Omanu ka va Siatele

Oku Sumbiwa

Manji umue o tukuiwa hati, MANDALENA KUSSEROW REUTER, wa talisiwa ohali kofeka yo Alemanya, wa popia hati: ‘Ovina viosi va enda oku tu linga, via kala lika elaviso loku sepuiwa.’

VOKUENDA Kuyaki wa vali wa pita voluali luosi, omanu valua kofeka yo Alemanya va kangisiwa calua. Pole, ungangala wa lingiwa kokuavo, ka wa kale efetikilo ale esulilo lielaviso pokati komanu. Momo tunde kosimbu, omanu va siata oku lavisiwa calua loku sepuiwa.

Oku lavisa ekalo liomanu, ka kua siatele lika oku lingiwa vokuenda kuovoyaki vofeka. Pole, kua siata oku lingiwa volonepa vialua. Sokolola ndeci omãla va siata oku sepuiwa la vakuavo omo liekalo liavo. Omanu vamue omo lioku ilukila kolofeka vikuavo, va siata oku sepuiwa lolonungi viofeka yaco omo liovituwa viavo. Vakuavo va siata oku sepuiwa omo liekova liavo kuenda ekalo liofeka yavo. Omanu vana va siata oku ci linga, pamue va citenda ndokupapala. Pole, vana va lavisiwa, va yeva evalo lialua kutima.​—⁠Olosapo 26:​18, 19.

Oku Sumbila Ekalo Liomunu ci Lomboloka Nye?

Elivulu limue lia lombolola okuti, ‘oku sumbila ekalo liomunu, ci lomboloka oku lekisa ocituwa coku kapako ekalo liaye.’ Voku sumbila ekalo liomunu, mua kongela oku kũlĩha ndomo tu litenda etu muẽle, kuenda ndomo vakuetu va tu tenda. Kuli ovina vialua vi tu vetiya oku kuata ovisimĩlo via litepa viatiamẽla kokuetu muẽle kuenda ndomo tu tenda vakuetu. Pole, ocituwa tu lekisa kokuavo, oco ci kuete esilivilo lialua.

Kolofeka viosi violuali, kuli omanu valua olohukũi okuti ka va kuete u o va kuatisa. Kuenda ka va kuete umue o va teyuila. Pole, eci ka ci lekisa okuti ka va sesamẽla vali esumbilo. Ovituwa viomanu, ovio vi kapa kohele esumbilo lia vakuavo. Omanu vana va kuka, lolohukũi, kuenda ava va vela, olonjanja vimue va siata oku sepuiwa ndoco: ‘U ka silivila, ka sesamẽla ocina eci, kuenda ka sesamẽla esumbilo.’

Momo lie omanu va siatele oku sepuila vakuavo? Anga hẽ eteke limue omanu vosi voluali vaka lisumbila pokati? Ocipama cikuãimo, cika eca etambululo li tunda Vondaka ya Suku.