Ovikomo Via Yesu—Nye o Lilongisilako?

OVE pamue o komõha poku kũlĩha okuti, ovolandu Embimbiliya a sonehiwa kelimi lio Helasi atiamẽla komuenyo wa Yesu palo posi, ka wa tukuiwile ondaka “ovikomo”. Ondaka yo Helasi yokuti (dyʹna·mis) olonjanja vimue yi pongoluiwa okuti “ocikomo,” yi lomboloka “unene.” (Luka 8:46) Oyo yi pondolavo oku lonboloka “uloño” ale “ovopange wunene.” (Mateo 11:20; 25:15) Onoño yimue ya popia okuti ondaka yo Helasi yi “lombolola upange wunene wa lingiwa kuenda capiãla enene unene upange waco wa lingiwa lawo. Upange waco ulomboluiwa okuti, ocindekaise cunene wa Suku.”

Ondaka yikuavo yo Helasi yokuti (teʹras), ya siata oku pongoluiwa okuti “olondimbukiso” ale ‘ovilimbu.’ (Yoano 4:48; Ovilinga 2:19) Ondaka eyi yi situlula ndomo omanu va kala poku yi yeva. Olonjanja vimue owuñi kuenda olondonge via enda oku komõha poku mola ovopange wunene Yesu wa enda oku linga.​—Marko 2:12; 4:41; 6:51; Luka 9:43.

Ondaka yimue yatatu yokuti (se·meiʹon), poku yi tiamisila kovikomo via Yesu, yi lomboloka “ondimbukiso.” Onoño yimue o tukuiwa Robert Deffinbaugh ya popia okuti, ondaka yaco yi “situlula elomboloko liondaka ocikomo.” Eye wamisako ndoco: “Ondimbukiso ocikomo cimue ci lekisa ocili cimue catiamẽla ku Ñala yetu Yesu.”

Epela Ale Unene wa Eciwa la Suku?

Embimbiliya ka li lombolola okuti ovikomo via Yesu via kala viepela ale via sokiyiwila oku taluisa omanu. Ovio via kala ondimbukiso ‘yunene wa Suku,’ ndeci ca kala kulandu wumalẽhe una Yesu a tundisa ondele yimue. (Luka 9:37-43) Anga hẽ Suku Ukuonene Wosi una o tukuiwa Vembimbiliya okuti “ongusu yaye yalua,” nda ka tẽlele oku linga ovopange aco? (Isaya 40:26) Ocili okuti nda wa ci tẽla!

Ovolandu a sangiwa Vavanjelio a tukula eci ci soka 35 kovikomo Yesu a linga. Pole, etendelo liosi liovikomo eye a linga, ka via tukuiwile. Ndeci, kelivulu lia Mateo 14:14 ku popia hati: “[Yesu] wa mola owiñi walua kuenje wa va kuatela ohenda, yu wa sakula ava va vela.” Ulandu waco ka u lombolola etendelo liolombei eye a sakulavepuluvi liaco.

Ovopange aco a kuatele elitokeko leci Yesu a popia okuti, eye wa kala Omõla wa Suku, Mesiya wa likuminyiwile. Ovisonehua vi lekisa okuti unene Suku a ecele kokuaye wo kuatisa oku linga ovikomo. Upostolo Petulu wa tukula Yesu okuti, “ulume una Suku a situluila kokuene lovilinga vi komõhisa, lovikomo kuenda olondimbukiso Suku a linga pokati kene pocakati caye, ndeci ene muẽle wa ci kũlĩhi.” (Ovilinga 2:22) Vepuluvi likuavo Petulu wa popia okuti ‘Suku wo waveka [Yesu] lespiritu sandu kuenda lunene, haeye wa endaenda kofeka yosi oku linga ovina viwa loku sakula vosi vana va talisiwile ohali vemẽhi liunene Weliapu; momo Suku wa kala laye.’​—Ovilinga 10:37, 38.

Ovikomo via Yesu via kuatele elitokeko lesapulo liaye. Elivulu lia Marko 1:21-27 li situlula ndomo owiñi wa kala poku yeva alongiso a Yesu kuenda ovikomo viaye. Elivulu lia Marko 1:22 li popia okuti “omanu va komõha loku longisa kuaye” kuenda ocinimbo 27 ci popia okuti omanu va “komõha” eci eye a tundisa ondele yimue. Cikaile ovopange a Yesu kuenda esapulo liaye, via eca ovovangi okuti eye wa kala Mesiya wa likuminyiwile.

Yesu ka vanguile lika komanu okuti eye wa kala Mesiya; pole, unene Suku a eca kokuaye, una wa lekisiwa kovikomo a linga kuenda ovina eye a popia levi a linga, via eca uvangi wokuti eye Mesiya. Eci vo pula cipi ca kala ocikele caye kuenda kulie a tambula unene waco, Yesu wa tambulula hati: “Ame ñuete uvangi wa velapo okuti wa Yoano [Upapatisi] u sule, momo ovopange osi Isiange a numa oku tẽlisa okuti o-o ñasi oku linga, a eca uvangi wokuti Isia eye wa numa.”​—Yoano 5:36.

Ovovangi a Lekisa Okuti Eye wa Kala Mesiya

Momo liye tu kolelela okuti ovikomo via Yesu via kala muẽle viocili? Kũlĩhĩsa ovovangi amue.

Yesu poku linga ovopange wunene, lalimue eteke a livelisilepo. Eye wa eca ku Suku esivayo omo liovikomo viosi eye a linga. Ndeci, Yesu osimbu ka sakuile omeke yimue, wa popia okuti “ca lingiwila oco ovopange a Suku a situluiwe vokuaye.”​—Yoano 9:1-3; 11:1-4.

Ca litepa lomanu vakuepela, vakualumbu kuenda vana va sakula pocakati cekolelo, Yesu lalimue eteke a lekisile ocituwa coku limolehisa, atutu, alumbu ale oviholo. Eye ka sandele umbanda ale oku talavaya lovina viosimbu. Limbuka ocituwa cumbombe Yesu a lekisa poku sakula olomeke vivali. Ulandu u popia ndoco: “Yesu wa va kuatela ohenda, wa lamba vovaso avo, vonjanja yaco haico ovaso avo a patuluka kuenje vo kuama.” (Mateo 20:29-34) Ka mua kongelele ociholo cimue ale ocipito cimue. Yesu wa lianjele poku linga ovikomo kuenda olonjanja vialua wa enda oku vi lingila pokati komanu valua. Eye ka endaile oku vi linga kovitumãlo vina vi likasi. Ca litepa lovikomo viokoloneke vilo ceci okuti, koloneke vilo ovikomo ka vi kuete ovovangi.​—Marko 5:24-29; Luka 7:11-15.

Olonjanja vimue, Yesu wa enda oku vangula catiamẽla kekolelo lia vana va kuatisiwa lovikomo viaye. Pole ekambo liekolelo liomunu umue, ka lia endaile oku tateka Yesu oku linga ovikomo. Osimbu a kala ko Kafarinau, ko Galileya, “omanu va fetika oku u nenela valua va kuatiwa lolondele; kuenje wa tundisa olondele viaco londaka yimosi, yu wa sakula vosi va kala oku vela.”​—Mateo 8:16.

Ovikomo via Yesu via lingiwa oco vi kuatise kovina omanu va sukilile okuti, ka via lingiwile oco vi sanjuise omunu umue. (Marko 10:46-52; Luka 23:8) Yesu lalimue eteke a lingile ovikomo oco vi u kuatise eye muẽle.​—Mateo 4:2-4; 10:8.

Nye ci Popiwa Catiamẽla Kovolandu a Sangiwa Vavangeliu?

Ovovangi atiamẽla kovikomo via Yesu, a tu situluiwa pocakati Cavangeliu akuãla. Anga hẽ kuli asunga oco tu kolele kovolandu aco poku konomuisa ocili catiamẽla kovikomo via lingiwa la Yesu? Ocili okuti kuli.

Ndomo ca lomboluiwa ale, ovikomo via Yesu via lingiwa pana pa kala omanu valua. Avangeliu a sonehiwa kotembo yimue okuti, valua pokati komanu va mola ovikomo viaco, va kala handi komuenyo. Catiamẽla koku kala vakuacili kua vana va soneha Avangeliu elivulu limue lia popia ndoco: “Oku lundila okuti vana va soneha Avangeliu ka va popele ovolandu osi atiamẽla kovikomo, nda ca kala ekambo liesunga . . Ovo va kuatele ocimãho coku soneha ulandu umue wocili.”

Va Yudea vana va enda oku lambalala alongiso Akristão, lalimue eteke va patãlele ovopange wunene a sangiwa Vavangeliu. Ovo va enda lika oku patãla unene ovopange aco a lingiwa lawo. (Marko 3:22-26) Vana vakuakupisa veya oku molẽha noke, ka va ponduilevo oku likala ovikomo Yesu a linga. Pole, vokuenda kuocita catete kuenda cavali K. K, kua kala ovolandu a lekisa ovikomo Yesu a linga. Ocili okuti, tu kuete asunga osi oku tava okuti Avangeliu atiamẽla kovikomo eye a linga, ocili.

Omunu wa Linga Ovikomo

Akonomuiso atiamẽla kovikomo Yesu a linga, nda ka a suilepo nda okuti a sulilile lika kolondaka viatiamẽla kocili covikomo viaco. Poku lombolola ovopange a Yesu, Avangeliu a situlula ulume umue wa kuatele ohenda yimue yi likasi okuti wa kapeleko ekalo liwa liomanu vakuavo.

Konomuisa ulandu wulume umue ukuavilundu wamela ku Yesu kuenda wo pinga loku livondela hati: “Nda wa panga, ñayise”. Kuenje Yesu “ohenda yo kuata kuenda wolõla eka liaye, wo lamba loku u sapuila hati: “Nda panga! Kaya.” Vonjanja yaco, haico ovilundu vio tunda kuenje wa kaya. (Marko 1:40-42) Yesu poku ci linga wa lekisa okuti, ohenda oyo yovetiya oku talavaya lunene Suku a ecelele kokuaye oco a linge ovikomo.

Nye ca lipita eci Yesu a ñualehela lomanu va kala oku tunda ko Naini oco va ka kende omunu umue? Umalẽhe wa file wa kala omõla wongunga wocimbumba cimue. Yesu wa “kuatela ohenda” ukãi waco kuenje wamela kokuaye loku u sapuila hati: “Ku ka lile vali.” Noke wa pindula omõlaye.​—Luka 7:11-15.

Ocina cimue ci lembeleka tu lilongisila kovikomo Yesu a linga, ceci okuti eye wa “kuata ohenda” kuenda wa linga cimue oco a kuatise omanu. Pole ovikomo viaco, ka via kaile ovolandu año. Ukanda ku Va Heveru 13:8 u popia hati: “Yesu Kristu ka pongolokele tunde hẽla, toke etali kuenda otembo ka yi pui.” Cilo eye o viala Ndosoma wokilu kuenda wa lipongiyila oco a talavaye lovonene woku linga ovikomo Suku a eca kokuaye lonjila yimue ya velapo okuti eci a kala palo posi ci sule. Yesu ndopo o ka talavaya lovonene aco oco a sakule omanu vakuepokolo. Olombangi Via Yehova vi ka sanjukila oku ku kuatisa oku kũlĩha ovina vikuavo viatiamẽla kekalo liaco likomõhĩsa liokovaso yoloneke.

[Oviluvialuvia kemẽla 4, 5]

Ovikomo via Yesu via kala ocindekaise “liunene wa Suku”

[Ociluvialuvia kemẽla 7]

Yesu wa kala ulume umue wa kuatele ohenda yalua