Nda Limbuka Esilivilo Liomuenyo
Ulandu wa Lomboluiwa la Gaspar Martínez
Ulandu wange, wa tiamẽla kotembo nda tunda kimbo okuti, nda kala umalẽhe ohukũi, kuenje, eci nda pitila volupale nda linga ohuasi. Pole, poku tanga ulandu waco, oka limbuka okuti, ukuasi nda kuata hawoko nda lavokaile.
NDA kulila vimbo limue ka li kuete ukuasi li tukuiwa hati, Rioja, konano yofeka yo Espanya, okupisa kunyamo wo 1930. Eci nda kuata ekũi lianyamo, nda liwekapo oku endaenda kosikola, pole, otembo yaco nda lilongisa ale oku tanga loku soneha. Ame kumue la va manjange epandu, tua pita otembo yalua loku lisa olomeme kuenda oku lima ovapia etu.
Omo liuhukũi tua simĩle okuti, olombongo kuenda ovina vikuavo, ovio vi kuete esilivilo lia velapo komuenyo. Tua fetika oku livela omuenyo womanu vana va kuatele ukuasi. Pole, eteke limue mbisipu wa lombolola hati, pokati kovambo osi a kasi vocikele caye, “imbo lietu olio lika lia velisilepo etavo.” Eye ka kũlĩhĩle okuti, vokuenda kuotembo omanu valua vimbo vaka siapo etavo Liokatolika.
Oku Sandiliya Ocina ca Velapo
Nda kuela ufeko umue tua kala vimbo limuamue o tukuiwa hati, Mercedes. Eci papita otembo yimue, tua cita omõla ulume. Kunyamo wo 1957, tua ilukila ocipepi lolupale luo Logroño, noke epata liange liosi lia ilukilavo kimbo liaco. Omo okuti sia kuatele uloño wumesele, sia lavokaile oku sanga upange umue u ndi kuatisa oku tekula epata liange. Nda kala oku sanda olonumbi vi ndi kuatisa. Noke nda fetika oku vi sandiliya volonjo vialivulu, ndaño sia kũlĩhĩle elivulu ndi sukila oku tanga.
Eteke limue vovingungu viasapulo nda yeva okuti, va kala oku eca elilongiso Liembimbiliya lekuatiso liovikanda. Noke yoku pita kelilongiso liaco, Ovitunda vimue vietavo lio Postande, via sapela lame. Noke yoku pita oloneke vimue loku endaenda konembele yavo, nda limbuka ukuse wa kala pokati kovitunda viaco. Pole, sia liwekelepo oku endaenda kefendelo liaco, momo nda simĩle okuti, atavo osi amuamue.
Ovaso Ange a Letuluka
Kunyamo wo 1964, ukuenje umue o tukuiwa hati, Eugenio, weyile oku tu nyula konjo yetu. Eye wa kala Ombangi ya Yehova okuti, lalimue eteke nda yevele etavo liaco. Pole, nda kuata ombili yoku sapela catiamẽla Kembimbiliya. Omo lioku sima okuti, ndi kuete ukũlĩhĩso Wovisonehua, ndo tambulula lovinimbu vimue Viembimbiliya nda lilongisa. Ndaño nda seteka oku teyuila ondontilina yetavo lio Postande, pole, sia kolelele kovina nda lilongisa.
Noke yoku sapela olonjanja vivali, nda limbuka okuti, Eugenio wa kũlĩhĩle ciwa Ondaka ya Suku. Ndaño elilongiso liange lio kosikola lia velelepo okuti liaye li sule, pole, nda komõha calua poku limbuka ndomo a loñoloha koku sanga lonjanga ovinimbu Viembimbiliya loku vi lombolola. Eugenio wa ndi lekisa ovipama Viembimbiliya vi lekisa okuti, tu kasi koloneke via sulako, kuenda Usoma wa Suku ndopo uka nena oluali luokaliye palo posi. Nda komoha calua.—Osa. 37:11, 29; Isa. 9:6, 7; Mat. 6:9, 10.
Noke, nda tava oku lilongisa Embimbiliya. Ovina viosi nda lilongisa, via kala viokaliye, kuenda via ndi kuatisa calua. Nda kuata elavoko liesanju, halio lia velapo komuenyo. Kuenje, oku sandiliya kuange kua pitila kesulilo. Elikolisilo liange lioku mioñolola ekalo liomuenyo, ka lia kuatele vali esilivilo. Kuenje, nda liwekapo oku sakalala calua lupange woku sanda eteku. Momo nda lilongisa okuti, oku vela kuenda oku fa, ka vika kalako vali.—Isa. 33:24; 35:5, 6; Esit. 21:4.
Noke, nda fetika oku sapuilako epata liange catiamẽla kovina nda kala oku lilongisa. Kuenje, nda va lomboluila okuti, Suku wa likuminya oku nena oluali luokaliye, muna omanu vakuekolelo vaka kala otembo ka yi pui.
Epata Liange Lia Tava Oku Lilongisa Embimbiliya
Valua pokati kepata lietu, tua enda oku liongoluila konjo ya tiyu yetu Calumingu koñolosi, oco tu sapele eci catiamẽla kolohuminyo Viembimbiliya. Vosemana tua enda oku pita olowola vivali ale vitatu loku sapela. Eci Eugenio a limbuka okuti, valua pokati ketu va fetika oku lekisa onjongole yoku lilongisa Embimbiliya, wa sokiya oku kuatisa omunu lomunu vepata.
Nda kuata epata likuavo kolupale luo Durango, lua kala ci soka 120 kolokilometulu okuti, ka kua kale Olombangi Via Yehova. Eci papita olosãi vitatu, nda sokiya oloneke vivali vioku va nyula, oco ndi va lomboluile ovina nda kala oku lilongisa. Kepuluvi liaco, koñolosi, tua enda oku kala ci soka ekũi komanu, loku sapela lavo toke kociteketeke. Vosi yavo va lekisile onjongole yoku yevelela. Kesulilo lioloneke viaco, nda va sila Ambimbiliya amue kuenda alivulu akuavo. Noke, nda linga eliangiliyo lioku sapela lavo olonjanja vikuavo.
Eci Olombangi Via Yehova via pitila ko Durango kuna okuti lomue handi wa kundilileko, va sangako ci soka 18 komanu va kala oku talamẽla oku lilongisa Embimbiliya. Omo liaco, Olombangi Via Yehova via linga eliangiliyo lioku longisa Embimbiliya kapata aco.
Otembo yaco, ukãi wange Mercedes ka tavele oku lilongisa Embimbiliya omo liusumba womanu. Vokuenda kuotembo, upange Wolombangi Via Yehova kofeka yo Espanya wa fetika oku tatekiwa lolombiali. Kuenje, wa simĩle okuti, omãla vetu vavali vaka tundisiwa kosikola, kuenda vosi yetu tu tundisiwa vofeka. Pole, eci a limbuka okuti vosi vakuepata lietu va fetika oku lilongisa Embimbiliya, wa fetikavo oku lilongisa.
Eci papita anyamo avali, ci soka 40 komanu vakuepata lietu, va papatisiwa, kuenda va linga Olombangi Via Yehova. Kotembo yaco, ame kumue lepata liange, tua kuata ocimãho cimuamue komuenyo. Nda limbuka okuti, nda sanga ovina vi kuete esilivilo lia velapo komuenyo. Tua tambula asumũlũho alua a tunda ku Suku.
Osimbu Nda Kala Oku Kuka Nda Kuata Esanju Lialua
Vokuenda kueci ci panda 20 kanyamo, nda tiamisilile utima wange koku tekula omãla vetu vavali valume, kuenda oku kuatisa ekongelo lietu. Eci ame la Mercedes tua ilukila ko Logroño, volupale luaco mua kala lika 20 Kolombangi Via Yehova. Pole, mua kala 100.000 komanu. Noke, nda tambula ovikele vikuavo vekongelo.
Eci nda tẽlisa 56 kanyamo, ocisoko cupange wange woku sanda eteku, ca liwekapo oku talavaya, kuenje sia kuatele vali upange. Omo okuti, nda yonguile oku litumbika kupange wakundi votembo yosi, noke, nda linga ukundi wa velapo. Nda enda oku tambula olombongo vitito, kuenje ka ca lelukile oku tekula epata. Pole, Mercedes wa ndi kuatisa calua, momo wa sandiliya upange woku yelisa volonjo. Tua tẽla oku tekula ciwa epata lietu, kuenda lalimue eteke tua kambelele ovina tu sukila. Toke cilo, ndi kasi oku amamako lupange wakundi va velapo, kuenda ukãi wange olonjanja vimue, wa siata oku li tumbika kupange wakundi va sokamo. Momo o sole calua upange woku kunda.
Kanyamo apita, Mercedes wa enda oku eca olorevista kumalẽhe umue ufeko o tukuiwa hati, Merche okuti, wa fetika oku lilongisa Embimbiliya tunde vutila. Merche wa tanga alivulu aco lesanju, kuenda ukãi wange Mercedes wa limbuka okuti, ufeko waco o yongola oku lilongisa Embimbiliya. Noke, Merche wa tava oku lilongisa Embimbiliya kuenje wa fetika oku kula kespiritu. Omo okuti ulume waye Vicente wa kala oholua, ka kuatele upange woku talavaya, momo wa enda oku tundisiwa calua kovopange osi a sanga. Omo liaco, ka kuatele olombongo vioku tekula epata. Omo liuholua, olohuela viavo via kala kohele.
Ukãi wange wa vetiya Merche oco a sapele lulume waye Vicente okuti, ndi yongola oku vangula laye. Noke lioku va nyula olonjanja vialua, wa tava oku lilongisa Embimbiliya. Vicente wa fetika oku linga apongoloko, kuenda wa enda oku pita oloneke vialua okuti, ka kolua vali. Noke, wa fetika oku pita olosemana vialua okuti ka kolua. Oku sulako, wa liwekapo oku nyua. Ocipala caye ca pongoloka, kuenda epata liaye lia fetika oku kuata ombembua. Vosi yavo oku kongelamo ukãi waye kuenda omõla wavo ufeko, va siata oku kuatisa calua ekongelo li kasi Vocifuka co Kanaria, kuna va kasi cilo.
Nda Siata Oku Sokolola Omuenyo Uwa Nda Kuata
Ndaño vamue pokati kepata liange va lilongisa Embimbiliya kanyamo a pita cilo va fa, pole, epata lietu li kasi oku amamako oku livokiya, kuenda Suku wa siata oku tu sumũlũisa calua. (Olosap. 10:22) Nda sanjuka calua poku limbuka okuti, omanu vana va fetika oku lilongisa Embimbiliya ci soka 40 kanyamo konyima, kumosi lomãla vavo kuenda olonekulu viavo, va kasi oku amamako oku vumba Yehova lekolelo!
Cilo, vosi vakuepata liange va linga Olombangi Via Yehova. Valua pokati kavo, akulu vekongelo, vakuavo oloñuatisi viakulu vekongelo, kuenda akundi votembo yosi. Omõletu uveli kumue lukãi waye, va kasi ko Betele ko Madrid, kofeka yo Espanya. Eci nda linga Ombangi ya Yehova, vofeka yo Espanya tua kala lika ci soka 3.000 Kolombangi Via Yehova. Cilo tu kasi eci ci pitahãla 100.000. Toke cilo, ndi kasi oku amamako kupange wakundi votembo yosi, kuenda ndeca olopandu ku Suku omo lioku linga upange waye. Ndaño sia lilongisile calua kosikola, pole, olonjanja vimue nda siata oku tambula ocikele coku nyula akongelo.
Kanyamo a pita, nda yeva okuti, imbo lina nda kulila lia sandoka. Uhukũi, wa vetiya omanu vosi oku siapo ovapia avo, lolonjo, oco va sande ekalo liwa kolofeka vikuavo. Pole, ovingendelei vialua oku kongelamo ame, tua sanga ukuasi wespiritu. Tua lilongisa okuti, omuenyo u kuete esilivilo, kuenda oku vumba Yehova ci nena esanju lia velapo.
[Elitalatu kemẽla 32]
Epata liosi lia manji Martínez li kasi vocisoko ca Yehova