Suku o Kuete hẽ Ekandu Liovitangi vi Pita Letu?

ECI omõla uveli wa Marion a kuatiwa lepute vowoño, eye wa likutilila ku Suku oco o kuatise.a Marion wa popia hati: “Nda yeva upongo umue okuti lalimue eteke nda u yevele vomuenyo wange.” Eci oku vela kuomõlaye kua fetika oku piãla, Marion wa fetika oku pula ku Suku okuti, “nye hẽ eci ci kasilili oku pita lame?” Eye co tatamẽle. Kuenje wa fetika oku lipula okuti, oco hẽ nda Suku ukuacisola, nye a njandulukila?

Marion hayeko lika wa siata oku pita locitangi ndeci. Omanu valua voluali va siata oku sima okuti Suku wa va yanduluka kotembo yohali. Ukãi umue otukuiwa hati Lisa, noke yoku pondiwa kuonekulu yaye, wa popia hati: “Ame nda siata oku lipula okuti, SUKU hẽ nye a ecelelela okuti eci ci pita lame? Ame sia liwekelepo oku kolela Suku. Pole ekolelo liange lia tepuluka.” Ukãi umue ukuavo eci a fisa omõlaye wa popia hati: “Suku ka nyihile elembeleko lalimue. Kuenda ka ndekisile ondimbukiso layimue yokuti o ñuetele ocikembe. Omo liaco, lalimue eteke ndi ka ecela Suku.”

Vamue va kuata onyeño la Suku eci va mõla ovitangi omanu va kasi oku liyaka lavio. Ovo va lete okuti omanu va kasi uhukũi lonjala. Vakuavo va kasi oku tila tila omo liovoyaki. Kulivo omãla vakahandangala va siala olosiwe omo olonjali viavo via fa luvei wo Sida. Kuenda omanu vakuavo va kasi oku kuatiwavo lovovei añi añi. Omo liovitangi evi, vamue va siata oku kapa ekandu ku Suku, loku sima okuti Suku omanu ka va kapeleko. Momo ka kasi oku linga lacimue.

Pole, Suku hayeko o kasi oku kokela omanu ovitangi. Kuenda tua kolela okuti eye ndopo oka mãlako ovitangi viosi viomanu. Tanga ocipama cikuãimo. Kuenje oka limbuka okuti Suku wa tu kapako.

[Atosi pombuelo yamẽla]