Ocipito Coku Malusula Epindiso Liocisoko 126 Kosikola Yo Gileada
Ndomo Omisionaliu Yi Kuata Onima Yiwa
KETEKE 14 kosãi Yelombo, kunyamo wo 2009, Casapalo, kua malusuiwa ocisoko cocita akũi avali lepandu Yosikola yo Gileada. Lesanju lialua, owiñi wa liongoluila ko Centro Educacional da Torre de Vigia, Patterson, Nova Yorke kuna kua lingiwila ocipito caco. Ava va pita kosikola yaco, va tumiwa kolofeka 22 oku kunda esapulo liwa Liusoma wa Suku.—Mateo 24:14.
Vokuenda kuolosãi vitãlo, olondonge via lilongisa Embimbiliya oco vi linge olomisionaliu via loñoloha kupange Wakristão. Keteke lioku malusula, va tambula alungulo a kuatisa oku tẽlisa ciwa ocikele cavo.
Manji Anthony Morris, Wosungu Yolombangi Via Yehova, haeye wa kala usongui wovipama, wa lombolola okuti, olomisionaliu via fetika oku pindisiwa Kosikola yo Gileada oku upisa kunyamo wo 1943. Tunde kunyamo waco, vana va pindisiwa va siata oku eca ekuatiso lialua kupange woku kunda koluali luosi.
Ndaño okuti vakuavisonehua kuenda va Fariseo va tendele ovapostolo va Yesu ndomanu ka va “longisiwile,” pole omo lioku vangula kuavo lutõi, ovanyãli va limbuka okuti ovapostolo vaco, va kala kala kumue la Yesu. (Ovilinga 4:13, Versão Rei Jaime) Epindiso olondonge via tambula, li va kuatisa oku vangula lutõi.
Manji Robert Ciranko, Oñuatisi Yocisoko Casonehi Kosungu Yolombangi Via Yehova wa linga ohundo losapi hati, “Ku ka Vanje Kovipala.” Eye wa lomboluila olondonge okuti va ka sanga omanu va kuete ovituwa loviholo via litepa. Oku kundila omanu vaco ci ka leluka lika nda olondonge vi kuama ovisimĩlo via Yehova. Olondaka viokuti “Suku ka vanji kovipala” kelivulu Liovilinga 10:34, vi lomboloka okuti Suku ka tundila olunda omunu umue okuti ukuavo ci sule. “Suku ka kuete ocame.” (Ovilinga 10:35) Manji Ciranko wa amisako hati, “Oco vu kuate onima yiwa kupange wene wumisionaliu, vu sukila oku tenda omanu vosi vu kundila ndeci Suku a va tenda.”
“Ene vu Kuete Ovina Viosi vu Sukila”
Manji Samuel Herd, Wosungu Yolombangi Via Yehova, wa fetika ohundo yaye poku popia hati: “Ndaño vamue va tenda ongamelo ndocinyama ca vĩha, oyo ya lulikiwa lepondolo lioku kala vekalasoko.” Cimuamue haico ci pita lolomisionaliu viokaliye, momo vi kuete ovimãleho vi va kuatisa oku linga upange wavo kovitumãlo va enda. Kuli ovina vitãlo vi pondola oku va kuatisa.
1. Oku kuatela Yehova ocisola. (Mateo 22:37, 38) Olomisionaliu via lekisa ale onjongole yoku vumba Yehova.
2. Oku soleka ukũlĩhĩso Wondaka ya Suku. Ongamelo ya siata oku soleka okulia vekundukundu liaye. Oyo ka yi liwekapo oku lia, momo ya kũlĩha okuti eci kuiya onjala okulia kuaco ku ko kuatisa. Cimuamue haico, olomisionaliu ka vi kolela lika kolonumbi va lilongisa Kosikola yo Gileada, ovio vi sukila oku amamako loku li tekula kespiritu.
3. Oku sola omanu. (Mateo 22:39) Olomisionaliu vi sukila oku kuatela ohenda omanu.
4. Oku lieca olumue. (Osamo 110:3) Eci olomisionaliu vi yeva ekavo, Yehova o va ĩha olohõlo.—Isaya 40:29.
5. Ongusu yo vutila. Ndeci ongamelo yambata ocilemo comanu poku pita vekalasoko, olomisionaliu vi sukila oku ambatelako ‘ovilemo’ Akristão vana va kava kespiritu. Ocili okuti, oku ci linga ci sukila ongusu yalua, pole olomisionaliu vi kuete olohõlo viumalẽhe.
Ovina Vikuavo Viatiamẽla Kovipama
Michael Burnett, ulongisi wo Gileada, wa tukula okuti olonendo via kala pokati kolombanjaile Yakoba a tuma kombiali yo Kegito. (Efetikilo 43:11) Olonendo vi kuete ovina vialua vi tekula etimba. Vokuenda kuosikola, olondonge via takĩla olonendo vialua konepa yespiritu. Pokati kovina vialua va lilongisa, pa sangiwa esilivilo lioku sanjukila aliangiliyo a Yehova loku sola ocitumãlo cokaliye, oku va enda.
Mark Noumair, ulongisi ukuavo wosikola yo Gileada, wa lombolola okuti Ondaka ya Suku ya soka “locipete ce yuka olondunge.” (Yovi 28:18 NW) Tu sukila oku yulula ocipete caco kuenda oku talavaya lovina vi sangiwamo. Nda upange wumisionaliu ka u nena esanju li lavokaiwa, ovo va sukila oku kuata ovisimĩlo ndevi viupostolo Paulu. Olondonge via Yesu vio tumĩle oku talavaya kimbo liaye vokuenda kuanyamo ecea. Ndaño Paulu wa simĩle okuti wa kala ‘ocikuata ca nõliwa,’ eye wa talavaya longusu kolonepa viosi a kala. (Ovilinga 9:15, 28-30) Ocili okuti, oku kapako ovisimĩlo via Yehova, ka ca lelukile. Yonatão wa liyaka locitangi caco. Eci Yonatão a limbuka okuti Yehova wa nõla Daviti ndosoma, eye wa ci sanjukila kuenda wo kuatisa.
Vonepa yikuavo losapi hati, “Afendeli va Suku va Vangula Lutõi,” olondonge via lombolola ovolandu a sanjuisa a tiamẽla kupange woku kunda otembo va kala kosikola. Valua pokati kavo va fetika oku lilongisa lomanu Embimbiliya. Vonepa ya kuamamo losapi hati, “Va Pongiyiwa Locisoko ca Yehova,” kua pulisiwa vamanji vatatu va kasi otembo yalua kupange wumisionaliu. Omunu lomunu, wa lombolola ndomo a pindisiwa oku talavaya kumue locisoko ca Suku.
“Kali Olomisionaliu Via Sanjuka”
Gerrit Lösch, Wosungu Yolombangi Via Yehova, wa linga ohundo ya velapo losapi hati, “Kali Olomisionaliu Via Sanjuka.” Eye wa lungula okuti, ovina vialua vi tendiwa “ndepuiti,” ka vi nena esanju liocili. (Olosapo 14:13; Ukundi 2:10, 11) Esanju lia velapo, li tunda koku linga ocipango ca Suku, ndaño okuti olonjanja vimue oku ci linga ka ca lelukile. Kosikola yo Gileada kua kala upange walua, pole upange waco wa nena esanju liocili.
Kuli ovina vialua vi sanjuisa Akristão vocili. Momo ovo va fendela Suku yesanju. (Osamo 33:12; 1 Timoteo 1:11) Ovo va kasi ale vofeka yelau konepa yespiritu, kuenda Embimbiliya li lekisa okuti ndopo va ka kala vofeka yelau palo posi. Va limbuka ocimãho comuenyo okuti, oku vumba Yehova loku U sanjuisa. Omo liaco, va soliwe la Yehova kuenda la Yesu.
Hundi wa amisako hati, “Ene vu ka kala olomisionaliu via sanjuka nda wa lilongisi oku kala vakuesanju.” Oku sola omanu loku soliwa lavo, ocina cikuavo ci nena esanju liocili. Omo liaco, velisipo vakuene, okuti ka vu luluvalela lika kokulueya kuavo. Lingili eci ciwa vakuene, kuatisi ava va hongua, lekisi ongangu yiwa. (Osamo 41:1, 2; Ovilinga 20:35) Esanju liocili li tunda koku pesela otembo kupange woku kunda.—Luka 11:28.
Manji Lösch wa malusula ohundo yaye levetiyo liokuti, “Kuendi ndolomisionaliu via sanjuka, lingi olomapalo via pita pokati, pole luluvaleli koku sanjuisa Yehova, Suku yetu yesanju kuenda lingi ovina vi sanjuisa vakuene.”
Noke yoku tanga ovilamo via tunda kolofeka vikuavo, manji Anthony Morris, wa eca kolomisionaliu ovikanda viavo viuvangi. Yu umue pokati kolondonge viocisoko 126, wa tangela Osungu Yolombangi Via Yehova ukanda wolopandu viavo. Vukanda waco, ovo va lekisa esanju va kuata omo lioku pita Kosikola yo Gileada.
Poku malusula, usongui wovipama wa popia hati, ndeci ‘asokoluilo kuenda asipa’ a tokekisa etimba pamosi, “ukuenje wa kolelua haeye wa lunguka” wa siata oku linga esokiyo lioku eca eteku lolonumbi vi kuatisa omanu va Yehova. (Va Kolosai 2:18, 19; Mateo 24:45) Nda olomisionaliu vi pokola kolonumiwa via Suku, vi tẽlisa ciwa upange wavo woku kunda.—2 Timoteo 4:5.
[Okakasia kemẽla 31]
ULANDU WOCISOKO CACO
Kolofeka kua tunda olondonge: 6
Kolofeka va tumiwa: 22
Etendelo liolondonge: 56
Etendelo liolohueli: 28
Anyamo a pita pokati va kuete: 32, 8
Anyamo a pita pokati va kasi vocili: 17, 9
Anyamo va kasi kupange wotembo yosi: 13, 5
KOKU VA TUMIWA
Olomisionaliu via tumiwa kolofeka evi, ko Benin, Bolivia, Bulgaria, Burkina Faso, Camerões, Costa Rica, Gana, Guatemala, Honduras, Kenya, Liberia, Madagascar, Moçambique, Nicaragua, Panamá, Paraguai, Peru, Romenia, Serra Leoa, Africa do Sul , ko Togo kuenda ko Uganda.
[Elitalatu kemẽla 32]
Ocisoko 126, Cava va Malusula Epindiso Kosikola yo Gileada
Olonduko vi kasi kulala u kuãimo, vi fetika kepĩli oku endela kondio.
(1) Kirchhoff, K.; Nichols, C.; Guzmán, Y.; Coil, H.; Becker, O.; De Simone, A. (2) Manzanares, A.; Bouvier, E.; Peddle, J.; Mason, H.; Braz, J. (3) Lee, J.; Forte, A.; Boucher, T.; Marsh, A.; Leighton, S.; Glover, M. (4) Kambach, H.; Jones, T.; Ferreira, A.; Morales, J.; Chicas, S.; Davis, B.; Dormanen, E. (5) Dormanen, B.; Nichols, J.; Pacho, T.; Titmas, L.; Bouvier, E.; Kirchhoff, A. (6) Leighton, G.; Pacho, A.; Van Campen, B.; Manzanares, A.; Rivard, A.; Lee, Y.; Titmas, L. (7) Boucher, M.; Coil, K.; Marsh, C.; Guzmán, J.; Jones, W.; Kambach, J. (8) Glover, A.; Ferreira, G.; Mason, E.; Forte, D.; Davis, N.; Chicas, O.; Rivard, Y. (9) Braz, D.; Van Campen, D.; Morales, A.; De Simone, M.; Becker, M.; Peddle, D.