“Popia Ondaka Ya Suku Lutõi”

“Vosi ve yukisua espiritu sandu, kuenje va popia ondaka ya Suku lutõi.”​—⁠OVIL. 4:⁠31.

1, 2. Momo lie tu sukilila oku loñoloha kupange woku kunda?

ECI kua kambele oloneke vitatu oco Yesu a fe, eye wa sapuila olondonge viaye hati: “Ondaka eyi yiwa yusoma yi kundilua kuoha koluali, ha yi lingi uvangi kolofeka viosi, oco esulilo liya noke.” Osimbu handi Yesu ka endele kilu, wa tuma oloñame viaye ‘oku tavisa omanu vo kolofeka viosi oco va linge olondonge, loku va longisa ovina viosi eye a va kundika.’ Kuenje wa va sapuila hati, ‘ñasi kumue lene oloneke viosi toke kesulilo lioluali.’​—⁠Mat. 24:14; 26:​1, 2; 28:​19, 20.

² Koloneke vilo, etu Tulombangi via Yehova tu kasi oku linga lombili upange una wa fetikiwa kocita catete. Ka kuli upange ukuavo wa velapo u pondola oku tuala kepopelo, nda haku kundako Usoma loku longisa omanu oco va linge olondonge. Omo liaco, oku loñoloha kupange woku kunda ci kuete esilivilo! Vocipama cilo, tu ka lilongisa ndomo espiritu sandu li tu kuatisa oku popia lutõi poku kundila omanu. Ovipama vivali vi kuãimo, vi ka lekisa ndomo espiritu lia Yehova li pondola oku tu kuatisa oku longisa luloño kuenda oku kunda lepandi.

Tu Sukila Oku Kuata Utõi

3. Momo lie ci sukilila oku kuata utõi poku kunda Usoma?

³ Ocikundi Suku a tu ĩha coku kunda Usoma waye, esumũlũho limue ka li sokisiwa. Pole, olonjanja vimue oku ci linga ka ca lelukile. Ndaño okuti vamue va tava lonjanga oku va kundila Usoma wa Suku, handi kuli ava va kasi ndomanu vo koloneke via Noha. Catiamẽla kokuavo Yesu wa popia hati, “ka va limbukile cimue, toke eci etande lieya kuenje lia va nyõla vosi.” (Mat. 24:​38, 39) Vamue va siata oku tu tomba kuenda oku tu lambalala. (2 Pet. 3:⁠3) Pamue elambalalo liaco li tunda kolombiali, kakamba vo kosikola, vo kupange kuenda ku vangandietu. Omo okuti ka tua lipuile, pamue tu yeva osõi kuenda usumba wokuti ka tu ka kuata vali akamba. Kuli ovina vialua vi pondola oku tu tateka oku “popia lutõi” ondaka ya Suku. (Va Efe. 6:​19, 20) Oku kunda ondaka ya Suku, ci sukila utõi kuenda epandi. Nye ci pondola oku tu kuatisa oku kuata utõi waco?

4. (a) Oku kuata utõi ku lomboloka nye? (b) Upostolo Paulu wa lekisa ndati utõi poku popia la va Tesalonike?

⁴ Ondaka “utõi,” yi lomboloka oku kala “londundo, elukuto, pamue uhande.” Ondaka yaco yi pitiya ocisimĩlo coku kuata “ombili, ekolelo, . . . lekambo liusumba.” Oku kuata utõi ka ci lomboloka oku kala omunu umue wa tĩla. (Va Kol. 4:⁠6) Osimbu tu amamako lutõi, tu sukila oku kala lombembua lomanu vosi. (Va Rom. 12:​18) Omo liaco, poku kunda esapulo liwa Liusoma wa Suku, ndaño tu ci linga lutõi, lopo tu sukila oku kuata utate oco ka tu ka sumuise omanu. Poku lekisa utõi, tu sukilavo oku likolisilako oku kuata ovituwa vikuavo. Utõi waco ka u tundi kokuetu muẽle. Upostolo Paulu kumue lakamba vaye noke yoku “fũkĩlisua vo Filipoi,” va lekisa ndati ‘utõi’ woku vangula la va Tesalonike? Paulu wa soneha hati: “Tua kuata utõi vu Suku.” (Tanga 1 Va Tesalonike 2:⁠2.) Yehova Suku eye o malako usumba wetu kuenda o tu ĩha utõi.

5. Yehova wa eca ndati utõi ku Petulu la Yoano kuenda olondonge vikuavo?

⁵ Eci olombiali, “akulu, lolombuale, la vakuavisonehua,” va lemẽla ovapostolo oku kunda, Petulu la Yoano va va kumbulula vati: “Nda esunga kovaso a Suku oku tava kokuene, okuti ku Suku hakoko, ci popi, ene muẽle. Momo etu, lacimue vali tu tẽla oku linga, te oku popia eci tua mola leci tua yeva.” Ovo ka va likutililile ku Suku oco elambalalo li imũhe pole kumue la vamanji vakuavo va pinga ku Suku vati: “Kaliye a [Yehova], limbuka ndomo va kasi loku seteka oku tu lingisa usumba, kuenje eca kakuenje vove utõi woku popia ondaka yove.” (Ovil. 4:​5, 19, 20, 29) Yehova wa tambulula ndati epingilo liavo? (Tanga Ovilinga 4:31.) Eye wa va ĩha utõi lekuatiso liespiritu liaye. Koloneke vilo, espiritu lia Suku li pondolavo oku tu kuatisa. Oco hẽ, tu tambula ndati espiritu lia Suku loku songuiwa lalio kupange woku kunda?

Kuata Utõi

6, 7. Espiritu sandu lia Suku li songuila ndati omanu? Tukula ovolandu amue.

⁶ Eci ci tu kuatisa oku tambula espiritu sandu lia Suku, oku li pinga kokuaye vohutililo. Yesu wa sapuila olonjeveleli viaye hati: “Nda ene wa tuwi ale oku linga cĩvi, wa kũlĩhi oku eca oviali viwa komãla vene, Isiene ukuailu hẽ, ka velipo oku avela espiritu sandu kuava vo pinga?” (Luka 11:​13) Tu sukila oku likutilila lolupili oku pinga espiritu sandu. Nda poku kundila volokololo, poku eca uvangi ka wa sokiyiwile, oku kundila povitumãlo violomĩlu tu yeva usumba, tu sukila oku likutilila ku Yehova oco a tu ĩhe espiritu liaye okuti li tu kuatisa oku kuata utõi.​—⁠1 Va Tes. 5:⁠17.

⁷ Eci oco ca linga ukãi umue Ukristão o tukuiwa hati Rosa.a Eteke limue, eci Rosa a endele oku longisa kosikola, ukãi umue okuti ulongisivo wo kosikola yaco, wa kala oku tanga esapulo lia pita kosikola yikuavo lia lekisa ndomo omãla va kala oku tatiwa lãvi. Omo ulongisi waco wa komõha calua lovina a tanga, wa popia hati, “Oluali lulo hẽ lu ka sulila pi?” Rosa ka pumbile epuluvi lioku eca uvangi. Nye eye a linga oco a kuate utõi woku fetika ombangulo? Rosa wa popia hati, “Nda likutilila ku Yehova oco a ñuatise.” Eye wa eca uvangi uwa kuenje, wa linga esokiyo lioku amamako lombangulo. Kũlĩhisavo ulandu wa kafeko umue o kuete anyamo atãlo o tukuiwa hati Milane, kolupale luo Nova Yorke. Milane wa popia hati: “Olonjanja viosi eci handi sia endele kosikola, mãi wa enda oku likutilila ku Yehova kumue lame.” Va enda oku tukula nye volohutililo viaco? Ovo va enda oku pinga oco Milane a kuate utõi woku vangula ocili ca tiamẽla ku Suku yaye! Inaye wa popia hati: “Oku lingainga olohutililo, ca kuatisa Milane oku lombolola esunga lieci ka tavela oku sambiliyila ateke oku citiwa loku panga onepa kovipito vikuavo violuali.” Ovolandu a-a hẽ, ka a lekisa okuti olohutililo vi tu kuatisa oku kuata utõi?

8. Nye tu lilongisila kulandu wuprofeto Yeremiya?

⁸ Sokolola eci ca kuatisa uprofeto Yeremiya oku kuata utõi. Eci Yehova a nõla Yeremiya oco a linge uprofeto wolofeka, Yeremiya wa tambulula hati: “Ame hameko, oku popia si ci tẽla momo ndimõla.” (Yer. 1:​4-6) Ndaño Yeremiya wa amamako lupange waye, omanu valua vo tendele okuti wa kala lika oku kunda olondaka vienyõleho. (Yer. 38:⁠4) Yeremiya wa sapula esombiso lia Yehova lutõi walua, votembo yi pitahãla 65 kanyamo. Va Isareli va kũlĩhile ciwa utõi waye woku kunda, okuti kovaso yanyamo 600, eci Yesu a vangula lutõi, omanu vamue va simile okuti, Yeremiya wa pinduka. (Mat. 16:​13, 14) Uprofeto Yeremiya weya oku yula ndati usumba a kuatele? Eye wa popia hati: “Vutima wange mu kala ca soka ndondalu yi taima ya yikiwila vakepa ange. Nda kava loku likandangiya oku ci sapula.” (Yer. 20:⁠9) Ocili okuti unene wondaka ya Yehova wa vetiya Yeremiya oku vangula.

9. Ndeci ca pita la Yeremiya, Ondaka ya Suku yi pondola oku tu vetiya ndati?

⁹ Paulu wa sonehela ndoco va Heveru: “Ondaka ya Suku yi kasi lomuenyo, haiyo yi kasi loku talavaya, haiyo ya tua enene, omoko ya tua nelembali yi sule. Ondaka yaco yi toma toke yi tepa omuenyo [lolondunge], kuenda asokoluilo lupuma, haiyo yi limbuka ovisimilo lovipango viutima.” (Va Hev. 4:​12) Ocili, Ondaka ya Suku yi pondola oku tu vetiya ndeci ya vetiya Yeremiya. Ivaluka okuti ndaño Embimbiliya lia sonehiwa lomanu, ovo ka va ci lingile lolondunge viavo muẽle, momo omanu vaco va vetiyiwa la Suku. Kelivulu lia 2 Petulu 1:​21, tu tangako ndoco: “La-umue owanji wovaprofeto weya locipango comunu, puãi omanu va kola va vetiyiwa le espiritu sandu va popia ondaka ya tunda ku Suku.” Eci tu linga elilongiso Liembimbiliya pokolika, vutima wetu mu yuka esapulo lia vetiyiwa lespiritu sandu. (Tanga 1 Va Korindo 2:10.) Esapulo liaco, li kala “ndondalu yi taima” vakepa etu, kuenje ka tu pondola vali oku likandangiya oku popia.

10, 11. (a) Oco tu popie lutõi, elilongiso lietu lio pokolika li sukila oku lingiwa ndati? (b) Tukula olonjila vimue vi tu kuatisa oku lemulula elilongiso lietu lio pokolika.

¹⁰ Oco elilongiso lio pokolika li kuate unene, te li lingiwa lonjila yimue okuti esapulo Liembimbiliya li vetiya ovisimĩlo viutima wetu. Vocinjonde uprofeto Esekiele a mola, vo tuma oku lia ociña celivulu mua kala esapulo liepopelo komanu vakuavitima via tĩla. Kuenje Esekiele wa ina esapulo liaco kuenda olio lia linga onepa yomuenyo waye. Eye wa sanjukilile oku sapula eyovo ndo kulia owiki.​—⁠Tanga Esekiele 2:8–3:​4, 7-9.

¹¹ Ekalo lietu li kasi ndeli lia Esekiele. Koloneke vilo, omanu valua ka va yongola oku yeva eci Embimbiliya li popia. Oco tu amameko oku kunda Ondaka ya Suku, tu sukila oku lilongisa Ovisonehua loku ecelela okuti esapulo liaco li kala vutima wetu. Oku amamako, ku lomboloka oku kuata ocituwa coku lilongisa eteke leteke. Tu kuete onjongole ndeyi yukualosamo wa imba ocisungo hati: “Olondaka viomela wange lovisimilo viutima wange vi sunguluke kokuove, a Yehova, wucikolo cange, haive wunjovoli yange.” (Osa. 19:​14) Oku sanda otembo yoku sokolola eci tua tanga, oco ocili Cembimbiliya ci yukise utima wetu, ci kuete esilivilo lialua! Mekonda liaco, tu sukila oku likolisilako oku lingainga elilongiso lio pokolika lonjila yimue yiwa.b

12. Olohongele vi tu kuatisa ndati oku songuiwa lespiritu sandu?

¹² Onjila yikuavo yi tu kuatisiwa oku tambula espiritu sandu lia Yehova oku ‘livetiya pokati loku kala locisola kuenda ovilinga viwa, okuti ka tu liwekapo oku liongolola.’ (Va Hev. 10:​24, 25) Oku endaenda kolohongele, loku yevelela lutate, kuenda oku kapako ovina tu lilongisa ci tu kuatisa oku songuiwa lespiritu sandu. Ove hẽ ku tava okuti Yehova o songuila ekongelo lekuatiso liespiritu liaye?​—⁠Tanga Esituluilo 3:⁠6.

Onima Yiyilila Koku Kuata Utõi

13. Nye tu lilongisila kulandu Wakristão vo kocita catete woku tẽlisa upange woku kunda?

¹³ Espiritu sandu, ongusu yimue ya pama, yi sangiwa kolonepa viosi violuali, kuenda li pamisavo omanu oku linga ocipango ca Yehova. Lekuatiso liespiritu sandu, Akristão vo kocita catete va linga upange woku kunda lonjila yi komõhisa calua. Ovo va kundila esapulo liwa ‘komanu vosi vemehi liekumbi.’ (Va Kol. 1:​23) Omo valua pokati kavo va tendiwile “[nd]omanu vaño,” tu limbuka okuti kua kala ongusu yimue ya va vetiya oku ci linga.​—⁠Ovil. 4:⁠13.

14. Nye ci tu kuatisa oku ‘kuata owuya wespiritu’?

¹⁴ Oku ecelela okuti espiritu sandu li songuila omuenyo wetu ci pondola oku tu vetiya oku kunda lutõi. Oku pinga espiritu vohutililo, oku linga elilongiso lio pokolika, oku sokolola eci tua tanga, kuenda oku endaenda kolohongele, ci pondola oku tu kuatisa ‘oku kuata owuya wespiritu.’ (Va Rom. 12:​11) Embimbiliya li lombolola ulandu u “Yudea umue, onduko yaye Apolosi, onyitiwe yimbo lio ka Alexandria, weya ko Efeso,” hati: “Wa kala onoño yoku kunda, kuenda wa loñolohele lovisonehua. Eye wa longisiwa lika onjila ya Yehova, pole omo wa kala ukuambili yovutima, oco wa sapula loku longisa lutate ovina via Yesu.” (Ovil. 18:​24, 25) Nda etu tu kalavo ‘vakuambili yovutima’ tu ka kuata utõi woku kundila konjo lanjo kuenda oku eca uvangi ka wa sokiyiwile.​—⁠Va Rom. 12:⁠11.

15. Oku vangula lutõi ci tu kuatisa ndati?

¹⁵ Oku kuata utõi woku eca uvangi ci tu kuatisa calua. Tu pondola oku vokiya ovituwa viwa loku velisapo upange wetu. Esanju lietu li li vokiya kuenda tu tẽlisa ciwa upange. Kuenje tu pamisa ombili loku kuata ocituwa conjanga koku tẽlisa upange wetu.

16. Nda ombili yetu kupange woku kunda yi kasi oku tepuluka tu sukila oku linga nye?

¹⁶ Nda tua limbuka okuti ombili tua kuatele kupange woku kunda yi kasi oku tepuluka, tu sukila oku linga nye? Tu sukila oku li kũlĩhisa etu muẽle lumbombe. Paulu wa soneha hati:“ Liseteki ene muẽle nda hẽ vu kasi ocili vekolelo. Linyiki [ene] muẽle.” (2 Va Kor. 13:⁠5) Lipula ndoco: ‘Ñuete hẽ ombili yovutima? Nda siata hẽ oku pinga espiritu ku Yehova volohutililo? Olohutililo viange vi lekisa okuti ñuete muẽle ekolelo lioku linga ocipango caye? Ombangulo yange yi lekisa hẽ okuti nda sanjukila upange wetu woku kunda? Anga ndi kuete ocituwa ciwa coku linga elilongiso lio pokolika? Nda siata oku sokolola ovina nda tanga levi nda yeva? Ndi kuete hẽ ocituwa coku eca atambululo kolohongele?’ Oku sokolola kapulilo a-a, ci pondola oku ku kuatisa oku limbuka kolonepa vimue wa hongua loku sanda onjila yoku potolola ocitangi caco lonjanga.

Ecelela Okuti Espiritu Lia Suku li ku Ĩha Utõi

17, 18. (a) Koloneke vilo, upange woku kunda u kasi oku lingiwa ndati? (b) Tu pondola oku lekisa ndati “utõi” poku kunda olondaka viwa Viusoma wa Suku?

¹⁷ Eci Yesu a pinduiwa wa sapuila olondonge viaye hati: ‘Eci espiritu sandu liu wili, vu kuata unene, kuenje vu linga olombangi viange vo Yerusalãi, lo vo Yudea yosi, lo vo Samaria, kuenda toke kasulilo okilu lieve.’ (Ovil. 1:⁠8) Koloneke vilo, upange waco wa li vokiya calua okuti kosimbu ci sule. Unyamo wa pita, ci pitãhala epanduvali kolohuluwa Violombangi via Yehova via litumbika koku sandeka esapulo Liusoma kueci ci pitãhala 230 kolofeka, kuenje va pesela eci ci soka 1.500.000 kolowola, poku linga upange waco. Oku lekisa ombili koku linga upange owu, ci nena esanju liocili, momo ka u ka pituluiwa vali!

¹⁸ Ndeci ca kala kocita catete, upange woku kunda koluali luosi u kasi loku lingiwa lekuatiso liespiritu lia Suku. Nda tu tava okuti espiritu li tu soguila, tu ka kuata “utõi” kupange woku kunda. (Ovil. 28:​31) Omo liaco, tu songuiwi lespiritu sandu osimbu tu kunda olondaka viwa Viusoma wa Suku!

[Atosi pombuelo yamẽla]

Nye wa Lilongisa?

• Momo lie tu sukilila utõi poku popia ondaka ya Suku?

• Nye ca kuatisa olondonge kosimbu oku popia lutõi?

• Tu pondola oku kuata ndati utõi?

• Oku kuata utõi ci tu nenela onima yipi?

[Elitalatu kemẽla 7]

Olonjali vi pondola oku kuatisa ndati omãla vavo oku kuata utõi?

[Elitalatu kemẽla 8]

Oku linga ohutililo yi teta onimbu ci pondola oku ku kuatisa oku kuata utõi koku kunda