Kuama Ongangu Yomisionaliu Yavelapo
“Lingi muẽle olosetukuli viange ndomo ame ndisetukuli ya Kristu.”—1 VA KOR. 11:1.
1. Momo lie tu sukilila oku kuama ongangu ya Yesu Kristu?
UPOSTOLO Paulu, wa kuama ongangu ya Yesu Kristu, Omisionaliu yavelapo. Paulu wa vetiyavo Akristão hati: “Lingi muẽle olosetukuli viange ndomo ame ndisetukuli ya Kristu.” (1 Va Kor. 11:1) Yesu noke yoku eca kolondonge viaye elongiso lioku lekisa umbombe poku sukula olomãhi viavo, wa popia hati: “Ndo wihi ongangu okuti vu lingavo ndeci ndo lingi.” (Yoa. 13:12-15) Koloneke vilo, etu Tuakristão tu kuete ocikele coku kuama ongangu ya Yesu Kristu kolondaka vietu, kovilinga, kuenda kovituwa vietu.—1 Pet. 2:21.
2. Ndaño kua nõliwile Losungu Yolombangi Via Yehova oco o linge omisionaliu, ocituwa cipi o sukila oku kuata?
2 Vocipama ca pita tua lilongisa okuti, omisionaliu yi lomboloka omunu una o tumiwa koku kunda, okuti, o tuala olondaka viwa ku vakuavo. Omo liaco, Paulu wa linga apulilo amue a kuete esilivilo. (Tanga Va Roma 10:11-15.) Kũlĩhĩsa ndomo upostolo a pula hati: “Va yeva ndati nda lu o kunda sio?” Noke wa tukula ocitumasuku ca Isaya ci popia hati: “[Olomãhi] viava va sapula ondaka yiwa haiyo yombembua, via posoka nye!” (Isa. 52:7) Ove ndaño kua nõliwile oco o tumiwe kupange wumisionaliu kofeka yikuavo, o pondola oku kuata ombili poku kuama ongangu ya Yesu yoku kunda olondaka viwa. Unyamo wa pita, ci soka 6.957.852 kakundi Vusoma, va ‘kundila’ kueci ci soka 236 kolofeka.—2 Tim. 4:5.
“Tua Sia Ovina Viosi ha tu ku Kuama”
3, 4. Ovina vipi Yesu a sile kilu, kuenda nye tu sukila oku linga oco tu linge olondonge viaye?
3 Oco Yesu a tẽlise ocikele caye palo posi, “wa lipesela eye muẽle, wa linga ndupika,” poku siapo omuenyo waye wokilu kuenda ulamba waco. (Va Fil. 2:7) Ovina viosi tu linga koku kuama ongangu ya Kristu, ka vi sokisiwa levi Yesu a linga eci a kala palo posi. Pole, tu pondola oku amamako lepandi oku kala olondonge viaye, okuti, ka tu sokolola ovina tua sia konyima voluali lua Satana.—1 Yoa. 5:19.
4 Vepuluvi limue, upostolo Petulu wa sapuila Yesu hati: “Tua sia ovina viosi ha tu ku kuama.” (Mat. 19:27) Petulu, Andereu, Tiago, kuenda Yoano, va siapo awanda avo oku tamba ombisi eci va lalekiwa oco va kuame Yesu. Ovo va siapo upange wavo woku tamba olõsi, kuenje va litumbika kupange woku kunda. Ndomo ca lekisiwa Vevanjeliu lia Luka, Petulu wa popia hati: “Tua sia cetu cosi kuenje tua ku kuama.” (Luka 18:28) Valua pokati ketu ka tua ‘silepo ovina vietu’ viosi, oco tu kuame Yesu. Pole, tua yuvula ‘oku litenda etu muẽle,’ oco tu linge olondonge via Kristu kuenda oku vumba Yehova lutima wosi. (Mat. 16:24) Omo liaco, tua siata oku tambula asumũlũho alua. (Tanga Mateo 19:29.) Oku kuata ombili kupange woku kunda ndeci Kristu a linga, ci nena esanju, capiãla enene nda tua tẽla oku kuatisa umue oku kuata ukamba wocili la Suku kuenda Omõlaye wa soliwa.
5. Lombolola ulandu u lekisa eci ovingendelei vimue via siata oku linga noke yoku lilongisa ocili Cembimbiliya.
5 Ulume umue wo ko Brasil o tukuiwa hati Valmir, wa kala oku talavaya kupange woku fẽla ulu kofeka yo Suriname. Eye wa kala oholua kuenda wambatele omuenyo wa vĩha. Eci a kala volupale, wa fetika oku lilongisa Embimbiliya Lolombangi Via Yehova. Eye wa enda oku lilongisa oloneke viosi, kuenje wa linga apongoloko alua komuenyo waye kuenda wa papatisiwa. Eci a limbuka okuti upange waye wa kala oku kapa kohele ekolelo liaye, wa landisa ovina viaye vioku linga olomĩlu, kuenje wa tiukila ko Brasil oco a kuatise epata liaye konepa yespiritu. Ovingendelei via lua via kala oku talavaya kolofeka vikuavo kuli ovokuasi, noke yoku li longisa ocili Cembimbiliya, va siapo ovopange aco. Kuenje, via tiukila kolofeka viavo locimãho coku kuatisa apata avo kuenda omanu vakuavo konepa yespiritu. Akundi vaco Vusoma va lekisa ombili kupange woku kunda.
6. Nye tu sukila oku linga nda ka tu kuete epondolo lioku ilukila kovikanjo kuli ekambo liakundi Vusoma?
6 Olombangi vialua Via Yehova, via siata oku ilukila kovikanjo kuli ekambo liakundi Vusoma. Vamue va ilukila kolofeka vikuavo locimãho coku kunda. Pamue ka tu kuete epondolo lioku ilukila kolonepa vikuavo, pole tu pondola oku kuama ongangu ya Yesu poku li kolisilako kupange woku kunda lutima wosi.
Yehova Eca Epindiso li Sukiliwa
7. Olosikola vipi via siata oku lingiwa oco vi pindise vana va yongola oku kala akundi va loñoloha kupange woku kunda Usoma?
7 Tu pondola oku kuatisiwa lelongiso Yehova a kasi oku eca cilo ndeci Yesu a pindisiwavo la Isiaye. Yesu wa popia hati: “Ca sonehiwa Vovaprofeto citi, ‘Kuenje vosi va longisiwa la [Yehova] Suku.’” (Yoa. 6:45; Isa. 54:13) Koloneke vilo, kua siata oku lingiwa olosikola vioku tu pindisa oco tu kale akundi Vusoma va loñoloha. Vosi yetu tu kasi oku kuatisiwa Losikola Yupange Wakristão ya siata oku lingiwa vakongelo. Akundi votembo yosi, va siata oku pindisiwa kosikola Yakundi Vavelapo. Vana va litumbika kupange waco vokuenda kuotembo yalua, va siata oku lalekiwa oco va pindisiwe onjanja yavali kosikola yaco. Akulu vekongelo kuenda oloñuatisi viavo, va siatavo oku pindisiwa Kosikola Yupange Wusoma, oco va loñolohe koku kuatisa vamanji. Akulu vekongelo loloñuatisi viakulu vekongelo okuti ka va kuelele, va siata oku pindisiwa Kosikola Yoku Angiliya Olondingupange, oco va loñolohe koku kuatisa vakuavo kupange woku kunda. Vamanji vakuavo, va siata oku lalekiwa oku enda Kosikola yo Gileada oco va tambule epindiso lioku enda kupange wumisionaliu.
8. Vamanji vamue va siata oku velisapo ndati epindiso li kasi oku eciwa la Yehova?
8 Olombangi vialua Via Yehova, via siata oku linga esokiyo lioku enda kolosikola viaco. Manji Yugu wo kofeka yo Kanada omo okuti cime caye ka tavele oku u wiha oloneke vimue, wa siapo upange waco oco a ende Kosikola Yoku Angiliya Olondingupange. Eye wa popia hati: “Sia sumuile omo lionjila nda nõla. Nda ovo va nyihile otembo yaco ndombanjaile, nda ndamamako kupange waco lepokolo. Cilo nda lipongiya oku tambula ocikele cosi ci tunda ku Yehova.” Vamanji vamue va siata oku siapo ovina viavo oco va tambule epindiso li kasi oku eciwa la Suku.—Luka 5:28.
9. Lombolola ulandu umue u lekisa esilivilo lioku likolisilako oku longisa Ovisonehua.
9 Oku likolisilako oku longisa Ovisonehua, ci kuatisa omanu oku kula kespiritu. (2 Tim. 3:16, 17) Kũlĩhĩsa ulandu wa pita la Saulo wo kofeka yo Guatemala. Eye wa citiwa locitangi cimue vowoño okuti ka kuatele epondolo lioku patekela ovina vo longisa. Kuenje, ulongisi waye kosikola, wa sapuila inaye hati, nda wa kisika omõlaye oku lilongisa oku tanga, o nyõla olondunge viaye. Saulo wa tunda kosikola okuti ka tẽla oku tanga. Pole, umue Ombangi ya Yehova, wa longisa Saulo oku tanga lekuatiso liokalivulu losapi hati, Aplique-se à Leitura e à Escrita. Eci ca kuatisa Saulo oku tanga, kuenje wa linga ohundo Kosikola Yupange Wakristão. Eteke limue, ina ya Saulo wa lisanga lulongisi waye kupange woku kunda konjo lanjo. Eci ulongisi a yeva okuti Saulo wa lilongisa oku tanga, wa pinga ku inaye oco eye laye osemana yikuavo. Eci Saulo vonena, ulogisi wo pula hati: “Nye o yongola oku ndi longisa?” Saulo wa fetika oku u tangela ocinimbu cimue velivulu Embimbiliya li Longisa Nye? Ulongisi wa popia hati: “Si tava okuti cilo o kasi oku ndi longisa.” Noke ulonguisi wa fetika oku lila lesanju loku u kuata kapepe.
Elongiso li Vetiya Utima
10. Ovimalẽho vipi tu kuete vi tu kuatisa oku longisa ocili Cembimbiliya?
10 Yesu wa tiamisila elongiso liaye kovina Yehova o longisa kuenda wa longisa eci ca sonehiwa Vondaka ya Suku. (Luka 4:16-21; Yoa. 8:28) Tu kuama ongangu ya Yesu poku kapako elungulo liaye kuenda oku kuama Ovisonehua koku longisa. Vosi yetu tua siata oku popia kuenda oku sima ovina vimuamue, vi vetiya oku likuata omunga. (1 Va Kor. 1:10) Tua sanjuka calua omo okuti ‘ukuenje wa kolelua haeye wa lunguka,’ wa siata oku tu ĩha alivulu a lombolola eci ci kasi Vembimbiliya okuti a tu kuatisa oku likuata omunga koku longisa kuenda oku tẽlisa upange wetu woku kunda! (Mat. 24:45; 28:19, 20) Limue pokati kalivulu aco, elivulu losapi hati, Embimbiliya li Longisa Nye?, okuti cilo lia sandekiwa kueci ci soka 179 kalimi.
11. Manji umue ko Etiopia wa yula ndati elambalalo lekuatiso lielivulu Embimbiliya li Longisa Nye?
11 Oku lilongisa Ovisonehua lekuatiso lielivulu Embimbiliya li Longisa Nye?, ci pondola oku pongolola utima wovanyali vetu. Manji umue o tukuiwa hati, Lula okuti ukundi wavelapo kofeka yo Etiopia, eteke limue wa kala oku songola elilongiso Liembimbiliya kondonge yimue. Noke, umue ukuepata liondonge yaco, weya loku tema kuenda wa popia hati, ku sukila oku kuata elilongiso liaco. Manji Lula wa lekisa umbombe poku sapela lomunu waco loku tukula ocindekaise catiamẽla kolombongo viesanda ca tukuiwa kocipama 15 celivulu Embimbiliya li Longisa Nye? Noke, ukãi waco wa tulumuha kuenje wa ecelela oku malusula elilongiso. Onjanja yikuavo eci manji eyile oku linga elilongiso, eye wa kalapo kuenda wa popia hati, o yongolavo oku lilongisa Embimbiliya okuti, o feta olombongo! Noke manji wa fetika oku u longisa olonjanja vitatu vosemana, kuenje wamamako oku kula kespiritu.
12. Tukula ulandu umue u lekisa ndomo amalẽhe va pondola oku kuata onima yiwa koku longisa ocili Cembimbiliya.
12 Amalẽhe, va pondola oku kuatisa vakuavo lelivulu Embimbiliya li Longisa Nye? Umalẽhe umue o tukuiwa hati Keanu wo kofeka yo Havai, eci a kuata 11 kanyamo, wa kala oku tanga elivulu liaco kosikola. Noke ekamba liaye wo pula hati: “Momo lie ku tavela oku linga onepa kovipito?” Keanu wa eca etambululo loku tanga alomboluilo a vokiyiwako kocipama losapi hati: “Ci Tava hẽ Okuti Akristão va Linga Onepa Kovipito Violuali?” Kuenje, wa yulula velivulu kemẽla ku sangiwa olosapi viovipama viosi, loku pula ekamba liaye ocipama a yongola oku kũlĩhĩsa. Noke, wa fetika oku lilongisa Embimbiliya. Unyamo wa pita, Olombangi Via Yehova via songola eci ci soka 6.561.426 kalilongiso Embimbiliya. Valua pokati ka vamanji, va kuama elivulu Embimbiliya li Longisa Nye?, poku longisa omanu vaco. Ove hẽ, o kasi oku kuama elivulu eli poku longisa Embimbiliya?
13. Elilongiso Liembimbiliya lia siata oku kuatisa ndati omanu?
13 Oku lilongisa Ovisonehua lekuatiso lielivulu Embimbiliya li Longisa Nye?, ci kuatisa vana va yongola oku linga ocipango ca Suku. Manji umue ukundi olikasi kofeka yo Noruega, wa fetika oku songola elilongiso Liembimbiliya kepata limue lia tunda ko Zambia. Ulume waco lukãi waye va kuatele omãla vatatu vafeko, kuenda ka va yonguile vali oku kuata omãla. Eci ukãi a mina, va nõlapo oku pulumula oñaña yaco. Osimbu handi ka va endele kondotolo, va lilongisa ocipama losapi hati: “Ndomo Suku a Tenda Omuenyo.” Elitalatu lioñaña yi kasi vimo lia inaye, lia vetiya olohueli viaco oku yuvula oku pulumula. Ovo vamamako oku kula kespiritu kuenje, eci omõlaco a citiwa vo luka onduko ya manji ulume wa enda oku songola elilongiso liavo Liembimbiliya.
14. Lombolola ndomo oku pokola kovina tu longisa ku nena onima yiwa.
14 Ocina cimue cavelapo koku longisa kua Yesu, ceci okuti wambatele omuenyo u li kuata lovina a longisa. Omanu valua va siata oku sanjukila ovituwa viwa Violombangi Via Yehova, vi likolisilako oku kuama ongangu ya Yesu. Eteke limue, ulume umue ukualomĩlu kofeka yo Nova Zelândia ekãlu liaye lia nyõlehele, kuenda wa nyelisile ocipete caye. Noke lioku lombolola ulandu waco kolosipayu, umue pokati kavo wo sapuila hati: “Ocipete cove ci molẽha lika nda ca nõliwa Lombangi ya Yehova.” Manji umue wa kala oku eca ovikanda viasapulo, wa nõla ocipete caco. Ulume waco eci a yeva okuti, ocipete caye ca molẽha, wa enda konjo ya manji yaco. Eye wa sanjukile calua momo wa mola okuti, ovikanda viaye vi kuete esilivilo haimo via kala. Manji wo sapuila hati: “Ovina vi kasi vocipete cove sia vi sengele, momo Ndimbangi ya Yehova.” Ulume waco ukualomilu wa komõha calua eci a ivaluka olondaka sipayu o sapuilile lomẽle keteke liaco. Akristão vocili, va pokola kolonumbi Viembimbiliya va siata oku longisa, kuenda va kuama ongangu ya Yesu.—Va Hev. 13:18.
Kuama Ongangu ya Yesu Yoku Kapako Omanu
15, 16. Tu vetiya ndati omanu lesapulo tu kunda?
15 Ovituwa via Yesu via enda oku vetiya omanu oku yevelela esapulo liaye. Ocisola caye kuenda umbombe, via enda oku vetiya olohukũi okuiya kokuaye. Eye wa lekisa ohenda kokuavo kuenje, wa va lembeleka lolondaka kuenda wa sakula ovovei avo. (Tanga Marko 2:1-5.) Etu ka tu pondola oku linga ovikomo, pole, tu pondola oku lekisa ovituwa vi tu kuatisa oku longisa ocili komanu ndeci, ocisola, umbombe, kuenda ohenda.
16 Ohenda ya kuatisa manji umue ukãi ukundi olikasi o tukuiwa hati Tariua, poku kundila konjo lanjo, eci a sapela lulume umue wa kuka o tukuiwa hati Beere, wa kala kocifuka cimue ko Kiribati, Kombuelo yo Pasifiku. Ndaño ulume waco ka yonguile oku yevelela, manji Tariua wa limbuka okuti wa kala luvei wociteyateya, kuenje wa lekisa ohenda kokuaye. Noke, wo pula hati: “Ove hẽ, wa kũlĩha eci Suku a likuminya komanu va vela lava va kuka?” Noke manji wo tangela ocipama cimue vocitumasuku ca Isaya. (Tanga Isaya 35:5, 6.) Ulume waco lesanju lialua wa popia hati: “Nda siata oku tanga Embimbiliya vokuenda kuanyamo alua kuenda oku nyuliwa lolomisionaliu vietavo liange. Pole, lalimue eteke nda muile ocinimbu eci Cembimbiliya.” Noke manji wa fetika elilongiso Liembimbiliya lulume waco kuenje wamamako oku kula kespiritu. Ndaño okuti ulume waco ka kuete uhayele, wa papatisiwa kuenda o kasi oku tata ocimunga cimue ci kasi kocikanjo kupãla. Kuenda wa siata oku kundila olondaka viwa viusoma kolonepa viosi viocikanjo caco.
Amamako Oku Kuama Ongangu ya Kristu
17, 18. (a) O pondola ndati oku linga ukundi wa loñoloha? (b) Vana va likolisilako kupange woku kunda, va lavoka oku tambula onima yipi?
17 Ndomo ca siata oku lekisiwa vovolandu atiamẽla kupange woku kunda, tu pondola oku kala akundi va loñoloha nda tua kuata ovituwa via Yesu kuenda oku vi lekisa komanu. Eli olio esunga lieci tu sukilila oku kuama ongangu ya Kristu yoku lekisa ombili kupange woku kunda!
18 Kocita catete, eci vamue va linga olondonge via Yesu, Petulu wa pula hati: “Tu mola nye?” Yesu wo tambulula hati: “Vosi va sia olonjo, pamue vamanjavo, pamue vamukãi wavo, pamue va isiavo, pamue vainavo, pamue omãla, pamue ovapia, mekonda lionduko yange, va mola eci ca velapo kuenje va piñala omuenyo ko pui.” (Mat. 19:27-29) Tu pondolavo oku tambula asumũlũho aco, nda tu amamako oku kuama ongangu ya Yesu Kristu, Omisionaliu ya velapo.
O Tambulula Ndati?
• Yehova o tu pindisa ndati oco tu linge akundi va loñoloha?
• Momo lie elivulu Embimbiliya li Longisa Nye, li kuetele esilivilo kupange woku kunda?
• Tu kuama ndati ongangu ya Yesu catiamẽla kovituwa tu lekisa komanu?
[Elitalatu kemẽla 17]
Eci Yesu a laleka Petulu, Andereu, Tiago, kuenda Yoano oco vo kuame, ovo va tava
[Elitalatu kemẽla 19]
Alivulu amue ndeci Embimbiliya li Longisa Nye?, a tu kuatisa oku likuata omunga kupange woku kunda