Ovisikilo vi Sanjuisa Suku

Ocisikilo casiata oku lomboluiwa okuti “cosiahulu kuenda haico cafina vali kovomesele osi.” Omo elimi ongavelo yimue okuti kayisokisiwa, yi tepisa omanu kovinyama. Ocisikilo ci lingisa ombili kolonjongole. Ci sanjuisa etui, ci talalisa kutima, kuenda kovina viosi, ocisikilo ci sanjuisa Suku.

Ndomo Embimbiliya li lekisa, va Isareli vakala omanu vamue okuti olonjimbi. Capopia o unger’s Bible Dictionary ceci hati: Ocisikilo cakala “upange umue u silivila kolotembo Viembimbiliya.” Omo okuti viakala onepa yomuenyo weteke leteke, ondaka locikuata covisikilo via lekisiwa vefendelo liavo. Puãi eci ca lingiwile vali enene ondaka yomanu.

Soma Daviti wa lekisiwa okuti wakala pokati ka va Lewi “oku songola ovisungo” vo tavernakulu, apa handi onembele ya tungiwa lomõlaye Salomone ka ya tumbikiwile. (1 Asapulo 6:31, 32) Eci ocikasia covisila cina cilekisa ekalo lia Yehova ca pitila ko Yerusalãi, Daviti wa nola vamue va Lewi “loku tumbanguya loku pandula loku sivaya Yehova.” Ovo vacilingila lolondaka viavo viesivayo, kuenje “va sika ovisumba lolohalupa, . . . olombeta.” Alume vaco vana va “nõliwa, va tukuiwa kolonduko, ha va imbi olopandu ku Yehova, momo ohenda yaye yenda ño hu.”−1 Asapulo 16:4–6, 41; 25:1

Olondaka viokuti “ohenda yaye [Yehova] yenda ño hu” vi mõleha olonjanja vialua Volosamo, omo olio elivulu lia tiamela vali enene kocisikilo. Ndeci, Osamo 136 yikuete ovinimbu 26, ocinimbu locinimbu onepa yavali ocisungo. Umue ukuasikola Yembimbiliya wa popia hati: “Oku teta kuavio onimbu vi leluka lonjanga komela womunu.” Ndaño umue wa ci yeva ño, haico muele a pondola oku civaluka.”

Ovisonehua viavelapo kosamo vi lekisa okulua kuovikuata viovisikilo. Osamo 150 yi lombolola olumbeta, ohalupa, opandelu, okalialia, kuenda olombendo. Ndaño oco, ca tete ca molehele vali enene ondaka yomanu. Ocinimbu 6 ci vetiya okuti: “Cosi ci fuima ci sivaye Yehova. Sivayi Yehova!”

Ndaño okuti ocisikilo cilekisa ovisimilo vietu, pole kolotembo Viembimbiliya viakokailevo ovisimilo viesumuo ale oku lisiõsiõla. Okuimba lonjila ndoyo,puãi, ka ca eceleliwile vocisikilo ca va Isareli. Capopia o enciclopedia Estudo Perspicaz das Escrituras ceci hati: “Velikekembelo limue ale voku lisiõsiõla omo lika nda catava oku nõla okuimba osamo locileñi cocisikilo, ale koku sokiya ondaka kuenda oku tumbika upopi ndondaka.”a

Yesu lovapostolo vaye vaendaenda lukuimba oku sivaya Yehova apa handi okuti uteke waye wokufa kua Yesu ka wa pitilile, okuti kakuli atatahãi, va cilingila volondaka Violosamo okuti Aleluya.(Olosamo 113–118) Eci oco ca pamisa olondonge via Yesu eci ovo va fisa Cime cavo! Handi vali, ovo va nõlapo oku panamãla kekolelo oku vumba Ñala Tõlo yoluali luosi, okuti Yehova, kumosi loku pitulula olonjanja vitãlo okuimba eci va tukola “ocisola caye ka ci pui cenda hu.”−Osamo 118:1–4, 29.

Akristão va tete ko Efeso kuenda ko Kolosai vaendavo lokuimba “olosamo lovisungo viefendelo ku Suku,” (NW). Kovina evi ovo va vokiyako ‘asivayo Espiritu’ pokuimba ovisungo vovitima viavo. (Va Efeso 5:19; Va Kolosai 3:16) Etu tu cikuetele ekolelo okuti ovimela viavo valinga laviovo olondaka viesivayo. Yesu ka lomboluile okuti “eci ca siata vutima oco omela u popia?”−Mateo 12:34.

OCISIKILO CISUMUISA SUKU

Ovisikilo haviosiko via tukuiwa Vembimbiliya vi sanjuisa Suku. Lilongisa handi eci ca pita komunda Sinai, kuna Mose a tambuilile Ocihandeleko, oku kongelamo Ovihandeleko Ekui. Eci Mose a loka komunda nye a yeva? Hati “handakako yava va kalukila oku yula; handakako yava va liyula omo va yuliwa. Ondaka njevite ondaka yava va imba ovisungo.” Ocisungo caco cina ca tiamelele kefendelo lioviteka, ocina cimue okuti ca nenele esumuo ku Suku kuenda ca sulako olofa vieci cisoka 3.000 viava vaco valinga ocisikilo.−Etundilo 32:18,25–28.

Ndaño okuti omanu vapanga, loku sika, kuenda va kuama olonjila viosi viocisikilo, eci hacosiko ci sanjuisa Suku. Momo lie sio? Ukristão upostolo Paulu wa lombolola hati: “Vosi va linga akandu, kuenje va lipumbisa ulamba wa Suku.” (Va Roma 3:23) Ovituwa va vakuakufendela oviteka, okuti elongiso liocilelembia ka ci fi, kuenda oku fendela Maria okuti “ina ya Suku” evi ndeti olonjanja vialua vikasi ndolosapi viovisikilo viakuãla. Handi ovina evi kuenda ovilinga viaco vi sumuisa Suku yocili, mekonda evi via limba onyima leci ci situlula Embimbiliya.−Esinumuilo 18:10–12; Esekiele 18:4; Luka 1:35, 38.

OKU NÕLA LULOÑO OVISIKILO

Oku nõla ocisikilo catila calua. Kilu liolokasia omu muendela alonga ovisikilo atayiwa oco akokise onjongole kuvakuakulanda ovisikilo viñi viñi viapangiwa. Nda okuti ufendeli wa Suku oyongola oku sanjuisa Eye, te o lunguka poku nõla lolondunge oco a yuvule ondaka locisikilo vina okuti vikuete unene wa vakuetavo liesanda ale vina vi vetiya ukahonga kuenda olondele.

Albert, una onjanja yimue wa kala o misionariu vo Afrika, wa popele hati ndakuatele epuluvi litito lioku sika o pianu oko. Eye puãi, wa yevalalaila ño kamue katito onjanja lonjanja noke wa viambata. Eci a tiukila kofeka yaye yucitiwo, Albert kaliye o nyula ekongelo Liakristão mekonda omitavaso yinyula akongelo. Otembo yaye yoku yevelela ocisikilo yitito. Eye wa popia hati: “Ocisikilo nda solaile ca Beethove. Pokati kalima, ame ndongekele ovisikilo viaye vi tukuiwa okuti sinfonia, concertos, sonatas kuenda olo kuarteto.” Kuenda viaco evi oku vi yevelela cowiha esanju lialua. Ocili muele, omunu lomunu okuete ocisikilo caye asole, puãi omo Tuakristão, te tukapa vutima wetu elungulo lia Paulu okuti: “Ndaño wu lia, ndaño wu nyua, cosi wu linga ci lingili ulamba wa Suku.”−1 Va Korindo 10:31.

OCISIKILO KUENDA OKU LITUMBIKAKO

Ocisola ca tete ca Suzie cakala ocisikilo. Eye wa lombolola hati: “Ame eci nda fetika oku sika o pianu ndakala lalima 6, o viyola 10, kuenje oku sulako o halupa 12.” Suzie noke wa iñila Kosikola Yelilongiso ko Londre, yo Inglaterra, oku lilongisa o halupa. Vokuenda kualima akuãla eye wa lilongisa la umue ukualuhimo lualua woko Espanya wa sikaile ciwa o halupa kuenda eci papita umue ulima Konjo Yvisikilo Paris, wa nganyala ekemanyo liavelapo kocisikilo kuendavo koku sika o halupa loku longisa o pianu.

Suzie kaliye wa likongela lekongelo Liolombangi via Yehova ko Londre. Oko wa sangeleko onjongole yiwa kuenda ocisola pokati Kolombangi. Kamue kamue, ocisola caye la Yehova ca kula kuenda ombili yaye kupange waye yovetya oku sanda olonjila vioku vumba. Eci cotuala kelitumbiko lepapatiso. Suzie wa lombolola hati: “Oku tenda ocisikilo ndupange onjila yimue yelitumbiko liomuenyo, omo liaco, omuenyo woku lieca olumue ocina cimue ka caikile kokuange.” Otembo yaye yatiamela kovisikilo ya tepuluka calua mekonda wa litumbika kupange woku kunda olondaka viwa Viusoma wa Suku poku pokola kolonumbi via Yesu.−Mateo 24:14; Marko 13:10.

Kaliye okuti okatembo kaye katito kokulinga ocisikilo, eye oliyevite ndati? Eye wa popia hati: “Olonjanja vimue ndi sumuapo kamue omo ame sikuete vali otembo yoku amamako oku sika, pole ame handi ndisika ovikuata viocisikilo viange kuenda handi njupako esanju. Ocisikilo cimue ca tunda ku Yehova. Eci ci ndi sanjuisa vali enene ceci okuti upange waye nda u pitisa vali kovaso yomuenyo wange.”−Mateo 6:33.

OCISIKIO CISANJUISA SUKU

Albert la Suzie va likongela ale osimbu yalua pokati ku vakuavo vasoka 6 liolohuluwa Violombangi via Yehova okuti olonjanja viosi va sivaya Yehova Suku lovisikilo. Kolohongele Viakristão kolofeka cisoka 234 Volonjango Viusoma, ovo va fetika kuenda vamãla olohongele viavo, muna okuti citava okuimbila ovisungo Yehova. Cikale valua ale vitito, ovisikilo via posoka haivio viatiamela Kovisonehua vimbiwila oku sivaya Yehova Suku.

Vosi va liongolola va votola olondaka viavo okuimba lolukandi okuti Yehova eye Suku upopeli (Ocisungo 44). Ovo vaimba ocisungo coku sivaya Yehova (Ocisungo 190). Ovisungo viavo vi limbukiwila kesanju kuenda ovikele Viumanji Wukristão, omuenyo Wukristão, kuenda ovituwa Viukristão. Ci vokiya kesanju liavo ovisikilo vitunda kolofeka vialua vieca uvangi, ndeci; vo Asia, vo Australia, vo Europa, kuenda ko Norte loko Sul yo Amerika mua tengiwa ovileñi vialua oco vikapiweko.b

“Imbili Yehova ocisungo cokaliye. Imbili Yehova, ene alofeka viosi. Imbili Yehova, panduli onduko yaye,” evi ovio olondaka vi fetika ocili ocisungo caye cohenda keteke liukualosamo. “Lombololi eyovo liaye eteke leteke. Sapuli ulamba waye kolofeka, lovikomo viaye pokati komanu vosi.” (Osamo 96:1–3) Eci oco Olombangi via Yehova vikasi lokulinga kocivanja cove, kuenda vakasi loku ku pañinya okuimba kumuamue lavo esivayo liaco eli. Ove oka tambuiwa ciwa Volonjango viavo Viusoma, muna oka lilongisila oku sivaya Yehova locisikilo cina okuti cu sanjuisa.

[Atosi]