Omõla Wa Likuminyiwa

Yosefe la Maria va nõlapo oku kala ko Beteleme pole, ka va tiukila ko Nasara. Eci Yesu a tẽlisa oloneke ecelãlã, o seviwa evamba ndeci ca kisikile Ocihandeleko Suku a ecele ku va Isareli. (Ovisila 12:2, 3) Omanu va kuatelevo ocituwa cokuti, eci oñaña yi tẽlisa oloneke ecelãlã yi lukiwa onduko. Ndeci ungelo Gabriele a ci popele, Yosefe la Maria va luka omõlavo okuti, Yesu.

Pa pita ale ci pitahãla osãi yimosi kuenda Yesu o kuete eci ci soka 40 koloneke. Pi olonjali viaye viu ambata cilo? Va kasi oku wambata vonembele ko Yerusalãi okuti, ocinãla caco citito limbo va kasi. Ocihandeleko ci popia okuti, noke yoloneke 40 tunde koku citiwa kuoñaña, ina wa kisikiwile oku eca vonembele ocilumba coku liyelisa.—Ovisila 12:4-7.

Kuenje Maria o tẽlisa ocihandeleko caco. Eye wa lumba olonjila vivali vitito. Ovilumba viaco vi eca uvangi wokuti, Yosefe la Maria va kala olohukũi. Ocihandeleko ca lekisile okuti, ca sukilile oku lumba okameme kuenda onjila. Pole, nda ina ka kuete epondolo lioku lumba okameme, o sukila oku lumba olopomba vivali, ale olonende vivali. Eci oco ocitangi ca pita la Maria kuenda oco ocilumba a eca.

Osimbu Yosefe la Maria va kala vonembele, ulume umue wa kuka weya ocipepi lavo. Eye o tukuiwa hati, Simeone. Suku wo situluila okuti osimbu eye ka file, o ka mola Kristu ale Mesiya una wa likuminyiwa la Yehova. Keteke liaco, Simeone wa songuiwa lespiritu sandu vonembele kuenje wa sanga Yosefe la Maria kumue loñaña yavo vonembele. Kuenje Simeone wa angata oñaña yaco.

Osimbu Simeone a kala oku angata Yesu, eca olopandu ku Suku poku popia hati: “A Ñala Tõlo, wa ecelela okuti ukuenje wove enda lombembua ndomo wa popele, momo ovaso ange a mola onjila yove yoku popela, okuti wa yangiliyila kovaso omanu vosi, ocinyi cupa esitikilo kolofeka kuenda ulamba womanu vove va Isareli.”—Luka 2:29-32.

Yosefe la Maria va komõha, eci va yeva olondaka viaco. Kuenje Simeone o va sumũlũisa kuenda o sapuila Maria okuti, omõlove wa ‘nõliwa oku kupula loku votola vali valua va Isareli’ okuti Maria o ka yeva esumuo ndosipata yatua yo toma.—Luka 2:34.

Ukãi umue uprofeto o tukuiwa hati, Ana haeye o kuete 84 kanyamo, o kasivo vonembele keteke liaco. Eye lalimue eteke a liwekelepo oku endaenda konembele. Vepuluvi liaco, eye amela ku Yosefe la Maria kuenda koñaña okuti Yesu. Ana eca olopandu ku Suku kuenda o sapula eci catiamẽla ku Yesu komanu vosi va kasi oku u yevelela.

Sokolola esanju Yosefe la Maria va kuata omo liovina vi kasi oku pita vonembele! Ovolandu aco, a va kuatisa oku kolela okuti, omõla wavo wa Likuminyiwa muẽle la Suku.