Nda Limbuka Esilivilo Liomuenyo
CA KALA KETEKE 16, YA KUPUPU KUNYAMO WO 2007. Nda vutama pevindi kosapalalo yatatu voseketa yo kosikola ya velapo yi tukuiwa hati, Norris Hall, Virginia Polytechnic Institute, ale Virginia Tech. Kuenje nda kala oku sokolola esilivilo lioku eca olopandu omo liomuenyo tu kuete.
Eci nda kala voseketa yange nda si oku kopa ovikanda via kala kosapalalo yavali. Kuenje ulongisi umue wa numa oku semulũla o kombutador voseketa yaye. Eci tua iñila voseketa yaye, tua yeva ovota a kala oku loya kosapalalo yavali. Omo ka tua kũlĩhĩle eci ca kala oku pita, tua lupukila voseketa yaye, kuenje tua yika epito loku kevelela eci ca laikele oku pita letu. Noke nda enda pevindi oku likutilila ku Yehova Suku loku u pinga oco a ñuatise oku pandikisa locitangi caco.
Osimbu tua kala oku kevelela, nda sokolola eci ca pita lame vokuenda kueci ci soka 15 kanyamo konyima, otembo nda kala oku talavaya vonjo yoku semulula akãlu. Ekamba liange lio kupange wa ambatele ociyenjo mua kala ongasolina, kuenje ca vata ondalu. Omo liusumba, wa pesila ociyenjo caco kocipala cange, pole, eye ka ci lingile ocipango! Ame nda fetika oku fenya owisi kuenda onepa yimue yetimba liange ya pia calua. Noke Elikopitu lia ndi tuala lonjanga kosipitali yomanu va timĩhiwa kuna nda kala olosãi vitatu lomeyu, oku sakuiwa. Noke yolosãi vitãlo, nda tiukila konjo kuenje nda eca olopandu omo sia file. Ulandu waco wa ndi longisa okuti tu sukila oku tenda okuti eteke olio eteke liomuenyo wetu li kuete esilivilo. Kuenje nda pamisa ohuminyo yange yoku amamako oku vumba Yehova Suku, una wa nyĩha omuenyo loku nõlapo oku kala Ombangi yaye.—Osamo 90:12; Isaya 43:10.
Omo sia tẽlele vali oku talavaya konjo yoku semulũla akãlu, nda lilongisa ufisiu woku semulũla olokombutador, yu nda fetika oku talavaya kosikola ya velapo ko Virginia Tech. Eli olio esunga lieci nda endelele lomẽle kosikola yo Norris Hall.
Osimbu ovota amamako oku loya, tua sima okuti vo Amerika mua iñila uyaki. Ovota a liwekapo lika eci umue pokati kovingumba a li ponda eye muẽle, noke yoku ponda 32 komanu ka va kuete eko. Eci pa pita 20 kakukutu tunde eci ovota a fetika oku loya, tua yeva asualali va kala oku endela vokololo yonjo. Kuenje tua va vilikiya lolukandi yu veya oku tu teyuila.
Ulandu owu wa ndi longisa okuti omuenyo wetu u kasi ndocina cimue ci pita ño ombamba. (Tiago 4:14) Omo liaco, tu sukila oku imba ovaso loku kolela Usovoli womuenyo, Yehova Suku, loku tenda okuti eteke olio eteke, li kuete esilivilo, momo omuenyo wetu ombanjaile yimue yinene tua tambula kokuaye!—Osamo 23:4; 91:2.
[Ono Yofoto kemẽla 26]
AP Photo/The Roanoke Times, Alan Kim