Apulilo a Lingiwa la Vakuakutanga

Yesu wa sapuila olonjeveleli viaye hati: “Lingi omanu va lipua, nda Isiene o kasi kilu wa lipua.” Oco hẽ koloneke vilo omanu va pondola ndati “oku lipua”?—Mat. 5:48, NW.

Oco tu sange etambululo kepulilo eli, tu sukila oku kũlĩha ndomo ondaka ‘oku lipua’ loku ‘suapo’ via tukuiwa Vembimbiliya. Olonjanja vimue eci Ovisonehua vi tukula ondaka ‘oku lipua’ ka ci lomboloka oku suapo kolonepa viosi. Ocili okuti Yehova wa lipua kolonepa viosi. Pole, omanu kuenda ovina vikuavo ka va lipuile kolonepa viosi. Kelimi lio Heveru kuenda lio Helasi ondaka ‘oku lipua’ yi lomboloka oku “suapo,” oku “kanguka,” ale ocina cimue ka ci “kuete etime” ndomo ci likuata locihandeleko cimue. Vupopi wetu weteke leteke, ondaka oku lipua ka yi lomboloka oku suapo kolonepa viosi. Ndocindekaise, omanu va siata oku popia vati, “kilu kua yela.”

Adama la Heva va lulikiwa loku lipua kovituwa, kespiritu lo ketimba. Ovo va kala omanu va lipua ndomo ca lekisiwile volonumbi Viululiki wavo. Pole, omo liesino, va liwekapo oku pokola kolonumbi viaco kuenje va lipumbisa oku lipua ovo muẽle kuenda ocitumbulukila cavo. Omo liaco, Adama wa sambuisa ekandu, ekambo lioku lipua, kuenda olofa komanu vosi.—Va Rom. 5:12.

Ndomo ca lekisiwa Vohundo Yesu a lingila Komunda, omanu ndaño ka va lipuile citava okuti va tendiwa ndomanu va lipua vonepa ya pita ño pokati. Vohundo yaco, eye wa lekisa okuti ocisola oco ci tu kuatisa oku lipua, ale oku suapo. Ocisola caco, oco Suku a lekisa komanu. Yesu wa linga hati: “Soli ovanyali vene, likutilili ava vo fũkĩlisa, oco vu linge omãla va Isiene o kasi kilu, momo o tundasaila ekumbi liaye kolondingaiwa lo kolondingaĩvi; kuenje o lokasaila ombela vakuesunga la vakuevĩho.” (Mat. 5:44, 45) Olondonge via Yesu vi lekisa ocisola caco nda via setukula ndomo Suku a lekisa ocisola caye.

Koloneke vilo, Olombangi via Yehova koluali luosi vi likolisilako oku lekisa ocisola caco komanu. Ovio vi kuete onjongole yoku kuatisa omanu vakuavisoko viñi viñi, vakuapata aiñi aiñi, kuenda vakuatavo a litepa oku kũlĩha ocili ci sangiwa Vembimbiliya. Olombangi via Yehova vi kasi oku songola eci ci pitahãla 7.000.000 kalilongiso Embimbiliya kueci ci soka 236 kolofeka.

Yesu wa pulisa hati: “Nda vu sole ava vo soli, vu kuete onima ye? Vakuakutambula elisimu hẽ, ka va ci lingaingavo? Nda vu lama vakuẽle lika, wa lingi nye ca velapo? Vakualofeka hẽ, ka va ci lingaingavo?” (Mat. 5:46, 47) Akristão vocili ka va lekisa ocame komanu omo lielilongiso ale oku tiamẽla kepata limue; pamue oku sola umue lonjongole yoku va tiuwila ocisola caco. Pole, ovo va kuatisa olohukũi, vana va vela, ci kale amalẽhe ale akulu. Vapuluvi aco, Akristão va setukula ocisola ca Yehova kuenda oku lipua vonepa ya pita ño pokati.

Eteke limue nga tu ka lipua ndeci Adama a lipuile? Oco muẽle, omo lioku kolela kocisembi ca Yesu, omanu va ka lipua vokuenda Kuviali wa Kristu Wohulukãi Yanyamo, eci ‘Omõla a Suku a ka nyõla ovilinga viosi Vieliapu’.—1 Yoa. 3:8.