“Oco ku Sandekiwe Onduko ya Yehova”

Voluali luosi Utala Wondavululi kuenda Omasuli! vi soliwe omo liolondaka viespiritu vi sangiwamo kuenda elongiso liaco. Uvangi waco, u limbikiwa kolondaka viukãi umue wo ko Fransa wa vi tanga, wa soneha ndoco:

“Ame ndufeko umue wa citiwa ko Afrika kuenda sia tangele calua. Nda fetika oku tanga olorevista viene. Ovolandu a komõhisa, a ndi kuatisa oku limbuka esilivilo lioku kuata ocituwa coku tanga. Lekuatiso liene nda kũlĩha olondaka viokaliye kuenda ndi tẽla oku soneha ukanda umue okuti si lueya calua.

“Ndi komõha calua poku mola ndomo ene vu soneha ovipama viatimẽla komanu, koluali kuenda Kululiki. Ovipama viaco vi lomboloka ciwa kuenda vi vetiya omunu oku tanga. Ka kuli laumue o pondola oku pindisa omanu vosi vonjanja yimuamue.

“Ndi komõhavo oku mola okuti ka vu fetiwa, pole, vu ci linga oco onduko ya Suku yi sandekiwe. Nda kũlĩha okuti ene vu taviwa laye, nda pandula calua. Lingi ohenda, amamiko oku sanda ekuatiso Liululiki locimãho coku longisa.”

Olombangi via Yehova koloneke vilo, vi linga upange woku longisa Embimbiliya kueci ci soka 235 Kolofeka. Utala Wondavululi wa siata oku sandekiwa kueci ci soka 148 kalimi, kuenda Omasuli! u sandekiwa kueci ci soka 87 kalimi. Olorevista viaco ka via siatele oku sandekiwa oco vi ece sivayo komunu umue. Alungulo a sangiwa Vembimbiliya kuenda lonumbi vi viaco, vi kuete ocimãho coku eca esivayo Kululiki una wa popia hati: “Ame ndi Yehova, . . ., Una o ku longisa eci ci ku kuatisa.” (Isaya 48:17) Ove o pondolavo oku kuatisiwa poku tanga ovisonehua vi kola eteke leteke, kumue lolorevista viaco oco o lilongise Embimbiliya.