Apulilo va Lingiwa la Vakuakutanga
Upostolo Paulu vukanda a sonehela va Heveru, wa popia eci catiamẽla koku “kapa ovaka.” Anga hẽ, ondaka yaco wa yi tiamisila kakulu vekongelo, ale kovina vikuavo?—Va Hev. 6:2.
Ka tu sukila oku kuata olonamãlala, momo Paulu wa popia eci catiamẽla koku kapa ovaka poku eca olombanjaile viespiritu.
Ondaka oku kapa ovaka, Embimbiliya li yi tiamisila koku eca ovikele komanu. Mose wa ‘imbile ovaka aye’ ku Yehosua eci o nõla oco a linge kapiñala kaye. (Esin. 34:9) Vekongelo Liakristão, mua siata oku nõliwa vamanji vamue alume va loñoloha poku va kapa ovaka. (Ovil. 6:6; 1 Tim. 4:14) Paulu wa lungula hati, tu sukila oku yuvula oku kapa lonjanga ovaka ku manji umue ulume.—1 Tim. 5:22.
Paulu wa vetiya Akristão voko Heveru, oco ‘va loñolohe kespiritu,’ momo kotembo yaco va silepo ‘ovilongua viefetikilo.’ Noke wa yeva okuti, ‘va siapo ovilinga vi koka okufa, kuenda va kolela Suku. Momo va liwekapo oku longisa ovisila vioku papatisa omanu, levi vioku kapa ovaka.’ (Va Hev. 6:1, 2) Anga hẽ, vamanji va loñoloha kespiritu va sukila lika oku sanda ocikele coku kala akulu vekongelo? Sio, hacoko. Momo vosi yavo va sukila oku sanda ocikele caco kuenda oku ci sanjukila.—1 Tim. 3:1.
Kulivo onjila yikuavo yoku kapa ovaka. Eci Yehova a likala va Isareli yosimbu kotembo yovapostolo, wa nõla va Isareli yespiritu okuti, Akristão olombuavekua. (Mat. 21:43; Ovil. 15:14; Va Gal. 6:16) Ombanjaile yespiritu va tambula yoku vangula alime a litepa, ya eca uvangi wepongoloko va pita lalio. (1 Va Kor. 12:4-11) Eci Korneliu kumue lepata liaye va linga Akristão, va tambula espiritu sandu, kuenje va fetika oku ‘vangula alimi a litepa.’—Ovil. 10:44-46.
Vokuenda kuotembo ombanjaile yaco, ya eciwa poku kapa ovaka. Eci Filipe a kundila olondaka viwa vo Samaria, omanu valua va papatisiwa. Omo liaco, osungu yakulu, ya tuma upostolo Petulu la Yoano kimbo liaco. Momo lie? Embimbiliya li popia hati: “Noke [alume vaco vavali] va kapa ovaka avo [komanu va papatisiwa ndopo], kuenje va tambula espiritu sandu.” Eci ci lekisa okuti, ombanjaile yespiritu va tambula, ya muiwa lomanu vosi. Tua kũlĩha ulandu waco, momo Simono una wa enda oku linga ovina viumbanda, eci a mõla ndomo espiritu sandu li talavaya wa yonguile oku landa uloño waco, oco a kape ovaka aye komanu loku linga ovikomo. (Ovil. 8:5-20) Noke ci soka 12 komanu voko Efeso va papatisiwa. Ulandu waco u popia hati: ‘Eci Paulu a va kapa ovaka, espiritu sandu lieya kokuavo, kuenje va fetika oku vangula alimi a litepa loku imba owanji wovaprofeto.’—Ovil. 19:1-7; sokisa lelivulu lia 2 Timoteo 1:6.
Omo liaco, olondaka Paulu a tukula kelivulu lia Va Heveru 6:2, wa vi tiamisila koku kapa ovaka komanu vana va tava ndopo oco va tambule espiritu.