Esapulo 108
Vonjila Yoko Damasko
WA KŨLĨHA ulume u wa kupukila ndeti posi? Onduko yaye Saulu. Ivaluka okuti Saulu, umalẽhe una wa kala loku lava ovikutu vialume vana va ponda Stefano. Tala ocinyi eci! Nye ci kasi loku pita?
Noke yolofa via Stefano, Saulu wa kala loku lambalala kuenda oku kangisa olondonge via Yesu. Eye wa enda oku iñila volonjo oku va kuata oco va kapiwe vokayike. Olondonge vialua via tilila kolofeka vikuavo oku kunda “olondaka viwa.” Lopo Saulu wa enda kolofeka viaco oku sandiliya olondonge via Yesu. Eci a kala loku enda ko Damasko, kua pita ocina cimue ci komõhisa.
Vocipikipiki kilu kua tunda ociliakulo ca wila Saulu. Eye wa kupukila posi, ndomo ocilete palo. Kuenje wa yeva ondaka yimue ya popia hati: ‘A Saulu, A Saulu! Nye o ñangisila? Alume va kala kumue laye va mola ocinyi kuenda va yeva ondaka, pole ovo ka va kuatele elomboloko lieci ca kala loku vanguiwa.
Saulu wa pula hati: ‘A Ñala, ove elie?’
Wa yeva ondaka ya tambulula hati: ‘Ame Yesu, u o kasi loku kangisa.’ Yesu wa popia olondaka evi, momo eci Saulu a kangisa olondonge viaye, ca kala ndu okuti eye wa kala oku kangisiwa.
Saulu wo pula hati: ‘A Ñala, nye ndi kuete oku linga?’
Yesu wa popia laye hati: ‘Votoka kuende ko Damasko. Oko vaka ku sapuila eci okuete oku linga.’ Saulu eci a vatoka ka tẽlele oku mola lacimue, momo wa linga omeke. Alume va kala loku enda laye vo kuata peka kuenje vo songuila ko Damasko.
Yesu wa vangula londonge yimue hati: ‘Ananiya katuka. Kuende koluwa lua tukuiwa Luasuñama. Ka vanje umue o tukuiwa hati, Saulu u Yuda. Momo ndo nõla oco a linge ukuenje wange wa velapo.’
Ananiya wa pokola. Eci eye a sanga Saulu, wo kapa ovaka aye, kuenda wa popia laye hati: ‘Ñala wa ku tukulukila kuenje o yuka espiritu sandu.’ Vonjanja yaco vovaso a Saulu mua tunda ocina cimue ca soka ndolombande, yu wa patuluka.
Saulu wa kundila omanu valua va kualofeka. Eye weya oku kũlĩhĩwa ndupostolo Paulu una tuka lilongisa vali catiamẽla kokuaye. Catete, tu kũlĩhĩsi eci Suku a tuma Petulu oku linga.
Ovilinga 8:1-4; 9:1-20; 22:6-16; 26:8-20.