Yehova Eca Ongusu Komunu wa Kava

‘[Yehova] o kolisa u wa kava, o vokiya olohõlo ku ka vi kuete.’−ISAYA: 40:29.

1. Lombolola ongusu yi kasi vovina via pangiwa la Suku.

YEHOVA o kuete unene umue ka u sokisiwa. Hangusukuoyo yapama yi sangiwa vovina eye a lulika! O atomu okuti okatosi kamue katito tito, onepa yimue yitito ca lua yi tunga ovina viosi, okuti vetosi limosi liovava mu sangiwa olohuluwa violohuluwa vio lo atomu viaco.a Ovina viosi vi kuete omuenyo vi kasi voluali luetu, ekalo liavio liatiamẽla kowuya u tunda kolosongo viekumbi. Oco hẽ, ongusu yiñami yi tunda kolosongo viekumbi yi sukiliwa oco yi kuatise ovina viosi vi kuete omuenyo vi kasi palo posi? Umue onoño o tukuiwa okuti James S. Pickering, wa popia hati: “Ilu lieve li tambula lika onepa yimue yitito tito kongusu yolohuluwa yi tunda kolosongo viekumbi.” Ilu lieve li tambula lika okanepa kamue ka tito ca lua kongusu yi tunda kolosongo viekumbi. Pole, okanepa kaco ka tito ca lua kongusu yi tunda kolosongo viekumbi ka siata oku pitila toke palo posi, ka pitahãla ongusu yosi ya siata oku talavayisa olomakina via mulo voluali.

2. Loku teta onimbu, nye elivulu lia Isaya 40:26 li popia kueci catiamẽla kunene wa Yehova?

² Cikale okuti tusima eci catiamẽla ketosi limue, ale ceci ci kasi voluali luosi, tu komõha ca lua unene wa Yehova. Ka ci komohisa, eci eye a popia hati: “Petuili ovaso kilu, vanji; helie wa vi lulika? U o vi tundisa lumosi lumosi vohoka yavio poku vi tukula olonduko,−eye wa vi lulika. Kuenje, omo unene waye wa piãla longusu yaye ya lua cimue; oco lalumue lu kambapo.” (Isaya 40:26) Ocili okuti, Yehova okuete ‘unene wa piãla,’ kuenda eye, eye Ono ‘yongusu ya lua cimue’ okuti, oyo a lulika layo ovina viosi vi kasi voluali.

Unene Umue Wavelapo Okuti Wa Pita Pokati Usule

3, 4. (a) Ovina vipi okuti pamue vi tu kavisa? (b) Epulilo lipi li sukila oku konomuisiwa ciwa?

³ Osimbu okuti unene wa Suku ka u sulila, omanu puãi va kava. Kolonepa viosi tuenda, tu sanga omanu va kava. Ovo va pasuka lekavo, vaenda kupange ale kosikola lekavo, va tiuka konjo lekavo, kuenje kuteke poku ka pekelako vaenda tupu pula, ve yuka to epuila. Omanu vamue va siata oku sima oku tila, oku siapo ovitangi viosi, oco va tale ño nda va tẽla oku puyukapo kamue. Etu tumanu va Yehova, tua siata oku kavavo, momo oku litumbika kuetu kupange wa Suku, ku sukila oku likolisilako ca lua. (Marko 6:30, 31; Luka 13:24; 1 Timoteo 4:8) Pole, kuli handi ovina via lua vikuavo okuti, vi tepulula ongusu yetu.

⁴ Ndaño okuti Tuakristão, handi lopo tua siata oku liyakavo lovitangi vi kasi loku pita lomanu vosi. (Yovi 14:1) Ovovei, ekambo liolombongo, ale ovitangi vikuavo via siata komuenyo, citava okuti pamue vi tu sumuisa kuenje tu hongua. Handi kuli vali ayonjo akuavo, ana a siata ca lua ku vana va lambalaliwa omo liesunga. (2 Timoteo 3:12; 1 Petulu 3:14) Omo liovilondokua violuali lulo, kuenda oku suvukiwa kupange wetu woku kunda Usoma, vamue pokati ketu ci tava okuti tu yeva ekavo lia lua okuti, tu sima oku liwekapo kupange wa Yehova. Handi vali, Satana o kasi loku sandiliya olonjila viñi viñi oco a tu konyõle kekolelo lietu ku Suku. Tu pondola hẽ ndati oku kuata ongusu yi sukiliwa kespiritu oco ka tu ka kave, kuenda oco ka tu ka liwekepo?

5. Momo lie ci sukilila ongusu ya velapo vali ca lua okuti yomanu yi sule, koku linga upange Wakristão?

⁵ Oco tu kuate ongusu kespiritu, tu kuete oku kolela Yehova, momo eye Ululiki ukuonene wosi. Upostolo Paulu wa popia hati, upange Wukristão u sukila unene wa piãla vali okuti womanu ka va lipuile u sule. Eye wa soneha ndoco: “Ukuasi ulo puãi, tu kasi lawo volombia viotuma, oku lekisa okuti unene wa piãla wa Suku, hawetuko.” (2 Va Korindo 4:7) Akristão olombuavekua, va kasi oku linga “upange woku linalisa,” lekuatiso liakamba vavo va kuete elavoko lioku kala palo posi. (2 Va Korindo 5:18; Yoano 10:16; Esituluilo 7:9) Omo okuti, etu tumanu ka tualipuile, kuenda tu kasi oku linga upange wa Suku loku lambalaliwa, ka ci tẽliwa okuti upange waco tu u linga longusu yetu muẽle. Yehova o tu kuatisa lespiritu sandu liaye, kuenje, ahonguo etu a kemãlisa unene waye. Helembelekokuolio tu yevite omo tua kolela okuti “Yehova puãi o tundila vakuesunga olunda”!−Osamo 37:17.

‘Yehova Eye Ongusu Yetu Yavelapo’

6. Ovisonehua vi tu likuminya ndati okuti Yehova eye Ono yi tu iha ongusu?

⁶ Isietu wokilu, “unene waye wa piãla,” kuenda o pondola lulelu walua oku tu iha ongusu. Omo liaco, etu tu tẽla oku popia ndoco: “[Yehova] o kolisa ava va lenda, o vokiya olohõlo ku ka vi kuete. Ndaño akuenje va lenda loku kava, kuenda amalẽhe va fa ipepe; puãi ava va imba Yehova ovaso va sakumuha; va palãla lavava ndolongonga, va lupuka kuenje ka va kavi, va enda kuenje ka va vela epuila.” (Isaya 40:29–31) Omo liovitangi vi kasi loku li vokiya ca lua, citava okuti pamue tu kala ndomunu ukuakuyoloka wa kava, okuti, ovipindi viaye vi mõleha soketi ka vi kuete vali ongusu yoku yoloka. Pole, omo okuti ndopo muẽle tu pitila kesulilo, poku yolokela kuetu komuenyo, tuamamiko muẽle, kuenda ka tu ka liwekipo. (2 Asapulo 29:11) Unyãli wetu Eliapu o kasi “ndohosi yi koma,” o yongola okuti tu liwekapo. (1 Petulu 5:8) Tu ivaluki okuti, ‘Yehova eye ongusu yetu, haeye o tevele yetu,’ kuenda eye wa siata oku angiliya ovikulia via lua oco a ‘kolise omunu wa kava.’−Osamo 28:7.

7, 8. Uvangi upi u kasiko, u lekisa okuti Yehova wa kolisile Daviti, la Havakuki kuenda Paulu?

⁷ Yehova wa eca ku Daviti ongusu a sukilile oco amameko, eci a sangiwa lovitangi. Omo liaco, lekolelo lia piãla, Daviti wa soneha ndoco: “Eci Suku a kasi letu tu yaka lutõi. Eye o kosa ovanyali vetu.” (Osamo 60:12) Yehova wa ecavo ongusu ku Havakuki oco a tẽlise ocikele caye cuprofeto. Kelivulu lia Havakuki 3:19, kua sonehiwa ndoco: “Yehova Suku eye ongusu yange, haeye endisa olomãi viange ndevi viohoka.” Umue ukuavo, okuti ukuangangu yiwavo, Paulu, okuti wa soneha ndoco: “Ñela ovina viosi vu Kristu [omo lia Suku] u o ñolaisa.”−Va Filipoi 4:13.

⁸ Ndeci ca kala Daviti, la Havakuki, kuenda Paulu, etu tu sukilavo oku kolela kuloño wa Suku woku tuiha ongusu kuenda woku tu yovola. Loku limbuka okuti Ñala Yehova eye Ono ‘yongusu yetu,’ kaliye tu kulihisi vimue vi lekisa ndomo tu tẽla oku kuata ongusu kespiritu yi tundilila kovina via lua Suku a siata oku tu angiliyila.

Aliangiliyo Okespiritu A Tu Kolisa

9. Esilivilo lipi alivulu Akristão akuete kueci catiamẽla koku tu tekula kespiritu?

⁹ Elilongiso limue liondongosi Liovisonehua li lingiwa lekuatiso lialivulu a lombolola eci ci kasi Vembimbiliya, ci tava okuti li tu kolisa kuenda li tu kuatisa. Ukualosamo waimba hati: “Wa sumuluha omunu . . . [una okuti] ovihandeleko via Yehova ovio a sanjukila. O sokolola ovihandeleko viaye utanya luteke. Wa linga nduti wa kuliwa kolondui viovava, haiwo wimaima epako liawo kuvo waco. Lemela liawo ka li uvuka. Cosi [a] linga o sumuluha laco.” (Osamo 1:1–3) Ndeci tu sukila okulia oco etimba lietu likuate ongusu, haico tu sukilavo oku tambula oku lia kuespiritu kuangiliyiwa la Suku Vondaka yaye, kuenda valivulu Akristão oco tuamameko loku pama kespiritu. Omo liaco, oku linga elilongiso limue liwa kuenda oku sokolola eci tua lilongisa cikuete esilivilo lia lua.

10. Otembo yipi hẽ ci tava okuti tu sanga epuluvi lioku lilongisa, kuenda lioku sokolola eci tua lilongisa?

¹⁰ Ocili okuti oku sokolola ovina “via longa via Suku,” ci nena olonima viwa calua. (1 Va Korindo 2:10) Pole, otembo yipi hẽ tu sanga epuluvi lioku sokolola eci tua lilongisa? Isake omõla wa Avirahama, ‘koñolosi yimue wa endele kusenge oku ka likutilila.’ (Efetikilo 24:63–67) Ukualosamo Daviti, wa enda loku ‘sokolola Suku poku lendela kuteke.’ (Osamo 63:6) Ci tava okuti, tu lilongisa Ondaka ya Suku, loku sokolola eci tua tangamo, kowola yomẽle, kekumbi, koñolosi, ale kowola yimue yikuavo tu tẽla oku ci linga. Elilongiso liaco loku sokolola eci tua lilongisa, li tu tuala keliangiliyo limue likuavo Yehova a linga oco li tu pamise kespiritu, okuti ohutililo.

11. Momo lie tu kuetele oku velisapo olohutililo okuti tu vi linga muẽle olonjanja viosi?

¹¹ Oku likutilila olonjanja viosi ku Suku, ku tu kavuluisa ca lua. Omo liaco, tu kuati ‘ocituwa coku likutilila.’ (Va Roma 12:12) Olonjanja vimue, tu sukila oku popoluila kueci tu yongola oku pinga ndeci, uloño kuenda ongusu tu sukila oco yi tu kuatise eci tu sangiwa lovitangi. (Tiago 1:5–8) Tuecivo olopandu viesivayo ku Suku eci tu tala ovina eye a linga locipango caye, ale ceci tu limbuka ekuatiso tua siata oku tambula kokuaye oco tu linge upange waye. (Va Filipoi 4:6,7) Nda tua kuata elitokeko liocili la Yehova kumue loku linga olohutililo, eye lalimue eteke aka tu ivala. Daviti wa imba hati: “Suku eye oñuatisi yange.”−Osamo 54:4.

12. Momo lie tu sukilila oku pinga ku Suku espiritu sandu liaye?

¹² Isietu wokilu, o tu kavuluisa, kuenda o tu iha ongusu lekuatiso liespiritu sandu liaye, ale ongusu yaye yapama. Upostolo Paulu wa soneha ndoco: “Oco ñekama si likutilila ku Isia, . . . ndi likutilila okuti, ndeci nda soka lukuasi wulamba waye, haico Suku Isietu o kolisi longusu ye espiritu liaye.” (Va Efeso 3:14–16) Tu sukila oku likutilila oku pinga espiritu sandu, lekolelo liokuti Yehova oka tu iha esumuluho lioku li tambula. Yesu wa popia hati: “Nda okuti omõla o pinga olusi, isiaye ukuacisola citava hẽ okuti u wiha onyõha? Sio, hacoko. Omo liaco, eye wa malusula loku popia hati: “Nda ene wa tuwi ale oku linga civi wa kulihi oku eca oviali viwa komãla vene, Isiene ukuailu hẽ, ka velipo oku avela espiritu Sandu kuava vo pinga?” (Luka 11:11–13) Tuamamiko loku likutilila lekolelo liaco, kuenda olonjanja viosi tu ivaluki okuti, omanu va Suku vakuekolelo, ci tava okuti va ‘kolisiwa’ longusu yespiritu liaye.

Ekongelo Ekuatisovo Limue Liocili

13. Ndamupi tu sukila oku tenda olohongele vietu Tuakristão?

¹³ Yehova o tu kavuluisilavo volohongele Viakristão vi lingiwa vekongelo. Yesu wa popia hati: “Apa pali vavali pamue vatatu va liongoluila vonduko yange haipo ñasi pokati kavo.” (Mateo 18:20) Eci Yesu a linga ohuminyo yaco eyi, eye wa kala loku popia eci catiamẽla kovitangi vimue okuti vana va tambula omoko yoku songuila ekongelo, va sukilile oku vi kulihisa ciwa. (Mateo 18:15–19) Pole, olondaka viaye vi kapiwavo kolohongele vietu viosi, ndeci, olohongele vimbo levi vilikasi, kuenda olohongele viofeka okuti, vi fetikiwa kuenda vi malusuiwa lohutililo yilingiwa vonduko ya Yesu. (Yoano 14:14) Omo liaco, esumuluho liocili oku endaenda kolohongele viaco, cikale okuti ku kala omanu vamue ño, ale olohulukãi. Omo liaco, tueci olopandu omo lieliangiliyo liaco lialingiwila oku tu pamisa kespiritu, kuenda oku tu vetiya oku kala locisola kumue lovilinga viwa.−Va Heveru 10:24, 25.

14. Ekuatiso lipi tu pondola oku tambula kelikolisilo Liakristão vana okuti akulu vekongelo?

¹⁴ Akristão vana okuti akulu vekongelo, va eca ekuatiso kespiritu kuenda evetiyo. (1 Petulu 5:2, 3) Ndeci upostolo Paulu a kuatisa kuenda a vetiya akongelo oku eye a talavaya, koloneke vilo, cimuamue haico ci kasi oku linga olomitavaso vinyula akongelo vovaimbo. Ocili okuti, eye wa yongowaile ca lua oku kala kumue la vamanjaye, oco okuti va tẽla oku li vetiya kuenda oku likolisa pokati. (Ovilinga 14:19–22; Va Roma 1:11, 12) Olonjanja viosi tu sumbili ca lua akulu va kasi vekongelo lietu, kuenda Akristão vana okuti olomitavaso vinyula akongelo vovaimbo, okuti va kuete onepa ya lua kupange woku tu pamisa kespiritu.

15. Vakuetu tu fendelela kumue vekongelo lietu, va pondola ndati oku eca ‘ekoliso liocili’?

¹⁵ Vakuetu tu fendelela kumue vekongelo lietu va pondola oku eca ‘ekoliso liocili’ (Va Kolosai 4:10, 11) Omo okuti ‘akamba vocili,’ eci tu sangiwa lovitangi, va tu kuatisa. (Olosapo 17:17) Ndeci kunyamo wo 1945, eci etendelo limue lisoka ovita vivali lakui avali komanu va Suku, va tunda kocila coku kangisila colo Nazista ci tukuiwa okuti, Sachsenhausen, va linga ungende umue wa soka ovita vivali kolokilometulu. Ovo va enda ovimunga, kuenje, vana okuti va pamelepo vali, va kapa votukangulu vakuavo vana va honguelepo vali, kuenje, omo va vambatela. Lesulilo lipi? Vungende wa tukuiwile okuti ungende wo lofa, okuti mueya oku fila eci ci pitahãla olohulukãi ekui, viava va kala kukonde kocila caco oko coku kangisila omanu, ka muafile la yimue Ombangi ya Yehova. Ovolandu a tukuiwa ndeti, a sangiwa valivulu a sandekiwa Locisoko Cutala Wondavululi, oku kongelamo o Anuário das Testemunhas de Jeová, kuenda elivulu Testemunhas de Jeová−Proclamadores do Reino de Deus. Ovolandu aco, a lekisa okuti Suku eca ongusu komanu vaye, oco ka va ka konyohe.−Va Galatia 6:9.b

Oku Pamisiwa Lupange Wetu Woku Kunda

16. Oku kuata onepa olonjanja vialua kupange woku kunda ci tu pamisa ndati kespiritu?

¹⁶ Oku kuata onepa olonjanja vialua kupange woku kunda Usoma, ci tu pamisa ca lua kespiritu. Upange wa u tu kuatisa oku luluvalela Kusoma wa Suku, kumue loku amamako oku lavoka asumuluho a laika oku iyililako. (Yuda 20, 21) Olohuminyo vi sangiwa Vovisonehua etu tua siata oku sapula kupange wetu woku kunda, vi tu iha elavoko kuenda vi tu iha utõi woku amamako, ndeci uprofeto Mika, wa linga hati: “Etu . . . tu endela ño–o hu, oloneke ka vi pui, vonduko ya Yehova Suku yetu.”−Mika 4:5.

17. Olonumbi vipi vieciwa kueci catiamẽla ko ku endisa alilongiso Embimbiliya?

¹⁷ Elitokeko lietu la Yehova li pamisiwa vali ca lua, poku tanga tanga Embimbiliya olonjanja vialua osimbu tuamamako oku longisa vakuetu eci ci kasimo. Ndeci, poku endisa alilongiso Embimbiliya lekuatiso lelivulu Ukulihiso Utuala Komuenyo Ko Pui, ciwa oku tanga kuenda oku lombolola ovisonehua Viembimbiliya via tukuiwa pocinimbu. Onjila eyi, yi kuatisa omunu tu kasi oku longisa, kuenda yecelelavo okuti, tu kuata elomboloko liwa liovisonehua. Nda okuti, omunu tu kasi oku longisa, co tatama oku kuata elomboloko liocisimilo cimue ale alusapo lumue Luembimbiliya, ca velapo okuti vonjanja yimosi u longisa lika ovinimbu vimue viocipama celivulu Ukulihiso. Hesanjukuolio tu kuata nda tua lipongiya ciwa, okuti tu likolisilako ca lua koku kuatisa vakuetu oco va kuate elitokeko liocili la Suku!

18. Lombolola ndomo citava oku kuama elivulu Ukulihiso letundilo liwa?

¹⁸ Unyamo lunyamo, elivulu Ukulihiso, li kasi oku kuamiwa oco ku kuatisiwe ovita viomanu, kuenje, noke va linga omanu va Yehova va litumbika. Kuenda, pokati komanu vaco va litumbika, pali va lua okuti kava la kuata ukulihiso la umue Wembimbiliya tunde vutila wavo. Ndeci, ulandu umue u lekisa okuti, umue u Hindu, wo kofeka yo Sri Lanka, eci a kala umalẽhe wa yevele manji umue ukãi okuti Ombangi ya Yehova wa kala loku vangula eci catiamẽla Kofeka Yelau. Noke yanyamo amue, ulume waco wa endele kumanji yaco ukãi, kuenje, ulume wa manji, wa fetika oku lilongisa laye Embimbiliya. Ulume waco wa enda oku linga elilongiso eteke leteke, kuenda ka papitile otembo ya lua, haico a mãla oku lilongisa elivulu Ukulihiso. Eye wa fetika oku endaenda kolohongele viekongelo olonjanja viosi. Kuenje, ketavo oku eye atiamẽlele wa tundako, kuenda wa linga ukundi Wusoma. Eci a papatisiwa, wa kala ale loku lilongisa Embimbiliya konjo, lomunu umue a kulihile.

19. Ekolelo lipi tu sukila oku kuata osimbu tuamamako loku sandiliya tete Usoma?

¹⁹ Oku pitisa kovaso Usoma, ci nena esanju li tu pamisa. (Mateo 6:33) Ndaño okuti tu li yaka lovitangi viñi viñi, tuamamiko lesanju, kumue lonjongole yocili yoku sandeka olondaka viwa viusoma. (Tito 2:14) Va lua pokati ketu okuti va litumbika kupange wakundi votembo yosi, vamue va kasi oku talavaya kovitumãlo kuna okuti kuli ekambo lia lua liakundi. Ci kale okuti tua litumbika kupange owu woku kunda Usoma lesanju lia piãla, ale tu kasi loku u linga poku kuama onjila yimue yikuavo, tua kolela okuti Yehova kaka ivalako upange wetu, kuenda ocisola tua lekisa vonduko yaye.−Va Heveru 6:10–12.

Oku Amamako Longusu Yituiha Yehova

20. Tu pondola ndati oku lekisa okuti tua kolela ku Yehova oco a tu kolise?

²⁰ Lutima wosi, tu lekisi okuti tu kevelela ku Yehova oco a tu kolise. Tu pondola oku ci linga, poku upa esilivilo kaliangiliyo osi espiritu Yehova a kasi loku eca, lekuatiso ‘liukuenje wa lunguka.’ (Mateo 24:45) Elilongiso Liondaka ya Suku pokolika, lo vekongelo, kumue lekuatiso lialivulu etu Tuakristão a lombolola eci ci kasi Vembimbiliya, olohutililo viokutima, ekuatiso kespiritu lieciwa lakulu vekongelo, ongangu yiwa yi lekisiwa la vakuetu vekongelo, kumue loku endaenda kupange woku kunda olonjanja viosi, aliangiliyo aco a tukuiwa ndeti, a tu kuatisa oco tu kuate elitokeko liocili la Yehova, okuti tuamamako kupange waye u kola.

21. Upostolo Petulu la Paulu va lekisa ndati esukilo lioku kolela kongusu yeciwa la Suku?

²¹ Ndaño okuti etu tumanu tua hongua, Yehova oka tu kolisa oco tu linge ocipango caye, nda tua kolela muẽle kekuatiso liaye. Loku limbuka esukilo liekuatiso liaco, upostolo Petulu wa soneha ndoco: “Wosi o popia, a popie ndu o sapula olondaka viovitumasuku. Wosi o vumba a vumbe ndu o talavaya longusu yo wiha Suku.” (1 Petulu 4:11) Kuenda upostolo Paulu wa lekisa ekolelo kongusu yeciwa la Suku, eci a popia hati: “[Ndi] sanjukila oku pekengua, lafuki, lovosuke, lakangiso, lasakalalo, momo, eci nda pekengua, oco ñuete ongusu.” (2 Va Korindo 12:10) Tu lekisivo ocituwa cimuamue, kuenda tu eci esivayo ku Ñala Yehova, okuti eye eca ongusu komunu wosi wa kava.−Isaya 12:2.

[Atosi]

O Tambulula hẽ Ndati?

• Momo lie omanu va Yehova va sukilila ongusu ya velapo vali ca lua okuti yomanu yi sule?

• Uvangi upi Wembimbiliya u kasiko u lekisa okuti Suku eca ongusu komanu vaye?

• Vapi hẽ aliangiliyo amue espiritu Yehova a siata oku tu lingila oco tu pamisiwe?

• Tu pondola ndati oku lekisa okuti tua kolela ku Suku oco a tu ihe ongusu?

[Elitalatu kemela 22]

Elitokeko lietu la Yehova, li pamisiwa poku tanga Embimbiliya eci tu longisa vakuetu