Otembo Yiñami Tupondola Okukala Lomuenyo?
Ndomo cikasi okumoleha omanu vakasi okukala otembo yalua komuenyo, cikokisa valua okulipula ovo muẽle hati, ‘Otembo yiñami tupondola okukala komuenyo?’
NDOMO cilomboluiwa velivulu The New Encyclopædia Britannica (1995), otembo yapita, Pierre Joubert wasiatele okutaviwa okuti wakala lomuenyo otembo yalua. Eye wafa vunyamo wo 1814 eci akala lanyamo 113. Omanu vamue vakuavo vataviwa okuti, vakala lomuenyo otembo yalua, pole anyamo avo ka a sonehiwile kalivulu amue. Pole alivulu amue awa, aeca uvangi wokuti omanu valua vakala komuenyo anyamo alua vali okuti Pierre Joubert cisule.
Jeanne Louise Calment wacitiwa ko Aeles, konepa yo kombuelo ya França, veteke 21 vosãi ya Kayovo kunyamo wo 1875. Eye wafa eteke 4 vosãi Yenyenye kunyamo wo 1997−wakala otembo yipitahãla 122 kanyamo−wakemãlisiwile vali. Vunyamo wo 1986, Shigechiyo Izumi woko Japão wafa eci akala lo 120 kanyamo. Elivulu Guinnes Book of Records 1999 lisapula okuti Sarah Knauss wakala lanyamo 118 okuti eye omunu ukulupo vali voluali eci elivulu liaco liakala okusonehiwa. Eye wacitiwa eteke 24 vosãi Yenyenye Linene kunyamo wo 1880 ko Pennsylvania, U. S. A. Eci Marie–Lousie Febronie Meileur woko Quebec, Canada, wafa kunyamo wo 1998, wakala lanyamo 118 eye wapitahãlele Sarah oloneke 26 komuenyo.
Ocili muẽle etendelo liomanu vakuka likasi okulivokiya calua. Etendelo liomanu vakuete ocita kanyamo, lisimiwa okuti lilivokiya kuenje likapitahãla 2,2 kolohuluwa vocita canyamo ciyako! Cimuamue haico, etendelo liomanu vakuete 80 kanyamo kuenda ava vakuka lialivokiya okuti ko 1970, etendelo liakala lio 26,7 kolohuluwa viomanu pole ko 1998 etendelo lialivokiya toke 66 kolohuluwa viomanu. Eli olio evokiyo lisoka 147%, okucisokisa levokiyo lia 60% liatiamẽla komanu vosi voluali.
Puãi omanu okukala otembo yalua komuenyo kacikasi okuiya ño. Valua cilo vakasi okukuama ovina vimue okuti vana vakuete anyamo 20 kavasiatele okuvilinga. Vunyamo wo 1990, John Kelley wakala lanyamo 82 walupuka omaratona yacinãla cimue co−42.195 kolokilometulu−valivala atãlo lakukuktu atãlo. Vunyamo wo 1991, umue kamakulu Mavis Lindgren wakala lanyamo 84 walupuka ocinãla cimuamue valivala epanduvali lakukutu ecea. Kuenda oloneke vilo muẽle, umue ulume okuete anyamo 91 walupuka omaratona yolupale luo Nova Yorke olokilometulu 42!
Katukasi okupopia okuti okukala anyamo alua kosiahulu okuti kacasiatele okulinganga olomapalo viokulipamisa ketimba. Ukuepata Vembimbiliya Avirahama eci akala lanyamo 99, “wa lupukila okuñualehela” lakombe vaye. Kalembe Eci akala lanyamo 85, wapopia hati: “Ongusu nda kaile layo kotembo yaco [konyima eci akala lanyamo 45], haiyo ñasi layo etaili, nda kovita, nda poku tunda tunda lopoku iñaila.” Kuenda Embimbiliya lipopia okuti Mose eci akala lanyamo 120, “ovaso aye ka a vuvalele, ndaño ongusu yaye ka ya tepulukile.”−Efetikilo 18:2; Yehosua 14:10, 11; Esinumuilo 34:7.
Yesu Kristu weca uvangi wokuti ulume watete, Adama kuenda utungi wocimbaluku Noha kavali kavo, omanu okuti vakalako muẽle. (Mateo 19:4–6; 24:37–39) Elivulu Liefetikilo lisapula okuti Adama wakala komuenyo toke anyamo 930, kuenda Noha toke 950. (Efetikilo 5:5; 9:29) Kuakala muẽle omanu vakala otembo yalua ndeyi komuenyo? Etu tupondola hẽ okukala komuenyo otembo yaluapo vali, pamue muẽle otembo kayipui? Kulihisa ciwa eci catiamẽla kondaka eyi vocipama cikuaimo.