Ka ca Lelukile Oku Limbuka Ondimbukiso

Ukãi umue Gertrude, kofeka yo Alemanya, wa popia hati: ‘Omõletu Andreas eci a fetika oku vela, tete wa yeva evalo liutue. Kuenda ka yonguile vali oku lia. Momo wa kuata ombambi yalua. Eci nda limbuka okuti evalo liaye liutue lia livokiya, nda yokoka calua. Kuenje, eci ulume wange a tiuka kupange, tua enda laye kondotolo. Eci ndotolo a limbuka uvei waco, wa tu vetiya oku enda lonjanga kosipitali. Andreas ka kale lika oku vela utue. Eye wa kuata uvei u tukuiwa hati, o menengite. Pole, noke lioku sakuiwa, wa kuata vali uhayele.’

OLONJALI vialua via siatavo oku pita locitangi ndeci Gertrude a liyaka laco. Ovo va siata oku limbuka ondimbukiso yuvei womõla wavo. Ndaño okuti, uvei hawosiko u koka ohele, olonjali vi sukila oku yuvula oku lavisa ondimbukiso yoku vela kuomõla. Oku limbuka lonjanga ondimbukiso loku nõla onjila yi kuamiwa, ci kuete esilivilo liocili. Pole, ka ca lelukile oku nõla onjila yi kuamiwa.

Ondaka yoku limbuka ondimbukiso, ka yi tiamisiwila lika koku vela. Uvangi waco wa lekisiwa vulandu wocilunga ca pita Kokalunga kofeka yo India kosãi ya Cembanima kunyamo wo 2004. Olonoño vio kofeka yo Australia kuenda ko Hawaii, via limbukile ondimbukiso yocilunga caco kofeka yo Sumatra. Kuenda via limbukilevo unene wocilemawe caco. Pole, ka va kuatele onjila yoku lungula omanu va kala kocitumãlo caco cohele. Omo liaco, kua fa eci ci pitahãla 220.000 komanu.

Ondimbukiso Yimue yi Kuete Esilivilo Lia Velapo

Eci Yesu a kala palo posi, wa longisa olonjeveleli viaye oku limbuka ondimbukiso. Kuenda oku kuama onjila ya sunguluka. Eye wa va sapuila ondimbukiso yimue yi kuete esilivilo lia velapo. Embimbiliya li popia hati: “Va Fariseo la va Sadukeo veya [ku Yesu]. Oku u nyika vo pinga okuti o va lekisa ondimbukiso yimue yokilu. Eye wa va kumbulula hati: Koñolosi vu linga hoti, kuiya utanya, momo kilu ku kusuka. Komẽle [u popia] hoti: Etaili [kuiya] ombela, omo kilu ku kusuka kuenda kua sitika. Wa kũlĩhĩ oku limbuka eci cili kilu puãi ko tẽla oku limbuka olondimbukiso viovina vi lingiwa.”​—⁠Mateo 16:​1-3.

Yesu poku tukula ‘ondimbukiso yolotembo,’ wa lekisa okuti, va Yudea va sukilile oku limbuka otembo va kala. Momo ofeka yavo ya kala oku lavoka enyõleho limue li nena ovitangi kokuavo. Pole, osimbu handi Yesu ka file, wa sapuilile olondonge viaye catiamẽla kondimbukiso yikuavo yoku tukuluka kuaye. Olondaka eye a popele, vi kuete esilivilo kokuetu vosi.