O Yongola Oku Kala Omunu wa Tuwa Ndati?

USONGUI umue wolosipayu, kofeka yo Filipina, wa pulile manji umue ukundi wotembo yosi hati: “Nye wa linga okuti ca kuatisa ulume u oku siapo ovituwa viaye vĩvi?” Noke, sipayu wa lekisa omumu yolopapelo via kala komesa yaye kuenje, wamisako loku popia hati: “Ove hẽ, o tava okuti volopapelo evi mua sonehiwa uvangi wesombiso lia pita laye? Tu eca olopandu omo liekuatiso liove, momo eye wa enda oku nena ovitangi vialua mulo volupale.” Eye wa enda oku linga ovina viaco omo liuholua. Nye ca vetiya ulume waco oku linga apongoloko komuenyo waye? Wa ci linga, omo liesapulo Liondaka ya Suku.

Omanu valua va siata oku pokola kelungulo liupostolo Paulu lioku ‘lula omunu wale una wa tiamẽla komuenyo wosimbu, kuenda oku wala omunu wokaliye una wa tungiwa lesetahãlo lia Suku.’ (Va Efe. 4:​22-​24) Omo liaco, ndaño tu yongola oku linga apongoloko amue, pole, oco tu kũlĩhĩwe okuti Tuakristão, tu sukila oku likolisilako oku wala omunu wokaliye.

Apongoloko tu linga, a tu ĩha epuluvi lioku papatisiwa. Eci tu lieca oco tu papatisiwe, tu sokisiwa levaya lia songiwa. Pole, oco li posoke, li sukila oku songiwa lutate. Cimuamue haico ci pita letu okuti, oco tu papatisiwe, tu sukila oku lekisa ovituwa vi eca uvangi wokuti tuafendeli va Suku. Omo liaco, tu sukila oku likolisiliko oku lekisa ovituwa viokaliye, loku linga apongoloko.

Paulu wa limbukile esilivilo lioku linga apongoloko. Eye wa popia hati: “Eci njongola oku linga ciwa, cĩvi ceci.” (Va Rom. 7:​21) Eye wa limbukile ovituwa a kuatele kosimbu, kuenda apongoloko a sukilile oku linga. Nye ci popiwa catiamẽla kokuetu? Tu sukila oku li pula ndoco: ‘Ocina cĩvi si yongola oku linga ci lomboloka nye? Ovituwa vipi ndi kuete? Kuenda ndi yongola oku kala omunu wa tuwa ndati?’

‘Ocina Cĩvi si Yongola Oku Linga’ ci Lomboloka Nye?

Nda tu kuete onjo yimue yosimbu, ka tu yi semulula lika kosamua osimbu okuti, olusoka luaco lua vola. Nda ka tua yi semuluile ciwa, tu kuata ovitangi. Cimuamue haico ci pondola oku pita letu okuti, ka tu sanjukila lika eposo lietimba lietu. Pole, tu sukila oku konomuisa ovituwa vietu, kuenda oku limbuka ovitangi tu sukila oku tetulula. Tu sukilavo oku siapo ovituwa viosimbu, kuenda oku kũlĩhĩsa ekalo lietu. (2 Va Kor. 13:⁠5) Nda tua limbuka ovituwa vimue vĩvi, tu sukila oku vi siapo. Nda tua ci linga Yehova o tu kuatisa.

Paulu wa soneha hati: “Ondaka ya Suku yi kasi lomuenyo, haiyo yi kasi loku talavaya, haiyo ya tua enene, [okuti] omoko ya tua nelembali yi sule. Ondaka yaco yi toma toke yi tepa omuenyo . . . kuenda asokoluilo lupuma, haiyo yi limbuka ovisimĩlo lovipango viutima.” (Va Hev. 4:​12) Esapulo Liondaka ya Suku, li tu kuatisa oku lekisa ovituwa viwa kuenda oku linga apongoloko a sukiliwa. Li situlula ovisimĩlo vietu, kuenda li tu kuatisa oku limbuka ekalo lietu. Ondaka ya Suku yi tu kuatisavo oku limbuka ovitangi vietu!

Nda tu kuete onjo yimue yosimbu, ka tu semulula lika ovina via nyõleha. Oku kũlĩhĩsa eci ca nyõla onjo yaco, ci tu kuatisa oku limbuka ovina tu sukila oku linga oco ka yika nyõlehe vali. Cimuamue haico tu sukila oku linga okuti, ka tu limbuka lika ovituwa vietu vĩvi, pole, nda tua kũlĩhĩsa eci ci koka ovituwa viaco, ci tu kuatisa oku likandangiya oku vi yuvula. Kuli ovina vialua vi tu kuatisa oku linga apongoloko ndeci: ekalo liomuenyo wetu, ukuasi, ovituwa vioku tua citiwila, olonjali vietu, akamba, kuenda etavo lietu. Ovipama vimue vio televisãu, kuenda ovitalukilo vikuavo, vi pondola oku nyõla ovisimĩlo vietu. Oku limbuka ovina viaco, ci tu kuatisa oku yuvula ovitangi.

Noke lioku konomuisa ekalo lietu, tu sukila oku popia ndoco: ‘Eyi oyo onjila ndi sukila oku kuama.’ Ca sunguluka oku popia olondaka evi. Catiamẽla ku vamue vekongelo lioko Korindo okuti, va litumbikile kukahonga, alume va lipekela lalume, uholua, kuenda ovina vikuavo via vĩha, Paulu wa popia hati: “Vamue pokati kene, osimbu, wa kaili lovituwa viaco. [Pole], wa sukuiwi . . . [lespiritu] lia Suku yetu.” (1 Va Kor. 6:​9-​11) Espiritu sandu lia Yehova li pondolavo oku tu kuatisa oku linga apongoloko aco.

Tu konomuisi ulandu wulume umue o tukuiwa hati Marcos a kofeka yo Filipina. Poku lombolola catiamẽla kekalo liaye, wa popia hati: “Omo okuti olonjali viange via enda oku lihoya calua, eci nda tẽlisa 19 kanyamo, nda fetika oku sina.” Eye wa litumbikile kolomapalo vioku nganyala olombongo, kuenda oku ambata uta koku nyana ovina viamãle. Eteke limue eye kumue lakamba vaye, va tumbikile ongombo yoku nyana vombalãu, pole ka va tẽlisile ocimãho cavo. Marcos wamamako lovituwa viaco toke eci a kuela. Kuenje, weya oku nyelisa ovina viosi a nyanele. Noke, Marcos wa fetikavo oku kuama ukãi waye kelilongiso Liembimbiliya Lolombangi Via Yehova. Eci a fetika oku lilongisa, wa simĩle okuti ka pondola oku kala Ombangi ya Yehova. Pole, oku kapako ovina a kala oku lilongisa loku endaenda kolohongele co kuatisa oku siapo ovituwa vĩvi. Cilo, wa papatisiwa kuenda o kasi oku longisa vakuavo ndomo va pondola oku pongolola ekalo liomuenyo wavo.

O Yongola Oku Tuwa Ndati?

Apongoloko api tu sukila oku linga oco tu lekise ovituwa viwa? Paulu wa lungula Akristão hati: “[Imbipo ovituwa viosi vĩvi]. Imbipo onyeño, lekaka, lukuse, kuenda oku lundila, lolombangulo vi linga osõi. Ko ka likembi pokati, momo wa luli omunu wale lovilinga viaye vĩvi.” Upostolo wamisako hati: “Wali omunu wokaliye. Omunu waco wokaliye o kasi lokutumbuluiwa lukũlĩhiso wokaliye okuti o setahala usovoli waye.”​—⁠Va Kol. 3:​8-10.

Tu yongola oku siapo ovituwa viosimbu okuti, tu wala viokaliye. Ovituwa vipi vi tu kuatisa oku ci linga? Paulu wa popia hati: “Wali ohenda kuenda ocikembe lumbombe loku unjuka kuenda epandi. Kuati utima woku kuamelela loku lisola pokati. Kuenda, nda vu likuetele olondaka, lieceli pokati. Ndeci [Yehova] o weceli ene, haico ene eceli. Puãi ca piãla enene, wali ocisola, momo ocisola oco ci kutila cosi pamosi vomunga ya kanguka.” (Va Kol. 3:​12-​14) Oku likolisilako oku kuata ovituwa viaco ci tu kuatisa oku ‘soliwa la Yehova kuenda lomanu.’ (1 Sam. 2:​26) Yesu eci a kala palo posi wa likolisilako oku lekisa ovituwa via Suku. Nda tua lilongisa Embimbiliya loku kuama ongangu ya Kristu, tu linga ‘olosetukuli via Suku.’​—⁠Va Efe. 5:​1, 2.

Oku lilongisa ovituwa viwa kuenda ovituwa vĩvi viomanu va tukuiwa Vembimbiliya, ci tu kuatisa oku limbuka apongoloko tu sukila oku linga. Tu kũlĩhĩsi ulandu wa Yosefe omõla a Yakoba. Ndaño wa talisiwa ohali, pole, wamamako lovituwa viaye viwa. (Efet. 45:​1-​15) Pole, Avisalome omõla wa Soma Daviti wa vetiya omanu oco vo pandiye omo lieposo liaye. Pole, wa kala omakuli haeye omondi. (2 Sam. 13:​28, 29; 14:25; 15:​1-​12) Oku kisika omanu oco va tu pandiye omo lieposo lietu, ka ci lekisa okuti tu kuete ovituwa viwa.

Tu Pondola Oku Tambula Onima Yiwa Nda Tua Linga Apongoloko

Oco tu linge apongoloko komuenyo wetu kuenda oku soliwa la Suku, tu sukila oku konomuisa ovisimĩlo vietu. (1 Pet. 3:​3, 4) Pole, tu pondola lika oku linga apongoloko aco poku kũlĩhĩsa ovituwa vietu vĩvi kuenda ovina via siata oku tu vetiya oku vi lekisa osimbu tua amamako lovituwa viwa. Anga hẽ, tu kuata onima yiwa nda tua likolisilako oku linga apongoloko aco?

Tu pondola oku linga apongoloko aco lekuatiso lia Yehova. Tu pondolavo oku likutilila ndeci ukualosamo a linga poku popia hati: “Sovuile utima u yela, a Suku. Kapa vokati kange espiritu liokaliye liesunga.” (Osa. 51:​10) Tu sukila oku pinga espiritu lia Suku oco li tu kuatisa oku linga apongoloko kuenda oku linga ocipango caye. Nda tua ci linga, tu soliwa la Yehova!

[Etosi pombuelo yemẽla]

[Elitalatu kemẽla 4]

Anga hẽ, tu sukila lika oku posuisa onjo kosamua?

[Elitalatu kemẽla 5]

Ove hẽ, o kuete ovituwa ndevi via Kristu?