Otembo Yoku Situlula Ondaka Yimue yo Pokolika

Oku limbika ondaka yimue okuti handi ka ci tava okuti omanu va yi kũlĩha, ci pondola oku kuatisa omunu oku yuvula ovitangi kuenda ci nena ombembua. Oco hẽ kuli otembo yoku situlula ondaka yimue yo pokolika? Kũlĩhĩsa eci uprofeto Amosi a popia catiamẽla ku Suku yaye hati: “Yehova ka lingi cimue te tete o situlula ocisimĩlo caye kovakuenje vaye ovaprofeto.” (Amosi 3:⁠7) Kolondaka evi tu lilongisilako calua kueci catiamẽla koku limbika ondaka yimue yo pokolika. Yehova wa siata oku limbika ovolandu amue toke otembo yimue ya sokiyiwa kuenje vokuenda kuotembo ovolandu aco o a situluila komanu vamue eye a nõla. Ndamupi tu pondola oku setukula Yehova kueci catiamẽla kondaka eyi?

Olonjanja vialua, Akristão vana okuti akulu vekongelo va siata oku sanga esilivilo lioku seleka ondaka yimue yo pokolika. (Ovilinga 20:28) Oco va kuatise ekongelo, pamue va nõlapo oku seleka olondaka vimue viatiamẽla kaliangiliyo ale kapongoloko ovikele viekongelo toke otembo yimue ya sokiyiwa.

Kueci catiamẽla kondaka eyi ci kuete esilivilo lialua oku lomboluila ciwa omanu va panga onepa vondaka yaco yo pokolika oco va kũlĩhe otembo kuenda ndomo ondaka yika situluiwa. Oku kũlĩha otembo yoku situluila komanu ondaka yimue, ci pondola oku kuatisa ava va kũlĩha ocitangi caco oco ka vaka ci situlule handi.​—⁠Olosapo 25:⁠9.