa sapuila omanu hati: “Ko ka kuati usumba, momo Suku yocili wa molẽha kokuene oku vu seteki,+ oco usumba vu kueteli Suku wamameko okuti, ka vu lingi ekandu.”+ 21 Omanu vamamako oku talama kupãla, pole, Mose wamẽla ocipepi lelende litekãva muna Suku yocili a kala.+

22 Noke Yehova wa sapuila Mose hati: “Eci oco o sukila oku sapuila va Isareli hati: ‘Ene wa moli muẽle okuti ame nda vangula lene oku upisa kilu.+ 23 Ko ka litungili olosuku viopalata oco vu vi fendele kumue lame kuenda ko ka litungili olosuku viulu.+ 24 Vu sukila oku ndi tungila utala umue leve lio posi kuenje vu lumbilako ovilumba viene vioku pia elisi, ovilumba viene viombembua, olomeme viene kuenda olongombe viene. Kovitumãlo viosi kuna ndi ecelela okuti onduko yange ivalukiwa,+ ndiya kokuene kuenda ndu sumũlũisi. 25 Nda vu ndi tungila utala umue wovawe, ko ka tungi utala waco lovawe a songiwa* lovimalẽho.+ Momo nda wa talavayi locimalẽho coku songa ovawe, ene vu sepula utala waco. 26 Utala wange ka u ka kuate olosikata vioku londako, oco ka vu ka molẽhisiko epõlõla liene.

21 “Evi ovio ovisila o sukila oku sapuila komanu+ hati:

2 “Nda wa landa upika umue u Heveru,+ eye o kala love anyamo epandu, pole, kunyamo wepanduvali eye o yovuiwa okuti ka feti lacimue.+ 3 Nda eye weya lika waye, o tiukilavo lika waye. Nda okuti eye wa kuela ale, ukãi waye enda laye. 4 Nda cime caye wo wĩha ukãi, yu wo citila omãla valume lomãla vakãi, ukãi kuenda omãla vaye va linga va cime caye kuenje eye enda lika liaye.+ 5 Pole, nda upika o lipilika loku popia hati: ‘Ndi sole cime cange, lukãi wange kuenda omãla vange; si yongola oku yovuiwa,’+ 6 cime caye o sukila oku u nena kovaso a Suku yocili. Kuenje cime u kapa puvelo ale kocikuli cepito kuenda cime caye u tombola ketũi lociketelo noke eye o linga upika waye vokuenda kuomuenyo waye wosi.

7 “Nda omunu umue o landisa omõlaye ukãi ndupika, omõlaco ka yovoka ndeci upika wulume a yovuiwa. 8 Nda cime caye ko sanjukilile kuenda ko nõlele oco a linge ukama waye, pole, ecelela okuti eye o landiwa lomunu ukuavo,* ka citava okuti cime caye u landisa kovingendeleyi, momo cime wa kemba upika waye ukãi. 9 Nda cime wo nõla oco a linge ukãi womõlaye ulume, cime u tenda ndomõlaye ukãi. 10 Nda eye wa kuela ukãi ukuavo, o sukila oku amamako oku eca okulia kukãi watete, luwalo kuenda oku tẽlisa olonjongole viaye.+ 11 Nda eye ka eci ovina evi vitatu kukãi waco, ukãi waco o yovoka okuti ka feti olombongo.

12 “Wosi o veta omunu umue toke eci a fa, omunu waco a pondiwevo.+ 13 Pole, nda eye ka ci lingile ocipango kuenda Suku yocili wa ecelela okuti ocitangi caco ci pita, hu lekisa ocitumãlo cimue eye a ka tilila.+ 14 Nda omunu umue o kuatela onyeño yalua ukuavo kuenje u ponda ocipango,+ ndaño eye wa sanda eteyuilo kutala wange, te wa pondiwa.+ 15 Wosi o veta isiaye ale inaye, a pondiwe muẽle.+

16 “Wosi ambata utiku omunu umue+ kuenje u landisa, ale vo sanga laye,+ omunu waco a pondiwe.+

17 “Wosi wa siñala* isiaye ale inaye, a pondiwe.+

18 “Nda omunu umue wa liyaka lukuavo ale wo veta lewe pamue lonuku* kuenje omunu waco ka file, pole, o kala ño pula okuti ka votoka, ku lingiwe ndoco: 19 Nda eye o tẽla oku votoka loku ñuala ñuala posamua lekuatiso liombueti yimue, omunu wo lemẽha o yovuiwa keyambulo. Eye o feta lika otembo omunu a kala pula okuti, ka talavayele toke eci a kaya ciwa.

20 “Nda omunu umue wa veta lombueti upika waye ulume ale upika waye ukãi kuenje wo ponda, upika waco o fetuluinyiwa.+ 21 Pole, nda pa pita eteke limosi ale oloneke vivali okuti upika ka file, upika waco ka fetuluinyiwa, momo wa landiwa lolombongo via cime caye.

22 “Nda alume va liyaka kuenda va lemẽha ukãi omisi kuenje eye o cita selo,*+ pole, ka kua kaile olofa,* omunu wa lemẽha o sukila oku feta cosi ulume wukãi waco a pinga; kuenda o ci feta ndomo ci likuata leci olonganji via nõlapo.+ 23 Pole, nda kua kala olofa, te o feta omuenyo lomuenyo,+ 24 iso liso, eyo leyo, eka leka, omãhi lomãhi,+ 25 oku timĩhiwa loku timĩhiwa, epute lepute, onuku lonuku.

26 “Nda omunu umue wa veta viso liupika waye ulume ale liupika waye ukãi kuenje iso liupika lia nyõleha, eye ecelela okuti upika waye enda poku feta iso liaye.+ 27 Nda omunu umue wopa eyo liupika waye ulume ale liupika waye ukãi, eye ecelela okuti upika waye enda poku feta eyo liaye.

28 “Nda ongombe yimue ya toma ulume ale ukãi kuenje omunu waco o fa, ongombe yaco yi sõsuĩwe lovawe toke eci yi fa+ kuenda ka citava oku lia ositu yaco; pole, muẽleangombe yaco o yovuiwa keyambulo. 29 Pole, nda ongombe yaco ya toma toma ale omanu kuenda muẽleaco va enda ale oku u lungula, pole, ka yi lavele kuenje ongombe yaco ya ponda ulume umue ale ukãi, ongombe yaco yi sõsuĩwe lovawe kuenda muẽleaco a pondiwevo. 30 Nda muẽleaco vo fetisa,* eye o yovola omuenyo waye poku eca ondando yocisembi yovina viosi vo pinga. 31 Nda ongombe ya toma omõla ulume ale omõla ukãi, muẽleaco o sukila oku kapako ocisila eci. 32 Nda ongombe ya toma upika umue ulume ale upika ukãi, muẽleaco o sukila oku feta 30 kolosiekele* ku cime cupika waco kuenje ongombe yaco yi sõsuĩwa lovawe toke eci yi fa.

33 “Nda omunu umue wa sia ocitunu cimue upulule, ale wa ci fẽla, pole, ka ci sitikile kuenda ongombe ale ocimbulu ci kupukilamo, 34 muẽleacitunu o feta.+ Eye o feta ondando yocinyama ku muẽleaco kuenje ocinyama ca fa ci linga caye. 35 Nda ongombe yomunu umue ya toma ongombe yomunu ukuavo kuenje ya fa, va landisa ongombe yi kasi lomuenyo kuenda va litepela olombongo viaco; va litepelavo ositu yongombe ya fa. 36 Nda ongombe yaco ya kũlĩhĩwa okuti, ya toma toma ale, pole, muẽleaco ka yi lavele, o feta ongombe longombe kuenje ongombe ya fa yi linga yaye.

22 “Nda omunu umue o nyana ongombe ale omeme yimue kuenje o yi ponda ale o yi landisa, vongombe yimosi o sukila oku fetelamo olongombe vitãlo kuenda vomeme yimosi o fetelamo olomeme vikuãla.+

2 (“Nda ocimunu cimue+ ca kuatiwa okuti ci kasi oku tuiyila onjo yimue kuenje ci tipuiwa kuenda ci fa, omunu wa ci ponda ka kuata eko liosonde. 3 Pole, nda ca lingiwa noke yoku tunda kuekumbi, omunu wa ci ponda o kuata eko liosonde.)

“Ocimunu ci sukila oku feta. Nda ka ci kuete cimue, te ci landisiwa oco ci fete ovina a nyana. 4 Nda eci a nyana ci kasi lomuenyo kuenje ci sangiwa laye, nda ongombe, nda ocimbulu ale omeme, o sukila oku ci feta luvali.

5 “Nda omunu umue ambata ovinyama viaye koku vi lisa vepia ale vocumbo cayuva kuenje ecelela okuti ovinyama viaco vi lia vepia liomunu ukuavo, eye o sukila oku feta ovina via velapo vio vepia liaye ale ovina via velapo viocumbo caye cayuva.

6 “Nda ku kala ondalu yimue kuenje yi lisanduila vovikũla violosongo kuenda yi timĩha ovitungu viotiliku viongoluiwa, pamue otiliku ka ya keluiwile handi yi kasi vepia, ale epia liosi, una wa koka ondalu yaco o sukila oku feta ovina via timĩhiwa.

7 “Nda omunu umue eca kukuavo olombongo ale ovikuata oco a vi seleke kuenje ovio vi nyaniwa vonjo yomunu waco, nda ocimunu caco ca sangiwa, ci sukila oku feta ovina viaco luvali.+ 8 Nda ocimunu caco ka ca sangiwile, muẽleanjo o sukila oku ambatiwa kovaso a Suku yocili+ oco va kũlĩhĩse nda eye wopa ovina viukuavo ale sio. 9 Nda omunu umue wa sanga ocina cimue noke o popia okuti ocina caco caye a nyelisa, ndeci, ongombe, ocimbulu, omeme, uwalo ale ocina cikuavo, kavali kavo va sukila oku enda kovaso a Suku yocili+ loku lombolola ocitangi cavo. Una Suku a tukula okuti o kuete eko, o feta luvali kukuavo.+

10 “Nda omunu umue wa eca kukuavo ocimbulu ale ongombe ale omeme ale ocinyama co vimbo oco a ci seleke kuenje oco ci fa ale ci lemẽhiwa, pamue cambatiwa lovingumba okuti lomue wa ci mola, 11 ovo va sukila oku linga ocisila cimue pokati kavo kovaso a Yehova cokuti, eye kopile ovina viukuavo; kuenda muẽleaco o sukila oku tava. Kuenje omunu ukuavo ka sukila oku feta.+ 12 Pole, nda ocinyama ca nyaniwa peka lia una wa kala oku ci seleka,* eye o sukila oku ci feta ku muẽleaco. 13 Nda ocinyama caco ca pondiwa locinyama covusenge, eye o sukila oku nena ocinyama caco ca pondiwa oco ci kale nduvangi. Eye ka sukila oku feta cimue ca pondiwa locinyama covusenge.

14 “Nda omunu umue wondila ocinyama cimue kukuavo kuenje oco ci lemẽhiwa ale ci fa, osimbu muẽleaco ka kasipo, omunu wondila o sukila oku ci feta. 15 Nda muẽleaco haipo a kasi, omunu wondila ka sukila oku ci feta. Nda ocinyama caco coku fetela, olombongo viaco vioku feta ovio vi kala ofeto yaco.

16 “Nda ulume umue wa yonja ufeko umue wosombo okuti ka tambeliwile handi kuenje o lipekela laye, eye o sukila oku feta ovilombo oco a linge ukãi waye.+ 17 Nda isia yufeko o likala oku weca kulume, ulume waco o feta olombongo vi likuata londando yovilombo viufeko wosombo.

18 “Ku ka ecelele okuti onganga yi kala lomuenyo.+

19 “Wosi o lipekela locinyama cimue a pondiwe muẽle.+

20 “Wosi eca ovilumba kolosuku vikuavo okuti ka vi eci lika ku Yehova, a pondiwe.+

21 “Ku ka tate lãvi ocingendeleyi pamue oku ci talisa ohali,+ momo ene wa kalivo ovingendeleyi vofeka Yegito.+

22 “Ku ka talise ohali ocimbumba lacimue ale omõla ka kuete isia.*+ 23 Nda wa va talisa ohali kuenje ovo va liyuila kokuange, ame ndi yevelela oku liyula kuavo;+ 24 kuenje onyeño yange yi wenguka kuenda ndu wipayi losipata kuenje akãi vene va linga ovimbumba lomãla vene va linga olosiwe.

25 “Nda wondika olombongo ku umue ohukũi* pokati komanu vange okuti wa tunga love, ku ka linge ndomanu vakuavo vakuakulevalisa olombongo okuti va kisika omunu wa levala oku feta losindike. Ku ko pinge osindike.+

26 “Nda wa tambula uwalo wukuene oco o kale lawo nduvangi,+ o sukila oku u tiuwiya kokuaye osimbu ekumbi ka lia iñilile. 27 Momo owo lika uwalo a kuete woku lisikĩlĩla okuti, woku sikĩlĩla etimba* liaye; eye o pekela ndati?+ Eci a mbilikiya, ndi yevelela, omo ndukuahenda.*+

28 “Ku ka siñale* Suku+ ndaño usongui* umue o kasi pokati komanu vove.+

29 “Ku ka kuate ohele yoku eca ovilumba viovaima ove kuenda viovikoselo viove.*+ Ove o sukila oku nyĩha onuñulu yomãla vove valume.+ 30 Eci o linga lolonuñulu violongombe viove kuenda violomeme viove+ ceci: Ovio vi kala la inavio oloneke epanduvali. Keteke liecelãla, te o vi eca kokuange.+

31 “Vu sukila oku lekisa okuti, ene vumanu va kola kokuange+ kuenda ka vu li ositu yocinyama cosi ca pondiwa vusenge locinyama ca tema.+ Ositu yaco vu sukila oku yimba kolombua.

23 “Ku ka sandeke* esapulo limue liesanda.+ Ku ka livale ukamba londingaĩvi poku linga ombangi yesanda.+ 2 Ku ka kuame owiñi koku linga eci cĩvi kuenda poku imba uvangi, ku ka pengise esunga omo lioku kuama owiñi.* 3 Ku ka lekise ocame poku tetuluila omunu umue ohukũi.+

4 “Nda wa sanga ongombe ale ocimbulu cunyãli wove okuti ca nyelela, o sukila oku ci tiula ku muẽleaco.+ 5 Nda wa mola okuti ocimbulu comunu wa ku suvuka ca kupuka locilemo caco, ku ka ci pitahãle. O sukila oku kuatisa muẽleaco oku popela ocinyama.+

6 “Ku ka pengise esunga poku tetulula ocitangi comunu umue ohukũi o kasi pokati kove.+

7 “Ku ka litenge vuvangi* wuhembi kuenda ku ka ponde omunu ka kuete eko lomunu ukuesunga, momo u o linga eci cĩvi, si u tendi ndukuesunga.*+

8 “Ku ka tave ovitukiko, momo ovitukiko vi yapuisa omunu o tetulula lolondunge. Kuenje vi kokela omunu ukuesunga oku pengisa ovisimĩlo viaye.+

9 “Ku ka talise ohali ocingendeleyi. Ene wa kũlĩhi eci ci lomboloka oku kala ocingendeleyi,* momo wa kalivo ovingendeleyi vofeka Yegito.+

10 “O kũla ombuto vepia liove kuenje wungula ovaima aco vanyamo epandu.+ 11 Pole, kunyamo wepanduvali, ka citava oku lima, ovapia aco a vonge kuenje olohukũi vi kasi pokati kove vi lia ovisupe vialio kuenda eci ovio via supisapo ci liwa lovinyama viovusenge. Eci oco o sukila oku linga locumbo cove cayuva kuenda oviti viove violiveira.

12 “O linga upange wove oloneke epandu; pole, keteke liepanduvali o liwekapo oku linga upange, oco ongombe yove locimbulu cove vi puyuke kuenda omõla ukuenje wupika wove wukãi locingendeleyi, va puyukevo.+

13 “Vu sukila oku kuata utate poku linga ovina viosi nda ku handeleki+ kuenda ko ka tukuli olonduko violosuku vikuavo; ovio ka vi ka yeviwe vomẽla wene.+

14 “Olonjanja vitatu vunyamo o sukila oku ndi lingila ocipito cimue.+ 15 O ka linga Ocipito Colombolo ka vi Kuete Etumbisa.+ O ka lia olombolo ka vi kuete etumbisa vokuenda kuoloneke epanduvali ndomo nda ku handeleka okuti, kotembo ya sokiyiwa kosãi ya Aviva,*+ momo kotembo yaco oco wa tunda Kegito. Lomue ka keye ovoko kokuange.+ 16 O lingavo Ocipito Coku Ungula* ovaima atete wupange wove, wovina wa kũla vepia liove;+ kuenda o linga Ocipito Coku Ongolola* kesulilo liunyamo eci ove wungula vepia ovaima a tunda kupange wove.+ 17 Olonjanja vitatu vunyamo alume vove vosi va molẽhe kovaso ya Ñala yocili, Yehova.+

18 “Ku ka lumbe osonde yocilumba cange lovina vi kuete etumbisa. Ovilumba viulela vi eciwa kovipito viange, ka vi ka kale uteke wosi toke komẽle.

19 “Ovaima atete a velapo o vepia liove, o sukila oku a nena konjo ya Yehova Suku yove.+

“Ku ka teleke ositu yokahombo vasenjele a inaco.+

20 “Mitisa ungelo umue kovaso yove+ oco a ku teyuile vonjila wendela loku ku tuala kocitumãlo nda pongiya.+ 21 U yevelela kuenda pokola kondaka yaye. Ku ko sinĩle, sanga ka ka ecela akandu ove,+ momo onduko yange yi kasi vokuaye. 22 Nda ove wa pokola kondaka yaye lutima wosi loku linga ovina viosi ndu ku sapuila, ame ndi linga unyãli wovanyãli vove kuenda ndi katukila vana va ku katukila. 23 Momo ungelo wange o ka pita kovaso yove loku ku tuala ku va Amori, ku va Hiti, ku va Perisi, ku va Kanana, ku va Hivi kuenda ku va Yevusi kuenje ndi ka va kundula.+ 24 Ku ka fendele olosuku viavo loku kisikiwa oku vi vumba kuenda ku ka setukule ovilinga viavo.+ Pole, o sukila oku vi kundula loku nyanyõla olongunji viavo vi kola.+ 25 Ove o sukila oku vumba lika Yehova Suku yove+ kuenje eye o ka sumũlũisa okulia kuove kuenda ovava ove.+ Njupa ovovei pokati kove.+ 26 Akãi vo vofeka yove ka va ka pulumũla ndaño oku kala osiũle+ kuenje ndi ka eca kokuove anyamo alua omuenyo.*

27 “Ndi lingisa okuti omanu va ñuatela usumba osimbu ove kua pitĩlile+ kuenda ndi kokela ombuanja omanu vosi o sanga kuenje ndi lingisa okuti ovanyãli vove vosi va tila omo lioku va yula.*+ 28 Ndi lingisa okuti ovanyãli vove va sumua* osimbu kua pitĩlile,+ ndi tundisa kovaso yove va Hivi, la va Kanana kuenda va Hiti.+ 29 Si va tundisa vunyamo umosi oco ofeka ka yi ka kale upolokoso kuenda ovinyama viovusenge ka vi ka livokiye okuti, vi lemẽha omanu.+ 30 Ndi va tundisa kamue kamue kovaso yove, toke eci o livokiya kuenje o piñala ofeka.+

31 “Ndi kapa ongave yove oku upisa Kokalunga Kakusuka toke kokalunga ka va Filisiti kuenda oku upisa kongave yo vekalasoko toke Kolui;*+ momo ngeca olonungi viofeka peka liove kuenje o va tundisa kovaso yove.+ 32 Ku ka linge ocisila lavo pamue lolosuku viavo.+ 33 Ka va ka tunge vofeka yove, sanga va ku kokela oku ndi lingila ekandu. Momo nda wa vumba olosuku viavo, cu ku lingila onjanjo.”+

24 Noke eye wa sapuila Mose hati: “Lamanela ku Yehova ove la Arone, la Nadava, la Avihu+ kuenda 70 kakulu va va Isareli kuenje kekamẽli ocipãla. 2 Mose eye lika amela ku Yehova; pole, vakuavo ka citava okuti va amelako kuenda omanu ka citava okuti va lamana laye.”+

3 Kuenje Mose wa tiuka kuenda wa sapuila omanu olondaka viosi via Yehova kumue lovisila viosi+ kuenje omanu vosi va tambulula londaka yimuamue vati: “Olondaka viosi Yehova a popia, tua likapelako oku vi linga.”+ 4 Mose wa soneha olondaka viosi via Yehova.+ Wa pasuka selo komẽle kuenje wa tunga utala vepato liomunda kuenda olongunji 12 via soka lovikoti 12 via va Isareli. 5 Noke eye wa tuma amalẽhe vamue va Isareli kuenje va eca ovilumba vioku pia elisi kuenda va lumba olongombe ndovilumba viombembua+ ku Yehova. 6 Mose wa tikula onepa yimue yosonde, wa yi pesila patiyela kuenda onepa yikuavo yosonde wa yi nyĩla kutala. 7 Noke wa kuata elivulu liovisila kuenje wa li tangela omanu lolukandi.+ Ovo va tambulula vati: “Ovina viosi Yehova a popia, tua likapelako oku vi linga loku vi pokola.”+ 8 Mose wa tikula osonde, wa yi nyĩla komanu+ loku popia hati: “Eyi oyo osonde yocisila Yehova a linga lene, ndomo ci likuata lolondaka evi viosi.”+

9 Mose la Arone, la Nadava, la Avihu kuenda 70 kakulu va va Isareli va lamana, 10 kuenje va mola Suku ya Isareli.+ Vemẽhi liolomãhi viaye mua kala cimue ca setahãla osi ya pangiwa lovawe o safira kuenda ci tekãvelua ndovailu ka a kuete elende.+ 11 Eye ka lemẽhele alume va kemãla va va Isareli+ kuenda va mola ocinjonde ca Suku yocili kuenje va lia, va nyua.

12 Yehova wa sapuila Mose hati: “Lamanela kokuange komunda kuenje oko o kala. Ndu ku ĩha avaya ovawe a kuete ovihandeleko kuenda ovikundi ndi soneha, oco vi kale olonumbi viavo.”+ 13 Mose wa votoka loñuatisi yaye Yehosua+ kuenda Mose wa lamanela komunda ya Suku yocili.+ 14 Pole, eye wa sapuila akulu hati: “Ene vu tu talamẽla palo toke eci tu tiuka kokuene.+ Arone la Huru+ va kasi lene. Wosi o kuete ondaka yimue yoku tetulula a ende kokuavo.”+ 15 Noke Mose wa lamanela komunda osimbu elende lia kala oku sitika omunda.+

16 Ulamba wa Yehova+ wamamako oku kala Komunda Sinai+ kuenda elende lia sitika omunda vokuenda kuoloneke epandu. Keteke liepanduvali Suku wa vilikiyila Mose vokati kelende. 17 Ku va Isareli vana va kala oku vanja, oku molẽha kulamba wa Yehova kua kala ndondalu yi liakoka kilu liomunda. 18 Mose wa iñila velende kuenda wa lamanela komunda.+ Kuenje Mose wa kala komunda yaco ci soka 40 kovotanya kuenda 40 kovoteke.+

25 Yehova wa popia la Mose hati: 2 “Sapuila omanu va Isareli okuti va ece ombanjaile kokuange; vosi vana okuti utima wavo u va vetiya oku eca, vu sukila oku tambula kokuavo ombanjaile yange.+ 3 Ovina vu tambula kokuavo ndombanjaile okuti ovio vi taviwa vievi: ulu,+ opalata,+ osipi,+ 4 alinya a vumbula, la-a ohusu, la-a a kusuka, la-a ovalatanya, lovonya ohombo, 5 ovipa viocitupi comeme via pindaliwa levala li kusuka, ovipa violonjundu, avaya uti wo akasia,+ 6 ulela wolondiyelo,+ onguendu yoku linga ulela woku waveka+ kuenda winsensu vielemba liwa,+ 7 ovawe o onixi lovawe akuavo, oco a kapiwe kevendalia+ kuenda konjeke yo ponete.*+ 8 Va nungile ocitumãlo cimue ci kola kuenje ndi tunga pokati kavo.+ 9 Vu tunga ocitumãlo caco ci kola okuti, otavernakulu kumue lovikuata vialio viosi loku kuama ciwa oloseteko ndu ku lekisi.+

10 “Va tunge ocikasia cavaya o akasia okuti, kusõvi ovikeya* vivali lomeyu kuenda vupati waco ukeya lomeyu, oku lepa kuaco ukeya lomeyu.+ 11 Noke o ci laña lulu wa fina.+ O ci laña vokati lo kosamua kuenje kongenge yaco o ñualisako ocivindo culu.+ 12 O ci pangela ovinunga vikuãla viulu kuenje o vi kapa kilu liovolu aco akuãla okuti, konele yimue ovinunga vivali kuenda konele yikuavo ovinunga vivali. 13 Kuenje o panga olombueti viavaya o akasia kuenda o vi laña lulu.+ 14 Olombueti viaco, o vi iñisa vokati kovinunga vio kolonele Viocikasia oco Ocikasia caco cambatiwe lavio. 15 Olombueti vi kala vokati kovinunga Viocikasia; ka citava okuti olombueti viaco viupiwamo.+ 16 O kapa Vocikasia caco Uvangi ndi ka eca kokuove.+

17 “O tunga onuviko yulu wa fina okuti, kusõvi ovikeya vivali lomeyu kuenda vupati waco ukeya lomeyu.+ 18 O tunga va keruvi vavali va pangiwa lulu; o va tunga lulu wa teliwa lomatelo kolongenge vivali vionuviko.+ 19 Tunga va keruvi kolongenge vivali vionuviko, kongenge yimue o keruvi kuenda kongenge yikuavo o keruvi. 20 Va keruvi vaco voluĩle avava avo avali kilu, loku sikĩlĩla onuviko lavava avo+ kuenje ovipala viavo vi limbe ovaso. Ovipala via va keruvi vi petamẽle konuviko. 21 O kapa onuviko+ Kocikasia kuenje vokati Kocikasia caco, o kapamo Uvangi ndi ka eca kokuove. 22 Ndi ka limolẽhisa kokuove loku vangula love oku upisa kilu lionuviko yaco.+ Pokati ka va keruvi vavali va kasi kilu liocikasia Cuvangi, oko ndi ka ku sapuila ovihandeleko viosi o ka eca ku va Isareli.

23 “O pangavo omesa+ yimue yavaya o akasia okuti, kusõvi ovikeya vivali kuenda vupati waco ukeya umosi, voku lepa kuaco ukeya lomeyu.+ 24 O yi laña lulu wa fina kuenje kongenge yaco o ñualisako ocivindo culu. 25 Kolonele viomesa yaco o kapako ongenge ya soka lupati weka* koku sanjavala kuenda kongenge yaco o ñualisako ocivindo culu. 26 O yi tungila ovinunga vikuãla viulu kuenje o kapa ovinunga viaco kavindi akuãla kuna kua kapiwa ovolu aco akuãla. 27 Ovinunga vi kale ocipepi longumbo, momo vovinunga viaco omo iñisa olombueti vioku ambata omesa. 28 O panga olombueti viavaya o akasia kuenje o vi laña lulu, oco omesa yaco yambatiwe lavio.

29 “O tungavo alonga aco, olokopo, asanga kuenda atiyela ana ovo va ka itaila lao ovilumba vioku nyua. O vi tunga lulu wa fina.+ 30 Kuenje olonjanja viosi, o sukila oku kapa olombolo via taliwa komesa okuti, kovaso ange.+

31 “O panga ociyekelo colondiyelo+ lulu wa fina. Ociyekelo caco colondiyelo ci pangiwe lulu wa teliwa lomatelo. Ociseveto caco, uti waco, ovianja viaco, olokopo viaco, olombutãu viaco kuenda olonelẽho viaco, vi kale lika ocikuata cimosi.+ 32 Kolonele viociyekelo colondiyelo ku tunda ovianja epandu okuti, ovianja vitatu vi kala konele yimue kuenda ovianja vitatu vi kala konele yikuavo. 33 Kocanja locanja conele yimue, ku kala olokopo vitatu vi kasi ndolonelẽho viamendua, o kapavo olombutãu noke olonelẽho kuenda kocanja locanja conele yikuavo ku kala olokopo vitatu vi kasi ndolonelẽho viamendua, o kapavo olombutãu noke olonelẽho. Eci oco ci lingiwa lovianja epandu vi tunda kuti wociyekelo colondiyelo. 34 Kuti wociyekelo colondiyelo ku kala olokopo vikuãla vi kasi ndolonelẽho viamendua kumue lolombutãu noke olonelẽho. 35 Vemẽhi liovianja vivali viatete vi tunda kuti, mu kala olumbutãu lumue kuenda vemẽhi liovianja vivali vikuavo, mu kala olumbutãu lumue kuenje vemẽhi liovianja vivali vikuavo mu kala olumbutãu lumue, momo kuti ku tunda ovianja epandu. 36 Olombutãu viaco lovianja viaco kuenda ociyekelo cosi colondiyelo, ci linga ocikuata cimuamue culu wa fina wa teliwa lomatelo.+ 37 Kociyekelo caco, o tungilako olondiyelo epanduvali okuti, osimbu vi taima, vi mĩhila ocitumãlo ci kasi kovaso yociyekelo colondiyelo.+ 38 Ovikuata viaco vioku ima ondalu* loviyukilo viaco viondalu vi lingiwe lulu wa fina.+ 39 Ociyekelo colondiyelo lovikuata evi, vi lingiwe lotalendo* yimosi yulu wa fina. 40 Kũlĩhĩsa okuti o vi linga loloseteko vialio vina via lekisiwa kokuove komunda.+

26 “Otavernakulu+ o yi tunga lekũi kolonanga viombalaka vielinya liovalatanya lia tutiwa, li vumbula, liohusu leli li kusuka. Kolonanga viaco o tutilako va keruvi.+ 2 Onanga lonanga yombalaka yi kuate 28 kovikeya* vusõvi kuenda ovikeya 4 vupati. Olonanga viosi viombalaka vi kuate oloseteko vimuamue.+ 3 Olonanga vitãlo vi tongiwe pamosi oco vi linge yimosi kuenda olonanga vikuavo vitãlo vi tongiwevo pamosi oco vi linge yimosi. 4 Kongenge yonanga yimue ya sulako yombalaka o tongelako asusu elinya li vumbula, cimuamue haico o linga kongenge yonanga yikuavo ya sulako, pana olonanga vi tokekiwa. 5 Kongenge yonanga yimue yombalaka o tongelako 50 kasusu kuenda kongenge yonanga yikuavo yombalaka o tongelakovo 50 kasusu okuti, vi limba ovaso pana olonanga viaco vi ka tokekiwa. 6 Ove o panga 50 koviyikilo viulu kuenda o tokeka olonanga viombalaka loviyikilo viaco, oco otavernakulu yi linge yimuamue.+

7 “O pangavo olonanga viovonya olohombo+ oco vi sikĩlĩle kilu liotavernakulu. O panga 11 kolonanga viombalaka.+ 8 Onanga lonanga yombalaka yi kuate 30 kovikeya vusõvi kuenda ovikeya 4 vupati. Olonanga viosi vi soka 11 viombalaka, vi kuate oloseteko vimuamue. 9 Ove o tokeka pamosi olonanga vitãlo viombalaka kuenda o tokeka pamosi olonanga vikuavo epandu viombalaka kuenje onanga yepandu yombalaka o yi ketikila kovaso yombalaka. 10 Kongenge yonanga yimue yombalaka okuti, kongenge yonanga ya sulako, o tongelako 50 kasusu kuenda kongenge yonanga yikuavo yombalaka o tongelakovo 50 kasusu pana olonanga viaco vi tokekiwa. 11 Ove o panga 50 koviyikilo viosipi kuenda o vi kapa kasusu, oco vi tokekise ombalaka okuti, yi linga yimuamue. 12 Onanga yi supapo kolonanga viombalaka, yi kala yoku nyoñamisa. Onepa yimue yonanga ya supapo yi nyoñamele konyima yotavernakulu. 13 Onanga yikuavo yi supapo kusõvi wolonanga viombalaka yi kala yoku nyoñamisa kotavernakulu okuti, onele lonele ukeya umosi oco yi sikĩlileko.

14 “Kombalaka yaco o pangelakovo onuviko yovipa viocitupi comeme ca pindaliwa levala li kusuka kuenda kilu liaco o pangelako onuviko yovipa violonjundu.+

15 “Ove o ka pangela otavernakulu olomanji+ viavaya o akasia kuenje vi talamisiwe.+ 16 Omanji lomanji yi kuate ekũi kovikeya koku lepa kuenda vupati ukeya umosi lomeyu. 17 Omanji lomanji yi kuate oviti* vivali okuti, vi litokeka. Eci oco o sukila oku linga lolomanji viosi viotavernakulu. 18 Ove o panga 20 kolomanji vio konele yombuelo yotavernakulu okuti, vimba ovaso kombuelo.

19 “Ove o panga 40 kovikuata viosipi vi kuete epangu+ oco vi kapiwe vemẽhi 20 kolomanji: ovikuata vivali vi kuete epangu, vi kala vemẽhi liomanji yimue oco vi kale koviti viaco vivali kuenda ovikuata vivali vi kuete epangu, vi kala vemẽhi liomanji lomanji, oco vi kale koviti viaco vivali+ ndomo vi li kuãi. 20 Konele yikuavo yotavernakulu okuti konele yonano, o pangelako 20 kolomanji, 21 o pangavo 40 kovikuata viaco viopalata vi kuete epangu okuti, ovikuata vivali vi kuete epangu vi kala vemẽhi liomanji yimosi kuenda ovikuata vivali vi kuete epangu vi kala vemẽhi liomanji lomanji ndomo vi li kuãi. 22 Konyima yotavernakulu okuti kutakelo, o pangelako olomanji epandu.+ 23 Ove o panga olomanji vivali oco vi kale ndoviti vivali pevindi lio konyima yotavernakulu. 24 Olomanji viaco vi kuate avaya avali oku upisa kombuelo toke konano pana ovio vi tokekiwa okuti, kocinunga catete. Eci oco ci lingiwa lolomanji viaco kuenda ovio vi kala oviti vivali vio pevindi. 25 Ku kala olomanji ecelãla kumue 16 kovikuata vialio viopalata vi kuete epangu okuti, ovikuata vivali vi kuete epangu vi kala vemẽhi liomanji yimue kuenda ovikuata vivali vi kuete epangu vi kala vemẽhi liomanji yimue ndomo vi li kuãi.

26 “Ove o panga olombueti viavaya o akasia okuti, vitãlo vi tokeka olomanji konele yimue yotavernakulu,+ 27 kuenje olombueti vitãlo vi tokeka olomanji konele yikuavo yotavernakulu kuenda olombueti vitãlo vi tokeka olomanji konele yutakelo wotavernakulu okuti, konepa yo konyima. 28 Ombueti yo pokati yi tunda konele yimue toke konele yikuavo okuti, yi pita vokati kovinunga vi kasi pokati kolomanji.

29 “Olomanji viaco o vi laña lulu+ kuenda o pangavo ovinunga viaco lulu ndovikuatelo violombueti kuenda olombueti viaco o vi laña lulu. 30 Ove o tunga otavernakulu poku kuama ciwa oloseteko via lekisiwa kokuove komunda.+

31 “Ove o sukila oku panga ongumbo+ yimue lelinya li vumbula, liohusu li kusuka kuenda liovalatanya lia tutiwa. Kongumbo yaco o tutilako va keruvi. 32 Ove o yi nyoñamisa kolongunji vikuãla viuti wo akasia via lañiwa lulu. Olonjolo violongunji viaco vi kale viulu. Olongunji vi sokekiwe kovikuata vikuãla viopalata vi kuete epangu. 33 Ove o nyoñamisila ongumbo vemẽhi lioviyikilo kuenda o nena ocikasia Cuvangi+ vokati kongumbo. Ongumbo yaco yi tepisa pokati Kohondo yi Kola+ Lohondo yi Kola Koku Kola.+ 34 Kapa onuviko kocikasia Cuvangi kuenje ci kapa Vohondo yi Kola Koku Kola.

35 “Ove o kapa omesa vokati Kohondo yi Kola* kumue lociyekelo colondiyelo+ okuti, ci kala kovaso yomesa konele yombuelo yotavernakulu; kuenda omesa yaco o yi kapa konele yo konano. 36 Puvelo wombalaka o pangelapo ongumbo yimue lelinya li vumbula, liohusu leli li kusuka kuenda liovalatanya lia tutiwa okuti, vi tongiwa pamosi.+ 37 Ongumbo yaco o yi pangela olongunji vitãlo viuti wo akasia kuenje vi laña lulu. Olonjolo violongunji viaco vi kale viulu kuenda o vi pangela ovikuata vitãlo viosipi vi kuete epangu.

27 “Ove o panga utala lavaya o akasia;+ kusõvi ovikeya* vitãlo kuenda vupati ovikeya vitãlo. Utala waco u kuate olonele vikuãla via lisoka kuenda koku lepa ovikeya vitatu.+ 2 Kavindi aco akũala, o pangelako olombinga;+ olombinga viaco lutala, vi linga ocikuata cimuamue kuenda utala waco o u laña losipi.+ 3 Ove o panga ovikuata viaco vioku upa lavio atiko* wutala, o pangavo olopa, atiyela, olongalufu kuenda oviyukilo viondalu kuenje ovikuata viaco viosi o vi panga losipi.+ 4 Vutala waco o kapamo ociyo haico owanda wosipi kuenda kowanda waco o kapako ovinunga vikuãla viosipi okuti, vi kala pavindi akuãla wutala. 5 Owanda waco o u kapa vemẽhi liongenge yutala kuenda u kala vokati lakati kutala. 6 Utala o u pangela olombueti viuti wo akasia kuenje o vi laña losipi. 7 Olombueti viaco vi iñisiwa kovinunga oco vi kale kolonele vivali viutala eci wambatiwa.+ 8 Ove o tunga utala ndocikasia cavaya okuti vokati ka muli lacimue. O ci linga ndomo ca lekisiwa kokuove komunda.+

9 “Ove o panga ocitali+ cotavernakulu. Konele yombuelo yina ya imba ovaso kombuelo, ocitali ci kuata olonanga vielinya liovalatanya lia tutiwa okuti, konele yimue olonanga viaco vi kuata 100 kovikeya kusõvi.+ 10 Ocitali caco ci kuate 20 kolongunji kuenda 20 kovikuata viosipi vi kuete epangu. Olonjolo violongunji lovikuata viaco vioku tokeka* vi kale viopalata. 11 Olonanga vio konele yo konano vi kuatevo 100 kovikeya kusõvi kuenje ku kala 20 kolongunji viaco kuenda 20 kovikuata viaco viosipi vi kuete epangu, lolonjolo viopalata kuenda ovikuata vioku tokeka* olongunji. 12 Konele yutakelo ku kala olonanga vi kuata 50 kovikeya vupati wocitali, lolongunji ekũi kuenda ovikuata ekũi vi kuete epangu. 13 Upati wocitali konele yutundilo okuti, wa imba ovaso kutundilo wekumbi, u kuate 50 kovikeya. 14 Konele yimue ku kala olonanga vi kuete 15 kovikeya kuenje ku kala olongunji vitatu kuenda ovikuata vitatu vi kuete epangu.+ 15 Kuenje konele yikuavo ku kala olonanga vi kuete 15 kovikeya kuenda olongunji vitatu lovikuata vitatu vi kuete epangu.

16 “Uvelo wocitali u kuate ongumbo yi kuete 20 kovikeya kusõvi ya pangiwa lelinya li vumbula, liohusu, li kusuka kuenda liovalatanya lia tutiwa halio lia tongiwa pamosi,+ kumue lolongunji vikuãla kuenda ovikuata viaco vikuãla vi kuete epangu.+ 17 Olongunji viosi vi ñuala ocitali, vi kuate ovikuata vioku tokeka viopalata, lolonjolo viopalata, pole, ovikuata viaco vi kuete epangu vi lingiwe losipi.+ 18 Ocitali kusõvi ci kuate 100 kovikeya,+ vupati 50 kovikeya kuenda ovikeya 5 koku lepa okuti, vi lingiwa lelinya liovalatanya lia tutiwa kuenda vi kuate ovikuata viosipi vi kuete epangu. 19 Ovikuata viosi vi sukiliwa kupange wotavernakulu, oku kongelamo olopeleko viaco kuenda olopeleko viosi viocitali, vi kale viosipi.+

20 “Handeleka va Isareli oco va nene ulela uwa woliveira oco u kapiwe volondiyelo okuti, olondiyelo viaco vi amamako oku taima.+ 21 Vombalaka yohongele okuti, vokati Kohondo yi Kola* ocipepi locikasia Cuvangi,+ Arone lomãla vaye valume va linge esokiyo lioku taimisa olondiyelo, tunde koñolosi toke komẽle kovaso a Yehova.+ Eci ociholo cimue cotembo ka yi pui kovitumbulukila viavo viosi okuti, ci lingiwa la va Isareli.+

28 “Pokati ka va Isareli kovonga manjove Arone+ kumue lomãla vaye valume+ okuti, Nadava, la Avihu,+ la Eleasa kuenda Itamare,+ oco va ndi vumbe ndovitunda.+ 2 Ove o pangela huvove Arone ovowalo a kola, oco wece kokuaye ulamba kuenda eposo.+ 3 Sapuila vosi va loñoloha,* vana nda ĩha olondunge+ okuti, va tongela Arone ovowalo oku u kolisa, oco a ndi vumbe ndocitunda.

4 “Ovowalo va sukila oku panga vava: onjeke yo ponete,*+ evendalia,+ esanya ka li kuete ovoko,+ ocikutu ca lepa ci kuete avala a litepa, ekofue+ kuenda uvia;+ va tongele manjove Arone kuenda omãla vaye valume ovowalo aco a kola oco va ndi vumbe ndovitunda. 5 Olonalavayi viaco via loñoloha, vi ka linga upange waco lulu, lelinya li vumbula, liohusu, li kusuka kuenda liovalatanya.

6 “Ovo va sukila oku panga evendalia lulu, lelinya li vumbula, leli liohusu, leli li kusuka kuenda liovalatanya lia tutiwa kuenje va tuta evendalia liaco.+ 7 Olio li kuate ovikolo vivali vi pita kapepe okuti, vi tokeka evendalia kolongenge vialio vivali. 8 Uvia* wa tutiwa+ haiwo u tokekiwa kevendalia oco u kute ciwa evendalia liaco, u lingiwe lovikuata vimuamue ndeci: ulu, elinya li vumbula, li kusuka, liohusu kuenda liovalatanya lia tutiwa.

9 “Ove o kuata ovawe avali o onixi+ kuenje o sonehamo* olonduko viomãla va Isareli,+ 10 olonduko epandu vi sonehiwa kewe limue kuenda olonduko vikuavo epandu vi sonehiwa kewe likuavo ndomo va li kuãi poku va cita. 11 Ukuakusoneha o soneha olonduko viomãla va Isareli vovawe avali, ndeci a soneha ondimbukiso yimue.+ Noke ove o ñualisa ovivela viulu vovawe aco. 12 O kapa ovawe aco avali kovikolo vievendalia vi pita kapepe ndovawe onjivaluko komãla va Isareli+ kuenje Arone ambata olonduko viavo kovaso a Yehova kapepe aye avali ndonjivaluko. 13 Ove o sukila oku tela ovivela viulu, 14 kuenda alienge avali ulu wa fina a kasi ndomota yimue+ kuenje o kapa alienge aco vovivela.+

15 “Ove o tuma umue ukuakututa oco a pange onjeke yo ponete yoku sombisa.+ Onjeke yaco o yi panga ndeci evendalia lia pangiwa okuti, lulu, lelinya li vumbula, leli liohusu, leli li kusuka kuenda liovalatanya lia tutiwa.+ 16 Poku yi vaka pokati, yi kuate olonele vikuãla via lisoka okuti kusõvi ci soka lepaluma* kuenda vupati ci soka lepaluma. 17 Ove o kapamo ovawe kuenda ovawe aco o a longeka kovolala akuãla. Kulala watete lio rubi, lio topasiu kuenda lio emeralda. 18 Kulala wavali lio turkesa, lio safira kuenda lio jaspe. 19 Kulala watatu ewe lio leshem,* lio agata kuenda lio ametisitia. 20 Kulala wakuãla lio krisolitu, lio onixi kuenda lio jade. Ovawe aco a kapiwe kovivela viulu. 21 Ovawe aco a likuate lolonduko viomãla va Isareli okuti, 12. Kewe lewe ku sonehiwe ndeci ku sonehiwa ondimbukiso yimue, onduko londuko yi likuate locikoti cimue pokati kovikoti 12.

22 “Konjeke yo ponete, ove o pangelako alienge ulu wa fina a vindiwa ndovikolo.+ 23 Konjeke yo ponete ove o pangelako ovinunga vivali viulu kuenda o kapa ovinunga viaco vivali kasusu avali onjeke yo ponete. 24 Ove o pitisa ovikolo vivali viulu vovinunga vivali vi kasi kasusu onjeke yo ponete. 25 Asusu ovikolo vivali, ove o a pitisa vovivela vivali kuenje o a kutila kapepe evendalia kovaso yaco. 26 Ove o panga ovinunga vivali viulu kuenje o vi kapa kasusu avali vokati konjeke yo ponete kongenge yaco okuti, yimba ovaso kevendalia.+ 27 Ove o sukila oku panga vali ovinunga vivali viulu apa uvia u tokekiwa levendalia okuti, kovaso yevendalia, vemẽhi liovikolo vivali vi pita kapepe, kilu liuvia wa tutiwa* wevendalia.+ 28 Oco onjeke yo ponete yi kale pocitumãlo calio, ove o sukila oku kuta lukolo u vumbula onjeke yo ponete oku upisa kovinunga vionjeke yo ponete toke kovinunga vievendalia. Kuenje eci ci kuatisa onjeke yo ponete oku kala pocitumãlo calio kevendalia, kilu liuvia wa tutiwa.*

29 “Arone ambate olonduko viomãla va Isareli vonjeke yo ponete yoku tetulula, yi kasi ponete yaye eci eye a iñila Vohondo yi Kola, oco otembo yosi va ivalukiwe la Yehova. 30 Vonjeke yo ponete yoku tetulula, ove o kapamo o Urimi lo Tumimi*+ kuenje vi kala ponete ya Arone eci a iñila ku Yehova kuenda Arone ambate ponete yaye ovikuata viaco vioku tetuluila va Isareli, olonjanja viosi eci a enda ku Yehova.

31 “Evendalia o li pangela esanya ka li kuete ovoko okuti, liosi li pangiwa lelinya li vumbula.+ 32 Pokati kesanya liaco pa kale epangu lioku iñisila utue. Kolonele viosi viepangu liaco ku kale ocivindo ca tutiwa lukuakupota. Epangu liaco li kale ndepangu liocikutu covivela oco ka li ka toke. 33 Ove o panga olo romã lelinya li vumbula, leli liohusu, leli li kusuka, loku vi ñualisa kongenge yaco yosi, loku tengamo olongunga viulu pokati kavio. 34 Ove o kapa ongunga yulu noke o romã, o kapa vali ongunga yulu noke o romã kongenge yaco yosi yesanya ka li kuete ovoko. 35 Arone a wale wale esanya liaco poku linga upange waye kuenje ocileñi colongunga viaco ci yevale eci eye a iñila vocitumãlo ci kola kovaso a Yehova leci a tundamo, oco ka ka fe.+

36 “Ove o tela ulame u nina wulu wa fina kuenda o u sokotola ndeci va sokotola ondimbukiso yimue kuenje o sonehamo okuti: ‘Oku kola kua tiamẽla ku Yehova.’+ 37 Ulame waco o u kutila vekofue+ lukolo u vumbula; u kale kovaso yekofue. 38 Owo u kala pupolo wa Arone kuenje Arone eye ambata eko eci omunu umue a lueyela ovina vi kola+ vina va Isareli va kolisa eci va vi eca ndolombanjaile vi kola. Owo wamameko oku kala pupolo waye oco va taviwe la Yehova.

39 “Ove o tuta ocikutu ca lepa ci kuete avala a litepa elinya liovalatanya, o tonga ekofue lielinya liovalatanya kuenda o tuta uvia.+

40 “Ove o tongela omãla valume va Arone+ ovowalo a lepa, ovovia kuenda ovifuto oco vi ece ulamba kuenda eposo kokuavo.+ 41 Ove o walisa huvove Arone kumue lomãla vaye valume kuenje o va waveka+ loku va nõla*+ kuenda o va kolisa oco va ndi vumbe ndovitunda. 42 Ove o va tongelavo oloputula* viovalatanya oco va sitike epõlõla liavo.+ Ovio vi upise koviongo toke kovikalo. 43 Arone kumue lomãla vaye va vi wala poku iñila vombalaka yohongele ale ceci va kala ocipepi lutala, oco va vumbile vocitumãlo ci kola okuti, ka va kuata eko kuenje va fa. Eci ci linga ociholo cotembo ka yi pui kokuaye kuenda kocitumbulukila* caye ci kuamamo.

29 “Eci o sukila oku linga oco o va kolise okuti va ndi vumba ndovitunda ceci: O nyañula okangombe, lovitupi vivali violomeme ka vi kuete etondelo,+ 2 lolombolo ka vi kuete etumbisa, olombolo ka vi kuete etumbisa via tengiwa lulela okuti, vi kuete epangu kuenda olombolo via livanda ka vi kuete etumbisa okuti, via wavekiwa lulela.+ O vi panga losema ya fina yotiliku, 3 kuenje o vi kapa vekualu kuenda o vi nenela vekualu+ liaco kumue lokangombe lovitupi vivali violomeme.

4 “Arone kumue lomãla vaye valume, o va nena puvelo wombalaka yohongele+ kuenje o va sukula lovava.+ 5 Noke ove o tikula ovowalo+ kuenje o walisa Arone ocikutu ca lepa, lesanya ka li kuete ovoko lievendalia, kumue levendalia, lonjeke yo ponete kuenda o kuta ciwa vombunda yaye uvia wa tutiwa* wevendalia.+ 6 U walisa ekofue kutue loku kapa ondimbukiso yi kola yelitumbiko* kekofue liaco;+ 7 kuenje o tikula ulela woku waveka+ kuenda itila ulela waco kutue waye loku u waveka.+

8 “Noke sapuila omãla vaye oco va amele kovaso kuenje o va walisa ovowalo a lepa,+ 9 o va itika lovovia okuti, Arone lomãla vaye, loku va kapa ovifuto; kuenje upange wutunda u kala lavo ndociholo cotembo ka yi pui.+ Eci oco o linga poku nõla Arone kumue lomãla vaye oco va vumbe ndovitunda.*+

10 “Ove o nena ongombe kovaso yombalaka yohongele kuenje Arone kumue lomãla vaye va kapa ovaka avo kutue wongombe yaco.+ 11 Ove o pondela ongombe kovaso a Yehova puvelo wombalaka yohongele.+ 12 Ove o nyañula lomuine wove osonde yongombe kuenje o yi kapa kolombinga vi kasi kutala+ kuenda osonde yosi ya supapo o yi tila kociseveto cutala.+ 13 Noke ove upa ulela+ wa ñuala kovãla, kondeki yi kasi kilu liomuma kuenda kolongẽla vivali lulela u kasiko kuenje o vi yoka oco owisi waco u tuimĩle kutala.+ 14 Pole, ositu yongombe locipa caco kuenda aniña aco, o vi timĩha londalu posamua yocilombo. Oco, ocilumba cimue cekandu.

15 “Ove o kuatavo ocitupi comeme yimue kuenje Arone kumue lomãla vaye, va kapa ovaka avo kutue womeme yaco.+ 16 Ove o ponda ocitupi comeme kuenje o tikula osonde yaco o yi nyĩla kolonele viosi viutala.+ 17 Ove o teta ocitupi comeme vovinimbu, o sukula ovãla vaco,+ ovolu aco, loku kapa pamosi ovinimbu viaco kumue lutue waco. 18 Ove o yoka ocitupi comeme yosi oco owisi waco u tuimĩle kutala. Oco, ocilumba cimue coku pia elisi ku Yehova okuti, ceca elemba liwa.+ Oco, ocilumba cimue ci yokiwa vondalu ci lingiwila Yehova.

19 “Noke ove o kuata ocitupi cikuavo comeme kuenje Arone kumue lomãla vaye va kapa ovaka avo kutue wocitupi caco comeme.+ 20 Ove o ponda ocitupi comeme kuenje o nyañula onepa yimue yosonde yaco, loku yi kapa kosungu yetũi liondio lia Arone lo kolosungu viovatũi ondio vomãla vaye kuenda kolomumba viovaka avo ondio, lo kolomumba violomãhi viavo viondio, loku nyĩla osonde kolonele viosi viutala. 21 Noke o nyañula onepa yimue yosonde yi kasi kutala kuenda onepa yimue yulela woku waveka+ kuenje o vi nyĩla Arone lovowalo aye kuenda komãla vaye lovowalo avo, oco eye lovowalo aye kumue lomãla vaye lovowalo avo va kole.+

22 “Kuenje upa ulela u kasi kocitupi comeme, ucĩla waco wa lẽla, lulela wa ñuala kovãla, londeki yi kasi kilu liomuma, lolongẽla vivali, lulela u kasiko+ kuenda ocikalo condio, momo ocitupi caco comeme coku nõliwa.+ 23 Vekualu liolombolo ka vi kuete etumbisa vi kasi kovaso a Yehova, upamo ombolo yimue yi kasi ndombunge, lombolo yi kuete epangu haiyo ya tengiwa lulela kuenda ombolo ya livanda. 24 Ovina viaco viosi o vi kapa povaka a Arone kuenda povaka vomãla vaye kuenje o vi senga senga konyima lo kovaso ndocilumba coku senga senga kovaso a Yehova. 25 Noke o vi tambula peka liavo kuenje o vi timĩhila kutala kilu liocilumba coku pia elisi ndelemba liwa ku Yehova. Oco, ocilumba cimue ci yokiwa vondalu ci lingiwila Yehova.

26 “Ove o nyañula onete yocitupi comeme coku nõliwa+ cina ca tiamẽla ku Arone, loku yi senga senga konyima lo kovaso ndocilumba coku senga senga kovaso a Yehova kuenje yi kala onepa yove. 27 Ove o kolisa onete yocilumba coku senga senga kuenda ocikalo conepa yi kola okuti ya sengaiwa haiyo yopiwa kocitupi comeme coku nõliwa,+ cina catiamẽla ku Arone kuenda komãla vaye. 28 Onepa yaco yi linga ya Arone kumue lomãla vaye ndocihandeleko ka ci pui okuti, ci lingiwa la va Isareli, momo onepa yaco yi kola kuenda yi linga onepa yi kola yeciwa la va Isareli.+ Oyo onepa yavo yi kola ku Yehova yovilumba viavo viombembua.+

29 “Ovowalo a kola+ a tiamẽla ku Arone, a waliwa lomãla vaye+ vo ko piñainya eci va wavekiwa kuenda eci va nõliwa ndovitunda. 30 Ocitunda cina cu piñainya pokati komãla vaye kuenje ci iñila vombalaka yohongele oco ci vumbe vocitumãlo ci kola, ci wala ovowalo aco oloneke epanduvali.+

31 “Ove o nyañula ocitupi comeme coku nõliwa kuenda o teleka ositu yaco vocitumãlo cimue ci kola.+ 32 Ositu yaco yocitupi comeme kumue lombolo yi kasi vekualu, Arone lomãla vaye va vi lila+ puvelo wombalaka yohongele. 33 Ovo va lia ovina via eciwa ndocilumba coku tuvika akandu oco ovo va nõliwe ndovitunda* kuenda oku va kolisa. Pole, omunu* ka nõliwile ka ka lieko, momo ovina viaco vi kola.+ 34 Nda kositu yocilumba coku nõliwa lo kombolo kua supa cimue toke komẽle, eci ca supapo o ci timĩha vondalu.+ Ka citava oku ci lia, momo ocina cimue ci kola.

35 “Eci oco o linga ku Arone kuenda komãla vaye ndomo ci likuata lovina viosi nda ku handelekele. O va nõla ndovitunda* vokuenda kuoloneke epanduvali.+ 36 Eteke leteke, o sukila oku eca ongombe ndocilumba coku tuvika akandu kuenda o yelisa utala poku eca ocilumba caco coku tuvika akandu kuenda o waveka ulela kutala oco u kole.+ 37 Voloneke epanduvali, o yelisa utala kekandu poku eca ocilumba coku tuvika akandu kuenda o sukila oku u kolisa oco u linge utala umue u kola koku kola.+ Wosi o lamba kutala, o kola.

38 “Eci o ka lumba kutala ceci okuti: olonjanja viosi eteke leteke eca ovitupi vivali viomeme vi kuete unyamo umosi.+ 39 Ove o lumba ocitupi cimue comeme komẽle kuenda cikuavo o ci lumba kelivala lio pokati koku iñila kuekumbi loñolosi.*+ 40 Onepa yekũi yonjongo yo efa* yosema ya fina yina ya tengiwa lonepa yakuãla yo hine* yulela uwa woliveira kuenda ocilumba coku nyua conepa yakuãla yo hine yovinyu, vi kapiwe kocitupi catete comeme. 41 Ocitupi cikuavo comeme, ove o ci lumba kelivala lio pokati koku iñila kuekumbi loñolosi* kumue lolomema vimuamue kuenda ovilumba vioku nyua ndeci komẽle. Ove eca ocilumba caco ndelemba liwa okuti, ocilumba cimue ci yokiwa vondalu ci lingiwila Yehova. 42 Ocilumba caco coku pia elisi, ci lingiwa olonjanja viosi lovitumbulukila viene puvelo wombalaka yohongele kovaso a Yehova, kuna ndi ka limolẽhisa kokuene oco ndi vangule love.+

43 “Oko ndi ka limolẽhisila ku va Isareli kuenda ocitumãlo caco ci kolisiwa lulamba wange.+ 44 Ndi kolisa ombalaka yohongele kuenda utala kuenje ndi kolisa Arone kumue lomãla vaye+ oco va ndi vumbe ndovitunda. 45 Ndi tunga pokati komanu va Isareli kuenda ndi linga Suku yavo.+ 46 Kuenje ovo va ka limbuka muẽle okuti ame ndi Yehova Suku yavo, una wa vopa vofeka Yegito oco ndi tunge pokati kavo.+ Ame ndi Yehova Suku yavo.

30 “Ove o panga utala umue okuti, u linga ocitumãlo coku timĩha insensu;+ o u panga luti wo akasia.+ 2 Owo u kuate olonele vikuãla via lisoka okuti, ukeya* umosi kusõvi, ukeya umosi koku sanjavala kuenda ovikeya vivali koku lepa. Olombinga viaco lutala vi linga ocikuata cimosi.+ 3 Ove o u laña lulu wa fina okuti, kilu liaco, lo kolonele viaco viosi kuenda kolombinga viaco; kuenje kongenge yaco o ñualisako ocivindo culu. 4 Ove o pangavo ovinunga vivali viulu, o vi kapa vemẽhi liocivindo kolonele viaco vivali kuenje ovio vi ka kuata olombueti vioku ambata utala. 5 Ove o panga olombueti viavaya o akasia kuenje o vi laña lulu. 6 Ove o kapa utala waco kovaso yongumbo yi kasi ocipepi locikasia Cuvangi,+ konuviko yi kasi kocikasia Cuvangi kuna ndi ka limolẽhisila kokuove.+

7 “Arone+ oko+ a ka timĩhila insensu vielemba liwa+ okuti, owisi waco u tuimĩla kutala eci eye a pongiya olondiyelo+ olonjanja viosi komẽle. 8 Eci Arone a mĩha olondiyelo kelivala lio pokati koku iñila kuekumbi loñolosi,* eye o timĩha insensu. Oco, ocilumba cinsensu ceciwa ku Yehova olonjanja viosi vokuenda kuovitumbulukila viene viosi. 9 Kutala waco, ko ka lumbiliko insensu ka vi taviwa locihandeleko+ ale ocilumba coku pia elisi, pamue ocilumba colomema kuenda ko ka pesiliko ocilumba coku nyua. 10 Onjanja yimosi vunyamo,+ Arone o sukila oku kapa onepa yimue yosonde yocinyama cocilumba cekandu+ kolombinga viutala oco a yelise utala, ci lingiwa vokuenda kuovitumbulukila viene viosi. Ku Yehova utala waco u kola koku kola.”

11 Yehova wa sapuila Mose hati: 12 “Olonjanja viosi eci o tenda omãla va Isareli,+ omunu lomunu o sukila oku eca ocisembi comuenyo waye ku Yehova vepuluvi lioku tenda. Eci ci lingiwila oco ka va ka vetiwe lefengi limue eci va tendiwa. 13 Vosi vana va ka tendiwa, va sukila oku eca ovina ndeci: omeyu yosiekele* ndomo ci likuata locilemo cosiekele cocitumãlo ci kola.*+ Ologera* akũi avali via soka losiekele yimosi. Omeyu yosiekele oyo yi kala ombanjaile yoku eca ku Yehova.+ 14 Wosi wa tendiwa okuti o kuete 20 kanyamo ale ceci ci pitahãla anyamo aco, eca ombanjaile ku Yehova.+ 15 Ohuasi ka yi sukila oku eca calua okuti yi vokiya komeyu yosiekele* kuenda ohukũi ka yi sukilavo oku eca citito okuti yi tepulula komeyu yosiekele ndombanjaile yoku eca ku Yehova, oco yi yovole* ovimuenyo viene. 16 Ove o tambula ku va Isareli olombongo viopalata vioku tuvika akandu kuenda o vi eca kupange wombalaka yohongele okuti, vi kala ndonjivaluko ku va Isareli kovaso a Yehova, oco vi yovole* ovimuenyo viene.”

17 Yehova wa sapuila vali Mose hati: 18 “Tela ombasiya yosipi yoku pusa lociyekelo cayo cosipi;+ o yi kapa pokati kombalaka yohongele lutala kuenje o kapapo ovava.+ 19 Arone kumue lomãla vaye opo va ka sukuila ovaka avo kuenda olomãhi viavo.+ 20 Eci va iñila vombalaka yohongele, ale ceci va amela ocipepi lutala oku vumba loku eca ovilumba viondalu oco owisi wavio u tuimisiwe kovaso a Yehova, ovo va sukila oku lisukula lovava, oco ka va ka fe. 21 Ovo va sukila oku sukula ovaka avo lolomãhi viavo oco ka va ka fe kuenda ci kala ndocihandeleko ka ci pui kokuavo, ku Arone kuenda kombuto yaye vokuenda kuovitumbulukila viavo.”+

22 Yehova wamisako oku sapuila Mose hati: 23 “Tikula olonguendu vielemba liwa okuti: olokilu 6 vio mura, olokilu 3 viokanela, olokilu 3 viokalamu, 24 kuenda olokilu 6 vio kasia, ya yongiwa ndomo ci likuata locilemo cosiekele cocitumãlo ci kola*+ kuenda o hine* yimosi yulela woliveira. 25 Panga lovina viaco ulela u kola woku waveka; ovio vi tengiwe luloño.*+ Owo u linga ulela u kola woku waveka.

26 “Ove o waveka lawo ombalaka yohongele+ kuenda ocikasia Cuvangi, 27 lomesa lovikuata viaco viosi, lociyekelo colondiyelo lovikuata viaco viosi, lutala winsensu, 28 lutala wocilumba coku pia elisi, lovikuata viaco viosi kuenda ombasiya lociyekelo cayo. 29 Ove o vi kolisa oco vi kole koku kola.+ Wosi o vi lamba, o kola.+ 30 Ove o waveka Arone+ kumue lomãla vaye+ kuenje o va kolisa oco va ndi vumbe ndovitunda.+

31 “Ove o ka sapuila va Isareli okuti: ‘Ovina viaco vi kamamako oku kola kokuange ndulela woku waveka vokuenda kuovitumbulukila viene.+ 32 Ka citava oku sieketa ulela waco ketimba liomunu laumue kuenda ka citava oku panga ulela umue wa lisoka lawo. Momo ocina cimue ci kola. Owo wamamako oku kala ndocina cimue ci kola kokuene. 33 Omunu wosi o linga ulela umue wa soka lawo kuenda wosi o u sieketa komunu umue ka nõliwile,* a tepiwe* pokati komanu vaye.’”+

34 Noke Yehova wa sapuila Mose hati: “Tikula olonepa vimuamue viovolela elemba liwa+ okuti: “ostakate, omika, ulela welemba liwa wo gaibano kuenda insensu via fina. 35 Ovina viaco o vi panga insensu;+ ovikũla vielemba liwa vi tengiwe luloño,* vi kapiwe omongua,+ vi fine kuenda vi kole. 36 Ove o sukila oku fula onepa yimue toke eci yi linga ndosema kuenje onepa yimue o yi kapa kovaso yocikasia Cuvangi vombalaka yohongele, kuna ndi ka limolẽhisila kokuove. Momo oyo, yi sukila oku kola koku kola kokuove. 37 Ko ka li pangeli ene muẽle insensu ove o tenga lovina viaco.+ Insensu viaco o vi tenda ndocina cimue ci kola ku Yehova. 38 Omunu wosi o linga insensu ndevi oco a yeve elemba liaco, a tepiwe* pokati komanu vaye.”

31 Yehova wa sapuila vali Mose hati: 2 “Tala, nda nõla* Becalele+ omõla a Uri okuti, omõla a Huru ukuacikoti ca Yuda.+ 3 Ndu yukisa lespiritu lia Suku, poku wĩha olondunge, elomboloko kuenda ukũlĩhĩso wovomesele aiñi aiñi, 4 oco a linge ovopange wumesele, oku talavaya lulu, lopalata kuenda losipi, 5 oku songa ovawe loku a sokeka vovivela+ kuenda oku linga ovopange osi lavaya.+ 6 Handi vali, nda nõla Aholiava+ omõla a Ahisamaka ukuacikoti ca Dani, oco o kuatise kuenda ndi kapa olondunge vovitima via vosi vana va lonõloha,* oco va linge ovina viosi nda ku handeleka+ okuti: 7 ombalaka yohongele,+ ocikasia Cuvangi+ kuenda onuviko+ yi kasi kilu liaco, lovikuata viosi viombalaka, 8 omesa+ lovikuata vialio, ociyekelo colondiyelo ca pangiwa lulu wa fina lovikuata vialio viosi,+ utala winsensu,+ 9 utala wocilumba coku pia elisi+ lovikuata viaco viosi, ombasiya lociyekelo cayo,+ 10 ovowalo a tutiwa ciwa, ovowalo a kola a Arone ocitunda, ovowalo vomãla vaye oco va vumbe ndovitunda,+ 11 ulela woku waveka kuenda insensu vielemba liwa viocitumãlo ci kola.+ Ovo va linge ovina viosi nda ku handeleka.”

12 Yehova wa sapuila vali Mose hati: 13 “Sapuila va Isareli hati, ‘Ca piãla enene kokuene, vu sukila oku lava asambata ange,+ momo ovio ondimbukiso yi kasi pokati kange lene vokuenda kuovitumbulukila viene oco vu kũlĩhi okuti, ame ndi Yehova, ndu vu kolisi. 14 Vu sukila oku lava Esambata, momo ocina cimue ci kola kokuene.+ Wosi ka pokuile kocihandeleko cesambata, a pondiwe. Nda omunu umue wa linga upange kesambata, omunu waco a tepiwe* pokati komanu vaye.+ 15 Vu talavaya oloneke epandu, pole, keteke liepanduvali, esambata okuti eteke limue lilikasi lioku puyuka.+ Oco, ocina cimue ci kola ku Yehova. Wosi wa linga upange keteke Liesambata, a pondiwe. 16 Va Isareli va sukila oku lava Esambata; ovo va sukila oku kapako Esambata vokuenda kuovitumbulukila viavo viosi. Eci ocisila cotembo ka yi pui. 17 Olio, ondimbukiso yimue yotembo ka yi pui yi kasi pokati kange lomanu va Isareli,+ momo Yehova wa lulika ovailu longongo vokuenda kuoloneke epandu kuenda keteke liepanduvali, eye wa puyuka loku likavuluisa.’”+

18 Eci Suku a mala oku vangula la Mose Komunda Sinai, wo wĩha avaya avali Uvangi+ okuti, avaya ovawe a sonehiwa lomuine wa Suku.+

32 Omanu va limbuka okuti, Mose wa kala oku cilua oku loka komunda.+ Kuenje omanu va liongoluila ku Arone loku u sapuila vati: “Votoka, tu lingileko osuku yimue yi tu pitila kovaso,+ momo ka tua kũlĩhĩle eci ca pita la Mose una wa tu songuila poku tunda kofeka Yegito.” 2 Arone wa va sapuila hati: “Upi ovimbilingu viulu+ vi kasi kovatũi akãi vene, vomãla vene valume kuenda vomãla vene vakãi kuenje vi neni kokuange.” 3 Noke omanu vosi va fetika oku upa ovimbilingu viulu via kala kovatũi avo loku vi tuala ku Arone. 4 Eye wa tambula ulu wa tunda kokuavo kuenda wa tikula ocikuata cimue coku songa, yu wa panga ociñumañuma cimue conãle.+ Kuenje vamue pokati kavo va fetika oku popia vati: “A Isareli, eyi oyo o Suku yove, yina ya ku songuila poku tunda kofeka Yegito.”+

5 Arone eci a ci mola, wa tunga utala kovaso yociñumañuma caco. Noke Arone wa kaluka hati: “Hẽla ku lingiwila ocipito cimue Yehova.” 6 Keteke lia kuamamo, va votoka selo kuenda va fetika oku lumba ovilumba vioku pia elisi lovilumba viombembua. Kuenje omanu va tumãla oco va lie loku nyua. Noke va votoka oco va piluke lesanju.+

7 Yehova wa sapuila Mose hati: “Kuende, loka, momo omanu vove vana wa songuila poku tunda kofeka Yegito, va linga ekandu linene.+ 8 Ovo va yapuka lonjanga vonjila nda va handeleka oku endela.+ Va li pangela ovo muẽle ociñumañuma cimue conãle, va kasi oku ci kekamẽla, loku ci lumbila ovilumba loku popia vati: ‘A Isareli, eyi oyo o Suku yove, yina ya ku songuila poku tunda kofeka Yegito.’” 9 Yehova wa sapuila vali Mose hati: “Nda mola okuti, omanu vaco ava va sina.*+ 10 Ñasi lonyeño yalua. Omo liaco, ecelela okuti ndi va nyõla kuenje ndu ku lingisa ofeka yinene pomangu yavo.”+

11 Noke Mose wa livondela* ku Yehova Suku yaye+ loku pula hati: “A Yehova, momo lie onyeño yove yalua yi wengukila omanu vove noke yoku vopa kofeka Yegito lunene wa piãla kuenda leka lia pama?+ 12 Momo lie ecelela va Egito oku popia okuti, ‘Eye wa kuatele ovisimĩlo vĩvi eci a vopa Kegito kuenda wa yonguile oku va pondela kolomunda loku va kundula kilu lieve’?+ Tulumũha konyeño yove yalua kuenda pongolola* ovisimĩlo viove vioku nena eyambulo komanu vove. 13 Ivaluka akuenje vove Avirahama, Isake la Isareli vana wa lisila lavo loku popia hati: ‘Ndi ka luisa ocitumbulukila* cene ndolombungululu vio kovailu+ kuenda ndi ka eca kocitumbulukila* cene ofeka eyi yosi nda nõla kuenje yi kala yavo ndocipiñalo ka ci pui.’”+

14 Omo liaco, Yehova wa pongolola* ovisimĩlo viaye kuenje ka nenele eyambulo komanu vaye.+

15 Noke Mose wa ñualapo, wa loka komunda lavaya avali Uvangi+ peka liaye.+ Avaya aco a sonehiwa kolonele vivali; o-o a sonehiwa kovaso lo konyima. 16 Avaya aco a pangiwa la Suku kuenda oku soneha kuaco kua kala oku soneha kua Suku kua sokotuiwa vavaya.+ 17 Eci Yehosua a fetika oku yeva onjuela yomanu omo lioku kaluka kuavo, wa sapuila Mose hati: “Vocilombo mu yevalela onjuela yuyaki.” 18 Pole, Mose wa popia hati:

19 Eci Mose a pitĩla ocipepi locilombo leci a mola ociñumañuma conãle+ lomanu va kala oku piluka, onyeño yaye ya wenguka kuenje wa imba posi avaya ovawe a kala peka liaye kuenda wa a nyanyuila vepato liomunda.+ 20 Eye wa kuata ociñumañuma conãle ovo va pangele kuenda wa ci yoka vondalu loku ci nyanyõla toke eci ca linga ndoneketela;+ kuenje oneketela yaco wa yimba vovava kuenda wa handeleka va Isareli oku nyua ovava aco.+ 21 Noke Mose wa pula Arone hati: “Omanu ava va ku yapuisa ndati oco o va kokele ekandu linene?” 22 Arone wa tambulula hati: “Ku ka teme a ñala yange. Ove wa kũlĩha ciwa okuti, omanu ava va tekela lika koku linga eci cĩvi.+ 23 Ovo va ndi sapuila vati: ‘Tu lingileko osuku yimue yi tu pitila kovaso, momo ka tua kũlĩhĩle eci ca pita la Mose, una wa tu songuila poku tunda kofeka Yegito.’+ 24 Nda va tambulula hati: ‘Wosi o kuete ulu, a u liupe loku u nena kokuange.’ Noke nda wimba vondalu kuenje mua tunda ociñumañuma eci conãle.”

25 Mose wa mola okuti, omanu va kala vombuanja, momo Arone wa ecelela okuti, ovo va kala vombuanja kuenje va li kokela ovo muẽle esepu kovaso ovanyãli vavo. 26 Noke Mose wa talama pombundi yocilombo kuenda wa popia hati: “Helie wa tiamẽla ku Yehova? Eye kokuange!”+ Kuenje va Lewi vosi vongolokela kokuaye. 27 Eye wa va sapuila hati: “Ca popia Yehova Suku ya Isareli ceci hati: ‘Omunu lomunu pokati kene a malẽhe osipata yaye vombunda loku ñuala ñuala ocilombo cosi pombundi lombundi, oco a ponde manjaye, omunu a lisungue laye kuenda ekamba liaye.’”+ 28 Va Lewi va linga eci Mose a va sapuila. Kuenje keteke liaco kua pondiwa eci ci soka 3.000 kalume. 29 Mose wa popia hati: “Likolisi* ene muẽle etaili kupange wa Yehova, momo omunu lomunu pokati kene wa katukila omõlaye muẽle kuenda manjaye;+ etaili eye o vu sumũlũisi.”+

30 Keteke lia kuamamo, Mose wa sapuila omanu hati: “Ene wa lingi ekandu limue linene kuenje cilo ndi lamanela komunda loku pinga ku Yehova, pamue eye ecela ekandu liene.”+ 31 Omo liaco, Mose wa lamanela komunda kuenje wa sapuila Yehova hati: “Omanu ava va linga ekandu linene! Ovo va lipangela osuku yimue yulu!+ 32 Pole, cilo nda wa panga, ecela akandu avo;+ nda hacoko, mange ohenda, upa onduko yange velivulu liove wa soneha.”+ 33 Yehova wa sapuila Mose hati: “Wosi wa ndi lueyela, eye ndupa onduko yaye velivulu liange. 34 Cilo kuende, ka songuile omanu vocitumãlo nda ku sapuilile. Ungelo wange o ku pitila kovaso+ kuenda keteke nda sokiya oku va sombisa, ndi nena eyambulo kokuavo omo liekandu liavo.” 35 Noke Yehova wa fetika oku nena efengi komanu, omo va lipangela ociñumañuma conãle cina Arone a tunga.

33 Yehova wa sapuila vali Mose hati: “Kulo tundako ove lomanu vana wa songuila poku tunda vofeka Yegito. Kuende kofeka nda lisila la Avirahama, la Isake kuenda Yakoba hati: ‘Ngeca ofeka eyi kocitumbulukila* cove.’+ 2 Ndi tuma ungelo umue o ku pitila kovaso+ kuenda ndi tundisa va Kanana, va Amori, va Hiti, va Perisi, va Hivi kuenda va Yevusi.+ 3 Lamaneli kofeka yimue yi tumõha asenjele lowiki.+ Pole, ame si endela pokati kene, momo vumanu vamue va sina*+ kuenda nda ndo kunduli vonjila.”+

4 Eci omanu va yeva ondaka yaco ya kãla, va fetika oku lila kuenje lomue pokati kavo wa wala ovina viaye vioku liposuisa. 5 Yehova wa sapuila Mose hati: “Sapuila va Isareli huti: ‘Vumanu vamue va sina.*+ Vepuluvi limue ame nda nda endela pokati kene loku vu kunduli.+ Omo liaco, luli ovina viene vioku liposuisa, osimbu ndi kũlĩhĩsa eci ndi linga lene.’” 6 Omo liaco, tunde komunda Horeve, va Isareli ka va walele* vali ovina viavo vioku liposuisa.

7 Noke Mose wa yelula ombalaka yimue kuenda wa yi tungila kosamua ocipãla locilombo kuenje wa yi tukula okuti, ombalaka yohongele. Wosi wa yonguile oku pula cimue ku Yehova,+ wa sukilile oku enda kombalaka yohongele yi kasi kosamua yocilombo. 8 Eci Mose a enda kombalaka, omanu vosi va enda oku votoka loku talama puvelo wolombalaka viavo kuenje va enda oku luluvala Mose toke eci a iñila vombalaka. 9 Eci Mose a enda oku iñila vombalaka, ongunji yelende+ ya enda oku loka loku talama puvelo wombalaka, osimbu Suku a vangula la Mose.+ 10 Eci omanu vosi va enda oku mola ongunji yelende okuti, ya talama puvelo wombalaka, omunu lomunu wa enda oku votoka loku petamẽla puvelo wombalaka yaye muẽle. 11 Yehova wa vangola la Mose polo la polo,+ ndeci omunu umue a sapela lomunu ukuavo. Eci a enda oku tiukila kocilombo, Yehosua+ omõla a Nune, una wa enda oku u vumba haeye wa kala oñuatisi yaye,+ ka tundaile vombalaka.

12 Mose wa sapuila Yehova hati: “Tala, ove o kasi oku ndi sapuila okuti, ‘Songuila omanu ava,’ pole, kua ndekisile omunu enda lame. Handi vali, wa popia hati: ‘Nda ku kũlĩha konduko* kuenda ove wa sanga ohenda kovaso ange.’ 13 Mange ohenda, nda nda sanga ohenda kovaso ove, ndekise olonjila viove,+ oco ndu ku kũlĩhe loku amamako oku sanga ohenda kovaso ove. Kũlĩhavo okuti, omanu ava, omanu vove.”+ 14 Kuenje eye wa popia hati: “Ame muẽle* ngenda love+ kuenda ndu ku ĩha epuyuko.”+ 15 Noke Mose wo sapuila hati: “Nda ove muẽle* kuendi letu, ku ka tupe kulo. 16 Ci limbukiwa ndati okuti ame lomanu vove tua sanga ohenda kovaso ove? Siti ci limbukiwa nda ove wa enda letu+ kuenje ame lomanu vove tu tendiwa okuti, tua litepa lomanu vakuavo kilu lieve?”+

17 Yehova wa sapuila Mose hati: “Ndi lingavo eci wa pinga, momo wa sanga ohenda kovaso ange kuenda nda ku kũlĩha konduko.” 18 Noke Mose wa popia hati: “Mange ohenda, ndekise ulamba wove.” 19 Pole, Suku wa popia hati: “Ndu ka ku lekisa ohenda yange yosi kuenda ndu ku situluila onduko ya Yehova;+ kuenje ndi ka lekisa ocali komunu ndi yongola oku lekisa ocali kuenda ndi ka lekisa ohenda komunu ndi yongola oku lekisa ohenda.”+ 20 Pole, eye wamisako hati: “Ove ku pondola oku mola ocipala cange, momo ka kuli omunu o pondola oku ndi mola kuenje o kala vali lomuenyo.”

21 Yehova wa popia vali hati: “Palo pali ocitumãlo cimue ci kasi ocipepi lame. Talama kesenje li kasiko. 22 Eci ndi pita vulamba wange, ndu ku kapa veleva liesenje kuenje ndu ku teyuila leka liange. 23 Noke yoku pita, ndu ku upa eka liange kuenje o mola onyima yange. Pole, ocipala cange ka ci muiwa.”+

34 Noke Yehova wa sapuila Mose hati: “Pasa avaya avali ovawe ndava atete+ kuenda ndi soneha vavaya aco olondaka via kala vavaya atete,+ ana wa nyanyõla.+ 2 Lipongiya, momo hẽla komẽle o ka lamanela Komunda Sinai kuenda o ka talama kovaso yange kilu liomunda.+ 3 Lomue ka ka lamane love kuenda lomue ka ka muiwe konepa layimue yomunda. Ndaño oviunda violomeme pamue violongombe ka vi ka lile kovaso yomunda yaco.”+

4 Kuenje Mose wa pasa avaya avali ovawe ndava atete kuenda wa pasuka selo komẽle, wa lamanela Komunda Sinai ndomo Yehova o handelekele kuenje wambata avaya aco avali peka liaye. 5 Noke Yehova wa loka+ velende, loku talama ocipepi laye kuenda wa situlula onduko yaye Yehova.+ 6 Yehova wa kala oku pita kovaso yaye loku popia hati: “Yehova, Yehova, Suku umue ukuahenda,+ ukuacikembe,+ o livala konyeño+ kuenda ukuacisola calua haico ka ci pongoloka,*+ haeye ukuacili,+ 7 o lekisa ocisola ka ci pongoloka kolohulukãi,+ ecela okulueya, levĩho kuenda ekandu,+ pole, ka yovuisa u o kuete eko,+ o nena eyambulo komãla, kolonekulu, kocitumbulukila catatu toke kocitumbulukila cakuãla, omo liakulueya olonjali.”+

8 Mose wa petamẽla posi lonjanga loku kekama. 9 Kuenje wa popia hati: “A Yehova, nda cilo nda sanga ohenda kovaso ove, mange ohenda a Yehova, enju kumue letu kuenda kala pokati ketu,+ ndaño okuti tumanu vamue vakuesino*+ kuenda ecela okulueya kuetu, lekandu lietu+ kuenda tu tambule ndocipiñalo cove.” 10 Eye wa tambulula hati: “Ñasi oku linga ocisila cimue cokuti: Kovaso yomanu vove vosi, ndi linga* ovina vi komõhisa okuti, ka via la lingiwa kilu lieve liosi, ale pokati kolofeka viosi+ kuenje omanu vosi va tunga love va ka limbuka upange wa Yehova, momo eci ñasi oku linga love ocina cimue ci komõhisa.+

11 “Yevelela ovina ndi kasi oku ku handeleka etaili.+ Ñasi oku tundisa kovaso ove va Amori, va Kanana, va Hiti, va Perisi, va Hivi kuenda va Yevusi.+ 12 Kuata utate oco ku ka linge ocisila lolonungi viofeka o kasi oku enda,+ sanga ci linga onjanjo kokuove.+ 13 Pole, vu sukila oku nyõla ovotala avo, loku teya olongunji viavo vi kola kuenda oku lundula olombueti viavo vi kola.*+ 14 Ko ka kekamẽle o suku yiñi,+ momo Yehova o Suku yimue yi yongola okuti, omanu vo fendela lika eye.* Ocili, eye o Suku yimue yi yongola okuti omanu vo fendela lika eye.+ 15 Kuata utate oco ku ka linge ocisila lolonungi viofeka, momo eci va linga upuepue lolosuku viavo* kuenda va lumba ovilumba kolosuku viavo,+ omunu umue o ka ku laleka kuenje o ka lia kocilumba caye.+ 16 Noke ove o kopa vamue pokati komãla vavo vakãi oco va likuele lomãla vove valume+ kuenda omãla vavo vakãi va ka linga upuepue lolosuku viavo kuenje va yapuisa omãla vove valume, oco va lingevo upuepue lolosuku viavo.+

17 “Ku ka linge olosuku viutale wa yenguluiwa.+

18 “Ove o linga Ocipito Colombolo ka vi Kuete Etumbisa.+ O ka lia olombolo ka vi kuete etumbisa ndomo nda ku handeleka; o ci linga vokuenda kuoloneke epanduvali okuti, kotembo ya sokiyiwa kosãi ya Aviva,*+ momo kosãi yaco ya Aviva, oco wa tunda Kegito.

19 “Olonuñulu viosi vialume* oku kongelamo olonuñulu vioviunda viove, ci kaile ongombe, ale omeme,+ viosi viange.+ 20 Nda o kuete onuñulu yimue yocimbulu, o sukila oku yi yovola. O ci linga poku lumba omeme yimue pomangu yocimbulu. Nda kua lumbile omeme yimue o sukila oku teya osingo yocimbulu. Kuenje onuñulu yosi yomãla vove valume, o sukila oku yi yovola.+ Lomue ka keye ovoko kokuange.

21 “Ove o linga upange wove oloneke epandu, pole, keteke liepanduvali o puyukapo.*+ Ndaño muẽle vokuenda kuotembo yoku senda osi kuenda kuotembo yoku ungula, o sukilavo oku puyuka.

22 “Ove o linga Ocipito Colosemana lovaima atete otiliku yonguiwa kuenda Ocipito Coku Ongolola* kesulilo liunyamo.+

23 “Olonjanja vitatu vunyamo, alume vove vosi va molẽhe kovaso ya Ñala yocili, Yehova Suku ya Isareli.+ 24 Momo ndi tundisa olofeka kovaso ove,+ ndi vokiya ocikanjo cove kuenda lomue o kuata onjongole yoku tambula ofeka yove, osimbu o lamana oco o molẽhe kovaso a Yehova Suku yove olonjanja vitatu vunyamo.

25 “Ku ka lumbe osonde yocilumba cange lovina vi kuete etumbisa.+ Eci ci supa kocilumba cocipito co Paskoa, ka ci ka kale uteke wosi toke komẽle.+

26 “Ovaima atete a velapo o vepia liove, o sukila oku a nena konjo ya Yehova Suku yove.+

“Ku ka teleke ositu yokahombo vasenjele a inaco.”+

27 Yehova wa sapuila vali Mose hati: “Soneha olondaka evi,+ momo olondaka viaco ovio uvangi wokuti, ñasi oku linga ocisila love kuenda la va Isareli.”+ 28 Eye wa kalako la Yehova vokuenda 40 kovotanya kuenda 40 kovoteke. Eye ka lile ombolo ndaño oku nyua ovava.+ Kuenje Eye wa soneha vavaya, olondaka viocisila okuti, Ovihandeleko Ekũi.*+

29 Noke Mose wa loka Komunda Sinai kuenda avaya avali Uvangi, a kala peka liaye.+ Mose eci a loka komunda ka kũlĩhĩle okuti, ekova liocipala caye ca kala oku nina, omo a vangula la Suku. 30 Eci Arone kumue la va Isareli vosi va mola Mose, va limbuka okuti, ekova liocipala caye ca kala oku nina kuenje va kuata usumba woku amela ponele yaye.+

31 Pole, Mose wa va kovonga kuenje Arone kumue lasongui vosi vohongele veya kokuaye, noke Mose wa vangula lavo. 32 Noke va Isareli vosi va amela ponele yaye kuenje eye wa va sapuila ovihandeleko viosi Yehova a ecele kokuaye Komunda Sinai.+ 33 Olonjanja viosi eci Mose a mala oku vangula lavo, wa enda oku sitika ocipala caye loveu yimue.+ 34 Pole, eci Mose a enda oku molẽhela kovaso a Yehova oco a vangule laye, wa enda oku lisikũlũla oveu yaco toke eci a tunda.+ Noke poku tunda, wa enda oku sapuila va Isareli ovihandeleko viosi eye a tambuile.+ 35 Eci va Isareli va mola okuti, ekova liocipala ca Mose ca kala oku nina, Mose wa enda oku lisikĩlĩla vali oveu kocipala caye toke eci a iñila oco a vangule la Suku.+

35 Noke Mose wongolola ohongele yosi ya va Isareli loku va sapuila hati: “Ovina Yehova a handeleka oku linga vievi:+ 2 Vu talavaya oloneke epandu, pole, eteke liepanduvali li kala ocina cimue ci kola kokuene okuti, esambata halio eteke limue lilikasi lioku puyuka ku Yehova.+ Wosi wa linga upange keteke liaco, o ka pondiwa.+ 3 Ko ka siakãli ondalu kovitumãlo viosi vu sangiwa keteke Liesambata.”

4 Mose wa sapuila ohongele yosi ya va Isareli hati: “Eci ca handeleka Yehova ceci hati: 5 ‘Kongoli pokati kene ombanjaile yimue yoku eca ku Yehova.+ Wosi o kasi lutima woku eca,+ a nene ombanjaile ku Yehova okuti: ulu, opalata, osipi, 6 alinya a vumbula, la-a ohusu, la-a a kusuka, la-a ovalatanya, lovonya ohombo,+ 7 ovipa viocitupi comeme via pindaliwa levala li kusuka, ovipa violonjundu, avaya uti wo akasia, 8 ulela wolondiyelo, onguendu yoku linga ulela woku waveka kuenda winsensu vielemba liwa,+ 9 ovawe o onixi, lovawe akuavo oku kapa kevendalia+ kuenda konjeke yo ponete.+

10 “‘Vosi va loñoloha*+ pokati kene veye, loku linga ovina viosi Yehova a handeleka, 11 ndeci otavernakulu lolonanga vialio viombalaka, lonuviko yalio, oviyikilo vialio, olomanji, olombueti vialio, lolongunji vialio kuenda ovikuata vi kuete epangu; 12 Ocikasia+ lolombueti vialio,+ onuviko+ kuenda ongumbo+ yoku tepisa; 13 omesa+ lolombueti vialio, lovikuata vialio viosi kuenda olombolo via taliwa;+ 14 ociyekelo colondiyelo+ lovikuata vialio, lolondiyelo vialio kuenda ulela woku mĩhila;+ 15 utala winsensu+ lolombueti vialio; ulela woku waveka kuenda insensu vielemba liwa;+ longumbo yi kala puvelo wotavernakulu; 16 utala wocilumba coku pia elisi+ lociyo cayo cosipi, olombueti vialio, lovikuata vialio viosi; lombasiya kuenda ociyekelo cayo;+ 17 olonanga vi ñualisiwa kocitali+ lolongunji vialio kuenda ovikuata vialio viosipi vi kuete epangu; longumbo yi kala puvelo wocitali; 18 olopeleko viotavernakulu kuenda olopeleko viocitali kumue lalienge avio;+ 19 ovowalo a tutiwa ciwa+ oku vumba lao vocitumãlo ci kola, ovowalo a kola a Arone+ ocitunda kuenda ovowalo vomãla vaye oco va vumbe ndovitunda.’”

20 Kuenje ohongele yosi ya va Isareli ya tunda kovaso a Mose. 21 Kuenje wosi okuti utima waye wo vetiya+ kuenda espiritu lio kapa onjongole, weya kuenda wa nena ombanjaile yaye ku Yehova, oco yi kuatise kombalaka yohongele kuenda kovopange aco osi, lo koku tonga ovowalo a kola. 22 Ovo vamamako oku iya, alume lakãi okuti va kuete utima woku eca, omunu lomunu wa nena olofunyete, lovimbilingu, lolonela kuenda ovingẽlengẽle vikuavo, oku kongelamo ovikuata vikuavo viulu. Vosi yavo va eca ku Yehova olombanjaile* viavo viulu.+ 23 Vosi va kuatele alinya a vumbula, la-a ohusu, la-a a kusuka, la-a ovalatanya, lovonya ohombo, ovipa viocitupi comeme via pindaliwa levala li kusuka kuenda ovipa violonjundu, va vi nena. 24 Vosi vana va kuatele opalata kuenda osipi va nena ombanjaile yaco ku Yehova kuenje vosi vana va kuatele avaya uti wo akasia, va a nena oco a kuatise kovopange osi.

25 Akãi vosi va loñoloha+ koku pota lovaka avo, va nena ovina va pota ndeci: alinya a vumbula, la-a ohusu, la-a a kusuka, la-a ovalatanya. 26 Akãi vosi va loñoloha okuti, ovitima viavo via va vetiya, va pota ovonya ohombo.

27 Kuenje asongui va nena ovawe o onixi, lovawe akuavo oco a kapiwe kevendalia kuenda konjeke yo ponete,+ 28 longuendu, lulela woku mĩhila, lulela woku waveka+ kuenda winsensu vielemba liwa.+ 29 Alume vosi kuenda akãi vana okuti ovitima viavo via va vetiya oku eca, va nena cimue coku kuatisa kupange Yehova a handelekele oku linga pocakati ca Mose; va Isareli va vi nena ndombanjaile va eca ku Yehova lutima wosi.+

30 Noke Mose wa sapuila va Isareli hati: “Tali, Yehova wa nõla Becalele omõla a Uri okuti, omõla a Huru ukuacikoti ca Yuda.+ 31 Eye wo yukisa lespiritu lia Suku poku wĩha olondunge, elomboloko kuenda ukũlĩhĩso wovomesele aiñi aiñi, 32 oco a linge ovopange wumesele, oku talavaya lulu, lopalata kuenda osipi, 33 oku songa ovawe loku a sokeka vovivela kuenda uloño woku linga ovopange osi lavaya. 34 Kuenje wa kapa vutima waye uloño woku longisa, eye kumue la Aholiava+ omõla a Ahisamaka ukuacikoti ca Dani. 35 Eye wa va yukisa luloño*+ woku linga ovopange osi wovomesele, woku tonga kuenda woku tuta alinya a vumbula, la-a ohusu, la-a a kusuka, la-a ovalatanya kuenda upange woku pota. Alume vaco va ka linga ovopange osi kuenda oku panga oviluvialuvia viñi viñi.

36 “Becalele o ka linga upange la Aholiava kuenda alume vosi va loñoloha* vana Yehova a eca olondunge, lelomboloko oco va kũlĩhe ndomo va tẽlisa upange wosi u kola, ndeci Yehova a handelekele.”+

2 Mose wa vilikiya Becalele la Aholiava kumue lalume vosi va loñoloha vana Yehova a kapa olondunge+ vovitima viavo kuenda vosi vana ovitima viavo via va vetiya oku lieca olumue koku linga upange.+ 3 Ovo va tambula ku Mose olombanjaile+ viosi va Isareli va nena oco vi kuatise kupange u kola. Omẽle lomẽle ovo vamamako oku nena kokuaye olombanjaile vi eciwa lutima wosi.

4 Eci va fetika oku linga upange u kola, olonalavayi viosi via loñoloha via fetika oku iya umue umue, 5 kuenje va sapuila Mose vati: “Omanu va kasi oku nena ovina vialua okuti, eci ci sukiliwa oco ku lingiwe upange Yehova a handeleka oku linga ci sule.” 6 Noke Mose wa handeleka oco ku lingiwe esapulo limue kocilombo cosi liokuti: “Ene alume lakãi, ko ka neni vali olombanjaile vioku kuatisa kupange wombalaka yi kola.” Kuenje va tutuiya omanu oco ka va ka nene vali cimue. 7 Ovina va nena via tẽla oku linga upange wosi wa laikele oku lingiwa kuenda via supa.

8 Olonalavayi viosi via loñoloha+ via tunga otavernakulu+ lekũi kolonanga viombalaka vielinya liovalatanya lia tutiwa, li vumbula, liohusu leli li kusuka; volonanga viaco eye* wa tutilamo va keruvi.+ 9 Onanga lonanga yombalaka, ya kuata 28 kovikeya* kũsovi kuenda ovikeya 4 vupati. Olonanga viosi viombalaka via kuata oloseteko vimuamue. 10 Eye wa tokeka pamosi olonanga vitãlo kuenda olonanga vikuavo vitãlo wa vi tokekavo pamosi. 11 Noke kongenge yonanga yimue yombalaka, wa tongelako asusu elinya li vumbula pana vi tokekiwa. Cimuamue haico a linga kongenge yikuavo yonanga yombalaka pana olonanga vi tokekiwa. 12 Kongenge yonanga yimue yombalaka, eye wa tongelako 50 kasusu kuenda kongenge yonanga yikuavo yombalaka wa tongelakovo 50 kasusu, pana olonanga viaco vi tokekiwa oco asusu aco a limbe ovaso. 13 Noke eye wa tunga 50 koviyikilo viulu kuenda wa tokeka olonanga viombalaka loviyikilo viaco oco otavernakulu yi linge yimuamue.

14 Kuenje wa panga olonanga viovonya ohombo oco vi sikĩlĩle kilu liotavernakulu. Eye wa panga 11 kolonanga viombalaka.+ 15 Onanga lonanga yombalaka, vusõvi ya kuata 30 kovikeya kuenda ovikeya 4 vupati. Olonanga viosi 11 viombalaka, via kuata oloseteko vimuamue. 16 Eye wa tokeka pamosi olonanga vitãlo viombalaka kuenda wa tokekavo pamosi olonanga vikuavo epandu viombalaka. 17 Wa tonga 50 kasusu kongenge yonanga yimue yombalaka pana vi tokekiwila kuenda wa tongavo 50 kasusu kongenge yonanga yikuavo yombalaka pana olonanga viaco vi tokekiwila. 18 Noke wa tunga 50 koviyikilo viosipi vioku tokeka ombalaka oco yi linge yimuamue.

19 Ombalaka wa yi pangela onuviko yovipa viocitupi comeme ya pindaliwa levala li kusuka kuenda onuviko yovipa violonjundu oco yi kale kilu liaco.+

20 Otavernakulu wa yi pangela olomanji viavaya o akasia+ okuti via talamisua.+ 21 Omanji lomanji ya kuata ekũi kovikeya koku lepa kuenda vupati ukeya umosi lomeyu. 22 Omanji ya kuata oviti* vivali okuti, via litokeka. Eci oco a linga lolomanji viosi viotavernakulu. 23 Eye wa panga olomanji vio konele yombuelo yotavernakulu okuti, 20 kolomanji via imba ovaso kombuelo. 24 Wa panga 40 kovikuata viosipi vi kuete epangu oco vi kapiwe vemẽhi 20 kolomanji okuti, ovikuata vivali vi kuete epangu vi kala vemẽhi liomanji yimosi, oco vi kale koviti viaco vivali kuenda ovikuata vivali vi kuete epangu vi kala vemẽhi liomanji, oco vi kale koviti viaco vivali+ ndomo vi likuãi. 25 Konele yikuavo yotavernakulu okuti, konele yonano, wa pangelako 20 kolomanji, 26 wa pangavo 40 kovikuata viaco viopalata vi kuete epangu okuti, ovikuata vivali vi kuete epangu vi kala vemẽhi liomanji yimue kuenda ovikuata vivali vi kuete epangu vi kala vemẽhi liomanji lomanji ndomo vi likuãi.

27 Konyima yotavernakulu okuti kutakelo, wa pangelako olomanji epandu.+ 28 Wa panga olomanji vivali oco vi kale ndoviti pevindi liotavernakulu okuti, pavindi avali o konyima. 29 Oviti viaco via kuata avaya avali oku upisa kombuelo toke konano, pana ovio via tokekiwa okuti, kocinunga catete. Eci oco a linga loviti vivali vio pevindi. 30 Kua kala olomanji ecelãla kumue 16 kovikuata vialio viopalata vi kuete epangu okuti, ovikuata vivali vi kuete epangu vi kala vemẽhi liomanji lomanji.

31 Noke wa panga olombueti viavaya o akasia okuti, olombueti vitãlo vi tokeka olomanji konele yimue yotavernakulu,+ 32 kuenje olombueti vitãlo vi tokeka olomanji konele yikuavo yotavernakulu kuenda vitãlo vi tokeka olomanji viotavernakulu konepa yo konyima kutakelo. 33 Eye wa panga ombueti yo pokati okuti, yi pita vokati kolomanji vi tundila konele yimue toke konele yikuavo. 34 Olomanji wa vi laña lulu kuenda wa pangavo ovinunga viaco lulu ndovikuatelo violombueti kuenda olombueti viaco wa vi laña lulu.+

35 Eye wa panga ongumbo+ yimue lelinya li vumbula, liohusu, li kusuka kuenda liovalatanya lia tutiwa. Kongumbo yaco wa tutilako va keruvi.+ 36 Noke ongumbo yaco wa yi pangelavo olongunji vikuãla viuti wo akasia kuenje wa vi laña lulu kumue lolonjolo viulu kuenda wa vi pangela ovikuata vikuãla viopalata vi kuete epangu. 37 Noke puvelo wombalaka wa pangelapo ongumbo yimue lelinya li vumbula, liohusu leli li kusuka kuenda liovalatanya lia tutiwa okuti, via tongiwa pamosi,+ 38 wa pangavo olongunji viaco vitãlo lolonjolo viaco. Kilu liolongunji lo kovikuata viaco vioku tokeka* wa lañako lulu, pole, ovikuata viaco vitãlo vi kuete epangu via kala viosipi.

37 Becalele+ wa panga Ocikasia+ cavaya o akasia. Kusõvi ca kuata ovikeya* vivali lomeyu kuenda vupati waco ukeya lomeyu, oku lepa kuaco ukeya lomeyu.+ 2 Eye wa ci laña lulu wa fina vokati lo kosamua kuenje kongenge yaco wa ñualisako ocivindo culu.+ 3 Noke wa panga ovinunga vikuãla viulu kuenje wa vi kapa kilu liovolu aco akuãla okuti, konele yimue ovinunga vivali kuenda konele yikuavo ovinunga vivali. 4 Eye wa panga olombueti viavaya o akasia kuenda wa vi laña lulu.+ 5 Noke olombueti viaco wa vi iñisa vokati kovinunga vio kolonele Viocikasia oco Ocikasia cambatiwe.+

6 Eye wa tunga onuviko yulu wa fina.+ Kusõvi ya kuata ovikeya vivali lomeyu kuenda vupati waco ukeya lomeyu.+ 7 Kolongenge vivali vionuviko+ wa tungilako va keruvi vavali+ va pangiwa lulu wa teliwa lomatelo. 8 Keruvi umue wa kala kongenge yimue kuenda keruvi ukuavo wa kala kongenge yikuavo. Eye wa tunga va keruvi kolongenge vivali vionuviko. 9 Va keruvi vaco vavali volũila avava avo kilu, loku sikĩlĩla onuviko lavava avo.+ Ovipala viavo via limba ovaso kuenda via petamẽla konuviko.+

10 Noke wa panga omesa yavaya o akasia.+ Kusõvi ovikeya vivali kuenda vupati waco ukeya umosi, voku lepa kuaco ukeya lomeyu.+ 11 Kuenje wa yi laña lulu wa fina kuenda kongenge yaco wa ñualisako ocivindo culu. 12 Noke kolonele viomesa wa kapako ongenge ya soka lupati weka* koku sanjavala kuenda kongenge yaco wa ñualisako ocivindo culu. 13 Wa yi pangela ovinunga vikuãla viulu kuenje wa kapa ovinunga viaco kavindi akuãla kuna kua kapiwa ovolu aco akuãla. 14 Ovinunga via kala ocipepi longenge, momo vovinunga viaco omo mu iñila olombueti vioku ambata omesa. 15 Eye wa panga olombueti viavaya o akasia vioku ambata omesa kuenda wa vi laña lulu. 16 Noke wa panga lulu wa fina ovikuata vi kapiwa komesa ndeci: alonga aco, olokopo viaco, atiyela aco kuenda asanga aco ana va ka itaila lao ovilumba vioku nyua.+

17 Eye wa panga ociyekelo colondiyelo+ lulu wa fina. Ociyekelo caco colondiyelo, wa ci panga lulu wa teliwa lomatelo. Ociseveto caco, uti waco, ovianja viaco, olokopo viaco, olombutãu viaco kuenda olonelẽho viaco, via kala lika ocikuata cimosi.+ 18 Kuti wociyekelo colondiyelo kua tunda ovianja epandu okuti, ovianja vitatu via kala konele yimue kuenda ovianja vitatu via kala konele yikuavo. 19 Kocanja locanja conele yimue, kua kala olokopo vitatu vi kasi ndolonelẽho viamendua kuenje wa kapavo olombutãu noke olonelẽho kuenda kocanja locanja conele yikuavo kua kala olokopo vitatu vi kasi ndolonelẽho viamendua kuenje wa kapavo olombutãu, noke olonelẽho. Eci oco ca lingiwa lovianja epandu via tunda kuti wociyekelo colondiyelo. 20 Kuti wociyekelo colondiyelo kua kala olokopo vikuãla vi kasi ndolonelẽho viamendua kumue lolombutãu noke olonelẽho. 21 Vemẽhi liovianja vivali viatete via tunda kuti, mua kala olumbutãu lumue kuenda vemẽhi liovianja vivali vikuavo mua kala olumbutãu lumue kuenje vemẽhi liovianja vivali vikuavo mua kalavo olumbutãu lumue, momo kuti wociyekelo colondiyelo kua tunda ovianja epandu. 22 Olombutãu viaco lovianja viaco kuenda ociyekelo cosi colondiyelo, via linga ocikuata cimuamue culu wa fina wa teliwa lomatelo. 23 Noke eye wa panga olondiyelo viaco epanduvali+ kuenda ovikuata vioku ima ondalu* loviyukilo viaco viondalu lulu wa fina. 24 Wa panga ociyekelo colondiyelo kumue lovikuata viaco viosi lotalendo* yimosi yulu wa fina.

25 Eye wa panga utala winsensu+ luti wo akasia. Owo wa kuata olonele vikuãla via lisoka, ukeya umosi kusõvi, ukeya umosi koku sanjavala kuenda ovikeya vivali koku lepa. Olombinga viaco lutala, via kala ocikuata cimosi.+ 26 Eye wa u laña lulu wa fina okuti, kilu liaco, lo kolonele viaco viosi kuenda kolombinga viaco kuenje kongenge yaco wa ñualisako ocivindo culu. 27 Eye wa panga ovinunga vivali viulu via kapiwa kombuelo yocivindo caco okuti, kolonele viaco vivali, oco vi kuate olombueti vioku ambata utala. 28 Noke wa panga olombueti viavaya o akasia kuenda wa vi laña lulu. 29 Wa pangavo ulela u kola woku waveka+ haiwo wa fina kuenda insensu vielemba liwa+ okuti, via tengiwa luloño.*

38 Eye wa panga utala wocilumba coku pia elisi lavaya o akasia. Owo wa kuata olonele vikuãla via lisoka, kusõvi ovikeya* vitãlo, vupati ovikeya vitãlo kuenda koku lepa ovikeya vitatu.+ 2 Kavindi aco akuãla wa pangelako olombinga. Olombinga lutala waco via kala ocikuata cimosi. Noke wa ci laña losipi.+ 3 Kuenje wa panga ovikuata viosi viutala ndeci, ovikuata viatiko, olopa, atiyela, olongalufu kuenda oviyukilo viondalu. Ovikuata viaco viosi wa vi panga losipi. 4 Wa pangavo ociyo cutala okuti, owanda wosipi kuenje wa u kapa vemẽhi liongenge yalio vokati lakati kutala. 5 Eye wa panga ovinunga vikuãla kavindi akuãla ocipepi lociyo cosipi okuti, vovinunga viaco omo mu iñila olombueti. 6 Noke wa panga olombueti viuti wo akasia kuenda wa vi laña losipi. 7 Eye wa iñisa olombueti kovinunga kolonele viutala oco wambatiwe. Wa panga utala ndocikasia cavaya okuti, vokati ka muli lacimue.

8 Wa panga ombasiya yosipi+ lociyekelo caco cosipi; eye wa ci linga lalumũilo* akãi, vana va sokiyiwila oku vumba puvelo wombalaka yohongele.

9 Eye wa tunga ocitali.+ Konele yombuelo yocitali cina ca imba ovaso kombuelo, eye wa ñualisako lolonanga vielinya liovalatanya lia tutiwa okuti, via kuata 100 kovikeya.+ 10 Kua kala 20 kolongunji kuenda 20 kovikuata viosipi vi kuete epangu kuenje olonjolo violongunji lovikuata viaco vioku tokeka* via kala viopalata. 11 Konele yo konano kua ñualisiwavo olonanga via kuata 100 kovikeya. Olongunji viaco 20 kuenda 20 kovikuata viaco vi kuete epangu via kala viosipi. Olonjolo violongunji lovikuata viaco vioku tokeka* via kala viopalata. 12 Konele yutakelo kua kala olonanga via kuata 50 kovikeya. Kua kala olongunji ekũi kuenda ovikuata ekũi vi kuete epangu kuenje olonjolo violongunji, lovikuata vioku tokeka* via kala viopalata. 13 Upati wonele yutundilo okuti, ya imba ovaso kutundilo wekumbi, wa kuata 50 kovikeya. 14 Konele yimue yombundi yocitali, kua ñualisiwa olonanga via kuata 15 kovikeya kuenje kua kala olongunji vitatu kuenda ovikuata vitatu vi kuete epangu. 15 Konele yikuavo yombundi yocitali, kua kala olonanga via kuata 15 kovikeya kuenje kua kala olongunji vitatu kuenda ovikuata vitatu vi kuete epangu. 16 Olonanga viosi via ñualisiwa kocitali, via kala vielinya lionoloti. 17 Ovikuata vi kuete epangu vioku kapa kolongunji via kala viosipi kuenda olonjolo violongunji, lovikuata viaco vioku tokeka* via kala viopalata kuenda kilu liolongunji kua lañiwile lopalata kuenje olongunji viosi viocitali+ via kuatele ovikuata vioku tokeka viopalata.

18 Ongumbo yuvelo wocitali ya tutiwile lelinya li vumbula, liohusu, li kusuka kuenda liovalatanya lia tutiwa. Ongumbo yaco kusõvi ya kuata 20 kovikeya, koku lepa ovikeya 5, oku lepa kualio kua kala kumuamue ndoku kuolonanga via ñualisiwa kocitali.+ 19 Olongunji viaco vikuãla lovikuata viaco vikuãla vi kuete epangu, via kala viosipi. Olonjolo viaco via kala viopalata kuenda kilu liolongunji lo kovikuata vioku tokeka* kua lañiwile lopalata. 20 Olopeleko viosi viotavernakulu levi via ñuala kocitali, via kala viosipi.+

21 Owu owo ulala wovikuata va talavaya lavio poku tunga otavernakulu okuti, otavernakulu Yuvangi.+ Ulala waco wa pangiwa lolonumbi via Mose okuti, va Lewi+ ovo va kala locikele caco poku songuiwa la Itamare+ omõla ulume wa Arone, ocitunda. 22 Becalele+ omõla a Uri okuti, omõla a Huru ukuacikoti ca Yuda, wa linga cosi Yehova a handelekele Mose. 23 Eye wa kala la Aholiava+ omõla a Ahisamaka ukuacikoti ca Dani, omesele, ukuakupota, haeye ukuakututa alinya a vumbula, la-a ohusu, la-a a kusuka kuenda ovalatanya.

24 Ulu wosi va talavaya lawo poku linga upange wosi wocitumãlo ci kola, wa soka lulu wocilumba coku senga senga+ okuti, 29 kolotalendo* kuenda 730 kolosiekele* ndomo ci likuata locilemo cosiekele cocitumãlo ci kola.* 25 Opalata ya neniwa la vana va sonehiwa vohongele, ya tẽla 100 kolotalendo kuenda 1.775 kolosiekele ndomo ci likuata locilemo cosiekele cocitumãlo ci kola.* 26 Omunu wosi wa sonehiwa okuti o kuete 20 kanyamo ale ceci ci pitahãla anyamo aco,+ wa nena omeyu yosiekele ndomo ci likuata locilemo cosiekele cocitumãlo ci kola* kuenje ovo va tẽla 603.550 kalume.+

27 Poku panga ovikuata vi kuete epangu viocitumãlo ci kola kuenda ovikuata vi kuete epangu viongumbo, va talavaya leci ci soka 100 kolotalendo viopalata; 100 kovikuata vi kuete epangu via pangiwa leci ci soka 100 kolotalendo okuti, ocikuata locikuata ci kuete epangu, ca pangiwa lotalendo yimosi.+ 28 Lolosiekele vi soka 1.775, eye wa panga olonjolo violongunji kuenda wa laña kilu liolongunji viaco lopalata kuenje wa vi tokeka pamosi.

29 Osipi yombanjaile* ya tẽla 70 kolotalendo kuenda 2.400 kolosiekele. 30 Osipi yaco wa linga layo ovikuata vi kuete epangu vio puvelo wombalaka yohongele, utala wosipi, lociyo caco cosipi, ovikuata viosi viutala, 31 ovikuata vi kuete epangu via ñuala kocitali, lovikuata vi kuete epangu vio puvelo wocitali kumue lolopeleko viosi viotavernakulu kuenda olopeleko viosi+ via ñuala kocitali.

39 Lalinya a vumbula, la-a ohusu, la-a a kusuka,+ ovo va panga ovowalo a tutiwa ciwa oku vumba lao vocitumãlo ci kola. Va pangela Arone ovowalo a kola+ ndomo Yehova a handelekele Mose.

2 Becalele wa panga evendalia+ lulu, lelinya li vumbula, leli liohusu, leli li kusuka kuenda liovalatanya lia tutiwa. 3 Ovo va veta ulu toke eci wa pelevela kuenje va panga ovikete noke Becalele wa vi teta ndalinya oco vi vindiwe kumue lelinya li vumbula, leli liohusu, leli li kusuka kuenda liovalatanya kuenje via tutiwa. 4 Ovo va linga ovikolo vi pita kapepe yevendalia loku vi tokeka kolongenge vivali vievendalia. 5 Uvia wa tutiwa* haiwo wa tokekiwa kevendalia oco u kute ciwa evendalia liaco,+ wa pangiwa lovikuata vimuamue ndevi vievendalia okuti: ulu, lelinya li vumbula, leli li kusuka, leli liohusu kuenda liovalatanya lia tutiwa, ndomo Yehova a handelekele Mose.

6 Noke va kapa ovawe o onixi vovivela viulu kuenda va sonehamo* olonduko viomãla va Isareli, ndeci va sokotola ondimbukiso yimue.+ 7 Eye wa kapa ovawe aco kovikolo vievendalia vi pita kapepe, ndovawe onjivaluko komãla va Isareli+ ndomo Yehova a handelekele Mose. 8 Noke wa panga onjeke yo ponete+ okuti upange wukuakututa, ndeci upange wukuakututa evendalia okuti, lulu, lelinya li vumbula, leli liohusu, leli li kusuka kuenda liovalatanya lia tutiwa.+ 9 Poku yi vaka pokati ya kuata olonele vikuãla via lisoka. Ovo va tonga onjeke yo ponete okuti poku yi vaka ya kuata ocinãla cepaluma* kusõvi kuenda koku sanjavala. 10 Va kapamo ovolala akuãla ovawe. Kulala watete lio rubi, lio topasiu kuenda lio emeralda. 11 Kulala wavali lio turkesa, lio safira kuenda lio jaspe. 12 Kulala watatu ewe lio leshem,* lio agata kuenda lio ametisitia. 13 Kulala wakuãla lio krisolitu, lio onixi kuenda lio jade. Ovawe aco a kapiwa kovivela viulu. 14 Ovawe aco a likuatele lolonduko viomãla va Isareli okuti 12 kuenda kewe lewe kua sonehiwa onduko ndeci ku sonehiwa ondimbukiso yimue, onduko londuko yi likuata locikoti cimue pokati kovikoti 12.

15 Konjeke yo ponete va pangelako alienge ulu wa fina a vindiwa ndovikolo.+ 16 Kuenje ovo va panga ovivela vivali viulu, lovinunga vivali viulu kuenda va kapa ovinunga viaco vivali kavindi avali onjeke yo ponete. 17 Noke va pitisa ovikolo vivali viulu vovinunga vivali vi kasi kavindi onjeke yo ponete. 18 Kuenje asusu ovikolo vivali va a pitisa vovivela vivali kuenda va a kutila kapepe evendalia kovaso yaco. 19 Noke va panga ovinunga vivali viulu kuenje va vi kapa kasusu avali vokati konjeke yo ponete kongenge yaco okuti, ya imba ovaso kevendalia.+ 20 Va panga vali ovinunga vivali viulu apa uvia u tokekiwa levendalia okuti, kovaso yevendalia, vemẽhi liovikolo vivali vi pita kapepe, kilu liuvia wa tutiwa* wevendalia. 21 Oku sulako, ovo va kuta lukolo u vumbula onjeke yo ponete oku upisa kovinunga vionjeke yo ponete toke kovinunga vievendalia, oco onjeke yo ponete yi kale pocitumãlo calio kevendalia, kilu liuvia wa tutiwa* ndomo Yehova a handelekele Mose.

22 Noke evendalia wa li pangela esanya ka li kuete ovoko lia tutiwa lukuakupota okuti, liosi lia pangiwa lelinya li vumbula.+ 23 Epangu lioku iñisila utue lia kala pokati kesanya ka li kuete ovoko okuti, lia kala ndepangu liocikutu covivela. Kolonele viepangu liaco kua kala ocivindo oco ka li ka toke. 24 Kongenge yesanya ka li kuete ovoko, va pangelako olo romã lelinya li vumbula, leli liohusu, leli li kusuka okuti, a tutiwila pamosi. 25 Ovo va linga olongunga viulu wa fina kuenje olongunga viaco va vi kapa pokati kolo roma kongenge yosi yesanya ka li kuete ovoko okuti, pokati kolo romã; 26 va kapa ongunga noke o romã, va kapa vali ongunga noke o romã kongenge yaco yosi yesanya ka li kuete ovoko, lina lia enda oku waliwa poku vumba ndomo Yehova a handelekele Mose.

27 Va tongela Arone lomãla vaye+ ovowalo a lepa lelinya liovalatanya, wa pangiwa lukuakupota, 28 lekofue+ lielinya liovalatanya, ocifuto co kutue+ celinya liovalatanya, oloputula*+ vielinya lionoloti, 29 luvia welinya liovalatanya lia tutiwa, li vumbula, liohusu leli li kusuka okuti, a tutiwila pamosi, ndomo Yehova a handelekele Mose.

30 Oku sulako, va tela ulame u nina wulu wa fina, okuti ondimbukiso yi kola yelitumbiko kuenda mua sonehiwa olondaka ndeci va sokotola ondimbukiso yimue okuti: “Oku kola kua tiamẽla ku Yehova.”+ 31 Va kutako ukolo wa pangiwa lelinya li vumbula oco u kapiwe kekofue, ndomo Yehova a handelekele Mose.

32 Omo liaco, upange wosi wotavernakulu, ombalaka yohongele, wa malusuiwa kuenda va Isareli va linga ovina viosi Yehova a handelekele Mose.+ Va linga muẽle cosi.

33 Kuenje va nena otavernakulu+ ku Mose, ombalaka+ kuenda ovikuata viaco viosi ndeci: oviyikilo viaco,+ olomanji,+ olombueti viaco,+ olongunji viaco kuenda ovikuata viaco vi kuete epangu;+ 34 onuviko yalio yovipa viocitupi comeme ca pindaliwa levala li kusuka,+ onuviko yalio yovipa violonjundu kuenda ongumbo yoku tepisa;+ 35 ocikasia Cuvangi, olombueti viaco+ kuenda onuviko;+ 36 omesa, lovikuata viaco viosi+ kuenda olombolo via taliwa; 37 ociyekelo colondiyelo ca pangiwa lulu wa fina, olondiyelo viaco,+ ulala wolondiyelo, lovikuata viaco viosi+ kuenda ulela woku mĩhila;+ 38 utala+ wulu, ulela woku waveka,+ insensu vielemba liwa,+ ongumbo+ yuvelo wombalaka; 39 utala wosipi+ lociyo caco cosipi, olombueti viaco,+ ovikuata viaco viosi,+ ombasiya kuenda ociyekelo calio;+ 40 olonanga via ñuala ocitali, olongunji viaco, lovikuata viaco vi kuete epangu,+ ongumbo+ yuvelo wocitali, ovikolo viaco viombalaka, lolopeleko viaco viombalaka+ kuenda ovikuata viosi viupange wotavernakulu, viombalaka yohongele; 41 ovowalo a tutiwa ciwa oku vumba lao vocitumãlo ci kola, ovowalo a kola a Arone ocitunda+ kuenda ovowalo vomãla vaye oco va vumbe ndovitunda.

42 Va Isareli va linga upange wosi+ ndomo ci likuata lovina viosi Yehova a handelekele Mose. 43 Eci Mose a kũlĩhĩsa upange wosi ovo va linga, wa limbuka okuti, va linga ndomo Yehova a handelekele; kuenje Mose wa va sumũlũisa.

40 Yehova wa sapuila Mose hati: 2 “Keteke liatete liosãi yatete, o tunga otavernakulu okuti, ombalaka yohongele.+ 3 O kapamo ocikasia Cuvangi+ kuenda o vundisa Ocikasia longumbo.+ 4 O kapamo omesa+ loku ongotiya ovina vi kalako kuenda o kapamo ociyekelo colondiyelo+ loku mĩha olondiyelo viaco.+ 5 Noke kapa utala wulu winsensu+ kovaso yocikasia Cuvangi kuenda kapavo ongumbo yo puvelo wotavernakulu.+

6 “O kapa utala wocilumba coku pia elisi+ kovaso yuvelo wotavernakulu okuti, ombalaka yohongele, 7 kuenje o kapa ombasiya pokati kombalaka yohongele lutala kuenje o kapapo ovava.+ 8 Kotavernakulu o ñualisako ocitali loku kapa ongumbo+ puvelo wocitali caco.+ 9 Noke ove o tikula ulela woku waveka+ kuenje o waveka otavernakulu lovina viosi vi kasimo+ kuenda o yi kolisa kumue lovikuata viaco viosi okuti, yi linga ocina cimue ci kola. 10 Ove o waveka utala wocilumba coku pia elisi kumue lovikuata viaco viosi loku kolisa utala, oco u linge utala umue u kola koku kola.+ 11 Ove o waveka ombasiya lociyekelo calio loku yi kolisa.

12 “Noke nena Arone kumue lomãla vaye ocipepi luvelo wombalaka yohongele kuenje o va sukula lovava.+ 13 Ove o walisa Arone uwalo u kola+ loku u waveka+ kuenda oku u kolisa kuenje eye o ndi vumba ndocitunda. 14 Noke nena omãla vaye ocipepi kuenje va walisa ovowalo a lepa.+ 15 Ove o va waveka ndeci wa waveka isiavo,+ oco va ndi vumbe ndovitunda kuenje oku wavekiwa kuavo ku ka amamako ndupange wutunda kovitumbulukila viavo.”+

16 Mose wa linga ovina viosi ndomo Yehova o handelekele.+ Eye wa linga muẽle cosi.

17 Otavernakulu ya tungiwa+ kosãi yatete, kunyamo wavali, ketete liatete liosãi. 18 Eci Mose a tunga otavernakulu, kosi wa kapako ovikuata viaco vi kuete epangu+ kuenje kilu wa kapako olomanji,+ lolombueti viaco+ kuenda olongunji viaco. 19 Eye wa nyanyumũila olonanga+ kilu liotavernakulu kuenje wa kapa ocisikĩlĩlo kilu liaco,+ ndomo Yehova a handelekele Mose.

20 Noke Mose wa tikula Uvangi,+ loku u kapa Vocikasia+ kuenda olombueti+ wa vi iñisa vovinunga Viocikasia kuenje wa kapa onuviko+ kilu Liocikasia.+ 21 Eye wa nena Ocikasia votavernakulu loku kapa ongumbo+ yoku tepisa kuenda wa vundisa ocikasia Cuvangi,+ ndomo Yehova a handelekele Mose.

22 Noke wa kapa omesa+ vombalaka yohongele konele yo konano yotavernakulu vokati Kohondo yi Kola,* 23 kuenje komesa yaco wa kapako ulala wolombolo+ kovaso a Yehova, ndomo Yehova a handelekele Mose.

24 Eye wa kapa ociyekelo colondiyelo+ vombalaka yohongele kovaso yomesa okuti, konele yombuelo yotavernakulu. 25 Wa mĩha olondiyelo+ kovaso a Yehova, ndomo Yehova a handelekele Mose.

26 Noke wa kapa utala wulu+ vombalaka yohongele kovaso yongumbo, 27 oco a yokeleko+ insensu vielemba liwa,+ ndomo Yehova a handelekele Mose.

28 Wa kapa ongumbo+ puvelo wotavernakulu.

29 Eye wa kapa utala wocilumba coku pia elisi+ puvelo wotavernakulu okuti, ombalaka yohongele oco eye a lumbileko ocilumba coku pia elisi+ locilumba colomema, ndomo Yehova a handelekele Mose.

30 Wa kapa ombasiya pokati kombalaka yohongele lutala kuenje wa kapapo ovava oku pusa.+ 31 Mose la Arone kumue lomãla vaye opo va sukuila ovaka avo kuenda olomãhi viavo. 32 Olonjanja viosi eci va iñila vombalaka yohongele, ale oku kala ocipepi lutala, va pusa,+ ndomo Yehova a handelekele Mose.

33 Oku sulako, kotavernakulu wa ñualisako ocitali,+ lutala kuenda wa kapa ongumbo puvelo wocitali caco.+

Kuenje Mose wa malusula upange. 34 Noke elende lia fetika oku sitika ombalaka yohongele kuenda ulamba wa Yehova wa yukisa otavernakulu.+ 35 Mose ka ponduile oku iñila vombalaka yohongele, omo elende lia sikĩlĩlako kuenda ulamba wa Yehova wa yukisile otavernakulu.+

36 Nda elende li tunda kilu liotavernakulu, va Isareli va enda oku tungulula ocilombo cavo vokuenda kungende wavo.+ 37 Pole, nda elende ka lia tundile kilu liotavernakulu, ovo ka va ponduile oku tungulula ocilombo toke keteke elende li tunda.+ 38 Momo kutanya elende lia Yehova lia kala kilu liotavernakulu kuenda kuteke ondalu ya kala kilu liotavernakulu kovaso yonjo yosi ya Isareli vokuenda kungende wavo wosi.+