Ondalelo ya Ñala yi Lomboloka Nye?

ONDALELO ya Ñala oyo hẽ nye, kuenda yi kuete elomboloko lie komanu vana va kasi kocita cilo 21? Alivulu alua ana a lombolola ovoloño oluali atiamẽla kovina viosi, aka ku sapuila okuti Ondalelo ya Ñala yi lomboloka ocipito condalelo yonjivaluko Yesu Kristu a linga lolondonge viaye koñolosi, osimbu handi ka ecele omuenyo waye ndocilumba cocisembi. Omo okuti eyi ya kala ondalelo ya sulako Yesu a linga lolondonge viaye vina via lekisa ekolelo kokuaye, tunde osimbu ya siata oku tukuiwa okuti, Ondalelo ya Ñala. Omo okuti ondalelo yaco ya tumbikiwa la muẽle Yesu Kristu, eli olio esunga lieci yi tukuiwila okuti, Ondalelo ya Ñala.

Vokuenda kuovita vianyamo, omanu valua va siata oku eca omuenyo wavo ndocilumba omo lioku kuama ovihandeleko. Oku fa kuomanu vaco ndovilumba kua enda oku kuatisa omanu vamue vokuenda kuotembo yimue yitito. Omanu poku lieca ovo muẽle kolofa ndocilumba ka ci sokisiwa locilumba ca Yesu Kristu. Ndaño okuti oku fa kuaco ku komohĩsa calua, lalimue eteke ku sokisiwa loku fa kua Yesu Kristu kuna kua velapo ovina viosi. Momo ka kuli lavimue olofa via kuata ovitangi kuenda ovama añi añi vesapulo liomanu okuti mua kongela oluali luosi. Momo lie?

Oco o sange etambululo liepulilo eli kuenda oku ku kuatisa oku sanga eci ci lomboloka kokuove ocipito Condalelo ya Ñala, tu ku laleka oco o tange ocipama cikuãimo.