Ove hẽ wa Siata Oku Lembeleka Vakuene?

VOMBUELE Yomunda Antilíbano, muli Omunda Hermone yi kuete 2.814 kolometulu koku lepa okuti, o kalunga ka muiwila vombuelo. Vokuenda kuanyamo alua, kilu liomunda Hermone kua siata oku kala ocikokoto, kuenje eci ci yenguluka ci pongoloka owume. Noke owume waco u lokila koviti vinene via posoka vi kasi vemehi liaco, koviti viapako, kuenda koviti viayuva. Kotembo ya va Isareli, owume waco owo wa enda oku talalisa ovikũla pokuenye.

Vocisungo cimue ca imbiwa lekuatiso lia Suku, elitokeko liafendeli va Yehova, lia sokisiwa “ndowume wa Hermone u wila wila kolomunda via Siono.” (Osamo 133:​1, 3) Ndeci Omunda Hermone ya enda oku talalisa ovikũla lowume, etu tu pondolavo oku eca elembeleko ku vakuetu. Tu ci linga ndati?

Yesu wa Enda Oku Lembeleka Omanu

Yesu Kristu, wa eca ekuatiso liocili ku vakuavo. Ndaño muẽle vana va enda oku lisanga laye vapuluvi atito, va tambula elembeleko. Evangeliu lia sonehiwa la Marko li popia hati: “[Yesu] wa . . . angata [omãla], kuenje oku va kapa ovaka aye, wa va sumũlũisa.” (Marko 10:​16) Omãla vaco va tambula elembeleko liocili!

Yesu kuteke waye wa sulako palo posi, wa sukula olomãhi violondonge viaye. Umbombe waye, wa vetiya ovitima viavo. Eye wa va sapuila hati: “Ndo wihi ongangu okuti vu lingavo ndeci ndo lingi.” (Yoano 13:​1-​17) Omo liaco, va sukililevo oku lekisa umbombe. Ndaño okuti, vepuluvi liaco ovapostolo ka va kuatele elomboloko liolondaka evi, kuenda noke va fetika oku lihoya helie wa velapo pokati kavo, Yesu ka va temelẽle. Pole wa sapela lavo lepandi. (Luka 22:​24-​27) Ndaño ceci Yesu “vo lavisa, ka va tiuwilile elaviso [liaco].” “[Eci] vo talisa ohali, ka sokoluile oku va fetuluinya, puãi wa talamela u o tetulula olondaka lesunga.” Omo liaco, tu sukila oku kuama ongangu ya Yesu yoku eca elembeleko.​—⁠1 Petulu 2:​21, 23.

Yesu wa popia hati: “Likapi okanga yange kuenda lilongisi kokuange, momo ndonjuka, haime nda liketisa vutima, oco vu sanga ekavuluko vovitima viene.” (Mateo 11:​29) Sokolola ndeci okuti, o kasi oku longisiwa la Yesu. Noke lioku yevelela eci a kala oku longisa vo sunangonga, omanu vosi vo vimbo liaye va komoha calua, kuenje va popia hati: “Olondunge evi lunene u wa vi upa pi?” (Mateo 13:​54) Oku tanga ovolandu atiamẽla komuenyo wa Yesu kuenda kupange waye woku kunda, ci tu longisa oku lembeleka vakuetu. Omo liaco, tu konomuisi ndomo Yesu a lekisa ongangu yiwa koku vangula kuenda koku kuatisa omanu.

Vangula Ovina vi Lembeleka Vakuene

Ca leluka oku nyõla onjo yimue, pole, oku tunga yokaliye ka ca lelukile. Onumbi eyi yoku nyõla kuenda oku tunga onjo, yi tiamisiwilavo koku vangula kuetu. Omo okuti ka tualipuile, tua siata oku lueya. Soma Salomone wa popia hati: “Ka kuli ukuesunga kilu lieve okuti o lingainga esunga kuenje ka lueya.” (Ukundi 7:​20) Ca leluka oku limbuka akulueya omunu ukuavo, kuenda oku u vetela evelo lolondaka vimue vi sumuisa. (Osamo 64:​2-4) Pole, oco tu kuate ocituwa coku popia olondaka vi lembeleka vakuetu, ka ca lelukile. Tu sukila oku likolisilako oku kuata olondunge viaco.

Yesu oku vangula kuaye, kua enda oku lembeleka omanu. Eye wa eca elembeleko liaco poku va kundila olondaka viwa Viusoma. (Luka 8:⁠1) Yesu wa lembelekavo vana va linga olondonge viaye poku va situluila eci catiamẽla ku Isiaye wokilu. (Mateo 11:​25-​27) Eli olio esunga lieci omanu va lianjelele la Yesu!

Ocituwa ca Yesu, ca litepele leci ca vakuavisonehua kuenda va Fariseo okuti ka va kapeleko ovina vakuavo va sukila. Yesu wa popia hati: “Va sole olomangu viunene kolofesta, lolomangu viokovaso volosunangonga.” (Mateo 23:⁠6) Ovo ka va kapeleko omanu, momo va popia hati: “Owiñi [owu] ka wa kũlĩhile ovihandeleko, wa siñaliwa.” (Yoano 7:​49) Ovituwa viavo, vi lekisa okuti ka va endaile oku lembeleka vakuavo!

Olondaka vietu, olonjanja vimue ovio vi lekisa eci ci kasi vutima wetu, kuenda ndomo tu tenda vakuetu. Yesu wa popia hati: “Omunu wa sunguluka, kukuasi uwa wutima waye upopako evi viwa, puãi omunu wa vĩha, kukuasi waye wa vĩha upopako evi via vĩha, momo eci ce yuka vutima haico omela u popia.” (Luka 6:​45) Nye tu sukila oku linga oco tu kũlĩhe nda olondaka vietu vi lembeleka vakuetu?

Osimbu handi ka tua vanguile ondaka yimue, tu sukila oku sokolola ndomo tu yi popia. Elivulu Liolosapo 15:​28, li popia hati: “Ondingesunga yi sokolola eci a tambulula.” Pole, ka tu sukila oku pita otembo yalua loku sokolola eci tu yongola oku vangula. Tu sukila oku kũlĩhĩsa lutate nda olondaka vietu vi valula vakuetu ale vi lembeleka. Omo liaco, tu sukila oku lipula ndoco: ‘Anga hẽ olondaka ndi yongola oku popia vi lekisa ocisola? Olondaka viaco hẽ viocili, ale viesanda? Anga hẽ, ndi kasi oku vi popia ‘votembo vi sesamẽla?’ Vi kuatisa hẽ vana ndi vi sapuila kuenda vi va lembeleka?’ (Olosapo 15:​23) Nda tua limbuka okuti olondaka vietu ka via sungulukile, ale ka vi sesamẽla oku vi popia vepuluvi liaco, tu sukila oku vi yuvula. Olondaka viosi ka via sungulukile, tu sukila oku vi piñainya levi viwa haivo via sunguluka. Olondaka ka via sungulukile, ale viukãlu, vi kasi “ndokutoma kuosipata,” pole, olondaka via sunguluka, vi “sakula.”​—⁠Olosapo 12:⁠18.

Ocina cikuavo ci tu kuatisa oku vangula ovina vi lembeleka, oku sokolola ndomo vamanji va soliwe la Suku. Yesu wa popia hati: “Lomue o tẽla oku iya kokuange, te Isia wa numa u koka.” (Yoano 6:​44) Yehova wa kapako ovituwa viwa viomanu vaye vo kolela, ndaño vana tu sima okuti, ka va kuete ovituwa viwa. Nda tua likolisilako oku kũlĩhĩsa ovituwa viavo viwa, tu kuata esunga lioku vangula ovina viwa viatiamẽla kokuavo.

Kuatisa Vakuene

Yesu wa kapeleko vana va tala ohali. Onjanja yimue “eci a mola owiñi womanu, wa va kuatela ohenda momo va pekengua kuenda va sakalaisua ndolomeme ka vi kuete ungombo.” (Mateo 9:​36) Pole, omo okuti Yesu ka limbukile lika ohali yomanu vaco, wa va ĩha ekuatiso likuavo. Eye wa va laleka hati: “Enjui kokuange, vosi wa sovoloki kuenda wa lemiwi kuenje ndu kavuluisi.” Noke, wamisako hati: “Okanga yange ya sunguluka, locitele cange ca leluka.”​—⁠Mateo 11:​28, 30.

Koloneke vilo, tu kasi ‘kotembo yohali.’ (2 Timoteo 3:⁠1) Omanu valua, va lemiwa ‘lohele yoluali.’ (Mateo 13:​22) Vakuavo va lemiwa lovitangi viomuenyo. (1 Va  Tesalonike 5:​14) Nye tu sukila oku linga oco tu lembeleke omanu vaco? Tu pondola oku va kuatisa kovitangi viaco ndeci Kristu a linga.

Omanu vamue, va siata oku sanda ekavuluko poku vangula catiamẽla kovitangi viavo. Nda umue o kasi lovitangi o tu sandiliya oco tu u kuatise, ka tu sukila hẽ oku sanda otembo yoku u yevelela? Oco tu kale onjeveleli yiwa, tu sukila oku li pindisa etu muẽle. Vepindiso liaco, mua kongela oku yevelela lutate ovina omunu a kasi oku tu sapuila okuti, ka tu sokolola lika ndomo tu u tambulula, ale ndomo tu tetulula ocitangi caye. Pole, tu lekisa okuti tua kapako omunu o vangula letu, poku u yevelela lutate loku yolapo kamue nda citava.

Vekongelo, tu kuete apuluvi alua oku lembeleka vamanji. Eci tu enda kolohongele Vonjango Yusoma, tu sukila oku sapela la vana va liyaka lovitangi vioku vela. Nda tua sapela lavo vokuenda kuakukutu amue osimbu handi ohongele ka ya fetikile, ale kesulilo liohongele, ci va lembeleka. Tu sukilavo oku sandiliya vana ka veyile Kelilongiso Lielivulu. Tu pondola oku ci linga poku sapela lavo vo telefone, kuenda oku va vetiya oco veye kolohongele vikuavo.​—⁠Va Filipoi 2:⁠4.

Akulu vekongelo va kuete ocikele cinene vekongelo. Omo liaco, tu pondola oku va kuatisa poku pokola kokuavo kuenda oku tẽlisa ovikele viosi tu tambula. Ondaka ya Suku yi tu vetiya hati: “Pokoli kasongui vene loku linga eci va tuma, momo va kasi loku lavulula ovimuenyo viene ndava va lombolola noke ndomo va vi tata. Pokoli kokuavo okuti va ci linga lesanju, haloku lisiõsiõlako, momo nda va ci linga loku lisiõsiõla nda ka cu kuatisi.” (Va Heveru 13:​17) Nda tua lekisa epokolo liaco, tu eca elembeleko ku vana va “talavaya ciwa.”​—⁠1 Timoteo 5:⁠17.

Kuata Upopi wa Sunguluka Kuenda Ovilinga vi Kuatisa

Atosi owume eci a lokila posi, a molẽha ndu okuti, ka a kuete esilivilo. Cimuamue haico catiamẽla koku eca elembeleko ku vakuatu. Olio, ka li tundi lika kovina vinene tu lingila vakuetu ndeci ci pita lekuatiso tu eca komanu omo liovituwa tua siata oku lekisa otembo yosi kokuavo.

Upostolo Paulu wa soneha hati: “Lisoli pokati ndomunu la manjaye. Koku sumbila, velisipo vakuẽle.” (Va Roma 12:​10) Tu pokoli kelungulo lia Paulu. Omo liaco, tu amamiko oku lembeleka vakuetu lolondaka kuenda lovilinga vietu.

[Elitalatu kemẽla 31]

Oku yevelela lutate, ku lembeleka vakuetu

[Elitalatu kemẽla 32]

Owume wo Komunda Hermone, u talalisa ovikũla