Sanda Asumũlũho a Yehova
“Suku eca onima kuava vo sanda.”—Va Hev. 11:6.
1, 2. (a) Omanu vapi va sandiliya asumũlũho a Suku? (b) Momo lie tu sukilila oku tambula asumũlũho a Yehova?
KOLOFEKA vimue, eci omunu umue a ta ohesi, omanu va popia vati, “Suku a ku sumũlũise!” Asongui vatavo va siata oku sumũlũisa omanu, ovinyama, kuenda ovina vikuavo ka vi kuete omuenyo. Omanu valua va lingainga ovongende oku nyula olonembele vimue lelavoko lioku tambula asumũlũho. Vakuapulitika lavovo va pinga pinga ku Suku oco a sumũlũise ofeka yavo. Ove hẽ o sima okuti apingilo aco ocili? Apingilo aco a kuatisa hẽ? Nye omunu a sukila oku linga oco a tambule asumũlũho a Suku?
2 Yehova wa popele okuti koloneke via sulako, wa laikele oku kuata afendeli va liyelisa haivo vakuambembua va tunda kolofeka viosi, ha va kundi olondaka viwa Viusoma kasukiyo oluali ndaño lalambalalo. (Isa. 2:2-4; Mat. 24:14; Esit. 7:9, 14) Vosi yetu tua tava oku panga onepa kafendeli vaco, tu yongola kuenda tu sukila asumũlũho a Suku, momo ka tu tẽla oku linga upange waco lika lietu. (Osa. 127:1) Oco hẽ, tu tambula ndati asumũlũho a Suku?
Vakuepokolo va ka Tambula Asumũlũho Alua
3. Va Isareli va vakuepokolo, va laikele oku tambula onima yipi?
3 Tanga Olosapo 10:6, 7. Eci handi va Isareli ka va iñilile Vofeka Yohuminyo, Yehova wa va sapuila okuti va ponduuile lika oku tambula asumũlũho nda va pokuile kondaka yaye. (Esin. 28:1, 2) Asumũlũho a Yehova a laikele oku wila komanu Vaye, loku va “sanga.” Kuenda vakuepokolo ovo lika va kuatele elavoko lioku tambula asumũlũho aco.
4. Vepokolo liocili mua kongela nye?
4 Ocituwa cipi va Isareli va sesamẽlele oku lekisa poku pokola? Ocihandeleko ca Suku ca lekisile okuti nda ka va lekisile ‘onjolela lesanju liutima,’ epokolo liavo nda ka lia kuatele esilivilo. (Tanga Esinimuĩlo 28:45-47.) Yehova ka yongola okuti tu u pokola locikukũi ndeci ovinyama lolondele vi lingainga. (Mar. 1:27; Tia. 3:3) Epokolo liocili ku Suku li lekisiwa locisola. Olio li limbukiwila kesanju li tunda koku kolela okuti olonumbi via Yehova ka vi lemi kuenda eye “eca onima kuava vo sanda.”—Va Hev. 11:6; 1 Yoa. 5:3.
5. Oku kolela kohuminyo ya Yehova ca kuatasaile ndati omunu oku kapako ocihandeleko celivulu Liesinumuĩlo 15:7, 8?
5 Konomuisa ndomo epokolo liocili li lekisiwa poku kapako ocihandeleko ci sangiwa kelivulu Liesinumuĩlo 15:7, 8. (Tanga.) Ocili okuti, oku pokola kocihandeleko caco locikukũi ca ponduile oku va yovola kuhukũi okatembo kamue, pole, nda ca kuatisa hẽ omanu va Suku oku li kuatela ukamba kuenda omunga? Handi vali, eci nda ca lekisa hẽ okuti va kolelele okuti Yehova o kuete unene woku tata afendeli vaye kuenda oku setukula ocali caye? Sio! Omo Suku wa kũlĩha ndomo utima womunu ukuacali wa tuwa, wa likuminya oku u sumũlũisa kovopange aye osi. (Esin. 15:10) Wosi wa kolelele kohuminyo yaco wa sukilile oku ci lekisa kovilinga oco a tambule asumũlũho.—Olosap. 28:20.
6. Elivulu lia va Heveru 11:6 li tu ĩha elavoko lie?
6 Elivulu lia va Heveru 11:6 li lekisa ocituwa cikuavo ci sukiliwa koku tambula asumũlũho a Suku okuti hakukolelako lika ku Yehova Ndukuakueca onima. Limbuka okuti Yehova eca lika onima “kuava vo sanda.” Kelimi lio Helasi olondaka evi vi lomboloka oku lekisa ombili poku sanda ocina cimue. Ovio vi tu vetiya oku likolisililako oku tambula asumũlũho! Ohuminyo yaco yi tunda ku Suku yocili una okuti “lalimue eteke a kemba.” (Tito 1:2) Vokuenda kuolohuluwa vianyamo eye wa siata oku lekisa okuti olohuminyo viaye vi tẽlisiwa. Olondaka viaye ka vi tokoka; viocili muẽle. (Isa. 55:11) Omo liaco, nda tua lekisa ekolelo liocili, eye o ka linga muẽle Ukuakueca onima.
7. Tu tambula ndati asumũlũho vonduko ‘yombuto’ ya Avirahama?
7 Yesu Kristu wa lekisa okuti eye onepa yatete “yombuto” ya Avirahama. Akristão olombuavekua ovo onepa yavali “yombuto” ya likuminyilue. Ovo va kuete ocikundi coku sapula “ovilinga vi komohisa viona [wa va kovonga ha va] tundi vowelema, ha [veya] kocinyi caye ci komohisa.” (Va Gal. 3:7-9, 14, 16, 26-29; 1 Pet. 2:9) Nda ka tua kapeleko olonumbi viomanu Yesu a kundika ovikuata viaye, ka tu kuata ukamba la Yehova. Nda ka tua kuatisiwile lukuenje “wa kolelua haeye wa lunguka,” nda ka tu kuete elomboloko lia suapo liovina tu tanga Vondaka ya Suku ndaño oku vi kapako. (Mat. 24:45-47) Etu tu tambula lika asumũlũho a Suku, eci tu kapako olonumbi Viovisonehua.
Pitisa Kovaso Ocipango ca Suku
8, 9. Yakoba wa likolisilako oku linga nye oco epingilo liaye li tambuluiwe?
8 Ondaka yoku likolisilako oku tambula asumũlũho a Suku, yi tu ivaluisa ulandu wa Yakoba. Eye ka kũlĩhile ndomo ohuminyo Suku a linga ku Avirahama yi tẽlisiwa, pole, wa kolelele okuti Yehova wa laikele oku luisa ocitumbulukila ca pakũlu yaye, ha ci lingi ofeka yinene. Omo liaco, kunyamo wo 1781 K.Y., Yakoba wa endele oku ka sanda ukãi ko Harane. Eye ka yonguile oku sanda lika ombandeki yiwa, puãi wa lavokaile oku sanga ukãi umue o vumba Yehova haeye wa kula kespiritu, oco a kale onjali yiwa yomãla vaye.
9 Tua kũlĩha okuti Yakoba wa sanga ngandiaye Rahele. Eye wo sola calua kuenje wa tava oku talavayela Lavane isia a Rahele epanduvali kanyamo oco a tambule ukãi waye. Ulandu owu wocili, halusapoko luoku luvikiya ño. Yakoba wa kũlĩhĩle ohuminyo Suku Tõlo a lingile ku pakũlu yaye Avirahama kuenda ku isiaye, Isake. (Efet. 18:18; 22:17, 18; 26:3-5, 24, 25) Kuenje, Isake wa sapuila omõlaye Yakoba hati: “Suku Ukuonenewosi a ku sumũluise, a ku ihe ombuto, a ku luise hu lingi ohongele yapata; a ku muise ove esumũluho lia Avirahama, lombuto yove, hu lingi kapiñala kofeka yilo yulungi, eyi Suku a eca ku Avirahama.” (Efet. 28:3, 4) Omo Yakoba wa kolelele kondaka ya Yehova, wa likolisilako oku sanga ukãi umue wa sunguluka oco a kuate laye omãla.
10. Momo lie Yehova a sanjukilile oku sumũlũisa Yakoba?
10 Yakoba ka kaile oku sandiliya ovokuasi oco a ece omuenyo umue welau kepata liaye. Utima waye wa u tiamisilile kocipiñalo caye. Wa pitisile kovaso ocipango ca Yehova. Yakoba wa kuatele ocimãho coku linga cosi oco a tambule asumũlũho a Suku ndaño lovitangi. Eye wa amamako locituwa caco toke eci a kuka, kuenda Yehova wo sumũlũisa omo lialikolisilo aye.—Tanga Efetikilo 32:24-29.
11. Alikolisilo api tu sukila oku linga oco tu tẽlise ocipango ca Suku?
11 Ndeci ca pita la Yakoba, etu ka tua kũlĩhĩlevo ovina viosi via kongela vocipango ca Yehova. Pole, tu pondola oku kũlĩha ovina vi ka pita ‘keteke lia Yehova,’ poku tanga Ondaka ya Suku. (2 Pet. 3:10, 17) Ka tua kũlĩhĩle eci eteke liaco liya, pole tua kũlĩha okuti olio li kasi ocipepi. Tua kolela Kondaka ya Suku eci yi popia okuti poku eca uvangi kotembo ya kambako, tu popela omuenyo wetu kuenda wava va tu yeva.—1 Tim. 4:16.
12. Ekolelo lipi tu pondola oku kuata?
12 Esulilo liya votembo ka tua kũlĩhĩle; pole, Yehova ka ka kevelela toke eci omanu vosi vo kuli lieve va tambula uvangi. (Mat. 10:23) Tua siata oku tambula olonumbi viwa oco tu tẽlise lombili upange woku kunda. Tua litumbika lekolelo kupange waco luloño, kuenda tua limalẽha ciwa. Tu ka kunda hẽ olonjanja viosi vocikanjo mu sangiwa omanu va lekisa onjongole? Oco hẽ tu ci kũlĩha ndati? (Tanga Ukundi 11:5, 6.) Tua kolela okuti Yehova o ka tu sumũlũisa, nda tua amamako oku kunda. (1 Va Kor. 3:6, 7) Eye o lete alikolisilo etu kuenda o tu kuatisa lespiritu sandu liaye loku tu ĩha onumbi tu sukila.—Osa. 32:8.
Pinga Espiritu Sandu
13, 14. Espiritu sandu lia siata oku kuatisa ndati afendeli va Suku?
13 Nye tu sukila oku linga nda tu sima okuti ka tu tẽla oku tẽlisa ocikundi cimue ale oku kundila omanu? Tu sukila oku pinga espiritu sandu ku Yehova oco li tu ĩhe uloño. (Tanga Luka 11:13.) Espiritu lia Suku li kuatisa afendeli vaye oku tẽlisa ovikele va tambula ndaño okuti omunu lomunu o kuete uloño wa litepa. Noke lioku tunda Kegito, espiritu lia Suku lia kuatisa ovangombo kuenda apika oku yula ovanyali vavo ndaño ovo ka va kuatele uloño woku yaka. (Etu. 17:8-13) Noke espiritu liaco lia kuatisavo Becalele kuenda Aholiava oku tunga otavernakulu.—Etu. 31:2-6; 35:30-35.
14 Unene wespiritu liaco wa siatavo oku kuatisa afendeli va Suku koloneke vilo oku linga upange woku sandeka alivulu. Manji R. J. Martin, una wa kala mitavaso yo departamendu yolomakina vi panga alivulu, vukanda a soneha, wa lombolola upange wa lingawaile vokuenda kunyamo wo 1927. Eye wa popia hati: “Votembo ya sokiyiwa, Ñala wa tu ĩha omakina yimue okuti lomue wa tẽlele oku talavaya layo. Pole, Ñala wa tu ĩha uloño woku sokolola eci tua ponduile oku linga. . . . Eci pa pita olosemana vimue, tua kuata uloño woku talavaya lomakina yaco lonjila yimue okuti olonungi viayo ci sule.” Yehova o sumũlũisavo alikolisilo aco koloneke vilo.
15. Elivulu lia va Roma 8:11, lieca elembeleko lipi kuava va kasi oku liyaka layonjo?
15 Espiritu lia Yehova li kuatisa volonepa vialua. Espiritu liaco li kuatisa afendeli vosi va Suku oku yula ovitangi. Nda tu kasi oku yuliwa leyonjo limue, nye tu sukila oku linga? Olondaka via Paulu vi sangiwa kelivulu lia va Roma 7:21, 25 kuenda 8:11, vi tu lembeleka calua. Ocili okuti “espiritu liu wa pindula Yesu kuava va fa,” li tu kuatisa oku yula oloñeyi vietimba. Ndaño okuti olondaka evi via sonehiwilile Akristão olombuavekua, onumbi yaco yi tiamisiwilavo kafendeli vosi va Suku. Vosi yetu tu kuete elavoko lioku tambula omuenyo omo lioku kolela Kristu, loku ipaya oloñeyi vĩvi, kuenda oku songuiwa lespiritu.
16. Nye tu sukila oku linga oco tu tambule espiritu sandu lia Suku?
16 Citava hẽ oku lavoka okuti Suku o tu kuatisa longusu yaye ya pama, nda ka tua likolisilileko? Lakamue. Etu ka tu pingi lika espiritu liaco vohutililo, pole, sukilavo oku litekula Londaka ya Suku. (Olosap. 2:1-6) Handi vali, ekongelo Liakristão li kasi oku songuiwa lespiritu lia Suku. Ocituwa cetu coku endaenda kolohongele ci lekisiwa konjongole yetu yoku ‘yevelela eci espiritu li popia kakongelo.’ (Esit. 3:6) Ci sukilavo oku lekisa umbome oco tu kapeko eci tu kasi oku lilongisa. Elivulu Liolosapo 1:23, li tu lungula hati: “Yevi okutembula kuange. Ndu situluili utima wange.” Ocili okuti Suku eca espiritu sandu kuava “va pokola kokuaye.”—Ovil. 5:32.
17. Alikolisilo etu oku tambula asumũlũho a Suku a sokisiya la nye?
17 Ndaño okuti tu sesamẽla oku likolisilako oco tu tambule asumũlũho a Suku, tu sukila oku ivaluka okuti, Yehova ka sumũlũisa omanu vaye omo lialikolisilo avo muẽle. Puãi asumũlũho tua siata oku tambula, a sokisiwa lokulia kupepa ku kuatisa etimba. Suku wa tu lulika lonjila yimue okuti tu sanjukila okulia loku upa esilivilo keteku liaco. Eli olio esunga lieci a tu ĩhila okulia. Ka tua kũlĩhĩle ndomo etimba lietu li tekuiwa lokulia kuaco, ndaño oku lombolola ndomo etimba li kuata ongunsu omo liokulia tu lia lia. Tua kũlĩha lika ndomo olio li talavaya kuenda oku pokola kokualio poku lia. Nda tu lia okulia kuwa, etimba lietu li pama. Cimuamue haico, Yehova wa eca olonumbi vioku kuata omuenyo ko pui, kuenda o tu kuatisa oku kapako olonumbi viaco. Eye o sesamẽla esivayo, omo liovina a siata oku tu lingila. Oco tu tambule asumũlũho a Suku, tu sukila oku pokola kokuaye loku ambata omuenyo u litava locipango caye.—Hag. 2:18, 19.
18. Ocimãho cipi o kuete, kuenda momo lie?
18 Likolisilako oku linga ciwa ovikele viosi o tambula. Imba ovaso ku Yehova kovina viosi o linga. (Mar. 11:23, 24) Kolela okuti wosi “o pinga o tambula.” (Mat. 7:8) Akristão olombuavekua va ka kuata esumũlũho lioku “tambula ekolowa liomuenyo” oko kilu. (Tia. 1:12) Pole, “olomeme vikuavo” via Kristu, vina vi likolisilako oku tambula asumũlũho vonduko yombuto ya Avirahama, vi ka sanjukila oku yeva ondaka Yaye yiti: “Enjui ene wa sumũlũisui la Tate, ndo piñali usoma wo wangiliyilui tunde koku seveta oluali.” (Yoa. 10:16; Mat. 25:34) Kuenje “ava va sumũlũisua la Yehova va piñala ofeka, . . . [kuenda] vi tungamo oloneke ka vi pui.”—Osa. 37:22, 29.
O Tẽla Oku Lombolola?
• Vepokolo liocili mua kongela nye?
• Nye tu sukila oku linga oco tu tambule asumũlũho a Suku?
• Tu tambula ndati espiritu sandu lia Suku, kuenda olio li tu kuatisa ndati?
[Elitalatu kemẽla 9]
Yakoba wa liyaka lungelo oco a tambule esumũlũho lia Yehova.
[Elitalatu kemẽla 9]
Ove hẽ o kasivo oku ci linga?
[Elitalatu kemẽla 10]
Espiritu sandu lia Suku lia kuatisa Becalele kuenda Aholiava oku linga upange umesele