Kuama Ongangu Ya Yesu Yoku Longisa Omanu

“Lunguki ndeci vu yeva.”​—⁠LUKA 8:⁠18.

1, 2. Momo lie o sukilila oku kuama ongangu ya Yesu yoku lianja lomanu kupange woku kunda?

YESU KRISTU wa tẽlisa ocikundi caye coku kala Ulongisi Wavelapo koku longisa omanu. Eye wa sapuila olondonge viaye hati: “Lunguki ndeci vu yeva.” (Luka 8:​16-​18) Onumbi eyi yi tiamisiwilavo kokuove Ukristão, omo liocikele cove coku kunda. Nda wa pokola kolonumbi viovina viatiamẽla ku Suku kuenda kocipango caye, o kũlĩha eci o popia, kuenje o loñoloha kupange woku kunda Usoma. Koloneke vilo, ku tẽla oku yeva ondaka ya Yesu. Pole, o pondola oku tanga ovina a popia, levi a linga, ndomo via situluiwa Vovisonehua. Ovina viaco vi situlula nye catiamẽla ku Yesu ndomo a lianjele lomanu kupange woku kunda?

² Yesu wa loñolohele koku kunda olondaka viwa viusoma, kuenda wa longisa ciwa Ovisonehua. (Luka 8:1; Yoano 8:​28) Vupange woku longisa omanu, mua kongela oku kunda kuenda oku longisa. Pole, Akristão vamue va loñoloha, va siata oku kuata ocitangi coku longisa ciwa omanu. Vupange waco, mua kongela oku eca esapulo, loku longisa omanu catiamẽla ku Yehova kuenda kocipango caye. Pole, ukundi o sukila oku kuata ukamba lomunu a kasi oku longisa. (Mateo 28:​19, 20) Eye, o ci linga poku kuama ongangu ya Yesu Kristu, Ulongisi Wavelapo koku longisa Omanu.​—⁠Yoano 13:⁠13.

3. Ongangu ya Yesu yi pondola ndati oku ku kuatisa koku longisa omanu?

³ Nda wa kuama ongangu ya Yesu koku longisa, ciku kuatisa oku pokola kelungulo liupostolo Paulu wa popia hati: “Kali lolondunge eci vu kasi la vakualuali. Popeli otembo, ka yi ka peseke ño. Upopi wene u kale lumbombe loku singiwa lomongua, okuti vu kumbulula ciwa omunu omunu wo puli cimue.” (Va Kolosai 4:​5, 6) Oco o kuame ongangu ya Yesu kupange woku longisa omanu, o sukila oku likolisilako. Pole, o pondola oku loñoloha koku longisa, momo ongangu yaye, yi ku kuatisa oku ‘kumbulula ciwa omunu lomunu oku pula cimue.’

Yesu wa Vetiya Vakuavo Oku Vangula

4. Momo lie tu popela okuti Yesu wa kala onjeveleli yiwa?

⁴ Yesu tunde vutila, wa kuata ocituwa coku yevelela omanu kuenda wa va vetiya oku situlula ovisimĩlo viavo. Eci a kuata 12 kanyamo, olonjali viaye vio sangele pokati kalongisi vonembele, muna a kala “oku va yevelela loku va pula pula.” (Luka 2:​46) Yesu ka endele vonembele oco a lavise alongisi omo liukũlĩhĩso waye. Eye wa endelemo oku va yevelela kuenda oku va linga apulilo. Omo okuti wa kala onjeveleli yiwa, co kuatisa oku soliwa la Suku kuenda lomanu.​—⁠Luka 2:⁠52.

5, 6. Tua kũlĩha ndati okuti Yesu wa yevelela vana va enda okuiya ko kuaye?

⁵ Yesu noke liepapatiso liaye kuenda noke yoku linga Mesiya ombuavekua, wamamako locituwa caye coku yevelela omanu. Eye ka pitisile lika kovaso ovina a kala oku longisa, okuti ka kapiko vana va enda okuiya kokuaye loku u yevelela. Olonjanja vimue, wa enda oku pula eci omanu va sima kuenda oku yevelela atambululo avo. (Mateo 16:​13-​15) Noke liolofa via Lasaru, Yesu wa sapuila Marta hati: “Wosi o kasi lomuenyo, kuenje o ñolela, ka fi vali.” Noke wo pula hati: “Eci hẽ, o ci kolela?” Kuenje, Yesu wa yevelela Marta wa tambulula hati: “Oco, a Ñala, nda kolela ale okuti vu Kristu, vu Mõla a Suku.” (Yoano 11:​26, 27) Eye wa sanjukile calua poku yeva Marta wa lekisa ekolelo liaye volondaka evi!

⁶ Eci olondonge vialua via siapo Yesu, eye wa yevelela ovisimĩlo viovapostolo vaye. Kuenje, wa pula hati: “Lene wendivo?” Simono Petulu wa tambulula hati: “A Ñala, kulie tu enda? Ove, ove o kasi lolondaka viomuenyo ko pui. Etu tua kolela, kuenda tua limbuka okuti ove U o kola wa Suku.” (Yoano 6:​66-​69) Olondaka evi via sanjuisa calua Yesu! Nda omunu ove o longisa Embimbiliya wa tukulavo olondaka evi, ci sanjuisavo utima wove.

Yesu wa Yevelela Lesumbilo

7. Momo lie valua va Samaria va tavela ku Yesu?

⁷ Esunga likuavo li lekisa okuti Yesu wa loñolohẽlele kupange woku longisa lieli okuti, wa kuatisa omanu kuenda wa enda oku va yevelela lesumbilo. Onjanja yimue, Yesu wa kundilile ukãi umue u Samaria ocipepi lonjombo ya Yakoba ko Sukare. Osimbu Yesu a kala oku sapela laye, ka lomboluile ovina viosi. Pole, wa yevelela eci ukãi a kala oku popia. Osimbu Yesu a kala oku u yevelela, wa limbuka onjongole yaye yoku fendela. Kuenje, wo sapuila hati, Suku o kasi oku sandiliya vana va yongola oku U fendela lespiritu kuenda locili. Omo okuti, Yesu wa lekisa esumbilo kuenda wa kapeleko ukãi waco, noke wa sapuila vakuavo catiamẽla kokuaye. Omo liaco, “va Samaria va lua vakuimbo liaco vo tavela ondaka yukãi wa imba uvangi.”​—⁠Yoano 4:​5-29, 39-42.

8. Oku kapako ovisimĩlo viomanu ci ku kuatisa ndati oku fetika ombangulo kupange woku kunda?

⁸ Omanu va sanjuka calua poku lekisa ovisimĩlo viavo. Omanu vamue va kala ko Atenai, va sanjukilile oku lekisa ovisimĩlo viavo kuenda oku yevelela ovina viokaliye. Kuenje, ca kuatisa upostolo Paulu oku linga ciwa ohundo kokamunda kamue ka tukuiwa hati Areópago, ka kala volupale luaco. (Ovilinga 17:​18-​34) Kupange woku kunda, eci o fetika ombangulo lomunu umue konjo yaye, o sukila oku popia hati: “Ndeya oku ku nyula, momo ndi yongola oku yevelela ocisimĩlo cove catiamẽla kondaka eyi. [Tukula etosi limue].” Yevelela ocisimĩlo caye ale linga epulilo liatiamẽla kondaka yaco. Noke, lekisa eci Embimbiliya li popia catiamẽla kondaka yaco.

Yesu wa Kũlĩhĩle Ndomo a Fetika Ombangulo

9. Nye Yesu a linga osimbu ka ‘situluile Ovisonehua’ ku Kelopa lekamba liaye?

⁹ Yesu lalimue eteke a kambelele ondaka yoku popia. Ndaño wa kala onjeveleli yiwa, wa sakalalele leci omanu va enda oku sima catiamẽla kokuaye, kuenda wa kũlĩhĩle eci a sukilile oku popia. (Mateo 9:4; 12:​22-30; Luka 9:​46, 47) Tu kũlĩhĩsi ocindekaise eci: Noke liepinduko lia Yesu, olondonge viaye vivali via tunda ko Yerusalãi, kuenje via endele kimbo li tukuiwa hati Emausi. Ulandu Wevangeliu u popia hati: “Osimbu va kala loku vangula loku likumbolola, Yesu eye muẽle wa kokela ocipepi kuenje wa endela kumue lavo. Puãi ovaso avo a sitikiwa okuti ka volimbukile. Oco, eye wa va pula hati, ‘Ondaka ye vu kasi oku enda loku vangula?’ Va talama loku nyumala. Umue, onduko yaye Kelopa, wo kumbulula hati, ‘Pokati kakombe va kasi vo Yerusalãi, ove lika nga kua kũlĩhile ovina via lingiwamo oloneke vilo?’ Oco wa va pula hati, ‘Ovina vie?’” Ulongisi Wavelapo, wa yevelela eci omanu va popia hati, Yesu u Nasara wa longisa omanu, wa linga ovikomo, kuenje wa pondiwa. Noke, wa pinduiwa kolofa. Omo liaco, Yesu wa ecelela Kelopa lekamba liaye oku lombolola ovisimĩlo viavo. Kuenje, wa va lomboluila eci va sukilile oku kũlĩha poku va “situluila Ovisonehua.”​—⁠Luka 24:​13-27, 32.

10. O pondola ndati oku limbuka ovisimĩlo via umue ukuetavo o sanga kupange woku kunda?

¹⁰ Kupange woku kunda, citava okuti ku kũlĩha lacimue catiamẽla kovisimĩlo via umue ukuetavo o sanga konjo. Oco o limbuke ovisimĩlo viaye, o sukila oku u sapuila okuti, o sole oku yevelela eci omanu va sima catiamẽla kolohutililo. Noke, pula ndoco: “O tava hẽ okuti kuli umue ukuakuyevelela olohutililo?” Etambululo liaye, citava okuti li situlula ovisimĩlo vialitepa viomanu kuenda evi viatiamẽla ketavo. Nda omunu waco ukuetavo, citava oku amako lombangulo poku u pula ndoco: “Otava hẽ okuti Suku o yevelela olohutililo viosi, ale kuli vimue okuti ka vi yevelela?” Apulilo aco, a ecelela oku kuata ombangulo yiwa. Nda citava, lekisa Ocisonehua ci lombolola etosi ukasi oku sapela. Pole, ci linga luloño okuti kupisa etavo liaye. Nda wa sola ombangulo yove, citava okuti o pinga oco o tiuke vali. Nda eye wa linga epulilo limue okuti ku tẽla oku li tambulula, nye o sukila oku linga? O sukila oku lipongiya okuti eci o tiuka, o tẽla oku eca etambululo liatiamẽla ‘kelavoko liove. Pole, ci linga lumbombe kuenda lesumbilo.’​—⁠1 Petulu 3:⁠15.

Yesu wa Longisa Vakuavitima Via Sunguluka

11. Nye ci ku kuatisa oku sanga vakuavitima via sunguluka, va yongola oku longisiwa?

¹¹ Omo okuti Yesu wa lipuile, wa tẽla oku limbuka vana va sesamẽla oku longisiwa. Koloneke vilo, ka calelukile oku sanga vana “va noliwila omuenyo ko pui.” (Ovilinga 13:​48) Cimuamue haico ca pita lovapostolo Yesu a sapuila hati: “Vimbo liosi wiñili, ci kale linene, ci kale litito, kũlĩhisimo umue wa sunguluka.” (Mateo 10:​11) O sukila oku kuama ongangu yovapostolo va Yesu, poku sandiliya omanu vana va yongola oku yevelela oco va longisiwe Ovisonehua. O pondola oku sanga vakuavitima via sunguluka, poku yevelela lutate omanu o kundila, poku limbuka ekalo liomunu lomunu.

12. O pondola ndati oku amamako loku kuatisa omunu wa lekisa onjongole?

¹² Noke yoku litepa lomunu wa lekisa onjongole kesapulo Liusoma, amamako oku sokolola ovina viespiritu a sukila oku lilongisa. Nda wa soneha atosi wa sapela lomunu waco catiamẽla kolondaka viwa, ci ku kuatisa oku amamako oku u longisa ovina viespiritu. Poku linga epasu, nda o yongola oku kũlĩha ovina viatiamẽla ketavo liomunu wa sapela laye, kuenda ekalo liaye, yevelela lutate.

13. Nye ci ku kuatisa oku limbuka ovisimĩlo viomunu viatiamẽla Kembimbiliya?

¹³ O pondola ndati oku vetiya omanu oco vaku sapuile ovisimĩlo viavo viatiamẽla Kondaka ya Suku? Kovikanjo vimue, ca sunguluka oku pula ndoco: “Wa siata hẽ oku sima okuti ka calelukile oku kuata elomboloko Liembimbiliya?” Etambululo omunu a eca olio li lekisa nda wa kapako ovina viespiritu ale sio. Olonjanja vimue tu pondola oku tanga ocinimbu Cembimbiliya loku pula ndoco: “Ove hẽ o tava kondaka eyi?” Omo liaco, kupange woku kunda o sukila oku linga apulilo a sunguluka ndeci Yesu a linga. Pole, o sukilavo oku lavulula poku ci linga.

Yesu wa Linga Apulilo a Sunguluka

14. O pondola ndati oku kapako ovisimĩlo viomanu poku linga apulilo?

¹⁴ O sukila oku kapako ovisimĩlo via vakuene poku yuvula oku va sumuisa. Kuama ongangu ya Yesu. Eye ka lingile apulilo a sumuisa, pole wa linga apulilo a vetiya omanu oku sokolola. Yesu wa kalavo onjeveleli yiwa poku lembeleka omanu loku ecelela okuti va lianja laye. (Mateo 11:​28) Omanu vosi va lianjele oku sapela laye loku lombolola ovitangi viavo. (Marko 1:40; 5:​35, 36; 10:​13, 17, 46, 47) Nda vamue va yongola oku vangula love ovisimĩlo viavo viatiamẽla Kembimbiliya, kuenda kueci li longisa, yuvula oku linga apulilo ana a va sumuisa.

15, 16. O pondola ndati oku kongela omanu vombangulo yatiamẽla ketavo?

¹⁵ Oku linga apulilo a sunguluka, ci ku kuatisa oku fetika ombangulo poku popia ovina via sunguluka kuenda oku yevelela atambululo. Onjanja yimue Yesu wa sapuila Nikodemo hati: “Omunu ka tẽla oku mola usoma wa Suku, te wa citiwa evali.” (Yoano 3:⁠3) Olondaka evi via vetiya Nikodemo oku tambulula kuenda oku yevelela Yesu. (Yoano 3:​4-​20) Ove o pondolavo oku kuama ongangu yaco, poku kongela omanu vombangulo.

¹⁶ Omo okuti cilo atavo a kasi oku livokiya voluali, ca leluka oku vangula lomanu catiamẽla ketavo kolofeka ndeci, vo Afrika, Kutundilo woko Europa kuenda ko Amerika Latina. Vovikanjo viaco, o pondola oku fetika ombangulo poku popia hati: “Nda sakalala calua omo liatavo a kasi oku li vokiya voluali. Pole, ndi kuete elavoko liokuti, omanu voluali luosi ndopo vaka kuama lika efendelo limosi liocili. Ove hẽ ku yongola oku tala ndomo cika tẽlisiwa?” Nda wa vangula cimue ci komohisa catiamẽla kelavoko liove, o kuatisa omanu oku situlula ovisimĩlo viavo. Caleluka oku eca atambululo nda tu kuete olonjila vivali vi tu kuatisa oku cilinga. (Mateo 17:​25) Nda omunu wa sanga konjo o popia cimue catiamẽla kepulilo liove, eca etambululo loku tanga ocinimbu cimosi ale vivali viovisonehua. (Isaya 11:9; Sofoniya 3:⁠9) Oku yevelela lutate loku limbuka etambululo liomunu, ci ku kuatisa oku sokiya etosi oka lombolola onjanja yikuavo.

Yesu wa Yevelela Omãla

17. Nye ci lekisa okuti Yesu wa kapeleko omãla?

¹⁷ Yesu ka kapeleko lika akulo, pole wa kapelekovo omãla. Eye wa kũlĩhĩle olomapalo omãla va sole oku linga kuenda ovina va popia. Olonjanja vimue, wa enda oku va laleka okuiya kokuaye. (Luka 7:​31, 32; 18:​15-​17) Omãla valua, va kala pokati kowiñi oco va yevelele Yesu. Eci amalẽhe vamue va kaluka loku sivaya Yesu Mesiya, eye wa lombolola eci ovisonehua via popele catiamẽla kondaka yaco. (Mateo 14:21; 15:38; 21:​15, 16) Koloneke vilo, omãla valua va kasi oku linga olondonge via Yesu. O pondola ndati oku va kuatisa?

18, 19. O pondola ndati oku kuatisa omõla wove lovina viespiritu?

¹⁸ Oco o kuatise omõla wove oku linga ondonge, o sukila oku u yevelela. O sukilavo oku kuata elomboloko liovisimĩlo viaye okuti, vi likuata levi via Yehova. Ndaño omõla wa popia cimue ka ca sungulukile, ove unjali o sukila oku u tambulula lesunguluko. Noke, sandiliya ovinimbu viovisonehua vi pondola oku kuatisa omõla oku kuata elomboloko ndomo Yehova a tenda ovitangi tua siata oku liyaka lavio.

¹⁹ Apulilo a pondola oku ku kuatisa oku limbuka ovisimĩlo viomãla. Pole, ndeci ca siata oku pita lakulu okuti ka va sole oku lingiwa apulilo alua, cimuamue haico ca siata oku pita lomãla. Omo liaco, yuvula oku pula ovina viatatama komõla. Pole, lombolola ovina vi vetiya oku situlula ovisimĩlo viaye. Lomboluila omõla esunga lieci wa kuamela onjila yaco. Noke citava oku u pulisa ndoco: “Nye o sima catiamẽla kondaka eyi?” Nda wa ci linga, ci kuatisa omõla wove, kuenda cu vetiya oku lombolola ovina vikuavo viatiamẽla kovisonehua.

Amamako Oku Kuama Ongangu ya Yesu Yoku Longisa

20, 21. Momo lie o sukilila oku yevelela lutate kupange woku kunda?

²⁰ Oku yevelela lutate, ku kuete esilivilo poku kuatisa omõla ale omunu ukuavo. Nda tua ci linga, tu lekisa ocisola. O lekisa umbombe locisola kuenda esumbilo, poku yevelela umue o vangula. Oco o yevelele lutate, o sukila oku kapako olondaka omunu a kasi oku popia.

²¹ Osimbu amamako kupange woku kunda, yevelela lutate omanu o sanga vocikanjo. Nda wa yevelela eci va kasi oku vangula, ci ku kuatisa oku limbuka atosi Embimbiliya a pondola oku va kuatisa. Noke va kuatisa loku kuama olonjila via litepa vioku longisa ndeci Yesu a linga. Nda wa ci linga, o kuata esanju lialua omo lioku kuama ongangu Yulongisi Wavelapo.

O Tambulula Ndati?

• Yesu wa vetiya ndati omanu oku situlula ovisimĩlo viavo?

• Momo lie Yesu a yevelila vana a longisa?

• Apulilo aku kuatisa ndati kupange woku kunda?

• Nye o sukila oku linga oco o kuatise omãla konepa yespiritu?

[Elitalatu kemẽla 26]

Kuata ocituwa coku yevelela kupange woku kunda