Kuli Esilivilo Liocili Oku Kala Ciwa Lava tu Lisungue Lavo — OCISELEKO CALIVULU VO INTERNET Colombangi Via Yehova

Kuli Esilivilo Liocili Oku Kala Ciwa Lava tu Lisungue Lavo

“Ukuẽle o kasi ocipepi wa velapo, manjove o kasi kupãla o sule.”—⁠Olosapo 27:⁠10.

YIMUE onoño kocita catete K. K. ya pula Yesu hati: “U o lisungue lame helie?” Noke, Yesu wa tambulula okuti eci ca velapo hakukuatako lika omunu o lisungue laye, pole ceci ci lomboloka oku kala lomunu o lisungue laye. Ci tava okuti ove wa kũlĩha ciwa ocindekaise ca Yesu catiamẽla kondaka eyi. Omanu valua va kũlĩha ocindekaise ca sonehiwa velivulu lia Luka ci lombolola oku kala lomunu tu lisungue laye ndeci ca linga u Samária. Kuenje, Yesu wa ci lombolola ndoco:

“Omunu umue wa tunda ko Yerusalãi kuenje wa kala loku lokila ko Yeriko, yu wa sikila peka liovingumba, vio lula, vio tota olombole, kuenje oku tunda, vio sia lokamuenyo kimbanda. Oco ca veta ño okuti ocitunda cimue ca kala loku lokilavo konjila yaco, kuenje eci co mola co pitahala ombamba. Lu Lewi umue le, haico a linga, eci a keya kuenje wo mola wo pitahala ombamba. Puãi u Samária umue wa kala kungende kuenje weya oko a kasi, yu, eci o mola, wo kuatela ohenda. Oco wa kokela kokuaye, kuenje wa kuta apute aye oku itilako ulela lovinyu, loku u kapa kocimbulu caye, wo tuala konjo yolongende yu wo tata. Hẽla yaco wa pola olosingu vivali, yu wa vi eca ku muẽleonjo, hati, U tata, la cosi o pesela vali, eci njiya vali, hu ci tuiwila. Pokati kava vatatu, wa soka huti, Wa linga ndu a lisungue luna wa tokeka lovingumba, helie?”—⁠Luka 10:29-36.

Ci lekisa okuti onoño yaco ya limbuka eci ci lomboloka omunu o lisungue laye. Ka kuli atatahãi okuti eye wa limbuka helie o lisungue lomunu una wa totiwa olombole poku tambulula hati: “Yu wo linga ohenda.” Noke Yesu wo tambulula hati: “Kuende, lovevo ka lingainge ndoco.” (Luka 10:37) Ocindekaise caco ca lekisa ciwa eci ci lomboloka omunu una o lisungue laye. Ocindekaise ca Yesu ci tu vetiya oku lipula etu muẽle ndoco: ‘Ovituwa vie nda siata oku lekisa komanu ndi lisungue lavo? Anga hẽ ekova liange ale ofeka nda citiwila kuenda epata liange ovio ndi kapako poku tepisa helie omunu ndi lisungue laye? Ovina viaco evi via siata hẽ oku ndi tutuiya koku kuatisa omanu vana va kasi loku pita lovitangi vialua? Nda siata hẽ oku likolisilako oco ndi kale omunu umue uwa o lisungue la vakuavo?

Ci Fetikiwila hẽ pi?

Nda tu yongola oku linga apongoloko atiamẽla koku kala omanu vawa, tu sukila oku pongolola tete ovisimĩlo vietu. Kuenje, ovisimĩlo viaco vitiamẽla lika koku kala ciwa lomanu tu lisungue lavo. Eci ci pondolavo oku kuatisa omanu vakuavo oco va kalevo omanu vawa tu lisungue lavo. Kueci ci soka olohũlũkãi vivali vianyamo konyima, Yesu wa vangula calua eci catiamẽla konumbi ya velapo yekalo liwa lomanu eci a linga Ohundo yaye yo Komunda. Eye wa popia hati: “Oco ovina viosi vu yongola okuti omanu vo linga haivio vu va linga.” (Mateo 7:12) Oku tata vakuetu lesumbilo kuenda locisola ci va vetiya oku tu tatavo ndomo etu tu va tata.

Usonehi umue wo revista o tu kuiwa hati, Lise Funderburg wa lombolola eci ci sukila oku lingiwa lomanu tu lisungue lavo. Eye wa soneha ndoco: “Ndi yongola oku vangula eci catiamẽla koku lekisa ovituwa viwa kovina vitito via siata oku lekisiwa pokati komanu va lisungue ndeci: Oku nõla kuenda oku ka tuala ukanda wasapulo wa siwa ño ndoto puvelo womunu tu lisungue laye, oku lava omãla vomanu tu lisungue lavo oco ka vaka lilemẽhe ale oco ka vaka nyelele, kuenda oku landa cimue vovenda okuti ci sukiliwa lomunu una tu lisungue laye. Ndi yongola okuti eci nda oco ci kala pokati koluali lulo luolonepele okuti omanu valua vahongua haivo ka va kolelepo omo liusumba kuenda ungangala.” Ukãi waco wa vokiyako hati: “Ove cilo o sukila oku fetika oku linga ovina viaco evi oco omunu una o lisungue love a ci lingilevo omunu ukuavo.”

O revista yikuavo yokofeka yo Kanadá ya lombololavo etosi limue okuti li pondola oku kuatisa omanu va lisungue oco va kale lovisimĩlo viwa. Marni Jackson, usonehi wo revista yaco wa soneha hati: “Omanu tu lisungue lavo va kasi ndepata okuti hetuko muẽle tu va linõlela. Oku kuata ukamba lomanu ci sukila ño oku kala lovituwa viwa kuenda oku sunguluka.”

Omanu tu Lisungue Lavo va Kuete Ovituwa Viwa, va Kuete Onjongole Yoku Eca

Ocili okuti komanu valua ka ca va lelukile oku livala ukamba lomanu vana va lisungue lavo. Olonjanja vimue ca leluka vali oku yuvula omanu kuenda oku litepa lavo. Embimbiliya li lombolola okuti, “Esumũlũho li tunda koku eca olio lia lua, eli li tunda koku tambula li sule.” (Ovilinga 20:35) Omo liaco, omunu o lisungue la vakuavo okuti uwa, o likolisilako oku kũlĩha omanu vosi va lisungue laye. Ndaño okuti ka ci sukila oku livala ukamba walua, eye o likolisilako olonjanja viosi oku fetika ombangulo lukamba. Ci tava okuti o fetika lika oku lama omanu lesanju ndeci oku va melehẽla kuenda oku petamisako kamue utue.

Ndomo ca lomboluiwa ale tete “oku lekisa ovituwa viwa kovina vitito,” ci kuete esilivilo liocili komanu tu lisungue lavo, momo ovituwa viaco vi vetiya ukamba uwa pokati komanu vaco. Momo ciwa calua oku mõla omunu o lekisa ovituwa viocisola lomanu a lisungue lavo. Kuenje, eci cika vetiya onjongole yoku likuatisa pokati kuenda oku lisumbilavo pokati. Handi vali, poku linga eci, tuka pokola kelungulo lieciwa Lembimbiliya okuti: “Ku ka likandangiye oku linga ohenda ava va yi sukila, nda o ci tẽla oku yi linga.”—⁠Olosapo 3:27; Tiago 2:14-17.

Omanu tu Lisungue Lavo va Kuete Ovituwa Viwa va Tambula Lolopandu Ekuatiso Lia Vakuavo

Ocili okuti ka ca lelukile oku vangula okuti omanu vosi va siata oku tambula ekuatiso kuenda olombanjaile lolopandu. Pole, eci hacoko ca siata oku lingiwa lomanu. Omanu valua va siata oku eca ekuatiso okuti va ci linga lonjongole yiwa, ka va siatele oku tambuluiwa lolopandu. Omo liaco, omunu eca ekuatiso liaco o pondola oku sima ndoco: ‘Lalimue eteke ndika ci linga vali!’ Ci tava okuti, pamue alikolisilo ove osi oku lama lesanju lialua kuenda oku melehẽla omanu o lisungue lavo ka a siatele oku tambuluiwa lutima wosi.

Ocili okuti, olonjanja vialua u o tambula ka lekisa olopandu vialua, kuenje o tambuila lika kilu okuti ka ci lingi lutima waye wosi. Pamue kocitumãlo kuna eye a kulila oco co tateka oku lianja lomanu vosi. Omo liaco, o tambuila lika kilu okuti halutimawayeko wosi, kuenje eci ci pondola oku kokela komunu ocituwa cimue ci molẽha soketi ka yongola oku kuata ukamba lomanu. Handi vali, voluali lulo luomanu ka va kuete ovituwa vioku lekisa olopandu, ci tava okuti omanu va tenda ukamba ndocina cimue ka ca sungulukile ale pamue va fetika oku kuata ovisimĩlo viñi viñi vieci omunu a kasi loku lingila ukamba waco. Pamue ovo va sukila oku kũlĩhĩsa esunga lieci o lingila ukamba waco. Omo liaco, oku livala ukamba lomanu ci sukila otembo kuenda epandi. Pole, omanu vana va tungila pamosi okuti va lilongisa ovituwa viwa vioku kala vakuakueca kuenda vakuakutambula lolopandu vaka vetiya omanu vakuavo oco va kuatevo ovituwa viaco okuti vi nena ombembua kuenda esanju.

Ceci Kuiya Ovitangi

Omunu tua tungila pamosi o kuete esilivilo lialua eci kuiya ovitangi. Kua siata oku muĩwa ovituwa viwa vioku likuatisa kuomanu va lisungue eci va sangiwa lovitangi viaco. Kuli asapulo alua atiamẽla kovituwa viwa vioku kuatisa omanu va lisungue kotembo yovitangi. Ovitangi omanu va siata oku kuata, viecelela oku lekisa ocisola komanu vaco la vakuavo kuenda oku likuatisa pokati. Ndaño okuti ovo ka va kuete ovituwa vioku kala pamosi, nda kueya ovitangi, olonjanja vialua omanu vaco vaka talavayela pamosi.

Ndeci o revista yimue yoko Nova York ya lombolola okuti, eci kofeka yoko Turkia kua pita ocilemawe kunyamo wo 1999, omanu vana va kala anyali tunde osimbu okuti va lisungue, va likuatisa pokati. Umue usonehi wo kofeka yo Helasi, Anna Stergiou wa soneha vukanda wasapulo wo kolupale luo Atenas hati: “Etu tua longisiwa oku suvuka omanu vo kofeka yo Turkia vokuenda kuanyamo alua. Pole, olohali ovo va kuata ka via tu ihĩle esanju. Tua kuata ocikembe omo liocikumbiti cosi tua kala laco vutima vokuenda kuanyamo alua okuti ca takata eci tua mõla oloñaña via fa.” Eci ombiali yofeka ya tuma oku liwekapo kupange woku sandiliya omanu vana okuti handi va kasi lomuenyo va lembikiwa lovimano, ocimunga comanu vo kofeka yo Helasi va kala loku kuatisavo kupange waco ka va tavele.

Oku kuatisa omanu tu lisungue lavo kupange woku sandiliya omanu va puluka noke yocilemawe, oyo ondimbukiso yovituwa viwa kuenda yepandi koku kuatisa omanu tu lisungue lavo eci va sangiwa lovitangi. Handi vali, oku popela omunu tu lisungue laye poku eca elungulo kokuaye osimbu handi ka kuatele ocitangi, ci pondola oku tendiwa ndekuatiso limue lia velapo calua. Pole, esapulo lia siata oku lekisa okuti omanu vana va lungula vakuavo kueci catiamẽla kocitangi cimue ci keya kovaso yoloneke, olonjanja vimue ka va siatele oku tambuluiwa ciwa lomanu vaco. Ca piãla vali enene nda elungulo liaco va kasi oku lieca votembo yimue okuti omanu lacimue va lete catiamẽla kondaka yaco. Vosi vana okuti va kasi oku eca elungulo liaco olonjanja vialua ka va taviwa lomanu. Eci ci sukila epandi lialua komunu wosi weca elungulo liaco kuenda oku likolisilako calua poku eca ekuatiso komanu vana ka va kuete elomboloko liekalo liavo okuti li kasi kohele.

Oku Lekisa Ovituwa Viwa Komanu tu Lisungue Lavo ci Sukiliwa

Cilo ku kasi okuiya ocitangi cimue komanu vosi voluali okuti ocilemawe ci sule. Eli elinga lia Suku ukuonenewosi okuti lika mãlako ungangala wosi voluali, lakandu kuenda ovitangi viosi. (Esituluilo 16:16; 21:3, 4) Eci hacimueko ci tatãliwa, pole ocina cimue okuti cikeya muẽle ocili. Olombangi via Yehova vi kuete onjongole yalua yoku sandeka ukũlĩhĩso u sukiliwa oco onepa yalua yomanu yi popeliwe kenyolẽho lia velapo lioluali luosi. Eli olio esunga lieci ovo va kuetele epandi lioku amamako lupange wavo wa kũlĩhĩwa calua woku kunda voluali luosi. (Mateo 24:14) Ovo va linga upange waco lonjongole yavo muẽle kuenda ocisola va kuetele Suku kumosi lomanu va lisungue lavo.

Omo liaco, ku ka yuvule oku yevelela Olombangi via Yehova eci vi veta kepito liove ale eci vi ku sanga kolonepa vikuavo. Ovio vi kasi oku likolisilako oku kala ciwa lomanu vana va lisungue. Omo liaco, tava oku lilongisa lavo Embimbiliya. Lilongisa lavo ndomo Ondaka ya Suku yeca ohuminyo kokuetu okuti, otembo yo kovaso yoku kuata esanju lialua pokati komanu va lisungue yi kasi ocipepi. Kotembo yaco, ka kuka kala vali olonepele viakova, viatavo ale oku tepisiwa kuovisoko viomanu kuna kua siata oku nyõla ukamba una tu sukila.

[Elitalatu kemẽla 5]

Ciwa calua oku lekisa ovituwa viwa komanu vosi tu lisungue lavo

[Ono yelitalatu kemẽla 5]