Ovikomo Via Yesu—Ocili ale Uhembi?

“Omanu va fetika oku u nenela [ku Yesu Kristu] valua va kuatiwa lolondele kuenje wa tundisa olondele viaco londaka yimosi, yu wa sakula vosi va kala oku vela.” (Mateo 8:16) “Eci [Yesu] a ci yeva, wa votoka yu wa lemẽla ofela kuenda wa sapuila okalunga hati: “Ũhako! Tulumũha!” Ofela ya pita kuenje kua kala etulumũho lialua.” (Marko 4:39) Nye o sima catiamẽla kovolandu a-a? O tava hẽ okuti ovolandu aco a kala ocili ale o sima okuti uhembi?

Omanu valua va kuete atatahãi nda ovolandu atiamẽla kovikomo via Yesu a kala ocili. Kotembo yilo okuti ovoloño a livokiya calua, omanu va likala oku tava kovikomo, ale kovopange a Suku.

Omanu vamue va sima okuti ovikomo viaco ka via kaile viocili. Ndeci, usonehi welivulu limue liatiamẽla koku limbuka helie wa kala “ocili” Yesu, wa popia okuti ovolandu atiamẽla kovikomo via Yesu via kala lika “ndasapulo” oco ku sandekiwe alongiso a Kristu.

Vakuavo va sima okuti ovikomo via Yesu vi tiamisiwila koku nyana. Olonjanja vimue vamue va lundila Yesu okuti ukuakunyana. Justino una wa pondiwa kocita cavali K.K, wa popia okuti valua va lundila Yesu “va pitĩla petosi lioku u tukula okuti, ukualumbu haiye ukuakuyapuisa omanu.” Vamue pokati kavo va popia okuti Yesu “ka lingile ovikomo viaye omo wa kala uprofeto u Yudea, pole wa ci linga omo wa kala ukualumbu okuti, wa ci lilongisa volonembele viesanda.”

Esunga Lieci Omanu Vamue ka va Tavela Kovikomo Viaco

Pamue ove o sima okuti atatahãi aco eyilila omo liesunga lieci omanu ka va tavela kovikomo. Vakuavo va sima okuti ka ca lelukile kuenda ka ci tẽliwa oku tava kocisimĩlo cokuti oviluvo viespiritu via kuatisa kovikomo viaco. Umalẽhe umue wa popele okuti ka tava okuti kuli Suku, wa popia hati “ovikomo viaco ka via lingiwile.” Noke wa tukula olondaka vionoño yimue o tukuiwa David Hume wokocita 18, una wa popia ndoco: “Ocikomo ci lomboloka okuti ovihandeleko viovina vi kasi voluali ka via kapiweleko.”

Omo liaco, omanu valua va sukila oku kuata utate osimbu ka va popele okuti ocina cimue ka ci tẽliwa. Elivulu limue li tukula ocikomo okuti, “ulandu umue ka u tava oku u lombolola lovihandeleko violuali via kũlĩhĩwa.” Ndeci ca lekisiwa kelomboluilo eli, komanu valua va kala komuenyo kocita ca pita, ovongende vioku enda kilu, uloño woku sapela votelefone kuenda o internet, nda ca kala “ndocikomo” cimue. Ocili okuti ka ca sungulukile oku popia okuti, oku linga ovikomo ka ci tẽliwa omo okuti ka tu pondola oku ci lombolola pocakati cukũlĩhĩso tu kuete koloneke vilo.

Nda tua konomuisa ovovangi Embimbiliya a kuete elitokeko lovikomo Yesu Kristu a linga, nye tu sanga? Ovikomo via Yesu ocili ale uhembi?