Nda Sanjukila Oku Linga Ocipango Ca Suku Vomuenyo Wange Wosi

Ulandu wa Lomboluiwa la Bill Yaremchuk

Kunyamo wo 1947, kosãi Yelombo, noke yoku pindisiwa Kosikola yo Gileada vocisoko cecelãla, ko South Lansing, Nova Yorke, ko Estados Unidos, va ndi tuma oku ka talavaya ko Singapura.

NDA nõliwa oku ka talavaya kumue la manji Dave Farmer, wo ko Kanada, wa pindisiwa Kosikola yo Gileada, vocisiko cepanduvali. Tua linga ungende lonaviyu yimue yi tukuiwa hati, Marine Adder, okupisa kolupale luo San Francisco, ko California.

Ocitumãlo catete tua talama, ko Hong Kong. Ovina tua mola omo Liuyaki Wavali wa pita Voluali, via tu kokela akakama. Tua sanga omanu valua va pekela konele yetapalo ndu okuti va fa omo lioku hongua lonjala. Noke tua londa vali vonaviyu, kuenje tua enda toke ko Manila, ombala yo ko Filipinas.

Eci tua pitĩlako tua sangavo ovitangi via kokiwa luyaki. Petapu pa kala olonaviyu via nyõliwa latenda a imbiwa Lasualali vo kolofeka vikuavo, kuenda omanu vosi va fukilile calua. Tua sanga lika Olombangi Via Yehova viñañami, kuenje va enda letu toke Vonjango yavo Yusoma. Ndaño va kuata ovitangi vialua ovo va sanjukile.

Noke tua enda kofeka yo Indonesia kolupale luo Batavia (cilo lu tukuiwa hati Jakarta). Omo vofeka yaco mua kala uyaki walua, ka va tavele okuti tu loka vonaviyu. Eci tua fetika oku linga ungende woku enda ko Singapura, nda kuata usumba weci ca laikele oku pita letu. Kuenje nda fetika oku li pula okuti, ovina viwa nda tanga vokalivulu katiamẽla kolofeka Viokutundilo vi li pi?

Vokuenda kuoloneke vimue, atatahãi nda kuatele a pua. Ovina vieya oku pita lame kuenda Dave, via ñuatisa oku limbuka okuti Suku wa sanjukilile ungende wetu.

Va tu Ecelela Oku Kala Vofeka

Noke yosãi yimosi tunde eci tua tunda ko San Francisco, onaviyu yetu ya pitĩla ocipepi locifuka co San John, oku kevelila oku iñila vo Singapura. Ukuacikele coku kũlĩhĩsa omanu va tunda kolofeka vikuavo weya oku tala ovikanda vietu viuvangi, kuenje vovikanda vietu wa sonehamo hati, “Citava oku Iñila Vofeka.” Keteke likuavo eci kua ca omẽle, onaviyu yetu ya talama petapu. Noke yoku kũlĩhĩsa ovikanda vietu, tua loka vonaviyu.

Eteke likuavo tua tiukila ketapu oco tu liusike lolomisionaliu vikuavo tua lingila kumosi ungende. Ovo va amamako lungende wavo toke ko India kuenda ko Ceilão (cilo yi tukuiwa hati Sri Lanka). Eci kesongo ko naviyu a tu mola, wa vangula letu. Eye wa temẽle calua momo wa simĩle okuti ka tua kuatele omoko yoku tunda vonaviyu. Osimbu tua kala vokalunga, ñala Haxworth, ukuakutambula omanu va tunda kolofeka vikuavo, wa tu handelekele okuti eci tu pitĩla petapu, ka ca tavele oku loka vonaviyu. Ca tu tatamẽle calua momo usongui ukuavo wa tu ecelele ale oku loka vonaviyu.

Eci tueya ku ñala Haxworth, ka tu tambuile lesanju. Eye wa tu kelõhaila loku popia hati ka tua kuatele omoko yoku iñila vo Singapura. Eci a popia olondaka evi etu tuo lekisa ovicapa vietu viuvangi mua sonehiwile lusongui ukuavo okuti “Citava oku Iñila Vofeka.” Kuenje lonyeño yalua, wa tambula ovicapa vietu kuenda wa taya taya olondaka viaco. Pole, osimbu tua kala oku sapela, onaviyu ya tiukila! Ñala Haxworth, wa kala lovicapa vietu vokuenda kulima, noke wa tu vi tiuwila kuenda wa sonehamo vali hati, “Citava Oku Iñila Vofeka.”

Upange Wetu wa Kuata Onima ko Singapura

Eci tua pitĩla vo Singupura kosãi ya Kupupu kunyamo wo 1947, Joshua eye lika wa kala Ombangi ya Yehova vofeka. Eye wa kala ukundi wa velapo toke eci a fa kulima wo 1970. Vana a lilongisile lavo Embimbiliya va fetikavo oku longisa vakuavo. Alombelo etu oku pinga olondingupange konepa yespiritu, a fetika oku tambuluiwa.​—⁠Mateo 9:​37, 38.

Kunyamo wo 1949, osimbu ñala Haxworth a endele ko Inglaterra oku puyuka, vamanji epandu va pindisiwa Kosikola yo Gileada vocisoko cekũi lamosi, va pitĩla ko Singapura, kupange wumisionaliu. Dave una wa kala ekamba liange liupange vokuenda kuanyamo alua wa siapo ofeka yo Singapura omo lioku vela. Eye wa tumiwa ko Australia, kuenje oko a kala toke kolofa viaye kunyamo wo 1973. Pokati ka vamanji epandu va tumiwa vofeka, pa kala Aileen Franks, kuenje kunyamo wo 1956 tua likuela.

Vokuenda kuanyamo, omanu tua lilongisa lavo Embimbiliya va linga Olombangi Via Yehova. Toke cilo, kuli valua va kasi kupange wotembo yosi oku kundila omanu. Ulandu umue wa tu vetiya calua wa Lester kuenda Joanie Haynes, olohueli vimue vio ko Amerika vieya oku kala ko Singapura. Tua fetika oku lilongisa lavo Embimbiliya kunyamo wo 1950. Ovo va kala oku kula kespiritu, kuenje eci va tiukila ko Estados Unidos va papatisiwa. Noke va li tumbika kupange woku kunda. Ovo va kuatisa omanu valua oku linga Olombangi Via Yehova, oku kongelamo omãla vavo vatatu.

Joanie wa tu sonehela hati: “Eci ndi ivaluka unyamo waco tua kala ko Singapura, omuenyo wetu weya oku pongoloka calua. Nda ka tua li sangele lene, nda tua tumboka ño voluali. Ngeca olopandu kokuene omo wa longisi ocili ku Lester, kuenje wo vetiyi oku kuatela ocisola Yehova kuenda vamanjetu Akristão. Eye lalimue eteke aka ivalako.”

Nda Talavaya Lepata Liange ko Singapura

Kunyamo wo 1962, vomuenyo wetu mua pita epongoloko limue linene. Ndotolo wa sapuila Aileen okuti wa kala latimba avali. Ndaño tua yonguile oku amamako lupange wetu wumisionaliu, nda tua tekula ndati omõletu? Manji Nathan H. Knorr, wa kala mitavaso Yolombangi Via Yehova koluali luosi, wa tu sonehela ukanda, kuenda wa ndi vetiya oku sandiliya upange woku sanda eteku loku amamako oku kundila vo Singapura. Pole, ka ca lelukile.

Omanu vo kolofeka viñi ovo va kala asongui kovopange a tumbikiwile vofeka, lolofeka viaco. Ame sia loñolohele oku linga olomĩlu, momo eci nda mala oku tanga kosikola, nda iñila kupange wakundi votembo yosi, okuti otembo yaco pa pitile ale 23 kanyamo. Omo liaco, nda feta kocisoko cimue co ko Londres oco va ndi sonehẽleko ukanda uvangi watiamẽla kupange wumisionaliu nda kala oku linga. Kuenje ocisoko caco ca tuma ovikanda viaco kovopange osi a kala ko Singapura.

Kovopange aco va ndi tambulula hati, “Etu ka tu kuete upange tu eca komunu wa loñoloha ndove.” Ovo va ndi tendele okuti nda loñoloha calua! Eci pa pita olosãi vimue, omõletu Judy wa citiwa. Noke, eci manji Knorr a nyula o Singapura, wa endele oku pasuisa omõletu Judy kumue la inaye kosipitali. Eye wa va sapuila hati, “Vu pondola oku kala konjo yolomisionaliu toke eci Bill a sanga upange.”

Eci pa pita olosãi vimue, nda sanga upange vonjo yoku landisa olopasasi kocila colombalãu. Ofeto yange ya tẽlele oku tekula epata. Noke yalima avali, nda lalekiwa oku talavaya Locimunga cimue co ko Amerika, kuenda va likuminya oku ndi feta ci pitahãla olonjanja vivali olombongo nda enda oku nganyala. Omo nda kũlĩhĩwile ale kupange waco, nda kuata otembo yalua yoku kala lepata kuenda kupange woku kunda.

Omo lioku pitisa kovaso upange wa Yehova, nda kuata ovikele vialua vocisoko Caye. Aileen wa fetika vali upange wakundi votembo yosi. Votembo yitito upange woku kunda Usoma vo Singapura, wa livokiya calua. Vokuenda kuekũi lianyamo okupisa kunyamo wo 1960, tua landa olonjo vivali via fina, kuenje tua vi pongolola Onjango Yusoma. Vonjango yaco mua enda oku liongoluila akongelo akuãla.

Upange Woku Kunda wa Tatekiwa!

Vokuenda kuoloneke, kua fetika oku molẽha alambalalo. Keteke 14, kosãi ya Susu kunyamo wo 1972, eci tua endele kohongele, tua sanga okuti epito Lionjango Yusoma lia kutiwa lelienge kuenda okaliyatu. Tua mola olondaka via sonehiwa hati, upange Wolombangi Via Yehova ko Singapura, wa imũha!a

Oku yikiwa Kuonjango Yusoma, ka kua tatekele oku fendela Yehova, pole epulilo nda kala lalio, lieli, ‘Nye Suku a yonguila epata liange?’ Nda kala oku sokolola okuti nda tua tundisiwa vofeka, lalimue eteke tuka li sanga vali lakamba vetu ko Singapura. Nda pulisa cime cupange wange nda citava oku ka talavaya ko Kuala Lumpur, kofeka yo Malasia. Momo kofeka yaco, pamue nda ka tua kuatele ovitangi. Kuenje va nyĩha ocikele coku talavaya ndusongui woseketa yo ko Kuala Lumpur kuenda va yonguile oku vokiya ofeto yange loku nyĩha ovina vikuavo.

Pole nda soka ndoco: ‘Anga hẽ Suku o yongola okuti tu siapo ofeka yo Singapura kuenda vamanjetu?’ Kuenje tua likutilila ku Yehova kumue lepata liange. Tua limbuka okuti Yehova eye wa tu nenele kulo. Omo liaco, sia tavele oku enda. Cime cange wa komõha momo nda likala oku nganyala olombongo vialua.

Ka ca lelukile oku talavaya vofeka yimue okuti upange woku kunda wa tatekiwa, momo tua enda oku tipuiwa loku kapiwa vokayike. Pole olondaka Viosamo 34:​7, viokuti, “Ungelo wa Yehova o ñuala ava vo sumbila ha va popela,” via tu lembeleka calua.

Upange Wokaliye

Noke yoku talavaya ko Singapura vokuenda kueci ci pitahãla 46 kanyamo, tua tumiwa ko Nova Zelandia, kunyamo wo 1993, kuna tua ponduile oku talavaya lutima wa tula. Tua yeva esumuo lialua eci tua siapo akamba vetu vo ko Singapura. Pole, oku kũlĩha okuti ekolelo lia vamanji lia sevetiwa lovimalẽho via setekiwa londalu, ca tu sanjuisa calua. Eci ca va kuatisa oku pandikisa koloseteko kuenda kalambalalo.​—⁠1 Va Korindo 3:​12-14.

Noke yoku pita 14 kanyamo tunde eci tua enda ko Nova Zelandia, ame la Aileen, ndaño okuti tua kuka ale, handi tu kasi kupange wakundi valikasi. Va huvange​—⁠Mike o kuete 94 kanyamo kuenda Peter o kuete 90 kanyamo​—⁠va kasi oku amamako oku vumba Yehova ko Kanada.

Kunyamo wo 1998, omõletu Judy, wa tiukila Kutundilo, kuna a talavaya anyamo alua. Onjanja yimue wa tu sonehelele hati: “Ngeca olopandu ku Yehova omo wa nyĩha esumũlũho lioku talavaya kulo! Ngecavo olopandu kokuene vulonjali viange, omo liepindiso wa nyĩhi, momo lia ndi vetiya oku iñila kupange waco.” Kunyamo wo 2003 eye wa tiukila ko Nova Zelandia oco a tu kuatise.b

Tu eca olopandu ku Yehova omo wa ecelela okuti tu kala olondingupange via Cime kupange woku ungula. Upange waco wa siata oku tu nenẽla esanju lialua. Osimbu oluali ‘lu panda kesulilo,’ ndeci Embimbiliya li ci lekisa, tu lavoka oku tẽlisiwa kuohuminyo yokuti: “U o lingainga ocipango ca Suku o kala oloneke ka vi pui.”​—⁠1 Yoano 2:⁠17.

[Atosi pombuelo yamẽla]

[Ono Yofoto]

Kimroy Photography

[Elitalatu kemẽla 31]

Joshua eye lika wa kala Ombangi ya Yehova eci tua pitĩla ko Singapura kunyamo wo 1947

[Elitalatu kemẽla 31]

Ame la Dave Farmer ko Hong Kong, poku loña ko Singapura kunyamo wo 1947

[Elitalatu kemẽla 31]

Ame la Aileen, kunyamo wo 1958

[Elitalatu kemẽla 32]

Lomõletu Judy, cilo

[Ono Yofoto]

Kimroy Photography