Apulilo Valingiwa Lavakuakutanga

Ukristão o Tenda Ndati Onjevo Loku Pipa?

Embimbiliya ka li pisa oku linga onjevo ndaño oku pipa. (Esinumuĩlo 14:​4, 5, 9, 20; Mateo 17:27; Yoano 21:⁠6) Pole, nda Ukristão enyanga ale ukuakupipa, o sukila oku kũlĩhĩsa lutate Ovisonehua.

Suku wa ecelela okuti, Noha lovitumbikila viaye va ponda ovinyama oco va lie ositu. Pole, osonde yaco, va sukilile oku yi pesila posi. (Efetikilo 9:​3, 4) Onumbi eyi, yi lekisa okuti tu sukila oku sumbila omuenyo wovinyama ndeci Suku a u tenda. Akristão va sukila oku yuvula oku ponda ovinyama olivova ale ndocitalukilo. Momo, ka ci lekisa esumbilo ku Suku usovoli womuenyo.​—⁠Olosapo 12:⁠10.

Tu sukilavo oku kũlĩhĩsa etosi likuavo liatiamẽla kondaka eyi. Ovapostolo vana va kala vakuakupipa, va enda oku sanjuka calua poku kuata ombisi yalua. Ovo ka va lipandele loku lekisa okuti va velelepo vakuavo omo lioku kuata ombisi yalua.​—⁠Osamo 11:5; Va Galatia 5:⁠26.

Omo liaco, tu sukila oku lipula ndoco: ‘Anga hẽ ndi tenda omuenyo wovinyamo ndeci Yehova a u tenda? Nda siata hẽ oku vangula lika catiamẽla koku linga onjevo kuenda koku pipa? Nda siata hẽ oku lekisa okuti ndinyanga ale ovituwa viange vi lekisa okuti ndindingupange ya Suku? Upange woku linga onjevo kuenda woku pipa ombisi u ndi vetiya hẽ oku kuata ukamba lomanu vana okuti havakuetavoko kuenda u ndi tateka oku tata epata liange?’​—⁠Luka 6:⁠45.

Omanu vana va sole oku linga onjevo ale oku pipa oco va tekule epata liavo, va siata oku popia hati, upange waco owo wa va tateka oku pitisa kovaso ovina viespiritu. Nda ka tu ecelela okuti upange umue u tu tateka oku pitisa kovaso ovina viespiritu, tu lekisa okuti tua kolela Suku. (Mateo 6:​33) Akristão va sukila oku pokola kovihandeleko via “Kaisare” viatiamẽla koku linga onjevo ale koku pipa ombisi ndaño pamue ka va kisikiwa oku ci linga.​—⁠Mateo 22:21; Va Roma 13:⁠1.

Omanu vamue va sukila oku kũlĩha olonumbi via Yehova viatiamẽla koku linga onjevo kuenda koku pipa oco va kuate ovisimĩlo ndevi Viaye. (Va Efeso 4:​22-​24) Tu sukilavo oku sumbila ovisimĩlo via vakuetu. Catiamẽla kondaka yaco, upostolo Paulu o tu lungula hati: “Ka tu ka lipisi pokati, puãi tu lipokuisi okuti lalimue eteke tu kapela manjetu ocilondokua.” (Va Roma 14:​13) Oku lekisa ocisola kuenda esumbilo ku vakuetu, ci nena ombembua vekongelo kuenda ci sanjuisa Ululiki wetu haeye Ono yovivimuenyo viosi.​—⁠1 Va  Korindo 8:13.a

[Etosi pombuelo yemẽla]