O ci Ivaluka?

Ove wa sola hẽ oku tanga ovipama Viutala Wondavululi via sandekiwa volosãi via pita? Nda wa vi sola, tambulula apulilo a kuãimo:

• Momo lie ca sukilile okuti Mesiya o fa?

Oku fa kua Yesu kua lekisa okuti omunu wa lipua o tẽla oku pokola ku Suku ndaño loloseteko vialua. Eye wa feta etevo liekandu ocitumbulukila ca Adama ca piñala, loku va ecelela oku kuata omuenyo ko pui.​—⁠15/12, kemẽla 22-23.

• Nye ci kuatisa omunu oku kuata ocituwa ca sunguluka lovinyua vi koluisa?

Olohutililo lelilongiso Liembimbiliya vi kuatisa konepa eyi. Oku likandangiya, oku kũlĩha onjongo yove, loku nõla akamba vawa ci kuete esilivilo. Omunu wosi o nyua, o sukila oku tumbika onjongo yiwa, kuenda oku lilongisa oku likala.​—⁠1/1, kemẽla 7-9, Kelimi Lioputu.

• Voku sapela ciwa lomãla mua kongela nye?

Voku sapela ciwa lomãla ka mua kongelele lika oku va sapuila eci va linga, mua kongelavo oku va lingainga apulilo loku yevelela atambululo avo lutate. Vamue va nõlapo owola yoku lia okuti oyo epuluvi liwa lioku sapela lomãla.​—⁠15/1, kemẽla 18-19.

• Nda Yehova wa lipua, eye o livela ndati?

Suku wa enda oku pongolola onjila yaye yoku tata omanu vokuenda kuotembo. Olonjanja vimue eci va Isareli va enda oku siapo oku fendela Yehova, ha va fendela olosuku vikuavo, Yehova wa liwekailepo oku va teyuila. Pole, eci omanu va likekembela loku pinga ekuatiso Kokuaye, Suku wa pongolola ovisimĩlo viaye, kuenje wa “va kuatela ohenda.” (Olong. 2:18)​—⁠1/2, kemẽla 21, kelimi Lioputu.

• Nye cecelela omunu oku papatisiwa evali?

Citava lika oku papatisiwa evali nda omunu wa lingaile akandu vuyombeki osimbu ka papatisiwile, kuenda amamako lakamdu aco noke yepapatiso.​—⁠2/15, kemẽla 22.

• Ovina vipi vitatu omanu va tatẽlela eliaño?

Vamue va tatẽlela omo lioku kala ohukũi. Vakuavo, va popia vati, “Omanu vosi va ci lingainga.” Handi vali, vakuavo va popia okuti “oku nõla cimue hakunyanako.” Embimbiliya li pisa ovisimĩlo viaco.​—⁠1/3, kemẽla 12-14, kelimi Lioputu.

• Volusapo lua Yesu luotiliku losoka, ulume wa waya ombuto yiwa, helie?

Molõmanu, okuti Yesu, wa pongiya osi yaco vokuenda kupange waye palo posi. Tunde ko Pendekoste wa 33 K.K., eci Akristão va wavekiwa lespiritu lia Suku ha va lingi omãla Vusoma, oco ombuto yiwa ya wayiwa.​—⁠15/3, kemẽla 20.

• Otiliku yocindekaise volusapo lua Yesu, ya kapiwa ndati vosila ya Yehova? (Mat. 13:⁠30)

Olondaka viaco vi kasi oku tẽlisiwa vokuenda kuoloneke vilo via sulako. Otiliku yocindekaise, okuti omãla Vusoma, va kasi oku kapiwa vosila ya Yehova eci va neniwa vekongelo Liakristão ale ceci va tambula onima yavo kilu.​—⁠15/3, kemẽla 22.

• Helie o nõla nda alivulu Ovisonehua vio Helasi a kongeliwa vovisonehua vi kola?

Asongui vetavo havoko va kuete omoko yaco. Akristão vocili, vana va songuilua lespiritu sandu, va limbuka okuti ovisonehua via tunda ku Suku. Eci ci litava lulandu wokuti, Akristão vatete, va tambuile olongavelo viespiritu, kuenda “owanji wuprofeto.” (1 Va Kor. 12:​4, 10)​—⁠1/4, kemẽla 28.