Eye wa Solele Omanu

1, 2. Yesu wa lekisa ndati okuti o sole calua omanu?

OMÕLA watete wa Yehova Suku wa lekisa ongangu ya velapo yolondunge via Yehova kuenda wa kala “omesele” ya Isiaye. Sokolola esanju Yesu a kuata osimbu Isiaye a kala oku “sovola availu” kuenda eci “a seteka ociseveto coluali.” Pole, pokati kovina viosi Isiaye a lulika wa solele calua “omãla vomanu.” (Olosapo 8:22-31) Ocili okuti Yesu wa lekisile ocisola komanu tunde kefetikilo.

² Noke, Yesu wa lekisa epokolo locisola ku Isiaye kuenda komanu vosi eci a tunda kilu loku iya palo posi okuti wa linga omunu ukuetimba liositu. Yesu wa lekisa ocisola caye poku eca omuenyo waye “ndocimuenyo coku yovola va lua.” (Mateo 20:28; Va Filipoi 2:5-8) Eci Yesu a kala palo posi Suku wa ecele kokuaye unene woku linga ovikomo. Kuenje, ovikomo viaco via eca uvangi wokuti Yesu o sole calua omanu, kuenda ndopo o ka va lingila ovina vi komõhisa.

3. Nye tu konomuisa vocipama cilo?

³ Eci Yesu a kala palo posi wa kunda “ondaka yiwa Yusoma wa Suku.” (Luka 4:43) Eye wa kũlĩhĩle okuti Usoma waye wa laikele oku eca esivayo konduko ya Isiaye kuenda oku malako ovitangi viomanu. Osimbu Yesu a kala oku kunda wa linga ovikomo vialua via eca uvangi wokuti wa kapeleko omanu vosi. Momo lie ovina viaco vi kuetele esilivilo kokuetu? Momo ovina Yesu a linga vi tu ĩha elavoko kuenda ekolelo lio kovaso yoloneke. Omo liaco, tu konomuisi ovikomo vikuãla via Yesu.

“UNENE WOKU SAKULA WA KALA LAYE”

4. Nye ca pita eci Yesu a sanga ulume umue ukuavilundu?

⁴ Yesu vokuenda kupange waye woku kunda wa endele vimbo limue lia kala vocikanjo co Galilea. Volupale lumue wa sangamo ulume umue wa kuatele uveyi wovilundu. (Marko 1:39, 40) Ulume wa kala oku vela ndotolo Luka a tukula, ‘we yukile ovilundu.’ (Luka 5:12) Embimbiliya li popia okuti, ulume waco eci a mola Yesu, “wa lituvika posi kuenje wo pinga hati: ‘A Ñala, nda o ci panga o tẽla oku ñayisa.’” Ulume waco wa kũlĩhĩle okuti Yesu wa kuatele unene woku u sakula, pole, wa sukilile oku kũlĩha nda Yesu wa laikele oku tava oku u sakula ale sio. Momo lie? Momo ulume waco wa kuatele ovisimĩlo ndevi via va Fariseo ka va kapeleko omanu va kala luvei wovilundu. Pole, ovisimĩlo vipi Yesu a kuatele? Ocituwa cipi Yesu a lekisa kulume waco ukuavilundu? Nda ove wa pitile locitangi caco nda wa linga nye?

5. Momo lie Yesu a tavela oku sakula ulume wa kuatele ovilundu?

⁵ Citava okuti ulume wa kala oku vela ka kalukile loku popia hati: “Nda vĩhĩsua, nda vĩhĩsua,” ndomo ca kisikiwile Vocihandeleko ca Mose. (Ovisila 13:43-46) Yesu ka lekisile onyeño kulume waco. Pole, wa lekisa esakalalo kokuaye, momo wa yonguile oku u kuatisa. Ndaño ka tua kũlĩhĩle ciwa ovisimĩlo Yesu a kuata, pole, tua kũlĩha ovina via kala kutima waye. Ohenda a kuatela ulume waco yo vetiya oku linga ocikomo. Noke wa lamba ulume waco okuti lomue wa kuatele epondolo lioku ci linga. Ohenda Yesu a kuata yo vetiya oku popia hati: “Nda panga, kaya”! Noke “ovilundu vio tunda.” (Luka 5:13) Ocili okuti, Yehova wa ecele ku Yesu unene woku linga ovikomo oco a lekise okuti o kuetele ocisola omanu.​—Luka 5:17.

6. Ovikomo Yesu a linga vi tu longisa nye, kuenda vi lekisa nye?

⁶ Omo liunene Yesu a tambula ku Suku, wa linga ovikomo vialua. Eye ka sakuile lika vakuavilundu. Pole, wa sakulavo omanu va kuata ovovei a litepa. Embimbiliya li tu sapuila okuti, omanu va komõhele calua eci “va mola ovitende vi popia, lava va lemehua va sakuiwa, lovilema [vi] enda, kuenda olomeke vi lete.” (Mateo 15:31) Eci Yesu a linga ocikomo coku sakula, ka pingile ocimatamata comunu umue o kuete uhayele oco a sakule laco omanu va kala oku vela. Momo Yesu wa kuatele unene woku sakula olonepa viosi vietimba ka via kuatele uhayele. Eye wa sakula omanu vocipikipiki. Olonjanja vimue wa sakula omanu vana va kala ocipãla laye. (Yoano 4:46-54) Ovolandu a komõhisa a tukuiwa ndeti a lekisa nye? A lekisa okuti Soma yetu Yesu Kristu o kuete onjongole yoku malako ovovei osi. Eci tu lilongisa ndomo Yesu a kapeleko omanu, ci tu vetiya oku kolela okuti, voluali luokaliye o ka “kuatela ohenda ohukũi losuke.” (Osamo 72:13) Omo okuti Yesu o yongola oku ci linga, o ka sakula omanu vosi va siata oku tala ohali.

“VOTOKA, TIKULA ULA WOVE, KUENDE”

7, 8. Lombolola eci ca pita osimbu Yesu ka sangele ulume wa kala oku vela ko Betesaita.

⁷ Noke liolosãi vimue tunde eci Yesu a sakula ulume ukuavilundu, wa linga ungende woku tunda ko Galilea toke ko Yudea kuna amamako oku kunda olondaka viwa viatiamẽla Kusoma wa Suku. Citava okuti kua kala omanu valua va yeva esapulo lia Yesu okuti va vetiyiwa locisola a lekisa kokuavo. Yesu wa yonguile oku lembeleka olohukũi kuenda vana va kala oku talisiwa ohali, loku eca kokuavo elavoko.​—Isaya 61:1, 2; Luka 4:18-21.

⁸ Kosãi ya Nisana Yesu wa endele ko Yerusalãi kocipito co Paskoa. Omanu veya oku livokiya volupale luaco osimbu valua va kala oku pitĩla omo liocipito caco cilikasi. Konano yonembele kua kala ociva cimue covava ci tukuiwa hati Betesaita, kuna Yesu a sanga ulume umue okuti ka ponduile oku enda.

9, 10. (a) Momo lie omanu va endelele kociva co Betesaita? (b) Nye Yesu a linga pociva caco, kuenda ci tu longisa nye? (Tala ociluvialuvia kefetikilo liocipama cilo.)

⁹ Omanu valua va kala oku vela va yonguile oku enda ko Betesaita. Momo lie? Momo va simĩle okuti omunu umue ovela citava okuti o sakuiwa locikomo nda wa iñila vociva covava a tumõha. Sokolola ombuanja ya kalako omo liomanu valua ka va kuatele elavoko, haivo va sakalala okuti, va yonguile oku sakuiwa. Omo okuti Yesu wa kala omunu umue wa lipua kuenda ka sukilile oku sakuiwa, momo lie a endelele kociva caco covava? Ocisola a kuatela omanu oco co vetiya oku endako. Eci a pitĩla pociva caco, wa sangapo ulume umue wa kala oku vela vokuenda kuanyamo alua okuti otembo Yesu a kala komuenyo palo posi ci sule.​—Tanga Yoano 5:5-9.

¹⁰ Yesu wa pula kulume waco nda wa yonguile oku enda vali. Sokolola esumuo ulume waco a kuata eci a sapuila ku Yesu hati o yongola oku sakuiwa, pole, ka kua kalele omunu umue o pondola oku u kuatisa oco a iñile vociva covava. Noke Yesu wa sapuila kulume waco oco a likolisileko. Kuenje wo sapuila hati, tikula ula wove, kuende. Noke ulume wa tikula ula waye kuenje wa fetika oku enda! Ocikomo eci ceca uvangi wovina Yesu a ka linga voluali luokaliye palo posi. Ci lekisavo ocisola cocili Yesu a kuetele omanu. Yesu wa sandiliya omanu vana va sukilile ekuatiso. Ongangu ya Yesu yi tu vetiya oku amamako oku sandiliya vocikanjo cetu omanu va sumua omo liovitangi vi kasi oku pita voluali lulo.

“HELIE WA LAMBA KUWALO WANGE?”

11. Elivulu lia Marko 5:25-34 li eca ndati uvangi wokuti Yesu wa lekisile ocisola komanu va kala oku vela?

¹¹ Tanga Marko 5:25-34. Vokuenda kueci ci soka 12 kanyamo ukãi umue wa kala oku tala ohali omo lioku vela. Uvei waco wo kokela ovitangi vialua komuenyo waye kuenda wo tatekele oku fendela ciwa Yehova. Ndaño wa sandiliyile olondotolo vialua kuenda wa pesela olombongo vialua oco a sakuiwe, pole, olondotolo viaco ka via tẽlele oku u sakula. Eteke limue ukãi waco wa lingile esokiyo lioku kuama onjila yikuavo oco a kaye. Omo liaco, wa iñila pokati komanu kuenje, wa lamba kuwalo wa Yesu. (Ovisila 15:19, 25) Eci Yesu a limbuka okuti vetimba liaye mua tunda unene, wa pula helie wo lamba. Noke, ukãi ‘lusumba loku luluma wo kekamẽla kuenje wo sapuila ocili cosi.’ Yesu wa kũlĩhĩle okuti Yehova wa sakuile ukãi waco, kuenje wo sapuila hati: “Amõlange, ekolelo liove lia ku popela. Kuende lombembua. Uvei wove wa ku tunda.”

12. (a) Omo liovina tua siata oku lilongisa, nye tu pondola oku popia catiamẽla ku Yesu? (b) Ongangu yipi Yesu a tu sila?

¹² Tu sanjuka calua poku konomuisa ulandu u lekisa ndomo Yesu ukuacisola a kala lomanu, ca piãla enene vana va vela. Ocituwa caco ca litepa leci ca Satana una wa siata oku tu seteka oku tu vetiya oco tu tave kovisimĩlo viokuti ka tu silivila kuenda lomue o tu sole. Pole, ovikomo Yesu a linga via eca uvangi wokuti, wa siata oku tu tata ciwa kuenda o tu kuatisa poku liyaka lovitangi. Tu eca olopandu omo tu kuete Soma yaco ukuacisola okuti eye Ocitunda Cinene! (Va Heveru 4:15) Pamue ka ci leluka kokuetu oku kuata elomboloko liovisimĩlo viomunu umue o kasi oku vela vokuenda kuotembo yalua, ca piãla enene nda ka tu vela. Pole, sokolola eci catiamẽla ku Yesu. Eye wa lekisile ohenda komanu va kala oku vela ndaño okuti lalimue eteke a velele. Omo liaco, vosi yetu tu sukila oku setukula ongangu yaye yoku lekisa ocisola.​—1 Petulu 3:8.

“YESU WA LILA”

13. Epinduko lia Lasaru lia situlula nye catiamẽla ku Yesu?

¹³ Yesu wa vetiyiwa oku lekisa ohenda komanu omo liohali va kala oku tala. Yesu eci ekamba liaye Lasaru a fa, wa kuata “ocikembe” kuenje “wa tokotelua” poku mola esumuo liepata lia Lasaru, kuenda liakamba vaye. (Tanga Yoano 11:33-36.) Ndaño okuti Yesu wa kuatele epondolo lioku pindula Lasaru, pole, wa lila. Eye ka kuatele ohele yoku ecelela okuti omanu va limbuka esumuo liaye. Omo okuti Yesu wa solele calua Lasaru kumue lepata liaye, wa kuatisiwa lunene wa Suku oco a pindule Lasaru!—Yoano 11:43, 44.

14, 15. (a) Nye ci lekisa okuti Yehova o yongola oku malako ohali yomanu? (b) Ondaka “vayambo” yi tu longisa nye?

¹⁴ Embimbiliya li tukula Yesu hati o kasi nda Isiaye, Yehova. (Va Heveru 1:3) Omo liaco, ovikomo Yesu a linga vi eca uvangi wokuti Yehova o yongola oku malako ovovei, evalo kuenda olofa. Ndopo Yehova kumue la Yesu va ka pindula omanu valua va fa. Omo liaco, Yesu wa popia hati: “[Owola] yiya eci vosi va kasi vayambo” va ka pinduiwa.​—Yoano 5:28, 29.

¹⁵ Yesu wa tukula ondaka “vayambo,” oco a lekise okuti vondaka yaco mua kongela ovisimĩlo via Suku. Omo okuti Suku Ukuonene wa Velapo haeye Ululiki woluali luosi, o pondola oku sokolola ovina viosi viatiamẽla komanu va fa oku kongelamo ekalo liavo. (Isaya 40:26) Yehova ka pondola lika oku ivaluka omanu vaco, pole, o yongola oku tẽlisa onjongole yaye. Epinduko liomanu va tukuiwa Vembimbiliya li eca uvangi u komõhisa wovina vi ka lingiwa voluali luokaliye.

CECI TU LILONGISA KOVIKOMO VIA YESU

16. Epuluvi lipi afendeli va Suku va ka kuata?

¹⁶ Nda tua amamako oku pandikisa lekolelo tu ka kuata epuluvi lioku mola ocikomo coku puluka kohali ya piãla! Noke liuyaki wo Harmagedo, tu ka mola ovikomo vialua. Kotembo yaco, omanu vosi va ka kuata uhayele wa lipua. (Isaya 33:24; 35:5, 6; Esituluilo 21:4) Sokolola esanju o ka kuata poku mola omanu va ka inasi ovinokolo viumeke, olombueti vioku enda, olomangu vialola, kuenda olomakina vi kuatisa ovisitatũi oku yevelela ciwa. Yehova wa kũlĩha okuti omanu vosi va ka puluka kuyaki wo Harmagedo, va ka sukila oku pama loku kuata uhayele, momo va ka kuata upange walua u ka lingiwa. Omanu vaco ovo va ka pongolola Ongongo yosi oco yi linge yokaliye.​—Osamo 115:16.

17, 18. (a) Momo lie Yesu a lingila ovikomo? (b) Momo lie o sukilila oku likolisilako oco o ka kale voluali luokaliye?

¹⁷ Koloneke vilo, “owiñi wakahandangala” wa siata oku vetiyiwa calua poku tanga ovolandu a lekisa ndomo Yesu a sakula omanu va kala oku vela. (Esituluilo 7:9) Ovikomo viaco vi pamisa elavoko lietu li komõhisa lioku sakuiwa kovaso yoloneke. Vi lekisavo ndomo omõla watete wa Suku a sola omanu. (Yoano 10:11; 15:12, 13) Ohenda Yesu a lekisa komanu yeca uvangi wocisola Yehova a kuetele omunu lomunu pokati kafendeli vaye.​—Yoano 5:19.

¹⁸ Koloneke vilo voluali mue yuka ovitangi, ohali kuenda olofa. (Va Roma 8:22) Eli olio esunga lieci tu sukilila oluali luokaliye lua Suku. Omanu vosi va ka kuata uhayele wa lipua Suku a va likuminya. Elivulu lia Malakiya 4:2 li tu ĩha elavoko liokuti, tu ka ‘somboka ndolonãle via kutuluiwa vocunda’ omo liesanju li tunda koku yovuiwa kocitangi cekambo lioku lipua. Ocisola tu kuetele Yehova lekolelo lietu kolohuminyo viaye, ci tu vetiya oku likolisilako oku linga ovina vi sukiliwa oco tu kale voluali luokaliye. Oku kũlĩha ovikomo Yesu a linga ci tu vetiya calua, momo vi eca uvangi wekalo liwa omanu va ka kuata vokuenda kuviali waye!