Onepa 6

Tunde Koku Citiwa Kua Yesu Toke Kolofa Viaye

Ungelo Gabrieli wa tumiwile kufeko umue wa sunguluka wa tukuiwa hati Maria. Eye wo sapuila okuti oka cita omõla oka viala ndosoma otembo ka yi pui. Yesu wa citiwila vocimanga. Ovangombo omo vo sanga eci vaile oku pasuisa. Noke, olumbungululu lua songuila alume vokutundilo toke kuna kua kala okamõla. Tuka lilongisa helie wa va muisa olumbungululu luaco kuenda ndomo Yesu a puluka koku pondiwa.

Noke eci Yesu a tẽlisa ekũi kanyamo lanyamo avali, wa kala oku sapela lalongisi vonembele. Eci a tẽlisa akũi atatu kanyamo wa papatisiwa. Noke yepapatiso, eye wa fetika oku kunda loku longisa Usoma. Momo owu owo wa kala upange a tumiwila palo posi. Yesu wa nõla ekũi lavavali kalume veya oku kala olondonge, oco vo kuatise kupange woku kunda.

Yesu wa lingavo ovikomo vialua. Eye wa tekula olohulua viomanu lotumbolo tumue kuenda olosi viñamiñami. Wa sakula olombei kuenda wa pindula omanu kolofa. Noke tuka lilongisa vali ovina vialua viatiamẽla ku Yesu eci a kala palo posi kuenda ndomo eye a pondiwa. Yesu wa kunda eci ci soka anyamo atatu kuenda olosãi epandu. Onepa eyi YEPANDU yi lombolola ulandu weci ci soka akũi atatu lakuãla kanyamo.