Etavo Lipi O Sukila Oku  Kuama?

OMANU va siata oku popia hati, oku tiamẽla ketavo ci kuete esilivilo. Pole omunu eye wa kũlĩha etavo a yongola oku kuama. Pamue va popia hati: ‘Atavo a kasi ndolonjila via litepa okuti vi loña kocitumãlo cimosi. Momo kuli lika Suku umosi.’

Olondaka evi viocili muẽle. Momo kuli lika Suku umosi Wavelapo. (Isaya 44:6; Yoano 17:3; 1 Va  Korindo 8:​5, 6) Pole, tu sukila oku konomuisa oku litepa ku kasi pokati komanu vatiamẽla katavo alua. Ovo, va siata oku popia hati va kasi oku fendela Suku yocili. Pole, atavo a litepa kovilinga viavo, kuenda kolonumbi vikuavo. Kuenda atavo aco a siata oku longisa olondotilina vialua via litepa. Omo liaco, omanu ka va kuete elomboloko lieci va kasi oku longisiwa ketavo.

Yesu wa popia hati: “Suku espiritu kuenje ca sesamela ava vo fendaila oku u fendela lespiritu locili.” (Yoano 4:​24) Oku fendela Suku locili ku ecelela hẽ olonamalãla vieci catiamẽla kokuaye? Nye eye a yongola okuti oco afendeli vaye va linga?

Akristão Vocili Kosimbu Kuenda Cilo

Kosimbu Akristão va kuatele ovisimĩlo via litepa viatiamẽla ketavo. Paulu wa lungula omanu vo ko Korindo hati: “A vamanji, va Koloe va sapuila okuti pokati kene pali oku liyenja. Eci ñasi loku lombolola ceci, siti Pokati kene, u hati, Ame ndukua Paulu, ukuavo hati, Ame ndukua Apolosi, ukuavo hati, Ame ndukua Kefa, lukuavo hati, Ame ndukua Kristu.”​—⁠1 Va  Korindo 1:​11, 12.

Paulu wa kapeleko hẽ olonepele via kala pokati komanu vaco? Omunu lomunu wa kuamẽle hẽ onjila yaye oco a yovoke? Sio hacoko. Paulu wa lunguile omanu vaco hati: “Ndu peyi londuko ya Ñala Yetu Yesu Kristu okuti, vosi wu popia popia cimuamue. Pokati kene ka pa ka kale olonepele, puãi likuati omunga lutima umuamue lolondunge vimuamue.”​—⁠1 Va  Korindo 1:⁠10.

Ka ca sungulukile oku kisika omunu oco a kuame onjila vakuavo va nõla. Pole, eye muẽle o sukila oku konomuisa eci catiamẽla ketavo. Noke o li nõlela onjila a yongola oku kuama. Eye o sukila oku lilongisa Embimbiliya loku pokola kolonumbi viaco. Noke o sanjukila oku kuama olonumbi Paulu a tukula vioku li kuata omunga. Kuli hẽ omanu va li kuete omunga? Vocipama catete, tua li longisa okuti, tunde kosimbu Suku wa sokiya ocimunga comanu vaye. Ci tava hẽ okuti koloneke vilo tu limbuka ocimunga comanu vaco?

Ekuatiso Lioku li Kongela Lomanu va Suku

Daviti wa popia hati: “A Yehova o tumala vonembele yove helie? Helie o tunga vomunda yove yi kola?” Eye muẽle wa tambulula epulilo eli hati: “Yu omuenyo waye wa pua eko o lingainga esunga, vutima waye mu tunda olondaka viocili.” (Osamo 15:​1, 2) Omunu o sukila oku kuata elomboloko Liembimbiliya oco a tẽle oku limbuka etavo li kasi oku pokola kolonumbi viaco. Noke oka sanjuka calua poku li kongela lomanu va fendela Suku “lespiritu locili.”

Omanu va Yehova va tava okuti ci tẽliwa oku li kuata ocimunga voluali lulo mueyuka olonepele. Pokati Kolombangi via Yehova pa sangiwa vakuapata alua kuenda ava va tunda katavo añi añi. Pa sangiwavo omanu vana okuti tete ka va tavele ku Suku kuenda ka va kapeleko etavo. Elitokeko li sangiwa pokati kavo, ka lia siatele komanu vakuavo voluali lulo.

Olombangi via Yehova vi lilongisa Embimbiliya. Olio lia siata oku va kuatisa oku sanga elitokeko. Ovo ka va kisika vakuavo onjila va sukila oku kuama. Pole, va sanjukila ño oku longisa vakuavo Embimbiliya oco li va kuatise oku nõla efendelo liocili. Omo liaco, omanu valua va siata oku limbuka ekuatiso li tunda koku fendela Suku ‘lespiritu liocili.’

Koloneke vilo omanu va sukila oku lunguka oco ka vaka yapuisiwe lakamba vãvi. Omo liaco, oku nõla akamba va sunguluka ci kuete esilivilo. Embimbiliya li lungula hati: “U endaenda la vakualondunge o lingavo ukualondunge.” Pole, “akamba vãvi va nyola ovituwa viwa.” (Olosapo 13:20; 1 Va  Korindo 15:​33) Oku li kongela lomanu va fendela Suku ci kuatisa calua. Embimbiliya li popia hati: “Tu sokololi ndomo tu tela oku livetiya pokati oku kala locisola lovilinga viwa. Ka tu ka liweki oku ongoloka ndomo vamue va lingainga, puãi tu likuatisi pokati lalungulo, ca piãla vali omo tu lete okuti eteke liaco li kasi ocipepi.” (Va Heveru 10:​24, 25) Tu sanjuka calua eci tu mõla akamba vetu va kasi oku kuatisa vakuavo koku tẽlisa ovikele viavo ku Suku.

Ekalo liaco liwa lia vetiya umue o tukuiwa hati, Ottmar. Eye lepata liaye vatiamẽlele ketavo lio Katolika ko Alemanya. Noke weya oku liwekapo oku endaenda konembele. Kuenje wa popia hati: ‘Nda limbuka okuti lacimue nda kala oku lilongisa ketavo lio Katolika. Noke, nda liwekapo oku endaenda konembele.’ Eye wa vangula Lolombangi via Yehova. Kuenje wa limbuka okuti, ovo afendeli vocili va Suku. Noke wa li kongela lavo. Eye wamisako lulandu waye hati: ‘Cilo ndi kuete ombembua kutima omo lioku iñila vocisoko ca Yehova. Olombangi via Yehova via ndi kuatisa calua oco ndi kũlĩhe olonumbi Viembimbiliya. Ukũlĩhĩso waco u ndi kuetise calua komuenyo wange.’

Elaleko Kuava va Sandiliya Ocili

Omanu vosi va sunguluka kovitima, va pondola oku linga upange wa lua. Kuenda ka va sokisiwa lomunu una otalavaya ño likaliaye. Omo liaco, Yesu wa eca ocikundi kolondonge viaye hati: ‘Kuendi ka tavisi omanu vo kolofeka viosi oco va linge olondonge. Va papatisili vonduko ya Tate la mõla kuenda espiritu sandu. Va longisi oku linga ovina viosi ndo kundiki.’ (Mateo 28:​19, 20) Upange waco nda wa tẽlisiwa ndati, nda ka kua kaile usongui? Omunu o tẽlisa ndati onumbi eyi nda o seteka oku vumba Suku likaliaye okuti ka li kongela la vakuavo?

Unyamo wa pita, Olombangi via Yehova voluali luosi, via eca eci ci soka 91.933.280 kalivulu, lotuikanda. Via ecavo eci ci pitahãla 697.603.247 kotualivulu Utala Wondavululi lo Despertai! Upange waco woku sapula Ondaka ya Suku wa lingiwila kueci ci soka 235 kolofeka. Ovo va tẽla oku linga upange waco omo va likuete omunga. Kuenje upange waco ka u sokisiwa lowu u lingiwa lomunu umosi.

Olombangi via Yehova via siatavo oku longisa omanu Embimbiliya okuti ka va feti lacimue. Ovo va siata oku kuatisa omanu vaco oco va kuate elomboloko lieci Suku a yongola kokuavo. Unyamo wa pita, Olombangi via Yehova via songola eci ci soka 5.726.509 kalilongiso Embimbiliya. Elongiso liaco lia siata oku kuatisa omanu valua oco va tẽle oku nõla etavo liocili. Tu ku laleka oco o lilongise Embimbiliya. Kuenje oka tẽla oku nõla etavo liocili.​—⁠Va Efeso 4:13; Va Filipoi 1:9; 1 Timoteo 6:20; 2 Petulu 3:⁠18.

Nda o yongola oku sanjuisa Suku o sukila oku tiamẽla ketavo limue. Pole haku nõlako ño etavo limue lia ku yelela kutima. Ove o sukila oku kuata ukũlĩhĩso Wembimbiliya oco o tẽle oku nõla ciwa etavo liocili. Kuka kuame ño eci vakuene va ku sapuila. (Olosapo 16:​25) Omo liaco, lilongisa olonumbi vietavo liocili. Vi sokisa levi wa lilongisa ketavo wa kala tete. Noke nõlapo onjila o kuama.​—⁠Esinumuĩlo 30:⁠19.

[Elitalatu kemẽla 7]

Olombangi via Yehova vi li kuete omunga voluali mueyuka olonepele