Oku sandeka olondaka viwa viusoma kovapia oluoso ko Taiwan — OCISELEKO CALIVULU VO INTERNET Colombangi Via Yehova

Etu tu Vana Vakuete Ekolelo

Oku sandeka olondaka viwa viusoma kovapia oluoso ko Taiwan

KO TAIWAN olonjanja vimue kuloka ombela yalua, kuenje eci cecelela ofeka oyo oku ungula ciwa ulima lulima olonjanja vivali. Olonjanja vimue puãi, ombela ka yi loki ndomo va yongola, kuenje osongo yi kukuta. Oco yapa, olonalavayi yi liwekapo? Lakamue. Eye wa kuliha okuti cisukila epandi. Eye o kula vali osongo yikuavo kuenda o tuika vali ovapia. Noke, nda akalo a mioñoloha, ongunja yungula calua ciwa. Oku kula loku ungula kespiritu olonjanja vimue haico cimosi.

Oku Pandikisa Koku Ungula Kespiritu

Valima a pita, Olombangi via Yehova ko Taiwan via talavaya calua oco va kule kuenda oku ungula ombuto Yovisonehua viocili kolonepa vimue okuti ka ca mõlehẽle nda kuima ciwa. Ongangu yimue Koluvumba luo Miao–li. Oko eci vaecako uvangi lelikolisilo olonjanja vimue, ovo va tambulula citito. Omo liaco, ko 1973 kua tumiwa ulume lukãi waye akundi valikasi, okuti vakuopange wotembo yosi. Tete, vamue va lekisa onjongole kolondaka viwa. Noke, lonjanga haico onjongole yaco yapuamo. Kuenje, akundi valikasi va tumiwa kumue kuiñi.

Ko 1991 va tumileko vali akundi vavali valikasi. Pole esapulo lia lekisa okuti lopo muẽle ekalo ka lia kale ciwa konepa yespiritu. Eci papita alima amue ño, akundi valikasi va tumiwa kuna okuti citava okuecako ekuatiso lialua, okuti kuima calua. Kovaso yaco, ofeka ya siwapo handi votembo yimue.

Alikolisilo Okaliye Oku Ungula Ciwa

Kosãi Yenyenye Linene yo 1998 kua lingiwa alikolisilo oku sandiliya olonepa vikuavo viocikanjo ca sanjavala ko Taiwan okuti handi ka va kundililemo. Eci hẽ ca tẽlisiwa ndati? Ca tẽlisiwa poku tumako vamue 40 kakundi valikasi oco va talavaye kolonepa kuna okuti ka kua kundiwilile handi.

Alupale avali alisungue Koluvumba luo Miao–li a kala pokati kovikanjo via noliwilile onjevo. Vamanji vakuãla akãi kavakuele va tumiwako kuenje va kunda volosãi vikuãla voku seteka caco. Cina okuti ndopo va pitilako, ovo va soneha asapulo awa a tiamẽla ketendelo liomanu vakuete onjongole yalua. Vokuenda kuotembo, va mãla upange wavo volosãi vitatu konepa yaco, valinga alilongiso alua Embimbiliya. Va tumbikakovo cimue ocimunga celilongiso lielivulu lekuatiso lia umue ukulu wekongelo lia kala ocipepi.

Pokati kavo, vamanji akãi va tatu va yongola oku amamako oku tata “olombuto” vina via kala loku kula ndoto ciwa. Kuenje, vavali va ilikiwa oco vakale oko otembo yosi okuti akundi valikasi, kuenda wa tatu wamamako oku talavaya okuti ukundi wavelapo. Umue ukulu wekongelo ocipepi lonepa yaco wailukila kuaco oko oco aka va kuatiseko. Cipitahãla 60 komanu, va kala kohundo yatete yowiñi ya lingiwilako. Kaliye, ekongelo liaco likasi ndoto ocipepi, likasi loku kuatisa ocimunga caco, oco ci kuate olohongele olonjanja viosi Vovialumingu, loku vokiyako alilongiso alua elivulu. Soketi haico muẽle kua tumbikiwa limue ekongelo konepa yaco.

Oku pandikisa kuanena asumuluho kolonepa vikuavo vioko taiwan

Kolonepa vikuavo va tambululavo ndoco. Ko l–lan vupati wonano yocifuka co Island, kua tumbikiwa ocimunga Celilongiso Lielivulu Liekongelo, kuna okuti akundi valikasi oko vakala loku talavaya.

Osimbu akundi valikasi votembo yimue ño vakala loku talavaya onjo la onjo koñolosi, va mõla umalẽhe umue, kuenje vo lekisa ulala wesokiyo liolohongele viekongelo. Eye haico a pula hati: “Citava okuti ndendavo kohongele hẽla? Nda citava, ndi wala nye?” Ukundi u o likasi ndeti wa sanga eye muẽle alilongiso Embimbiliya ecelãla lonjongole yalua osemana losemana. Valua va lilongisa Embimbiliya va sima lonjanga oku kala akundi volondaka viwa viusoma, locimaho coku papatisiwa.

Omunu ukuavo kofeka oyo, wa siatele okuendaenda konembele valima alua, pole, ka sangele lomue u longisa Embimbiliya. Eci a yeva eliangiliyo lielilongiso Liembimbiliya, eye wa sanda epuluvi. Eye wa vetiyiwa oco angiliye onepa yaye muẽle kuenda oku tatekako la vikuavo. Eci o kundi o likasi otalavaya otembo yimue ño yitito a pitilako oco alinge elilongiso laye, wa limbuka okuti ukãi wa linga ale “upange wonjo,” wa landa okandelunu kuenje wa sonehamo ale apulilo elilongiso liaye. Noke, wa sonehavo atambululo atambululo apulilo osi. Eyevo wa soneha ale vokandelunu kaye ovinimbu Viembimbiliya visangiwa vulandu waye. Noke, manji ukãi eci a pitila oco va fetike elilongiso lia tete, ukãi wa angiliya ale olonepa vitatu viatete!

Cimosi haico ceya oku pita vimbo lio Dongshih vokati ko Taiwan. Akundi valikasi okuti va talavaya otembo yimue ño yitito, vaeca eci cipitahãla 2.000 kolombrochura volosãi vi tatu. Vosãi ya tatu, vaendisa ale cisoka 16 kalilongiso Embimbiliya. Ofeka ya nyõliwa locilemawe ca lundula ocakati ko Taiwan keteke 21 Yenyenye Linene yo 1999, pole vamue vamamako lonjongole kuenda okuamamako kespiritu, ndaño okuti okuenda konjango Yusoma cisukila oku linga ungende walua. Ocili, cisukila epandi lialua oco citave oku ungula ciwa, nda kovina viovikuata ale kovina viespiritu.

[Omapa kemẽla 8]

CHINA

Taiwan Strait

TAIWAN

[Olofoto via eciwa]