Kuata “Onjelo Yutima” Kotembo Yilo Yohali
“KOLONEKE vilo lomue o likala okuti onjelo ya linga ocitangi Vetavo.” Olondaka evi, via vanguiwa la Vittorio Messori, ulume umue ukuasapulo ketavo lio Katolika, poku konomuisa ovitangi viukahonga via pita ndopo Vetavo kofeka yo Italia. Eye wamisako hati: “Oku imula ocihandeleko coku tateka olopatele oku kuela, hayoko lika onjila yoku tetulula ocitangi caco, momo ci soka 80 kolopursendu viovitangi viukahonga—vialume va lipekaila lalume kuenda lomãla vatito.”—La Stampa.
Ocili okuti, evĩho ondimbukiso ‘yoloneke vilo via sulako.’ (2 Tim. 3:1-5) Ndomo ca lekisiwa vovolandu o kaliye, evĩho ka li kasi lika pokati kava havakuetavoko, pole, vana va litukula vati omanu va Suku, va vĩhisuavo. Ovitima viavo via vĩha haivio via sina, vi va vetiya oku linga umbondo. (Va Efe. 2:2) Eli olio esunga lieci Yesu a ecela elungulo liokuti, “evi vi tunda vutima vievi, ovisimilo vĩvi, umondi, oku pekelisa, ukahonga, umunu, uvangi wuhembi, etonãi.” (Mat. 15:19) Yehova Suku o yongola okuti afendeli vaye va sola “onjelo yutima.” (Olosap. 22:11) Oco hẽ, Ukristão o kuata ndati onjelo yutima koloneke vilo viohali?
Ceci ci Lomboloka “Onjelo Yutima”
Embimbiliya li tukula ondaka “utima” vupopi umue wocindekaise. Elivulu limue li lekisa okuti, Vembimbiliya ondaka utima, yi lomboloka “vokati komunu,” muna “Suku a konomuisa ekalo liomunu, kuna kua kunamẽla etavo, haiwo u vetiya ovituwa viomunu.” Utima u lomboloka eci tua tuwa. Ndomo ca lekisiwa velivulu liaco, Yehova o sanjukila ekalo liwa liutima wafendeli vaye.—1 Pet. 3:4.
Vembimbiliya, olondaka oku “lipua” loku “liyelisa,” vi tiamisiwila koku liyelisa ketimba. Pole, vi tiamisiwilavo komanu va yuvula oku vĩhisua, ci kale kovituwa, ci kale konepa yetavo. Yesu, Vohundo a lingila Komunda, wa popia hati: “Ava va yela vutima va sumũlũha.” Eye, wa tukula omunu o kuete ovisimĩlo vie lipua. (Mat. 5:8) Olonjongole lovisimĩlo viomunu waco, viosi via yela. Omo liocisola lolopandu va kuetele Yehova, vo vumba lutima wosi, kuenda va yuvula ombambe. (Luka 10:27) Ove ku yongola hẽ oku kuata onjelo yaco?
Ka ca Lelukile Oku Amamako ‘Lonjelo Yutima’
Afendeli va Yehova ka va vetiyiwa lika oku ‘kala lovaka a yela’ pole, va sesamẽlavo oku kala “lutima wa pua evĩho.” (Osa. 24:3, 4) Ocili okuti, kafendeli va Suku ka ca lelukile oku amamako ‘lonjelo yutima.’ Satana kumue loluali luaye, loku hongua kuetimba lietu, vi tu siliñinya oku tinduka ku Yehova. Oco tu pandikise lasipato aco, tu sukila oku sola “onjelo yutima” loku amamako oku ci linga. Eci ci tu kuatisa oku kala akamba va Suku. Oco hẽ, tu kuata ndati onjelo yutima?
Kelivulu lia va Heveru 3:12, tu sangako elungulo eli: “Lunguki a vamanji, sanga pokati kene pa kala umue ukuotima ũvi, haiwo ka u kuete ekolelo, kuenje omunu waco o vu songuila oku tinduka ku Suku o kasi lomuenyo.” Nda tua kala lutima “ka u kuete ekolelo,” ka tu tẽla oku kuata “onjelo yutima.” Nye Satana Eliapu a siata oku sandeka oco omanu va tatekiwe oku kolela Suku? Vovina viaco mua kongela elongiso liokuti ovina viosi via tukuluka ño ovio muẽle, locisimĩlo cokuti ka kuli onumbi ya sunguluka leyi ka ya sungulukile, loku kuatela Ovisonehua vi Kola atatahãi. Ka tu ka eceleli oku vetiyiwa lalongiso aco ka a kuete esilivilo. (Va Kol. 2:8) Nda tua tanga Embimbiliya loku sokolola ovina tua lilongisa, tu ka tẽla oku pandikisa latutu aco. Ukũlĩhiso wa suapo Wondaka ya Suku u vokiya ocisola tu kuetele Yehova loku sanjukila ovilinga viaye. Ocisola caco kumue lolopandu, vi tu kuatisa oku pembula alongiso uhembi, loku pamisa ekolelo lietu ku Yehova, kuenje, tu amamako oku kuata utima wa yela.—1 Tim. 1:3-5.
Ceci tu Liyaka Lolonjongole Vietimba
Ovina vikuavo vi tu tateka oku amamako ‘lonjelo yutima,’ olonjongole vietimba kuenda vioku kuata ovokuasi. (1 Yoa. 2:15, 16) Oku sola olombongo, onjongole yoku kala ohuasi pamue oku kuata ovipako vialua, vi honguisa utima, kuenda vi vetiya Ukristão oku linga ovina ka vi li kuata locipango ca Suku. Vamue va linga vakueliaño kupange, va nyanela volondando, ale va nyana olombongo pamue ovina via vakuavo.—1 Tim. 6:9, 10.
Nda tua kuata usumba woku sumuisa Yehova, loku sola esunga, locimãho coku kuata utima wa pua episo, tu ka lekisa okuti tu sole “onjelo yutima.” Ocisola caco ci tu kuatisa oku kala “vakuacili kovina viosi.” (Va Hev. 13:18, NW) Eci tu lekisa esunga, tu eca uvangi komanu. Emilio, Ombangi yimue ya Yehova ko Italia, haeye endisa okalela kocisoko cimue coviendelo, wa sanga okacipete mua kala ci soka 470 euros (680 kolondolale). Eye wa eca okacipete kaco kusongui waye kupange, noke usongui waco wa ka eca ku muẽleaco. Esunga Emilio a lekisa lia komõhisa vamue pokati komanu va talavayela kumosi. Kuenje eci ca vetiya eci ci soka epanduvali komanu oku lilongisa Embimbiliya. Ocili okuti, oku linga esunga lutima we lipua ci vetiya omanu oku sivaya Suku.—Tito 2:10.
Ocina cikuavo ci tateka Ukristão oku kuata onjelo yutima, oku kuata ovisimĩlo ka via sungulukile via tiamẽla koku lipekela. Omo okuti omanu vo posongo yetu va tenda ukahonga, ukahokolo, loku lipekela kulume lulume ndocituwa ciwa, eci ci pondola oku vĩhisa utima Wukristão. Nda omunu o lieca kovituwa viaco, o kala ukuambambe kuenje o fetika oku ambata omuenyo wolonjila vivali, kuenda o limbika akandu aye. Ocituwa caco ci tateka oku kuata “onjelo yutima.”
Gabriele, wa papatisiwa eci a kuata 15 kanyamo yu wa linga ohundi yotembo yosi. Pole, noke yotembo yimue wa livala ukamba lomanu vavĩ loku endaenda kolonjo vioku piluka. (Osa. 26:4) Omo lioku ambata omuenyo wombambe wa litumbika kukahonga, kuenje wa tundisiwa vekongelo Liakristão. Epindiso eli lia Yehova, lio vetiya oku sokolola kekalo liomuenyo waye. Gabriele wa popia hati: “Nda fetika oku kuama olonumbi viosi nda pembuile kefetikilo. Nda fetika oku yevelela ondaka ya Yehova poku tanga Embimbiliya eteke leteke, loku lilongisa lutate olonumbi vi sangiwa valivulu ocisoko. Nda limbuka okuti elilongiso lio pokolika loku tanga Embimbiliya kumue lolohutililo, ci pamisa.” Eci ca kuatisa Gabriele oku siapo omuenyo ũvi loku tumbulula ukamba waye la Yehova.
Cilo, Gabriele o kasi oku talavaya vali ndohundi yotembo yosi kumue lukãi waye. Ulandu waye u lekisa okuti oku tanga Embimbiliya lalivulu a sandekiwa ‘lukuenje wa kolelua haeye wa lunguka’ ci kuatisa omunu oku kala lutima wa yela kuenda oku nyehula ukahonga.—Mat. 24:45; Osa. 143:10.
Kuata “Onjelo Yutima” Poku Liyaka Lovitangi
Alambalalo, ekambo liolombongo, kuenda ovovei, a siata oku sumuisa afendeli vamue va Suku. Ovitangi viaco vi vetiya omunu oku kuata ovisimĩlo ka via sungulukile. Soma Daviti eci a liyaka locitangi caco, wa liyeya hati: “Espiritu liange ka li kuete vali ongusu, lutima vokati kange u kasi lupongo.” (Osa. 143:4) Nye co vetiya oku yula esumuo liaco? Daviti wa sokolola eci Suku o lingila kumue lakuenje vaye eci va sukilile epopelo. Eye wa ivaluka eci Yehova a lingile omo lionduko Yaye yi kola. Daviti wa amamako oku sokolola ovopange a Suku. (Osa. 143:5) Oku sokolola eci Ululiki wetu a tu lingaila leci a kasi oku tu lingila cilo, ci tu kuatisa eci tu liyaka lovitangi.
Eci tu tatiwa lãvi, ale tu sima okuti vakuetu va tu lueyela, citava okuti tu sumua calua. Nda tu amamako oku sokolola ovina viaco, tu pondola oku kuatela vamanji ovisimĩlo ka via sungulukile. Citava okuti tu yuvula oku kala pokati kavo, kuenda ka tu va lekisa ocisola. Anga ocituwa caco ka ci tateka hẽ onjongole yetu yoku kuata “onjelo yutima”? Ocili okuti, voku kala lutima wa yela, mua kongela oku kuata ukamba uwa la vamanjetu Akristão.
Osimbu oluali lulo lu amamako oku tekela komuenyo ũvi, etu Tuakristão vocili, tu yuvuli ovituwa viaco omo tu sole “onjelo yutima.” Omuenyo wetu u pongoloka lika nda tu kuata ombembua yutima, yina yi tunda koku linga ocipango ca Suku. Handi vali, ukamba wetu la Yehova Suku, una o sole omanu va kuete “onjelo yutima,” u pamisiwa. (Osa. 73:1) Kuenje, tu ka kala pokati komanu va sumũlũha, momo Yesu wa likuminya okuti, vana “va yela vutima” ovo lika va ka “mola Suku.”—Mat. 5:8.