Uloño wa Suku Ulekisiwa ndati?

“Olondonge viosuke via sepuiwa kuenda olondaka viaye ka via taviwile.” Lolondaka evi, ukualondunge Soma Salomone wa mãlusula oku vangula esapulo liulume umue osuke, puãi, omunu waco ukualondunge wa yovola olupale luosi kenyõlẽho. Cikoka ohenda okuti, “lomue wa ivaluka osuke yaco.”−Ukundi 9:14–16.

Onjongole yomanu oku vanja leselula komanu vana va sulemo, ndaño olohukui viaco vi linga ovina viwa. Eci oco capita la Yesu. Isaya vocitumasuku ca tiamẽla kokuaye hati: “Wa pembuiwa, wa nyehuiwa lomanu; ukuahali, haeye ombeyi; wa pembuiwa ndu vo vundisila ovipala, kuenje ka tuo tendele.” (Isaya 53:3) Yesu wa pembuiwila ovina viaño mekonda ka kuatele ukuasi ndeci cakala asongui vavelelepo koloneke viaye. Handi, eye wa lekisile olondunge vina okuti via velelepo calua okuti viomanu vakuakandu visule. Omanu kofeka ya Yesu ka va tavele okuti “omõla a karpinteiro” wa lekisa uloño waco kuenda wa linga ovopange a velapo. Caco oco cakala oku lueya kunene, poku popia hati Yesu “omo ka vo kolelele oco ka lingilileko ovikomo vialua.” Omanu vana va pumba calua!−Mateo 13:54–58.

Ka tu ka lueyivo ndoco. Yesu hati, “ndunge o tendiwa ndukuesunga mekonda liovilinga viaye.” Ava vakasi loku linga upange wa Suku, loku kuata onepa koku sapula olondunge viokilu, valitepa calua, hamekondako liukuasi ale ekalo lia velapo, pole,poku lekisa “apako awa,” okuti koku kolela kuavo Embimbiliya kuenda ovilinga viavo viwa.−Mateo 7:18–20; 11:19.