“Ove Ukãi Umue Wocili”

Olondaka evi viepandiyo, via loñisiwile kufeko umue wo kofeka yo Moavi. Eye wa kala ocimbumba o tukuiwa hati Ruti, haeye ndatembo ya Naomi woko Isareli. Tunde eci a kala ko Isareli toke cilo, papita ale eci ci soka 3.000 kanyamo, kotembo yolonganji okuti oco Ruti a tambula epandiyo liaco. (Ruti 3:11) Ndamupi Ruti eya oku kuata oluhimo luaco luwa? Helie o pondola oku kuatisiwa poku kuama ongangu yaye yiwa?

Ruti ka kaile omunu umue ‘ukuakulia ombolo yowesi,’ pole wa enda loku talavaya calua poku pupulula epungu vepia. Kuenje, omo liombili yaye kupange, weya oku tambula epandiyo. Ndaño eye wa enda loku tẽlisa ocikele caye co kepia, pole wa endaendavo loku linga upange wosi wo vonjo. Uvangi u lekisa okuti, eye wa kongeliwa vesapulo Liembimbiliya okuti ukãi umue o sivayiwa, ukuepondolo, haeye wa siata oku tẽlisa upange waye wosi.​—⁠Olosapo 31:​10-31; Ruti 2:​7, 15-17.

Ruti wa kala ukãi umue ukuavituwa viwa kespiritu. Wa liketisile, haeye wa enda loku likolisilako oku lekisa ovituwa viwa, kuenda esunguluko. Omo liaco, ovituwa viaco evi viwa ovio via vetiya omanu oku u pandiya, kuenje eye wa ci sanjukilile calua. Poku siapo olonjali viaye lofeka a citiwila, lelavoko litito lioku sanga olohuela viu sanjuisa, eye wa nõlapo oku kuama Naomi. Vokuenda kuotembo, Ruti wa lekisa onjongole yoku vumba Yehova okuti eye Suku ya ndatembo yaye. Poku tukula esilivilo lia Ruti, ulandu Wovisonehua u lombolola okuti, eye wa ‘kuata esilivilo lia velapo ku Naomi okuti omãla epanduvali valume va sule.’​—⁠Ruti 1:​16, 17; 2:​11, 12; 4:⁠15.

Ruti wa pandiyiwa omo liovituwa viaye viwa pokati komanu, kuenje omo liovituwa viaco viwa, wa pandiyiwa vali calua la Suku. Kuenje, weya oku tambula esumũlũho lioku kala kukululu yolonjali vieya oku cita Yesu Kristu. (Mateo 1:5; 1 Petulu 3:⁠4) Hangangukuoyo yiwa Ruti a lekisa kakãi Akristão kuenda komanu vosi va fendela Yehova!