Sandiliya Esilivilo Liomuenyo
“Cosi ci fuima ci sivaye Yehova.”—OSAMO 150:6.
1. Lombolola ndomo ukuenje umue a sanda esilivilo liomuenyo.
ULUME umue o tukuiwa hati, Seung Jin, wo kofeka yo Koreaa, wa popia hati: “Nda lilongisa uloño woku sakula omo lionjongole yoku kuatisa omanu. Nda simile okuti, oku kala ondotolo, ekemãlo, kuenda oku kuata olombongo vialua, oco ci nena esanju. Noke, ndeya oku sumua calua poku limbuka okuti, oku kala ondotolo hacoko ceca ekuatiso lia velapo komanu. Kuenje, nda lilongisa uloño ukuavo, pole omanu ka va sanjukilile ovina nda kala oku linga. Omo liaco, nda nolapo oku kala ulongisi, oco ndi pitiye ño ukũlĩhĩso kolondonge. Pole nda limbukavo okuti ka ci nena esanju liocili.” Omanu valua, va siata oku sanda esilivilo liomuenyo ndeci Seung Jin a linga.
2. (a) Nye tu sukila oku linga oco tu kũlĩhe esilivilo liomuenyo? (b) Tua kũlĩha ndati okuti, Ululiki wetu o kuete esunga lieci a tu kapela voluali?
2 Oco tu kuate elomboloko liesilivilo liomuenyo, tu sukila oku kũlĩha esunga lieci tu kasilili komuenyo. Tu sukilavo oku kuata ocimaho ca velapo, kuenda oku limbuka esunga lieci tu kuamẽla onjila yimue. Anga hẽ, omanu va pondola oku kũlĩha esilivilo liomuenyo? Va pondola! Momo tua lulikiwa luloño, kuenda olondunge vi tu kuatisa oku limbuka esunga lieci Ululiki wetu a tu kapela mulo voluali. Omo liaco, tu pondola lika oku kũlĩha esilivilo liomuenyo, nda tua pokola kolonumbi Viululiki wetu.
3. Vocipango ca Suku catiamẽla komanu mua kongela nye?
3 Embimbiliya li lekisa okuti, vocipango ca Suku catiamẽla kokuetu, mua kongela ovina vialua. Ocisola ca Suku, tu ci limbukila kekalo lietu ndomo tua lulikiwa. (Osamo 40:5; 139:14) Oku ambata omuenyo u likuata locipango ca Suku, ci lomboloka oku lekisa ocisola ku vakuetu ndeci Eye a siata oku linga. (1 Yoano 4:7-11) Ci lombolokavo oku pokola kolonumbi via Suku vina vi tu kuatisa oku ambata omuenyo ndomo a yongola.—Ukundi 12:13; 1 Yoano 5:3.
4. (a) Nye tu sukila oku linga oco tu kũlĩhe esilivilo liomuenyo? (b) Ocimaho cipi vosi yetu tu pondola oku tẽlisa?
4 Suku wa yonguilevo okuti, omanu va kuata esanju kuenda ombembua la vakuavo, kumue lovina vikuavo a lulika. (Efetikilo 1:26; 2:15) Nye tu sukila oku linga oco tu kuate esanju, ombembua kuenda oku kolapo? Oco omõla a kuate esanju loku kolapo, o sukila oku kala lolonjali viaye. Cimuamue haico catiamẽla kokuetu. Tu sukila oku kuata ukamba la Isietu wokilu oco tu kũlĩhe elomboloko liomuenyo kuenda esilivilo liaco. (Va Heveru 12:9) Oco ocimaho caco ci tẽlisiwe, Suku wa ecelela okuti, tu kuata ukamba laye poku yevelela olohutililo vietu. (Tiago 4:8; 1 Yoano 5:14, 15) Nda tua lekisa ekolelo poku “endaenda la Suku,” tu kuata ukamba laye, kuenda tu kuata esanju lina li eca esivayo ku Isietu wokilu. (Efetikilo 6:9; Olosapo 23:15, 16; Tiago 2:23) Vosi yetu tu pondola oku tẽlisa ocimaho caco. Ukualosamo wa popia hati: “Cosi ci fuima ci sivaye Yehova.”—Osamo 150:6.
Cipi Ocimaho Cove Komuenyo?
5. Momo lie oku tiamisila utima kovokuasi, ci lekisila ekambo liolondunge?
5 Suku o yongola okuti, tu tata ciwa omuenyo wetu, kuenda epata lietu. Vovina viaco, mua kongela eci tu sukila ketimba kuenda kespiritu. Pole, tu sukila oku lavulula oco ovina viespiritu ka vika tatekiwe lovopange akuavo. (Mateo 4:4; 6:33) Onepa yalua yomanu, va tiamisila lika utima wavo kovokuasi oluali. Pole, oku sakalala calua lovina viaco, uveke. Esapulo limue lia lekisa okuti, olohuasi vialua kocifuka co Asia, “ka via kolelepo ndaño okuti vi kuete olombongo vialua lekemãlo. Momo ndaño vi kuete ovokuasi, ka via siatele oku tẽlisa ovimaho viavo.”—Ukundi 5:11.
6. Elungulo lipi Yesu a eca, liatiamẽla koku sanda ovokuasi?
6 Yesu wa popia eci catiamẽla ‘keliaño liukuasi.’ (Marko 4:19) Ukuasi wa siata oku liaña ndati omanu? Owo, u moleha ndu okuti weca ekalo liwa komuenyo, pole ka u nena esanju lia velapo. Soma Salomone wa popia hati: “U o sole olombongo kekuta olombongo.” (Ukundi 5:10) Anga hẽ, tu pondola oku vumba Suku lutima wetu wosi, osimbu tu sakalala lovokuasi? Sio, ka ci tava. Yesu wa popia hati: “Lomue o tẽla oku vumba vacime vavali, momo pamue umue u suvuka lukuavo u sola, pamue o sumbila umue lukuavo u lavisa. Ko tẽla oku vumba Suku kuenda ukuasi.” Yesu wa vetiya olondonge viaye oco vi yuvule oku seleka ovokuasi palo posi. Pole, via sukilile oku seleka “ukuasi kilu,” oco vi kuate ukamba la Suku una ‘wa kũlĩha ovina va sesamẽla osimbu ka vo vi pingile.’—Mateo 6:8, 19-25.
7. Tu pondola ndati oku kuata “omuenyo wocili”?
7 Upostolo Paulu poku sonehela Timoteo, wa eca elungulo limue li kuete esilivilo. Eye wo sapuila hati: “Lungula olohuasi [okuti] ka vi lipandiya loku kolela ukuasi u pua pua, vi kolele puãi Suku u o tu ihaiha ovina viosi ha tu sanjuka lavio. . . . Vi ecaece lombili ku vakuavo loku va kuatisa, ha vi liangiliyila ociseveto ciwa cokotembo yi laika oku iya oco vi kuate omuenyo wocili.”—1 Timoteo 6:17-19.
“Omuenyo Wocili” u Lomboloka Nye?
8. (a) Momo lie valua va siatela oku sanda ovokuasi kuenda ekemãlo? (b) Ocina cipi ka va siatele oku limbuka?
8 Omanu valua, ondaka yokuti “omuenyo wocili,” va yi tiamisila koku kuata ovokuasi loku enda kayele. Ukanda umue wasapulo kocifuka co Asia, wa popia hati: “Omanu vana okuti ovitima viavo via tekela lika koku tala olosinema lo Televisãu, noke va vetiyiwa oku kuata ovina va siata oku mola kuenda oku lota ovina ka va kuete epondolo lioku vi landa.” Omanu valua, va siata oku sima okuti, ovokuasi lekemãlo, ovio vi kuete esilivilo komuenyo. Omo liaco, valua, va siata oku pesila otembo yavo yovomalẽhe koku sanda ovokuasi. Kuenje, va kapa kohele uhayele wavo, va kala ocipãla lepata, kuenda ka va kapiko ovina viespiritu. Pole, vamue ka va tava okuti, “espiritu lioluali” olio lia siata oku vetiya omanu valua oku tiamisila utima kovokuasi. Kuenje, va likala oku tava kovina Suku a tu likuminya. (1 Va Korindo 2:12; Va Efeso 2:2) Omo liaco, kuli omanu valua va sumua koloneke vilo!—Olosapo 18:11; 23:4, 5.
9. Ovina vipi okuti omanu lalimue eteke vaka tẽla oku vi linga kuenda momo lie?
9 Nye ci popiwa catiamẽla ku vana va siata oku talavaya oco va kuatise vakuavo lonjongole yoku malako onjala, uvei kuenda ekambo liesunga? Elikolisilo liavo, lia siata oku kuatisa omanu valua. Pole, ndaño va likolisilako, ka va tẽla oku nena ekalo liwa voluali. Momo lie? Momo ‘oluali luosi lu kasi povaka’ a Satana, una ka yongola okuti omanu va kuata ekalo liwa.—1 Yoano 5:19.
10. Otembo yipi vakuekolelo vaka kuata “omuenyo wocili”?
10 Tu sumua calua poku limbuka okuti vamue va kolela lika komuenyo woluali lulo! Paulu wa soneha hati: “Nda elavoko lietu . . . ku Kristu lia sulila lika vomuenyo ulo, nda pokati komanu vosi etu tete tua sesamẽla oku kuatelua ohenda.” Eye wa lombololavo eci catiamẽla ku vana va sima okuti, omuenyo ulo owo lika u kuete esilivilo, poku popia hati: “Tu li, tu nyui, momo hẽla tu fa.” (1 Va Korindo 15:19, 32) Pole, “mekonda liohuminyo [ya Suku,] tu lavoka ilu liokaliye loluali luokaliye omu mu kala esunga.” (2 Petulu 3:13) Eci olondaka evi vika tẽlisiwa, ci kale Akristão va kuete elavoko lioku enda kilu ale vana vaka kala palo posi, vaka kuata “omuenyo wocili,” okuti “omuenyo ko pui.” Kuenje, vaka vialiwa Lusoma wa Suku wocisola!—1 Timoteo 6:12.
11. Momo lie ci kuetele esilivilo oku pitisa kovaso upange woku kunda Usoma wa Suku?
11 Usoma wa Suku owo lika uka malako ovitangi viomanu. Omunu lomunu o sukila oku pitisa kovaso upange woku kunda Usoma wa Suku. (Yoano 4:34) Nda tua linga upange waco, tu kuata ukamba la Isietu Wokilu. Tu sanjukavo calua poku talavaya kumosi lolohuluwa via vamanji vana va sandiliya esilivilo liomuenyo.
Kuama Onjila ya Sunguluka
12. Lombolola oku litepa kukasi pokati komuenyo woluali lulo, kuenda “omuenyo wocili” tu lavoka.
12 Embimbiliya li lekisa okuti, oluali lulo lu kasi oku “takata loñeyi yaluo.” Ovina viosi viatiamẽla koluali lua Satana, oku kongelamo ovokuasi lekemãlo, vika kunduiwa. Pole, “u o lingainga ocipango ca Suku o kala oloneke ka vi pui.” (1 Yoano 2:15-17) Ocili okuti, ovokuasi oluali lulo, ekemãlo, kuenda esanju liaco, ka vi kala otembo yalua, kuenda ka vi sokisiwa loku kuata “omuenyo wocili” vemehi Liusoma wa Suku. Omo liaco, tu sukila oku likolisilako loku kuama onjila ya sunguluka oco tu kuate omuenyo ko pui.
13. Ulume umue lukãi waye va nola ndati onjila ya sunguluka?
13 Konomuisa ulandu wamanji Henry lukãi waye Suzanne. Ovo va kolela kolohuminyo via Suku viokuti, vana va pitisa kovaso Usoma, vaka tambula ekuatiso lia Suku. (Mateo 6:33) Ovo, va nolapo oku kala vonjo yimue okuti, ka va feti olombongo vialua vosãi, oco ka vaka pesile otembo yalua kupange woku sanda eteku. Momo, va yonguile oku vokiya otembo yavo kupange woku kundila kumue lomãla vavo vavali vafeko. (Va Heveru 13:15, 16) Pole, ekamba liavo va kolela, ka kuatele elomboloko lionjila va nolapo. Omo liaco, wa sapela la Suzanne hati: “Nda u yongola oku kala vonjo yimue ya posoka, u sukila oku talavaya calua kupange woku sanda eteku.” Manji Henry lukãi waye Suzanne, va kũlĩhĩle okuti, oku pitisa kovaso upange wa Yehova, ci kuatisa oku kakatela ‘kohuminyo yomuenyo ulo, kuenda komuenyo wa laika okuiya.’ (1 Timoteo 4:8; Tito 2:12) Noke, omãla vavo, veya oku litumbika kupange wakundi votembo yosi. Omo liaco, va limbuka okuti, ka va pumbile lacimue ci kuete esilivilo lia velapo. Momo, va kuatisiwa calua poku tẽlisa ocimaho cavo coku sandiliya “omuenyo wocili.”—Va Filipoi 3:8; 1 Timoteo 6:6-8.
Kuka ‘Sakalale Lovina Violuali’
14. Ovitangi vipi vi tunda koku ivalako oku kakatela kocimãho cetu?
14 Nda tua ivalako ocimaho cetu coku kakatela koku sanda “omuenyo wocili,” tu ‘totomisiwa lohele yukuasi kuenda elau liomuenyo.’ Kuenje, tu pumba omuenyo ko pui. (Luka 8:14) Oku kuata onjongole yalua lovokuasi, kuenda “oku sakalala lovina viomuenyo,” ci vetiya oku tiamisila utima kovina violuali. (Luka 21:34) Vamue omo lioku tiamisila lika ovitima kovokuasi oluali lulo, “va yapuka vekolelo, kuenje va litoma lohali ya lua,” kuenda, va nyola ukamba wavo la Yehova. Omo liaco, oku liwekapo oku ‘kakatela komuenyo wocili,’ ci nena ovitangi!—1 Timoteo 6:9, 10, 12; Olosapo 28:20.
15. Epata limue lia kuatisiwa ndati poku ‘linga ndava ka va kuete cimue loluali’?
15 Paulu wa lungula “ava va sakalala lovina violuali [oco] va linge ndava ka va kuete cimue laluo.” (1 Va Korindo 7:31) Manji Keith lukãi waye Bonnie, va kapako olondaka evi. Manji Keith wa popia hati: “Nda linga Ombangi ya Yehova eci nda mala oku lilongisa uloño woku sakula ovayo. Omo liaco, nda sukilile oku nola onjila ndi kuama. Uloño waco, nda wa ndi kuatisa oku sakula olombei, oco ndi kuate olombongo vialua. Pole, oku pitisa kovaso upange waco, nda kua tateka oku vokiya upange wetu woku kunda. Omo liaco, nda nolapo oku talavaya otembo yitito kupange woku sanda eteku, oco tu kuate otembo yalua yoku kunda kuenda oku pita otembo yalua lepata. Ndaño ka tu kuete olombongo vialua, tua siata oku sanjukila ovina tu kuete, kuenda lalimue eteke tua kambelele cimue. Epata lietu lia kuata ukamba wocili kuenda esanju. Omo liaco, vosi yetu tua litumbika kupange wakundi votembo yosi. Cilo, omãla vetu vatãlo vosi va kuete olohuela viwa kuenda vatatu va kuetevo omãla vavo. Ovo va kuete epata limue lia sanjuka, osimbu vamamako oku pitisa kovaso ocipango ca Yehova.”
Pitisa Kovaso Ocipango ca Suku
16, 17. Ovolandu api omanu vakuoloño va tukuiwa Vembimbiliya kuenda tu va ivaluka ndati?
16 Embimbiliya li kuete ovolandu omanu va linga ocipango ca Suku, kuenda vana ka va ci lingile. Ovolandu avo, a tiamisiwilavo komanu vosi koloneke vilo. (Va Roma 15:4; 1 Va Korindo 10:6, 11) Nimuroti wa tungile olupale lunene, pole ka lingile ocipango ca Yehova. (Efetikilo 10:8, 9) Kuli omanu vakuavo okuti, va lekisa ongangu yiwa. Mose wa likala oku kala omunu umue wa kemãla vofeka Yegito. Eye, wa velisilepo ovina viespiritu okuti, “ukuasi wosi wo ke Egito u sule.” (Va Heveru 11:26) Ndotolo Luka, wa kuatisavo Paulu kuenda omanu vakuavo kovitangi vioku vela. Pole, wa litumbikilevo kupange woku kunda kuenda koku soneha Embimbiliya. Handi vali, Paulu ka kũlĩhĩwile ndomunu wa loñoloha Kovihandeleko. Pole, wa kũlĩhĩwile ndomisionaliu kuenda “ndupostolo wa vakualofeka.”—Va Roma 11:13.
17 Daviti ka ivalukiwa nda umue kesongo liasualali, ale ukuakuimba ovisungo, pole, wa kala “ulume ukuotima [uwa ku Suku].” (1 Samuele 13:14) Daniele ka kũlĩhĩwile omo liupange a linga kombonge ya soma yo Bavulono. Pole, wa kũlĩhĩwa omo lioku kala uprofeto wa Yehova. Ester, ka kũlĩhĩwile nda nasoma yoko Persia. Pole, wa kũlĩhĩwa omo liutõi kuenda ekolelo. Petulu, Andereu, Tiago, kuenda Yoano, ka va kũlĩhĩwile ndanyanga vomanu. Pole, va kũlĩhĩwa ndovapostolo va Yesu. Handi vali, Yesu ka kũlĩhĩwile okuti “carpinteiro,” pole wa kũlĩhĩwa okuti, “Kristu.” (Marko 6:3; Mateo 16:16) Ndaño okuti omanu va tukuiwa ndeti, va kuatele ovoloño a litepa, ovokuasi, kuenda ekemãlo, ka va pitisile kovaso ovopange avo. Pole, va velisilepo upange woku vumba Suku. Ovo va kũlĩhĩle okuti, oco va tambule onima ya velapo, va sukilile oku sumbila Suku lutima wavo wosi.
18. Manji umue umalẽhe wa nolapo oku kuama onjila yipi kuenda nye a limbuka?
18 Manji Seung Jin, wa tukuiwa kefetikilo liocipama cilo, wa kuata elomboloko liovolandu a tukuiwa ndeti. Eye wa popia hati: “Noke lioku pesela otembo longusu yange koku kala ondotolo, oku kuata uloño woku linga ovina vimue, loku kala ulongisi, nda nõlapo oku pesila otembo yange koku vumba Suku. Cilo, ndi kasi oku longisa Embimbiliya vocikanjo muli ekambo liakundi, loku kuatisa omanu oku kuata elavoko liomuenyo kopui. Nda limbuka okuti, upange wakundi votembo yosi u nena esanju. Cilo omuenyo wange ukasi ciwa, omo lioku likolisilako oku lekisa ovituwa viwa, kuenje ndi tẽla oku talavaya lomanu vakuapata a litepa. Omo liaco, nda limbuka okuti oku linga ocipango ca Yehova oco lika cinena esanju komuenyo.”
19. Tu pondola ndati oku limbuka esilivilo liomuenyo?
19 Omo okuti Tuakristão, tua sumũlũisiwa lukũlĩhĩso wocili, kuenda elavoko lioku popeliwa. (Yoano 17:3) Omo liaco, tu yuvuli oku “tambula ocali ca Suku leselula.” (2 Va Korindo 6:1) Pole, tu pesili otembo yetu koku sivaya Yehova. Tu kundili omanu esapulo li nena esanju liocili cilo, lelavoko lioku kuata omuenyo ko pui. Omo liaco, tu tava kolondaka via Yesu wa popia hati: “Esumũlũho li tunda koku eca olio lia lua, eli li tunda koku tambula li sule.” (Ovilinga 20:35) Nda tua ci linga, tu limbuka esilivilo liomuenyo.
[Etosi pombuelo yemẽla]
a Olonduko vimue via pongoluiwa.
[Apulilo Elilongiso]
• Ocina cipi cavelapo tu sukila oku linga komuenyo?
• Momo lie ka ca sungulukilile oku pitisa kovaso ovokuasi?
• ‘Omuenyo upi wocili’ Suku a tu likuminya?
• Tu pondola ndati oku tiamisila utima koku linga ocipango ca Suku?
[Elitalatu kemẽla 20]
Akristão va sukila oku likolisilako oku kuama onjila ya sunguluka