Apulilo Valingiwa Lavakuakutanga

Upostolo Paulu wa popia hati, ‘va Isareli vosi vaka popeliwa.’ (Va Rom. 11:​26) Anga hẽ, olondaka viaye vi lomboloka okuti va Yudea vosi va linga Akristão?

Paulu hacoko a popia. Va Yudea vana va kala vakuepata lia Avirahama, ka va tavele okuti Yesu eye Mesiya. Noke lianyamo amue tunde kolofa via Yesu, kua lomboluiwa okuti, va Yudea vamue ka vaka tava oku linga Akristão. Omo liaco, olondaka via Paulu viokuti, ‘va Isareli vosi vaka popeliwa,’ viocili. Momo lie?

Yesu wa sapuila asongui vetavo lia va Yudea hati: “Usoma wa Suku upiwa kokuene kuenje weciwa kofeka yima apako awo.” (Mat. 21:​43) Omo okuti va Isareli vosi ka va tavele ku Yesu, Yehova wa nõla omanu vakuavo lekuatiso liespiritu liaye. Omanu vaco, Paulu wa va tukula hati, ‘va Isareli ya Suku.’​—⁠Va Gal. 6:⁠16.

Ovinimbu vikuavo Viovisonehua vio Helasi vi lekisa okuti, ‘va Isareli ya Suku,’ va kasi eci ci soka 144.000 Kakristão olombuavekua. (Va Rom. 8:​15-17; Esit. 7:⁠4) Uvangi u lekisa okuti, vetendelo liaco mua kongelavo vana ka vatiamẽlele kepata lia va Yudea, u sangiwa kelivulu Liesituluilo 5:​9, 10, kuna ku lekisa okuti, Akristão olombuavekua va “tunda kapata osi, lo kalimi aiñi aiñi . . . lo kovasitue osi, lo kolofeka viosi.” Vana vatiamẽla ku va Isareli yespiritu, va nõliwa pokati ka “vakuosoma wa Suku yetu, lovitunda viaye, kuenje va viala kilu lieve.” Ndaño okuti Yehova ka tavele va Isareli vana a nõlele tete, pole, wa nõla vakuavo okuti va linga akamba vaye. Vetendelo liaco, mua kongelavo ovapostolo kuenda Akristão valua vo kocita catete. Omo liaco, va Yudea kuenda omanu vakuavo, va landiwa losonde ya Yesu Kristu.​—⁠1 Tim. 2:​5, 6; Va Hev. 2:9; 1 Pet. 1:​17-19.

Omo okuti va Yudea vana va nõliwile kocita catete va pumba esumũlũho lioku viala la Yesu, ka ca tatekele oku tẽlisa ocipango ca Suku. Lomue o tateka oku tẽlisiwa kuocipango ca Yehova ndomo a ci popia vonduko yuprofeto waye hati: “Ondaka . . . yi tunda vomẽla wange; ka yi tiukila ño kokuange, puãi yi linga ndeci nda panga oku tẽlisa, leci nda yi tumĩla.”​—⁠Isa. 55:⁠11.

Oco Suku a tẽlise ocipango caye, wa nõla 144.000 komanu oco va viale kumue Lomõlaye kilu. Embimbiliya li lekisa okuti, Suku wa nõla eci ci soka 144.000 kolombuavekua. Lomue pokati kavo ivaliwa!​—⁠Esit. 14:​1-5.

Eci Paulu a soneha hati, ‘va Isareli vosi vaka popeliwa,’ ka ci lomboloka okuti va Yudea vosi vaka linga Akristão. Pole, olondaka viaye viokuti ocipango ca Suku coku nõla lika 144.000 ya va Isareli yespiritu oco vaka viale Lomõlaye Yesu Kristu kilu, cika tẽlisiwa. Omo liaco, votembo Suku a sokiya, ‘va Isareli vosi’ yespiritu vaka popeliwa, kuenje vaka linga olosoma kuenda ovitunda Vusoma wa Mesiya.​—⁠Va Efe. 2:⁠8.

[Elitalatu kemẽla 28]

Olombuavekua vi “tunda kapata osi, lo kalimi aiñi aiñi . . . lo kovasitue osi, lo kolofeka viosi”