Ambombe Vaka Piñala Oluali Luokaliye
Onoño yimue kofeka yo Fransa o tukuiwa hati Jean-Marie Pelt, wa popia hati: ‘Ndi tava okuti, ongongo yika pongoluiwa. Kuenje yi linga yokaliye. Pole, ohuminyo yilu liokaliye kuenda oluali luokaliye, ka yi tẽlisiwa ndopo.’
KOLONEKE vilo, omanu va kasi oku liyaka lovitangi. Valua va yongola oku mola okuti ongongo ya pongoluiwa oluali luokaliye. Elavoko liaco ka lia fetikile lika otembo yilo. Tunde kosimbu, Embimbiliya lia popele okuti, ilu lieve lika pongoluiwa Oluali luokaliye. Yesu wa popia hati: ‘Ava vomboka vutima . . . vaka piñala ofeka.’ Kuenje ‘ocipango ca Yehova ci lingiwa posi ndeci ci kasi oku lingiwa kilu.’ s(Mateo 5:5; 6:10) Koloneke vilo, omanu valua ka va tava okuti ambombe vaka piñala oluali luokaliye. Omanu valua va litukula hati, Akristão ka va tava kelongiso liatiamẽla Koluali Luokaliye.
Onoño yimue yoko Fransa, velivulu liaye wa lombolola esunga lieci omanu vakuetavo Liokatolika ka va kuetele vali ovisimĩlo vioku lavoka oluali luokaliye kuenda ilu liokaliye. Eye wa popia hati: ‘Omanu omo lioku vialiwa letavo Liokatolika vokuenda kuanyamo alua, ovisimĩlo vioku kala voluali luokaliye via tunda vutima wavo. Momo Vomisa ya Calumingu, lelongiso lieciwa kolosiminaliu kuenda okatesisimu, ka va longisa catiamẽla koku kala Voluali luokaliye palo posi.’ Ondaka oluali luokaliye, va siata oku yi nyõla lovohembi alua. Kuenje ka va kuatisa omanu oku kuata elomboloko liwa. Alongisi vamue va yuvula oku tukula ondaka yaco. Momo ‘yeca ovisimĩlo vioku kuata asumũlũho palo posi.’
Frédéric Lenoir una wa lilongisa ovina viatiamẽla ketavo, wa lombolola okuti, ondaka oluali luokaliye, ya tunda ‘kovisimĩlo viesanda.’ Cimuamue haico ca lombolola onoño yikuavo o tukuiwa hati Jean Delumeau. Eye wa popia hati: ‘Olohuminyo Viembimbiliya, ka vi tẽlisiwa ndomo via sonehiwa. Momo vi kasi ndocindekaise. Noke wa pula hati: Oluali luatete Luokaliye lu kasi pi? Elongiso Lietavo li popia hati: Tu eca olopandu kepinduko Lionjovoli. Momo eteke limue vosi yetu tuka kala pamosi. Kuenje tuka mola oku tẽlisiwa kuelavoko lietu.’
Anga hẽ ca sunguluka oku kuata elavoko lioku kala voluali luokaliye? Nye cika pita loluali kovaso yoloneke? Anga hẽ ocisimĩlo celavoko lioluali luokaliye liocili muẽle? Ocipama ci kuãimo, cika tambulula apulilo a lingiwa ndeti.