Ngeca Olopandu Ndaño Lovitangi

Ndomo Embimbiliya Lia Ndi Kuatisa Oku Pandikisa

Ulandu wa Lomboluia la Enrique Caravaca Acosta

Keteke 15 ya Kupupu, kunyamo wo 1971, nda pasuisa vangandiange va kala vepia liepata lietu. Ame sia la nyula vali epata, kuenje nda yonguile oku li sanga lavo. Osimbu nda kala vonjila, nda sokolola u nda laikele oku nyula tete. Eci nda pitĩla, nda saluka calua momo nda sanga okuti omanu vakuãla va pondiwa, oku kongelamo mãi yange!

ECI ca ndi nenẽla esumuo lialua. Momo lie ocina caco ca pitila? Nye ame nda sukilile oku linga? Lomue wa kala ponele yange oco a ndi kuatise. Osimbu sia fetikile oku vangula eci ca pita lame, linga ndu sapuili ulandu womuenyo wange. Vuka kuata elomboloko liwa ndomo nda kala kuenda ovitangi vikuavo via pita lame.

Tua Sanga Ocili

Nda citiwila kimbo lio Quirimán, ocipepi lolupale luo Nicoya, ko Costa Rica. Kunyamo wo 1953, eci nda tẽlisa 37 kalima, nda kala kumue lolonjali viange vepia lietu. Ndaño okuti tua kulila vetavo lio Katolica, ka tua solele alongiso amue kuenda tua kuata atatahãi alua.

Eteke limue lomẽle, ulume umue o tukuiwa hati, Anatolio Alfaro, weyile konjo yetu yu wa tu vetiya oku lilongisa Embimbiliya. Eye wa tanga letu ovinimbu vialua kuenda wa tu sapuila alongiso amue Embimbiliya. Olonjali viange la vamanjange valume lava vakãi, lakamba, vosi yetu tua tumãla oku u yevelela. Ombangulo tua kuata ya fetika lomẽle toke koñolosi. Etu tua kuata apulilo alua.

Anatolio wa pita letu uteke wosi toke eteke likuavo. Atambululo aye kapulilo etu lekuatiso Liembimbiliya, kuenda ovina tua yeva via tu sanjuisa calua. Ombangulo yaco ya kuata onima yiwa kokuetu. Tua kala oku sokolola ovina tua lilongisa, kuenje tua limbuka okuti tua sanga ocili. Anatolio wa tu sila olorevista kuenda alivulu amue. Vosi yetu vepata koñolosi, tua enda oku tanga alivulu aco. Pole, ka ca lelukile, momo onjo yetu ka ya kuatele ocinyi. Osimbu handi ka tua fetikile oku lilongisa, tua enda oku li sikilĩla kovolu lokolomahi lolonjeke viocikelẽyi oku li teyuile kolohamue.

Eci pa pita olosãi epandu, omanu vatãlo vepata lietu, va papatisiwa. Vamue pokati komanu vaco, ame kuenda olonjali viange. Kuenje lesanju lialua tua fetika oku enda konjo lanjo oku sapuila omanu ovina tua lilongisa. Tua lingaile ungende wolowola vivali posi ale lokavalu toke kolupale lumue lutukuiwa hati, Carrillo oku linga olohongele locimunga Colombangi Via Yehova via kala volupale luaco. Anatolio wamamako oku tu pasuisa konjo yetu loku linga elilongiso Liembimbiliya. Noke tua fetika oku lingila olohongele konjo yetu kuna kua enda oku kala omanu ecelãla. Vokuenda kuotembo, vosi yetu tua papatisiwa. Okacimunga ketu ka kula kuenje ka linga ekongelo mua kala ci soka 20 komanu.

Upange wa Suku Otembo Yosi

Vokuenda kuotembo, oseketa Yolombangi Via Yehova ko Costa Rica, ya laleka vana va yongola oku iñila kupange woku kunda otembo yosi. Kuenje kunyamo wo 1957, nda fetika oku linga upange wotembo yosi. Upange waco wa ndi sanjuisa calua. Poku kundila omanu vovaimbo, nda lingaile ovongende olowola vialua. Olonjanja vimue, omanu ka va ndi tambuile ciwa. Olonjanja vitatu nda tatiwa lãvi lalume vamue va kala lolomoko peka, kuenda va yonguile oku kũlĩha eci nda kala loku linga.

Kunyamo wo 1950, ca tĩlile oku li sanga lomanu, momo atapalo alua a kala ndekalasoko. Oco tu pitĩle kovitumãlo vimue, tua endaenda lotuvalu. Tua enda oku yoka olondui loku lala voluayela, kuenda kua kala olohamue vialua. Tua endavo oku mola olonyõha kuenda olongandu. Ndaño lovitangi viaco, tua solele calua oku longisa omanu ovina viatiamẽla ku Yehova Suku. Kuenje poku pitĩla konjo, ndaenda oku yeva esanju omo lioku sapuila omanu ocili Cembimbiliya. Osimbu nda kala oku amamako oku kunda loku lilongisa Embimbiliya, ocisola nda kuatela Yehova Suku ca fetika oku livokiya, kuenje nda linga ekamba liaye.

Noke yotembo yimue, nda tambula ovikele vialua vekongelo. Osemana losemana ndaenda oku nyula akongelo kovitumãlo via litepa, loku pamisa vamanji vokuenda kuanyamo ekũi. Omo liovitangi viuhayele, nda liwekapo oku linga upange waco, pole ndi kasi loku amamako kupange wotembo yosi poku kundila omanu.

Ocilunga Cinene

Kunyamo wo 1971, osimbu nda kala volupale luo Nicoya nda nyula epata liange. Poku iñila vonjo, nda sanga mãi wa kala lanyamo a tẽla 80, wa kupukila posi. Eye wa tipuiwa lombueti. Eci nda petamẽla posi oku u kũlĩhĩsa, handi wa kala oku fuima. Eye wa fila povaka ange noke yokatembo kamue. Vociwo mua kupukila ukãi umue wa kala latimba avali, olosãi ecelãla, kuenje nda mola okuti eye kumue lomõla wa kala vimo va fa. Manji umue wo vekongelo wa fila vokololo kuenda omõla ukuavo wukãi una nda sanga vociwo, layevo wa fila vonjo yuhayele. Vosi yavo va tipuiwa lolombueti. Helie wa koka ocilunga caco, kuenda momo lie?

Eci nda tunda kosamua nda sanga tate. Eye wa lemehiwa vutue lolusolo, pole ka file! Nda lupukila konjo ya manjange ya kala ocinãla ci soka 15 kakukutu, kuenje nda sanga okuti ukãi ukuavo lomõlaye va pondiwavo. Nda limbuka okuti cimumba cange una Hambangiko ya Yehova wa kuata 17 kanyamo, eye wa ponda omanu vosi ava, kuenje ca ndi sumuisa calua! Eye wa tilila kocitumãlo cimue ciñi. Noke asualali vo ko Costa Rica va fetika oku u sandiliya.

Esapulo liaco lia li sanduila vofeka yosi. Eci pa pita olosãi ecea, olosipayu via sanga ongangala yaco, lomoko yimue yinene kuenda o pistola a landa komunu umue, ndaño omunu waco wa kũlĩhĩle okuti eye wa kala eyui lopo wo yi landisa. Cimumba cange eci va kala oku u tuala vokayike, omo wa yaka calua vo loya kuenje wa fa.

Osimbu olosipayu via kala oku sandiliya cimumba cange omanu valua va ndi lungula oku tilila kocitumãlo ciñi lohele yokuti cimumba cange wa laikelevo oku ndi ponda. Ame nda likutilila ku Suku momo nda yonguile oku kuatisa vangadiange va puluka kuenda vamanji vekongelo. Omo liaco, sia tilile.

Ovitangi Via Likuamẽlela

Tate, wa pita lika unyamo umosi lomuenyo kuenje wa fa. Vunyamo wa kuamamo, mukãi wange wa kala ufendeli wa Yehova Suku, wa pondiwavo. Vangandiange vosi va sumuile calua omo vepata mua fa vali omunu umue. Si tẽla oku lombolola esumuo etu kumue lakamba vetu tua yeva. Pole, ndaño levalo liaco, nda imba ovaso ku Yehova kuenda nda amamako oku pinga ongusu yaye.

Kunyamo wo 1985, nda kala kohongele yoku pindisa akulu vekongelo ya lingiwa oloneke vitatu, kolupale luo San José kombala yofeka. Epindiso liaco, lia ñuatisa oku pama kespiritu. Ca Sengunda yosemana yikuavo nda tiukila konjo. Eci tua kala oku linga ungende lo kalela, ovingumba via nyana ovikuata viange viosi. Osimbu via kala oku ndi nyana sia tẽlele oku vanja kovipala viavo, ndeci omanu vo ko Costa Rica va siata oku linga poku vangula la vakuavo. Kulo kocivanja co Guanacaste, alume poku sapela pamue poku lilama va vangula lolukandi oco va yeviwe la vakuavo. Eci va kala oku ndi nyana nda nda kalukile, omanu nda va ndi kuatisa, pole, sia ci lingile.

Kunyamo wo 1979, nda li kuela la manji umue Ombangi ya Yehova o tukuiwa hati, Celia wo vekongelo lia kala ocipepi. Celia wa solele calua Embimbiliya. Oloneke viosi tua enda oku tanga loku lilongisila kumue Embimbiliya. Pole kunyamo wo 2001 eye wa fa luvei wo kanser. Cilo ñuete esumuo lialua omo nda siala ulika, pole, elavoko liepinduko lia siata oku ndi pamisa.—Yoano 5:28, 29.

Ñuete Esanju Ndaño Loloseteko

Ndaño okuti omanu havosiko va siata oku pita lovitangi ndevi nda liyaka lavio, ovio via nyĩha epuluvi lioku pamisa ekolelo liange ku Yehova. (Tiago 1:13) Oku limbuka okuti “cosi ciya ño ci veta ño,” ca ndi kuatisa oku kuata ovisimĩlo via sunguluka. (Ukundi 9:11) Nda limbukavo okuti tu kasi ‘kotembo yohali,’ kuenje olongangala, ka vi tẽla oku likandangiya. (2 Timoteo 3:1-5) Nda siatavo oku sokolola ulandu wa Yovi. Ndaño okuti Yovi wa pita lovitangi vialua ndeci, oku fisa omãla vaye, oku vetiwa loku vela, oku pesela ovipako viaye viosi, eye wa popia hati: “Onduko ya Yehova yi sivayiwe.” Kuenda Yehova wa sumũlũisa epandi lia Yovi. (Yovi 1:13-22; 42:12-15) Oku konomuisa ovolandu aco Embimbiliya, ca siata oku ndi kuatisa oku amamako lesanju ndaño lovitangi.

Yehova wa siata oku ndi kuatisa oku pitisa kovaso ocipango caye. Oku tanga Embimbiliya olonjanja viosi, ci ndi lembeleka kuenda ci nyĩha ongusu yoku pandikisa. Oku likutilila ku Yehova ca siata oku ndi kuatisa oku kuata esanju kuenda oku yeva “ombembua ya Suku, yina ya piãla olondunge viosi.” (Va Filipoi 4:6, 7) Eci ca siata oku ndi tulisa utima. Oku endaenda kolohongele loku eca atambululo ca siatavo oku ndi pamisa calua.—Va Heveru 10:24, 25.

Ndaño nda kuka ale, ngeca olopandu ku Yehova wa siata oku nyĩha olohõlo vioku talavayela kumue la vamanji Akristão kupange woku longisa Embimiliya omanu. Oku longisa omanu ca siata oku ndi kuatisa oku yula esumuo. Ngeca olopandu ku Yehova ndaño lovitangi viñi viñi nda siata oku liyaka lavio.a

[Etosi pombuelo yemẽla]

[Etosi Liavelapo kemẽla 18]

Oku tanga Embimbiliya olonjanja viosi ci ndi lembeleka kuenda ci nyĩha ongusu yoku pandikisa

[Elitalatu kemẽla 17]

Poku linga ohundo yange yatete

[Elitalatu kemẽla 18]

Kupange woku kunda eci nda kala umalẽhe